!Yumi Mas “Strong Blong Mekem Ol Gudfala Samting” Long Epril!

¹ Las yia, wan bigfala wetnes we i bitim olgeta taem bifo i kamaot, taem yumi givimaot plante milyan Kingdom Nyus N. 34 long olgeta ples blong wol. Ol pablisa mo ol paenia oli joen blong wok strong long nambawan wok ya. ?Yu yu wan long olgeta ya? Sipos yes, sua se yu bin haremgud tumas blong joen long spesel wok ya. Naoia, maet yu askem se: ?Wanem “gudfala samting” we yumi save mekem long yia ya?​—Taet. 2:14.

² Long Epril mo fashaf blong Mei, yumi glad blong seremaot ol spesel Wajtaoa blong Epril. Oli soemaot klia se Jeova God i stap, mo oli eksplenem olsem wanem blong luksave ol man we oli wosip long hem long trufala fasin. Taem ol man oli wantem ridim ol magasin blong yumi long Franis no Engglis, yumi save yusum spesel Wekap! blong Epril 22, 1996, nem blong hem, “Taem i No Moa Gat Ol Faet.” Plante man oli intres long poen ya, taswe bambae yumi traehad blong givimaot plante moa magasin.

³ Mak Blong Yumi​—Olgeta Pablisa Oli Joen: I gud tumas sipos evri pablisa long kantri ya oli save joen long wok blong prij long Epril. From we yumi mekem Memoriol blong ded blong Kraes long Epril, bambae yumi glad blong soem tangkyu from ol gudgudfala fasin blong God, tru long ‘sakrifaes we yumi givim long hem taem yumi presem hem’ long wok blong prij.​—Hib. 13:15.

⁴ Yumi mas traehad blong luksave nid blong evri memba blong kongregesen, blong mekem se olgeta evriwan oli save strong blong joen long wok blong prij long Epril. (Rom 15:1) Ol brata we oli lukaot long ol buk stadi, oli mas savegud ol nid blong olgeta long grup blong olgeta mo givhan taem oli nidim. ?I gat wan we i nidim yumi blong karem hem long trak? ?Hu i save mekem samting ya? ?Samfala oli sem mo fraet blong toktok? ?I gat samfala we oli kam pablisa longtaem finis, we oli save wok wetem olgeta ya? ?Olsem wanem long olgeta we oli no save aot long haos no oli sik? ?Oli save yusum telefon blong prij, raetem leta, no mekem wan narafala wok we i save karem frut?

⁵ Samfala we oli no moa prij, oli bin kasem help blong leftemap tingting blong olgeta long saed blong speret. Maet oli wantem stat bakegen long wok blong prij. Wok ya we yumi mekem wetem spesel Wekap! bambae i givim nambawan jans long olgeta blong stat bakegen long wok blong prij.

⁶ Trenem Ol Yangfala Blong Joen Long Wok Ya: Plante pikinini blong ol Wetnes blong Jeova oli bin folem papa mama blong olgeta blong plante yia long wok blong prij long ol haos wanwan. Be plante oli no kam pablisa we i no baptaes yet. ?Hemia nao stret taem blong olgeta ya oli stat? ?Hat blong olgeta i stap pusum olgeta mo oli rere blong joen fulwan long wok blong prij long evri haos wanwan? Hed blong famle i mas yusum taem long famle Baebol stadi blong halpem ol pikinini blong hem we oli naf blong kam pablisa, blong oli mekemrere wan storeyan we i stret long yia mo save blong olgeta wanwan. Ol pikinini we oli bigwan lelebet oli save jusum wan gudfala kwestin blong pulum tingting blong ol man blong haos, mo biaen, oli save soem ansa long kwestin ya long magasin. Ol smol pikinini oli save givim wan gudfala wetnes from sam smol toktok nomo we oli talem. Eksampel, oli save leftemap tingting blong man blong haos blong “ridim spesel magasin ya we mifala i stap givimaot long olgeta ples blong wol long manis ya.” Taem yu stap mekemrere wetem famle blong yu, yu no mas fogetem blong tokbaot sam rod blong ansa long ol tok we ol man oli talem blong blokem storeyan blong yumi. Bambae yu faenem plante gudfala advaes long Reasoning buk. Long taem blong kakae mo long sam narafala taem we yu luk se i stret, askem ol memba blong famle blong talemaot ol gudfala samting we i bin hapen long wok blong prij.

⁷ Ol Baebol Studen We Oli Naf Oli Stat Long Sem Wok We Jisas i Bin Mekem: Taem Jisas i stap tij, hem i no jes tokbaot ol tijing blong Baebol nomo. Hem i go wetem ol studen blong hem mo i tijim olgeta olsem wanem blong prij. (Luk 8:1; 10:1-11) ?Olsem wanem tede? Naoia long Vanuatu i gat bitim 350 Baebol stadi oli stap gohed long wanwan haos blong ol man. Sua se, sipos yumi talem ol stret toktok blong leftemap tingting blong ol studen ya, plante long olgeta oli save gohed moa long trening blong olgeta mo kam naf long Epril, blong wok olsem ol pablisa we oli no baptaes.

⁸ Sipos yu stap lidim wan Baebol stadi, tingbaot ol kwestin ya: ?Studen i stap gohed gud, stret long yia mo save blong hem? ?Hem i stat blong storeyan wetem ol narafala long saed blong bilif blong hem? ?Hem i stap jenisim fasin blong hem i kam olsem “nyufala laef ya”? (Kol. 3:10) ?Hem i kasem ol mak we hem i naf blong kam wan pablisa we i no baptaes, olsem pej 93 mo 94 blong buk ya Minista Wok Blong Yumi i soem? Sipos yu bilif se hem i naf, i gud blong tokbaot samting ya wetem hem. Sam studen oli nidim nomo we yu askem olgeta blong joen wetem yu long wok ya. I tru, sipos studen i wantem joen wetem yu, fastaem presiden elda i mas mekem plan blong tu elda oli storeyan wetem hem, olsem oli mekem oltaem. Be maet studen i no wantem joen wetem yu, maet wan samting i stap blokem hem. Wan elda i save go wetem yu taem yu mekem Baebol stadi wetem hem. Maet hem i askem sam gudfala kwestin long hem long saed blong filing blong hem long trutok. Afta we elda i harem ol ansa blong studen, maet hem i save givim sam advaes long hem wetem sam vas blong Baebol tu blong givhan.

⁹ ‘Pemaot Taem’ Blong Haftaem Paenia: Evri yia, long taem blong Memoriol, fasin tangkyu from ransom blong Jisas Kraes i pusum plante taosen blong ‘pemaot taem’ blong kam ol haftaem paenia. (Efes. 5:​15-17) Blong mekem olsem, oli mas rere blong livim sam samting. Be ol blesing we oli kasem, oli plante. I gud tumas blong luk we plante yangfala oli tekem jans blong haftaem paenia taem oli spel long skul. Ol bigman we oli wok fultaem, oli yusum sapa mo wiken blong mekem plante long wok ya. !Olsem nao, plante famle oli bin mekem wok blong haftaem paenia, evriwan wantaem! Long sam kongregesen, bighaf blong ol elda mo ol man blong givhan mo ol waef blong olgeta oli bin mekem wok blong haftaem paenia. From gudfala eksampel blong olgeta, plante narafala tu oli joen long wok ya, mekem se bighaf blong kongregesen oli mekem wok blong haftaem paenia long Epril.

¹⁰ Nating se yu save haftaem paenia no no gat, traem lukaot rod blong mekem moa long wok blong prij long Epril. Yu wan yu save putum wan mak we yu wantem kasem, wan we i nidim fasin traehad be i no hae tumas. Fasin blong yu blong wantem ‘lusum olgeta samting blong yu, blong givhan long narafala,’ stret olsem yu yu naf blong mekem long wok blong Jeova, bambae i kasem blesing.​—2 Kor. 12:15.

¹¹ Ol Miting Blong Prij: Yufala i mas mekem plan blong gat wan miting blong prij evri dei long olgeta wik we yumi seremaot spesel Wajtaoa mo Wekap! ya, long wan taem we i givim jans long yumi blong stat eli long wok blong prij. Yufala i mas mekem plan blong prij long sapa tu. Bighaf blong ol pablisa bambae oli joen long wok blong prij long wiken, taswe ol kongregesen oli mas putum wan taem blong mekem miting blong prij long olgeta Sarede, long moning mo long aftenun, gogo wok blong seremaot ol spesel magasin ya i finis.

¹² Olgeta we oli lidim ol miting blong prij oli mas mekem sua se oli karem plante teritori. Ol faswan teritori we yufala i mas mekem, hemia olgeta we yufala i no wok long olgeta longtaem.

¹³ ?Bambae Yu Seremaot Hamas Magasin? Hemia kwestin we yu wan yu mas ansa long hem. Taem yu putum wan namba long hamas magasin yu save seremaot long spesel taem ya, tingbaot wanem kaen teritori bambae yufala i wok long hem, yia mo helt blong yu, hamas taem yu save spenem long wok ya, mo ol narafala samting olsem. Be tu, makem tok we i stap long Wajtaoa blong Janewari 1, 1994 se: “Wan tingting we yufala i save folem se, maet wanwan pablisa oli save putum mak blong 10 magasin long wan manis, i dipen long ol ­samting long laef blong olgeta. Maet ol paenia oli traem givimaot 90.” ?Wan mak olsem i stret long yu?

¹⁴ Ol Elda​—Mekem Gudfala Plan: Mekem sua se, sipos i gat rod, olgeta teritori blong kongregesen i kasem wetnes wetem ol spesel magasin ya. Yumi mas traehad blong wokem ol stoa mo ofis we oli stap insaed long teritori blong kongregesen. Olgeta we oli mekem wok ya oli mas reregud mo putum ol gudfala klos we oli klin. I no nidim wan storeyan we i longfala mo i hadwok blong kasem save long hem. Taem yu mitim wan bisnesman, yu save talem nomo se, yu no stap mitim plante bisnesman long haos blong olgeta, taswe yu kam long stoa blong hem blong soem wan magasin we yu save se bambae hem i intres long hem. Nao blong smoltaem yu save talem wan klia poen long magasin ya. Kongregesen i mas mekem wan gudfala plan tu blong tekem evri jans blong prij wetem ol magasin, insaed long teritori blong olgeta. From we yu mekem wok ya long fored blong ol man, yu mas tingbaot blong putum gudfala klos we oli klin. Maet i gat sam narafala ples we yufala i save wok long olgeta long taem ya, olsem epot, hospital, ol ples blong putum trak, mo ol ples blong spel. Ol elda oli mas mekem disisen long ol plan blong prij long ol ples ya long teritori blong kongregesen.

¹⁵ Jeova i stap wok oltaem. (Jon 5:17) Hem i mekem heven mo wol wetem ol tri mo ol anamol. Mo hem i gohed blong wok gogo hem i mekem nambawan wok blong hem long wol ya​—hemia man. Yumi gat laef, samting ya i kamaot from we God i wan man blong wok strong. Blong ‘folem fasin blong God,’ yumi mas letem lav we yumi gat long hem i pusum yumi blong wok “strong blong mekem ol gudfala samting.” (Efes. 5:1; Taet. 2:14) I stret nomo we yumi wok blong Jeova wetem olgeta paoa blong yumi. Mo man we i wok strong i wantem tumas blong luk frut blong wok blong hem. Taswe, yumi mas wantem blong mekem wok blong prij long nambawan fasin. I tru, Jeova i glad long eni samting we yumi livim blong mekem wok blong hem, mo neva se wok blong yumi i blong nating nomo. (1 Kor. 15:58) !Taswe, wetem tangkyu long hat blong yumi, yumi mas traehad blong wok strong long Epril, wetem strong tingting se bambae Jeova i glad mo i blesem wok blong yumi, mo bambae wok ya i karem frut!