‘Talemaot Tok Blong God i Klia Gud’
1 Sipos yu yu rili gat tangkiu from wan gudfala samting we yu kasem, bambae yu soem tangkiu blong yu long toktok mo fasin blong yu. Makem tingting blong aposol Pol long saed blong gudfala fasin, lav mo kaen fasin we Jeova i soem long ol man. Hem i talem se: “Yumi mas talem tangkiu long God from presen ya blong hem we i gud tumas, i bitim mak olgeta.” ?Wanem nao “presen ya”? Hemia olgeta samting we God i mekem blong ‘givhan bigwan long yumi long gladhat blong hem.’ Samting we i soemaot gladhat blong hem, hemia we i givim laef blong Pikinini blong hem olsem wan ransom sakrefaes from ol sin blong yumi.—2 Kor. 9:14, 15; Jon 3:16.
2 ?Tok blong Pol blong talem tangkiu i jes ol toktok we i no gat mining? !No gat! Hem i soem bigfala tangkiu blong hem long plante defren rod. Hem i tingbaot bilif blong ol Kristin brata blong hem, mo hem i wantem mekem bes blong hem blong halpem olgeta blong harem gud long lav mo kaen fasin blong God. Long saed blong olgeta, Pol i talem se: “Mifala i no tingbaot blong talemaot gud nius ya nomo long yufala. Mifala i rere tu blong lego laef blong mifala from we mifala i lavem yufala, mo mifala i wantem tumas blong givhan long yufala.” (1 Tes. 2:8) Pol i no givhan long olgeta nomo we oli joen finis long kongregesen, blong oli save kasem laef. Be hem i talemaot gud nius tu, hem i no kam taed long wok ya, mo hem i wokbaot plante taosen kilometa long leg mo long sip blong faenem olgeta “we oli stret blong kasem laef blong olwe.” (Wok 13:48, NW ) Bigfala tangkiu we Pol i gat from olgeta samting we Jeova i bin mekem long hem, i pusum hem blong ‘talemaot tok blong God i klia gud.’—Kol. 1:25.
3 ?Tangkiu we yumi gat long Jeova from ol samting we hem i mekem long yumi i pusum yumi blong givhan long bilif blong olgeta long kongregesen we oli nidim help? (Gal. 6:10) ?Mo tu, yumi wantem joen fulwan long wok blong talemaot gud nius blong Kingdom long ples blong yumi?—Mat. 24:14.
4 Wan Janis Blong Soem Tangkiu: Evri yia, Memoriol blong ded blong Kraes i givim wan spesel janis long yumi blong soem tangkiu from ol samting we Jeova mo Jisas tufala i bin mekem long yumi. Hemia i no jes wan miting olsem ol narafala miting, mo i no jes wan lafet blong tingtingbak long wan samting we i bin hapen bifo. Jisas i talem se: “Oltaem yufala i mas mekem samting ya blong tingbaot mi bakegen.” (Luk 22:19) Memoriol blong ded blong Kraes i wan taem blong tingbaot ol fasin blong Jisas. Hem i wan taem blong luksave se hem i laef i stap mo i stap wok naoia, olsem wan king we God i givim haenem long hem from we hem i bin stap tru long God mo i givim laef blong hem olsem wan sakrefaes. Lafet ya i wan janis tu blong soemaot we yumi glad blong stap aninit long Kraes we i lidim Kristin kongregesen mo ol wok blong hem. (Kol. 1:17-20) Olgeta man blong God oli mas soem respek mo stap long Memoriol blong ded blong Kraes. Long yia ya bambae i stap long Tasde Maj 28, 2002, afta we san i godaon.
5 From ol hadwok bifo long Memoriol las yia, namba blong ol man long Niukaledonia we oli go long Memoriol ya, hemia 4,373, long Vanuatu 1,052 mo long Walis mo Futuna 344, hemia wan namba we oli neva kasem bifo long ples ya. ?Bambae i gat hamas man long yia ya? Ating bambae i gat fulap, sipos yumi ‘hadwok mo yumi stap traehad tumas’ blong givhan long plante man blong oli kam.—1 Tim. 4:10.
6 Bambae yumi go long lafet blong Lodsapa, be maet yumi save mekem moa long wok blong prij tu. I sua se plante taosen brata mo sista bambae oli mekem haftaem paenia long wan no moa manis long taem ya. Long taem blong Memoriol long ol tri yia we oli pas, i bin gat 141 haftaem paenia long Niukaledonia, 19 long Vanuatu, mo 7 long Walis mo Futuna. ?Yu yu save jenisim sam samting long laef blong yu, blong yu save haremgud long nambawan janis blong mekem haftaem paenia long yia ya? Hemia wan gudfala rod blong soemaot bigfala tangkiu from lav we God i soem taem hem i givim Kraes olsem wan sakrefaes. I sua se bambae yu kasem blesing blong Jeova, olsem ol stori ya oli soem.
7 Wan sista we i wok fultaem i raetem leta we i tokbaot samting we i kamaot long hem taem hem i mekem haftaem paenia long Maj las yia. Hem i talem se: “Kingdom Wok Blong Yumi blong Februari 2001 i bin leftemap tingting blong olgeta we oli naf, blong oli mekem wok blong haftaem paenia long taem blong Memoriol. I bin gat faef Sarede long manis Maj, mo samting ya i joen gud wetem program blong mi. Ale, mi tekem disisen blong fulumap pepa blong mekem wok ya.” Long stat blong manis ya, hem i putum wan mak blong statem wan Baebol stadi. ?Hem i kasem mak ya? !Yes, hem i jes faenem wan Baebol stadi taem hem i mekem 52 aoa long wok blong prij! ?Wanem tingting blong hem long saed ya? “I gat ol nambawan blesing oli kamaot taem yumi mekem moa i bitim wanem we yumi mas mekem.”
8 ?Wanem ol gudfala frut we i kamaot taem wan famle i mekem wok blong paenia tugeta? Wan famle we i gat tu pikinini i bin mekem wok blong haftaem paenia long manis Eprel las yia, mo oli no save fogetem manis ya. Mama i talem se: “!Mifala i gat wan hapi tingting evri dei, from we mifala evriwan i joen long wok blong prij! Taem blong kakae tugeta long sava i nambawan, from we mifala i stap tokbaot wanem we mifala i bin mekem long wok blong prij.” Pikinini boe i talem se: “Long ol narafala taem, papa i mas wok long ol dei blong wik blong winim mane, taswe mi haremgud blong mekem wok blong prij wetem hem long ol dei blong wik.” Papa i ademap tok ya: “Mi mi hed blong famle, taswe mi glad tumas blong save se mifala i stap wok tugeta long wok ya we i moa impoten i bitim ol narafala wok.” ?Famle blong yu i save mekem wok blong paenia tugeta? I gud we famle i toktok tugeta blong luk sipos ful famle i save mekem wok blong haftaem paenia long taem blong Memoriol.
9 ?Long Manis Maj, Yumi Save Mekem Moa Wok i Bitim Eni Narafala Manis? Long stat blong yia 2000, Kingdom Wok Blong Yumi i putum kwestin ya, se: “?Yumi Save Mekem Moa Wok Eprel 2000 Olsem Beswan Manis Blong Yumi?” ?Wanem i bin kamaot? I gat plante niufala namba. I gat wan niufala namba blong 153,774 haftaem paenia. Mo tu, i gat niufala namba blong ol aoa, magasin mo visit. ?Yu save tingtingbak long bigfala glad we i stap long kongregesen taem ol brata mo sista oli bisi long wok blong Jeova long spesel manis ya? ?Yumi save mekem sem mak long yia ya, no maet yumi mekem moa bakegen? Sipos yumi evriwan i traehad, manis Maj 2002 i save kam “Beswan Manis Blong Yumi.” ?From wanem yumi tokbaot manis Maj olsem?
10 I gat tu risen from wanem manis Maj i wan spesel manis blong mekem wok. Faswan risen: Memoriol i stap long en blong manis Maj, mo yumi mas yusum plante taem long stat blong manis blong singaot fulap man oli kam long Memoriol. Namba tu risen: Long yia ya, manis Maj i gat faef wiken long hem, mo samting ya i mekem i isi moa long olgeta we oli wok no oli go long skul blong oli save mekem wok blong haftaem paenia. I gud yu sidaon naoia, mo yu yusum kalenda we i stap long pepa ya blong wokem wan plan. Maet yu luksave se wok blong haftaem paenia i no strong tumas olsem yu bin tingting fastaem. Sipos yu prij 8 aoa long evri wiken long manis ya, bambae yu kasem 40 aoa. Nao yu nidim 10 aoa nomo long ol narafala dei blong manis ya blong kasem 50 aoa blong yu.
11 ?Ol elda oli save mekem wanem blong halpem olgeta long kongregesen, blong ‘oli talemaot tok blong God i klia gud’? Glad we oli soemaot long ol haf blong miting mo long ol storian blong olgeta, i save pulum ol brata mo sista blong gat strong tingting blong prij. Ol brata we oli lukaot long ol Buk Stadi mo ol brata we oli givhan long olgeta oli save tok wetem evriwan long buk stadi grup blong olgeta, mo givhan long olgeta wanwan. Maet oli nidim nomo blong harem smol toktok blong leftemap tingting blong olgeta, no blong kasem sam advaes we oli save wokem. (Prov. 25:11) Plante bambae oli luksave se sipos oli mekem sam smol jenis long laef blong olgeta, bambae oli save haremgud blong mekem nambawan wok blong haftaem paenia. Long plante kongregesen, bighaf blong ol elda mo ol man blong givhan wetem ol waef blong olgeta oli soem wan nambawan eksampol taem oli mekem wok blong haftaem paenia long manis blong Memoriol. Eksampol ya i pulum plante pablisa blong joen wetem olgeta long wok ya. From sam problem long saed blong bodi, no sam narafala samting, maet sam pablisa oli no save mekem wok blong paenia. Be, yumi save leftemap tingting blong olgeta blong mekem bes blong olgeta blong joen long wok blong prij wetem ol narafala long kongregesen. Olsem nao, oli save soemaot tangkiu blong olgeta tu.
12 Blong kasem gudfala frut, ol elda oli mas mekem gudfala plan long taem ya. I mas gat ol miting blong prij long ol taem we i stret. Bambae brata we i lukaot long wok blong prij i jusumaot fastaem ol brata we oli naf blong lidim ol miting blong prij. Bambae ol brata ya oli mas reregud fastaem blong meksua se ol miting oli no bitim 10 no 15 menet, hemia blong seraotem ol grup, givim teritori mo mekem prea tu. (Lukluk bokis ya Ansa Long Wan Kwestin long Kingdom Wok Blong Yumi blong Septemba 2001.) Ol brata oli mas eksplenem long klia fasin ol plan blong wok blong prij blong manis, mo putum lis blong ol miting blong prij long notis bod.
13 I mas gat naf teritori blong ol pablisa. Brata we i lukaot long wok blong prij i mas toktok wetem brata we i lukaot long ol kad blong teritori blong mekem plan blong kongregesen i prij long ol teritori we yumi no prij plante long hem. Tufala i mas tingbaot blong gobak long ol haos we fastaem i no gat man, blong prij long rod mo long ol stoa, mo blong prij long sava. Sipos i stret long ples blong yufala, maet plan i stap blong sam pablisa oli prij long telefon.
14 Halpem Olgeta Blong Oli Prij Bakegen: ?I gat sam pablisa long ples blong yufala we oli no moa stap talemaot gud nius? Olgeta ya oli ol memba blong kongregesen yet mo oli nidim help. (Sam 119:176) From we en blong rabis wol ya i klosap mo niufala wol i stap jes long fored blong yumi, hemia wan gudfala risen blong mekem bes blong yumi blong givhan long olgeta we oli no moa prij. (Rom 13:11, 12) Long ol faef yia we oli pas, bitim 26,500 brata mo sista evri yia oli glad blong kasem help blong oli prij bakegen. ?Yumi save mekem wanem blong halpem plante moa blong mekem lav mo bilif blong olgeta i kam strong bakegen, olsem we oli bin gat fastaem?—Hib. 3:12-14.
15 Ol elda bambae oli tokbaot olsem wanem oli save givhan long olgeta we oli kam slak mo oli no moa prij long ol laswan yia. (Mat. 18:12-14) Sekretari i mas jekem ol Kad Blong Pablisa mo makem nem blong olgeta we oli no moa prij. Oli mas mekem wan spesel traehad blong go luk olgeta blong givhan mo leftemap tingting blong olgeta. Maet wan elda i wantem go luk pablisa we hem i bin save gud hem bifo, no maet hem i askem narafala pablisa blong givhan long saed ya. Maet pablisa ya i bin stadi wetem hemia we i no moa prij, mo hem i glad blong givhan long hem bakegen. Yumi wantem se plante we oli kam slak bambae oli stat talemaot tok blong God bakegen. !Nambawan taem blong oli stat sipos oli naf, hemia long manis blong Memoriol!—Blong kasem moa save, lukluk Ansa Long Wan Kwestin long Kingdom Wok Blong Yumi, Novemba, 2000.
16 ?Sam Narafala Oli Naf Blong Prij? Jeova i stap gohed blong blesem ol man blong hem, i stap hivimap “ol gudgudfala samting” blong ol kantri. (Hag. 2:7) Evri yia, plante taosen oli kasem mak we oli naf blong kam pablisa we i no baptaes. ?Hu olgeta ya? Ol pikinini blong ol Witnes blong Jeova wetem ol Baebol stadi we oli stap gohed gud. ?Olsem wanem yumi save sipos oli naf blong kam pablisa blong gud nius?
17 Ol Pikinini Blong Ol Witnes Blong Jeova: Plante pikinini oli bin folem papa mama blong olgeta blong plante yia long wok blong prij, be oli no kam pablisa yet. Maet manis Maj nao i gudfala taem blong oli stat. ?Olsem wanem yu save sipos pikinini blong yu i naf? Pej 95 blong buk ya Ol Rul Blong Mekem Minista Wok Blong Yumi i talem se pikinini i naf sipos hem “i folem gudfala fasin mo i naf blong talemaot bilif blong hem long wok blong prij, mo hat blong hem i pulum hem blong mekem wok ya.” Sipos yu ting se pikinini blong yu i naf, toktok wetem wan long ol elda long Sevis Komiti blong Kongregesen.
18 Ol Baebol Stadi We Oli Naf: Afta we wan Baebol stadi i kasem plante save lelebet mo i stap kam long ol miting longtaem lelebet, maet hem i wantem kam wan pablisa blong Kingdom. Sipos yu stap stadi wetem wan olsem, traem tingbaot ol kwestin ya: ?Hem i stap gohed gud, long fasin we i stret long yia blong hem mo save blong hem? ?Hem i stat blong tekem janis blong tokbaot bilif blong hem wetem ol narafala? ?Hem i stap putum “niufala fasin blong laef”? (Kol. 3:10, NW ) ?Hem i kasem mak we hem i naf blong kam wan pablisa we i no baptaes yet, folem ol fasin we buk ya Minista Wok Blong Yumi i tokbaot long pej 93 kasem 95? Sipos yes, yu mas go luk ol elda long Sevis Komiti blong Kongregesen, nao bambae oli mekem plan blong tu elda oli miting wetem yu mo studen blong yu. Sipos hem i naf, tufala elda ya bambae oli talem long hem se hem i save joen long wok blong prij.
19 ?Olsem Wanem Long Manis Eprel Mo Mei? Tufala manis ya tu oli spesel manis blong prij moa. Plante we oli mekem haftaem paenia long manis Maj, ating oli save mekem bakegen long Eprel mo Mei. Long Manis Eprel mo Mei, bambae yumi tokbaot ol Wajtaoa mo Wekap! long wok blong prij. !Ol magasin ya oli mekem i gud tumas long laef blong olgeta we oli ridim! Oli bin givhan bigwan blong mekem namba blong ol man blong Jeova long fulwol i kam antap bitim mak. Bambae yumi traehad fulwan long manis Eprel mo Mei blong kasem evri man wetem ol magasin ya. I gud we yumi plan naoia blong joen fulwan long wok ya.
20 ?Olsem wanem? ?Yu yu nidim blong kasem moa magasin long kongregesen, blong joen long bigfala wok long ol manis ya? Long ful yia, yumi seremaot Wajtaoa mo Wekap! evri Sarede, olsem Dei Blong Seremaot Ol Magasin. Be, bambae plante blong yumi i joen long wok blong haftaem paenia, mo tu, buk we yumi seremaot blong tu manis, hemia ol magasin nomo, taswe ating kongregesen i mas mekem oda blong moa magasin. Sipos yu yu nidim moa magasin, plis talemaot kwiktaem long brata we i lukaot long ol magasin. Mo tu, brata we i lukaot long ol buk i mas meksua se i gat plante traket Would You Like to Know More About the Bible? (?Yu Yu Wantem Save Moa Long Saed Blong Baebol?)
21 Plante oli bin talemaot se oli laekem tumas haf ya long Kingdom Wok Blong Yumi we nem blong hem “?Yumi Tokbaot Wanem Long Ol Magasin?” ?Yu yu bin lanem ol isi rod ya blong seremaot ol magasin mo yusum olgeta? I gud blong tekem smol taem long Baebol stadi blong famle evri wik blong lanem ol rod ya blong seremaot magasin.
22 Wok Strong Long Taem Blong Memoriol: Yumi mas mekem olsem aposol Pol, yumi soem long Jeova se yumi laekem tumas “presen ya blong hem we i gud tumas, i bitim mak olgeta.” Yumi mekem olsem taem yumi joen fulwan long ol wok long taem blong Memoriol. Hemia ol wok olsem (1) joen long miting we i moa impoten i bitim ol narawan, hemia Lodsapa long Tasde, Maj 28, 2002; (2) givhan long olgeta we oli no moa prij blong oli kasem bakegen ‘lav ya we oli bin gat fastaem’ (Rev. 2:4; Rom 12:11); (3) givhan long ol pikinini blong yumi mo ol Baebol stadi we oli naf blong kam pablisa we i no baptaes; mo (4) joen fulwan long wok blong prij, olsem wok blong haftaem paenia long manis Maj mo biaen.—2 Tim. 4:5.
23 Yumi prea wetem fulhat blong yumi se yumi evriwan bambae i joen fulwan long wok blong talemaot gud nius blong Kingdom long taem blong Memoriol, mo long rod ya, yumi soemaot se yumi gat bigfala tangkiu long Jeova from ol samting we hem i mekem blong yumi.
[Bokis blong pija long pej 6]
Program Blong Mi Blong Prij Long Maj 2002
(Lukluk niuspepa)
Sande
Mande
Tusde
Wenesde
Tasde
Fraede
Sarede
Dei Blong Seremaot Ol Magasin
Dei Blong Seremaot Ol Magasin
Dei Blong Seremaot Ol Magasin
Dei Blong Seremaot Ol Magasin
MEMORIOL AFTA WE SAN I GODAON
Dei Blong Seremaot Ol Magasin
?Yu yu save mekem plan blong spenem 50 aoa long wok blong haftaem paenia long Maj?