‘Plante Wok Blong Mekem Long Wok Blong Masta’
1 !I tru se yumi gat wan bisi program blong ol tiokratik wok long manis Epril mo Mei! Long Epril 14, bambae yumi mekem Memoriol blong ded blong Jisas. Yumi mas mekem bes blong yumi blong singaot plante man blong kam long impoten taem ya: ol bisnesman we yumi save olgeta, ol famle blong yumi we oli no stap long trutok, ol fren blong yumi long skul, ol man we oli jes stat blong soem intres, mo olgeta we oli stadi Baebol. Mekem wan lis blong olgeta we yu wantem singaot olgeta, blong yu no mestem wan long olgeta.
2 Long wik biaen, bambae yumi leftemap tingting blong olgeta we oli kam long Memoriol blong kam lesin long wan spesel tok, long Epril 23. Stampa tok blong hem, “En Blong Ol Gyaman Skul i Kolosap.” Yumi hop se plante man we oli intres mo we oli harem klia mesej ya, bambae oli luksave se oli mas joen wetem kongregesen oltaem, i no long ol spesel taem nomo.
3 Spesel Kingdom Nyus We Bambae i Kamaot: Wan bigfala samting long miting blong Epril 23, hemia Kingdom Nyus No. 34 we bambae i kamaot. Traket ya we i gat fo pej blong hem, i stret long taem blong yumi. Bambae yumi givimaot long olgeta ples, go kasem Mei 14. ?Yu yu agri se bambae yumi gat ‘plante wok blong mekem long wok blong Masta’ long taem ya kolosap long Memoriol?—1 Kor. 15:58.
4 Bambae Sosaeti i sanem plante katon blong Kingdom Nyus i go long evri kongregesen. Yufala i mas putum ol katon ya long wan ples we i sef, mo no mas openem bifo we miting i finis long Epril 23. Long taem ya, ol brata mo ol narafala man tu, oli save kasem Kingdom Nyus ya. Long en blong ol miting blong kongregesen long Epril 23, ol man we oli stap bambae oli kasem wan traket. Olsemia nao, oli save ridim ol tok we i stap insaed blong mekem se oli rere blong givimaot.
5 Bambae Ol Elda Oli Gat Plante Wok: Long stat blong manis ya, bodi blong ol elda i mas mekem wan miting blong storeyan long spesel wok ya. Ol kongregesen i mas traehad blong kavremap fulwan ples we oli prij long hem. Bifo we wok ya i finis, mekem spesel fasin traehad blong mitim ol man long ol ples we yumi no prij long olgeta longtaem. Yumi wantem makemaot plante taem blong yumi blong mekem minista wok, from we wok ya i impoten tumas. I klia se, bambae i gat moa pablisa we oli joen long wok blong haftaem paenia, bitim ol narafala taem bifo. Ating plante we oli stadi long Baebol, bambae oli joen wetem yumi tu, olsem ol nyufala pablisa we oli no baptaes yet. !Taem yumi wok strong tugeta long wok blong Masta, bambae yumi haremgud tumas!
6 Ol brata we oli lidim ol buk stadi, oli mas mekem ol stret taem blong grup i prij long evri Sarede mo Sande. Oli mas leftemap tingting blong evriwan blong joen fulwan. Antap long wok blong prij long wiken, grup i save mekem ol stret taem blong prij long sapa, maet wan taem long wan wik, no moa, long taem blong spesel wok ya. Ating sam grup oli wantem mekem miting blong prij afta ol yangfala oli aot long skul, blong givhan long ol yangfala we oli wantem mekem moa long wok ya.
7 Taem blong ol miting blong prij i mas stret, blong mekem se ol pablisa mo paenia oli save stat eli long wok blong prij evri dei. Ol miting ya oli mas sot. Long ol miting ya, i mas gat wan smol pleplei blong soemaot wan isi rod blong givimaot Kingdom Nyus long ol man. Long ol miting blong prij long aftenun, maet brata i save talem wan no tu rod blong mekem ol visit bakegen long ol man we oli akseptem Kingdom Nyus. Be, ating sam pablisa oli wantem joen long wok blong givimaot ol traket long moning mo long aftenun bakegen. From samting ya, elda we i lukaot long wok blong prij i mas mekem sua se i gat inaf ples blong prij long olgeta. Long pepa blong prij, yumi mas raetemdaon nem mo adres blong ol man we oli soem intres. Aninit long haf ya, ‘Sam Samting We Mi Mi Makem,’ yu save raetem ol bigfala poen long sotfala toktok blong yu. Bambae samting ya i givhan long yu blong mekem wan visit bakegen samtaem biaen, maet long sem wik no manis.
8 Maet sam pablisa oli wantem givhan long wan kongregesen long bus no long aelan, blong kavremap sam spesel haf long ples we hem i stap prij long hem. Samting ya i tru moa, sipos oli toktok lanwis blong ples ya, mo sipos ol man oli akseptem olgeta long ples we oli no letem yumi prij long evri haos wanwan. Maet sam pablisa oli save go spel long aelan blong olgeta blong mekem wok ya. Bambae oli toktok wetem bodi blong ol elda long kongregesen blong olgeta, we bambae i toktok wetem branj ofis. Ol nem mo adres blong olgeta we oli soem intres, oli mas gobak long kongregesen we i lukaot long ples ya.
9 Ol papa mama, ?ol pikinini blong yufala oli stap traehad blong kasem mak we oli naf blong kam wan pablisa we i no baptaes yet? Long plante kongregesen, yumi luk se, plante yia finis, sam pikinini we oli gat gudfala fasin, oli stap go prij wetem papa mama blong olgeta we oli baptaes finis. Ol pikinini ya oli gat gudhan long wok ya, be oli no pablisa blong gud nyus yet. Ol papa mama oli mas tingbaot sipos pikinini blong olgeta oli kasem ol mak we oli naf blong kasem blesing ya. Tu elda oli save storeyan long bisnes ya wetem hed blong famle, blong faenemaot sipos oli save akseptem pikinini ya olsem wan pablisa we i no baptaes.—om pej 99 mo 100.
10 ?I gat sam pablisa long kongregesen blong yu, we oli no moa joen long wok blong presem Jeova olsem wan sakrifaes? (Hib. 13:15) Ating samfala oli no moa prij bitim sikis manis, from we oli no save winim sam samting we i mekem tingting blong olgeta i foldaon no ol wari blong laef. Be oli gohed blong folem ol rul blong Baebol long saed blong ol fasin blong laef. Wan elda i save visitim olgeta mo soem fasin fren long olgeta. Maet samting ya i save pusum olgeta blong joen bakegen wetem kongregesen oltaem. Mo biaen, taem oli naf, oli save joen bakegen long wok blong prij.
11 Olgeta We Oli Kasem Ol Mak Oli Save Joen Long Nambawan Wok Ya: Ol pikinini mo ol yangfala, ?yufala i faenem i strong blong joen long wok blong prij long ol haos wanwan? ?Olsem wanem long yufala we i jes stat blong prij mo i no gat tumas ekspiryens long wok ya? !Bambae yu faenem se yu haremgud tumas blong givimaot spesel Kingdom Nyus ya! Yu nidim wan sotfala toktok we i isi nomo.
Ating yu save talem samting olsem:
◼ “Long manis ya, mifala i stap givimaot wan impoten mesej long 232 kantri blong wol. Mesej ya i impoten from we i givim strongfala risen long yumi blong bilif se i gat wan rod blong stretem ol problem we yumi fesem tede. Mifala i wantem se yu gat prapa kopi blong yu.”
No yu save traem hemia:
◼ “Long manis ya, bitim faef milyan man oli wok fri blong givimaot wan impoten mesej long plante defren lanwis. Oli rerem mesej ya blong ol man we oli wantem se ol problem we yumi fesem tede oli finis. Hemia prapa kopi blong yu.”
Maet isi rod ya i stret long yu:
◼ “Mifala i stap leftemap tingting blong evri man blong ridim impoten mesej ya. Stampa tok blong hem [ridim stampa tok blong Kingdom Nyus]. Makemgud tok blong hem long pej 2, long saed blong ol problem we i stap kam antap, olsem . . . [ridim sam tok we yu jusum long Kingdom Nyus]. Mifala i sua se bambae yu glad blong ridim ol narafala haf blong mesej ya we i stret long taem blong yumi. Hemia kopi blong yu.”
12 Soem intres long evriwan we i akseptem Kingdom Nyus. Yu mas tok slou mo long fasin we i klia. Yu no nidim blong tok hareap. Yumi wantem givim gudfala wetnes long ples we yumi prij long hem, mo mekem sua se olgeta we oli wantem ridim Kingdom Nyus ya oli save kasem wan traket blong olgeta, nating se oli ol defren memba blong sem famle nomo. Sipos i no gat man long haos, makemgud samting ya long pepa blong prij, blong yu save kambak long wan narafala taem we i stret, blong givim Kingdom Nyus long man blong haos. Yumi save yusum Kingdom Nyus ya long wok blong prij long rod, taem wan man i intres blong ridim. Yumi no mas givimaot ol traket ya olbaot nomo, olsem ol pepa we oli no impoten. Long defren fasin, yumi mas go kolosap long ol man we oli stap wokbaot long rod, mo eksplenem from wanem mesej we i stap insaed i impoten. Yu save yusum Kingdom Nyus taem yu tekem evri jans blong prij, olsem taem yu stap wokbaot no taem yu prij long ol man long ples blong wok blong yu, long taem blong kakae long medel dei. Olgeta we oli sik mo olgeta we oli no save kamaot long haos, oli save givim traket ya long olgeta we oli kam luk olgeta, ol dokta, ol nes, ol man we oli kam blong salem sam samting, mo ol narafala we oli kam long haos blong olgeta.
13 ?Bambae yu mekem hamas visit bakegen long taem blong spesel wok ya? Bambae yu mekem plante, from we yumi mas visitim bakegen olgeta evriwan we oli soem intres long Kingdom Nyus ya. Long fastaem we yu mitim man blong haos, i gud blong tokbaot Kingdom Nyus nomo. Biaen, taem yu kambak bakegen, talem sam tok blong soem olsem wanem mesej blong Kingdom Nyus i stret long taem blong yumi. Lesingud taem man blong haos i talem tingting blong hem long wanem we hem i ridim. Bambae ol tok blong hem oli givhan long yu blong save wanem samting i gud blong soem long hem long ol nyufala magasin, mo wanem samting we yu save mekemrere blong storeyan long hem nekis taem. Sipos man i soem intres taem yu visitim hem bakegen, traem statem wan Baebol stadi.—1 Kor. 3:6, 7.
14 Ol pablisa we oli stap prij long bus mo long ol aelan, bambae oli traehad blong givimaot ol traket mo buk long evriwan. Maet yu nidim blong eksplenem spesel wok ya long jif blong ol velej. Afta we yu soem traket mo ol buk, yu save talem se: “Mifala i wantem givimaot samting ya long evriwan long velej blong yu. ?Yu yu agri long samting ya?” Sipos hem i talem ‘No’ stret, yu save talem se: “Mifala i karem wan envlop we i gat sam traket mo buk insaed. Mifala i glad sipos yu ridim ol buk ya fastaem, mo sipos yu agri, biaen yu save givimaot long ol man long velej.” Ale, givim envlop ya mo talem tata wetem wan positif tingting. Yu mas mekemrere ol envlop ya samtaem bifo.
15 “Wok ya Bambae i Gat Frut Blong Hem”: ?Bambae ol wok ya i blong nating nomo? Pol i mekem promes long ol man Korin se: “Taem yufala i wok blong Masta blong yumi, be wok ya bambae i gat frut blong hem.” (1 Kor. 15:58) Long ol yia we oli pas, Jeova i blesem bigwan hadwok blong yumi blong givimaot ol Kingdom Nyus. Wan man mo waef blong hem, we tufala i muf i go long wan narafala haos, oli faenem wan olfala Kingdom Nyus insaed long wan kabod. Samting ya nomo i stap long fulwan haos. Afta we tufala i ridim, tufala i go long kongregesen long ples blong tufala, mo tufala i askem blong stadi Baebol. Tufala i stat kam long ol miting, mo biaen tufala i askem blong tekem baptaes. !Maet wan traket we yu givimaot i save karem frut olsem!—km 11/74 pej 1; lukluk tu Wekap!, Novemba 8, 1976, pej 15 (Engglis).
16 Yumi gat wan bigfala wok i stap fored long yumi. Mak blong evri kongregesen i blong kavremap ful ples we hem i prij long hem bifo Mei 14, no bifo en blong manis Mei, sipos i nidim moa taem blong givimaot Kingdom Nyus. Oli sanem naf Kingdom Nyus blong mekem se evri fultaem mo haftaem paenia oli save kasem 250 blong hem. Wanwan pablisa long kongregesen i save kasem 50. Ol pablisa mo ol paenia oli mas tekem namba blong traket we oli naf nomo blong givimaot, mo oli mas givimbak ol traket we oli no yusum blong ol narafala oli save yusum. Sipos yumi wokgud tugeta long saed ya, bambae yumi save givimaot impoten mesej ya long olgeta ples long wol.
17 Blong mekemgud wok ya blong yumi, yumi mas givim olgeta sol blong yumi long Jeova. (Kol. 3:23) Laef blong ol man i stap long denja. Ol man oli no save satem tingting blong olgeta long mining blong ol samting we i stap kamaot long wol tede. Taem we i stap, kolosap i finis. Oli mas fesem samting we i tru, se man i no save stretem ol problem blong wol ya. Be God i save mekem. Olgeta we oli wantem kasem blesing blong God, oli mas mekem wan klia disisen, naoia nomo, folem ol rul blong Hem.
18 Long en blong spesel wok ya long Mei 14, ?bambae yumi kam slak long wok blong yumi? !No gat! Bambae yumi gohed blong stap bisi folem tok we God i givim long Pol.