Gohed Nomo Blong Tokbaot Ol Bigfala Wok Blong Jeova
1. ?Wanem sam gudfala wok blong Jeova we yu yu rili tinghae long olgeta?
1 !I no gat wan narafala god we i olsem nambawan God blong yumi, Jeova! Deved i raetem tok ya se: “Hae God, yu yu God blong mifala. Yu yu mekem plante samting finis blong givhan long mifala. I no gat narafala god we i olsem yu. Yu mekem plante gudfala plan blong mifala i folem. Mi mi no save tokbaot olgeta evriwan, oli plante tumas.” (Sam 40:5) Sam gudfala samting we Jeova i mekem finis blong givhan long yumi: hem i wokem heven mo wol, hem i stanemap Kingdom we Mesaea i rul long hem, hem i soem lav mo kaen fasin long ol man blong hem, mo hem i mekem se wok blong prij i gohed long olgeta ples blong wol. (Sam 17:7, 8; 139:14; Dan. 2:44; Mat. 24:14) Lav mo tangkiu we yumi gat long Jeova from ol samting we hem i mekem finis, i stap pulum yumi blong tokbaot hem long ol narafala. (Sam 145:5-7) Long manis Maj, Eprel, mo Mei, bambae yumi gat janis blong mekem samting ya moa.
2. ?Olsem wanem wok blong haftaem paenia i save givhan long yumi wanwan?
2 Wok Blong Haftaem Paenia: ?Yu yu save jenisim program blong yu lelebet, blong yu naf blong spenem 50 aoa long wok blong prij long wan manis no long ol trifala spesel manis ya blong prij? Sipos yu mekem olsem, bambae i no blong nating nomo. (Efes. 5:16) Plante brata sista oli faenem se wok blong haftaem paenia i givhan long olgeta blong kamgud moa long wok blong prij. Oli no moa fraet blong toktok long ol man, mo oli lanem blong yusum Baebol moa. From we yu spenem moa taem long wok blong prij, bambae yu gat moa janis blong mekem ol visit tu. Samfala we neva oli mekem wan Baebol stadi, oli faenem wan man we i wantem stadi, taem oli mekem wok blong haftaem paenia. Yumi kasem glad tu long wok ya, from we taem yumi mekem wok blong haftaem paenia, yumi stap halpem ol narafala.—Wok 20:35.
3. ?Samfala oli mekem wanem blong oli save joen long wok blong haftaem paenia, nating se i no isi long olgeta?
3 Yu no mas hareap blong talem se yu no save paenia from we yu gat tumas wok. Wan elda we i mekem wok blong haftaem paenia las yia, i gat tu pikinini blong hem mo hem i wok fultaem blong kasem mane. ?Brata ya i mekem wanem blong faenem taem blong haftaem paenia? Wok blong hem i tekem olgeta dei blong wik, taswe hem i mekem plan se bambae hem i spenem plante aoa long wok blong prij long wiken. Ale, long Sarede, hem i stat prij long rod long 7 klok long moning. Sam narafala long kongregesen we olgeta tu oli gat pikinini mo oli wok fultaem, oli joen wetem hem blong mekem haftaem paenia, mo olgeta evriwan ya oli givgivhan mo lefleftemap tingting blong olgeta. Long wan narafala kongregesen, wan sista we i gat 99 yia blong hem i tekem disisen blong paenia long manis Mei. Gel blong hem i wantem mekem wok ya, ale hem i singaot olfala mama blong hem blong joen wetem hem. Sam narafala long kongregesen oli givhan tu long olfala sista ya, oli pusum hem long wiljea blong hem blong i save go prij long olgeta haos wanwan mo blong i save joen wetem olgeta long ol Baebol stadi. Olfala sista ya i yusum telefon blong prij, hem i prij long rod tu, mo hem i raetem sam leta blong prij long ol narafala. Hem i save se hem i no mekem wok ya long prapa paoa blong hem, be hem i naf blong mekem nomo from we Jeova i givhan long hem.—Aes. 40:29-31.
4. ?Wanem sam samting blong tingbaot taem yumi mekem wan program blong haftaem paenia?
4 Traem raetemdaon wan program we i stret long laef blong yu. ?Olsem wanem? ?Yu yu stap wok fultaem? ?Yu yu stap skul yet? Long program blong yu, maet i moagud blong makemaot taem blong prij long wiken. Sipos yu siksik mo yu no gat naf paoa blong prij fuldei, maet long program blong yu yu save makemaot smol taem blong prij evri dei. Tokbaot wok blong haftaem paenia wetem ol narafala. Maet olgeta tu oli mekem plan blong joenem yu long wok ya.
5. ?Wanem sam mak we ol yangfala oli save traehad blong kasem long trifala manis ya Maj, Eprel, mo Mei?
5 Ol Yangfala Oli Save Joen Long Wok Ya: Jeova i glad tumas taem ol yangfala oli tokbaot ol bigfala wok blong hem. (Sam 71:17; Mat. 21:16) Sipos yu yu wan yangfala we yu baptaes finis, ating yu save mekem wok blong haftaem paenia long wan manis we yu spel long skul. ?Sipos yu no naf blong mekem wok blong haftaem paenia, olsem wanem sipos yu traehad blong prij moa long ol trifala manis ya, no blong kamgud moa long fasin blong prij? Sipos yu stap folem papa mama blong yu long wok blong prij be yu no kam wan pablisa yet, ating naoia i stret taem blong yu traehad blong kasem mak ya. Yu no mas ting se yu mas save ansa blong olgeta kwestin long Baebol, mo yu mas gat bigfala save olsem ol brata mo sista we oli baptaes longtaem finis. Tingbaot: ?Yu yu kasem save long ol stamba tijing blong Baebol? ?Yu yu folem ol rul blong Baebol long saed blong klin mo gudfala fasin? ?Yu yu wantem we ol man oli luk yu olsem wan Witnes blong Jeova? Sipos yes, ale tokbaot samting ya wetem papa mama blong yu. Tufala i save mekem plan blong tekem yu yu go luk ol elda, nao bambae oli skelem sipos yu yu naf blong kam wan pablisa.—Lukluk buk ya, Minista Wok Blong Yumi, pej 93-94.
6. ?Olsem wanem yumi save halpem ol Baebol stadi blong yumi blong oli kam pablisa?
6 Halpem Ol Narafala Blong Prij: Long ol spesel manis ya blong prij, maet sam Baebol stadi blong yu oli naf blong kam pablisa. Sipos wan Baebol stadi blong yu i stap gohed gud, askem brata we i lukaot long buk stadi blong yu no elda we i lukaot long wok blong prij, blong i kam wetem yu long stadi ya mo i skelem sipos studen ya i naf blong prij. Sipos studen i naf mo i wantem tumas blong kam wan pablisa, presiden elda i save mekem plan blong tu elda i miting wetem yu mo hem tugeta. (Lukluk Wajtaoa, Novemba 15, 1988, pej 17, Franis mo Inglis.) Sipos ol elda oli luk se hem i naf blong prij, yu yu save stat naoia nomo blong trenem hem long wok blong prij.
7. ?Olsem wanem blong givhan long ol pablisa we oli no moa prij longtaem no we oli mestem wan manis long wok blong prij?
7 Brata we i lukaot long buk stadi, i mas givim spesel kea long samfala long grup blong hem we maet oli no moa prij longtaem no maet oli mestem wan manis long wok blong prij. Hem i save askem long olgeta ya blong oli kam prij wetem hem. Sipos oli no bin prij longtaem, i gud we tu elda i toktok wetem olgeta fastaem, blong luk sipos laef blong olgeta i stret blong oli prij bakegen. (Lukluk Ansa Long Wan Kwestin long Kingdom Wok Blong Yumi, Novemba, 2000.) Taem oli luk we kongregesen i mekem wan spesel traehad blong prij long ol trifala manis ya, maet olgeta tu oli glad blong stat prij bakegen.
8, 9. ?Ol elda oli save mekem wanem blong leftemap tingting blong ol brata sista blong joen long spesel wok ya?
8 Rere Naoia Blong Prij Moa: Ol elda, yufala i mas stat naoia blong leftemap tingting blong olgeta long kongregesen blong oli mekem wok blong haftaem paenia. Blong mekem olsem, yufala i mas toktokgud long saed blong wok ya mo yufala i mas givim gudfala eksampol. (1 Pita 5:3) ?Wanem yia we kongregesen i bin gat moa haftaem paenia i bitim ol narafala yia? ?Long taem ya, i gat hamas haftaem paenia? ?Yufala i save bitim namba ya long yia ya? Ol brata we oli lukaot long ol buk stadi mo ol brata we oli givhan long olgeta, oli mas lukaot rod blong pulum olgeta long grup blong oli mekem moa wok. Elda we i lukaot long wok blong prij i save stanemap sam moa miting blong prij long trifala manis ya. Talemaot long kongregesen wanem plan i stap. Meksua se ol pablisa we oli lidim miting blong prij oli nafgud, mo se ol miting ya oli stat long stret taem mo oli no longfala tumas. (Lukluk Ansa Long Wan Kwestin long Kingdom Wok Blong Yumi, Septemba 2001.) Elda we i lukaot long wok blong prij i mas meksua se i gat naf teritori i stap oltaem, wetem naf magasin mo buk tu.
9 Las yia, ol elda long wan kongregesen oli stat eli blong leftemap tingting blong olgeta long kongregesen blong oli haftaem paenia, nao plante long kongregesen oli fulumap pepa ya. Ol elda ya oli stanemap sam moa miting blong prij—wan long haf pas faef long moning blong oli prij long rod, narawan long tri klok long aftenun blong ol yangfala oli prij afta skul, mo narawan long sikis klok long sapa blong olgeta we oli wantem prij afta wok. Mo tu, oli mekem tri miting blong prij long Sarede. !Long kongregesen ya, 66 brata mo sista oli mekem wok blong haftaem paenia long manis Eprel!
10. ?Ol famle oli save mekem wanem blong rere blong mekem moa wok?
10 Nekis taem we yufala i mekem famle stadi blong yufala, i gud we yufala i tektaem blong tokbaot ol mak we yufala i wantem kasem long ol manis we oli kam. Sipos yufala i mekem wan gudfala plan mo famle i wokgud tugeta, maet samfala long famle no maet ful famle i save mekem wok blong haftaem paenia. Sipos yufala i no save paenia, traehad blong prij moa. Taem yu go prij, i no nid blong yu kambak long haos kwik, yu save traem blong gohed longtaem lelebet. Mo tu, yu save go prij long sam narafala dei bakegen, i no long ol dei nomo we yu stap prij long olgeta oltaem. Ful famle i save prea tugeta long bisnes ya. Yufala i save sua se Jeova bambae i blesem traehad blong yufala.—1 Jon 3:22.
11. (a) ?Wanem ol gudfala samting we sakrefaes blong Kraes i mekem? (b) ?Long ples blong yu, wanem stret taem mo ples blong Memoriol?
11 Bigfala Wok Blong God We i Moa Gud: Nambawan presen we Jeova i givim blong soem lav long yumi, hemia taem i letem Pikinini blong hem i ded olsem wan ransom. (1 Jon 4:9, 10) Folem loa blong God, wan ransom i stret samting blong tekemaot sin mo ded blong ol man. (Rom 3:23, 24) Blad blong Jisas i mekem se niufala kontrak i save wok, nao God i save tekemaot sam man long wol ya we oli no stretgud olgeta, blong oli kam ol pikinini blong hem we bambae oli rul long Kingdom blong heven. (Jer. 31:31-34; Mak 14:24) Samting we i moa impoten, se taem Jisas i obei long God long fasin we i stretgud olgeta, hem i leftemap nem blong Jeova. (Dut. 32:4; Prov. 27:11) Long Sande, Eprel 4, afta we san i godaon, bambae yumi mekem Memoriol long olgeta ples blong wol, blong tingbaot ded blong Kraes.
12. ?Olsem wanem Lodsapa i save givhan long ol man we oli intres?
12 Taem yumi mekem Lodsapa, yumi leftemap ol gudfala wok blong Jeova. Tok blong Memoriol i pulum yumi blong gat bigfala tangkiu long Jeova from samting we hem i mekem taem hem i givim pikinini blong hem olsem wan ransom. Ol man we oli intres mo oli kam long Memoriol, bambae oli luksave sam narafala gudfala wok blong God. Bambae oli luk we Jeova i tijim ol man blong hem blong soemaot trufala lav mo blong oli joengud. (Efes. 4:16, 22-24; Jem. 3:17, 18) Impoten miting ya i save gat bigfala paoa long tingting blong man we i kam long hem, taswe yumi wantem singaot fulap man blong oli kam.—2 Kor. 5:14, 15.
13, 14. ?Yumi save singaot hu i kam long Memoriol, mo olsem wanem?
13 Singaot Ol Man Oli Kam: Stat naoia blong mekem wan lis blong ol man we yu wantem singaot olgeta. Long lis ya, yu save raetem nem blong ol famle blong yu we oli no stap long trutok, ol man we oli stap raonabaot long yu, ol man we yu wok no skul wetem olgeta, ol Baebol stadi we yu mekem naoia mo yu bin mekem long ol yia we oli pas, mo ol visit. Long lis blong ol brata we oli lukaot long ol buk stadi, oli save raetem nem blong ol pablisa we oli no moa prij tu.
14 Yusum ol pepa blong singaot man i kam long Memoriol, mo raetem stret taem mo ples blong Memoriol long pepa ya. Sipos no, yu save yusum las pej blong Wajtaoa blong Maj 15, 2004. Taem yumi kam klosap long Eprel 4, i gud we yu go luk olgeta long lis blong yu namba tu taem, no ring long olgeta, blong pulum tingting blong olgeta bakegen long saed blong Memoriol.
15. ?Olsem wanem yumi save welkamemgud ol man long naet blong Memoriol?
15 Long Memoriol: Traem kam eli long Memoriol. Blong welkamem ol niuwan, i gud yumi sekhan mo storian gud wetem olgeta. (Rom 12:13) Yu yu gat wan spesel wok blong mekem long olgeta we yu bin singaot olgeta. Yu mas mekem olgeta oli haremgud blong joen long miting ya, mo yu mas tekem olgeta oli goraon blong sekhan long ol narafala long kongregesen. Ating yu save faenem wan ples blong oli sidaon klosap long yu. Sipos oli no gat wan Baebol mo singbuk, yu save serem ol buk blong yu wetem olgeta, no yu save askem long wan narafala brata sista blong serem buk blong hem wetem olgeta. Afta long miting, yu mas rere blong ansa long ol kwestin we maet ol niuwan ya oli askem. Sipos hemia faswan miting blong olgeta, yu save askem olgeta sipos oli wantem lanem moa long saed blong Baebol mo stamba tingting blong God. Talem long olgeta se yu yu glad blong mekem wan Baebol stadi wetem olgeta.
16. ?Yumi save mekem wanem blong givhan moa long olgeta we oli kam long Memoriol?
16 Gohed Blong Halpem Olgeta We Oli Kam: Long ol wik afta long Memoriol, olgeta we oli bin kam bambae oli nidim we yumi givhan long olgeta moa. Hemia olgeta tu we bifo oli bin kam oltaem long miting, be naoia oli kam sam samtaem nomo. Ol elda bambae oli rere blong lukaotgud long olgeta ya. Maet oli traem faenemaot from wanem oli no moa gohed gud long saed blong spirit, mo traem halpem olgeta blong luksave se taem i sot tumas naoia. (1 Pita 4:7) I gud blong givhan long olgeta blong luksave se sipos oli obei long tok blong Baebol blong joen wanples wetem ol man blong God, samting ya i save mekem i gud long olgeta.—Hib. 10:24, 25.
17. ?From wanem yumi mas gohed nomo blong tokbaot ol gudfala wok blong Jeova?
17 Nating sipos yumi laef gogo i no save finis, be yumi no naf yet blong kasem save fulwan long ol wok blong Jeova, from we ol wok ya oli gudfala tumas. (Job 42:2, 3; Pri. 3:11) Taswe, oltaem bambae i gat samting blong presem Jeova from, neva yumi save finis blong presem hem. Long taem blong Memoriol long yia ya, yumi save soem bigfala tangkiu long Jeova from ol gudfala wok blong hem, sipos yumi mekem wan spesel traehad blong prij moa.
[Tok blong pija long pej 5]
?Yu Yu Save Mekem Wok Blong Haftaem Paenia Folem Wan Long Ol Program Ya?
(Lukluk niuspepa)