“Talemaot Gud Nius”
1. ?Yumi save tokbaot wanem gud nius?
1 Long wol ya we i no gat plante gud nius, yumi gat janis blong “talemaot gud nius ya we God i lavem yumi tumas, mo i stap mekem i gud tumas long yumi.” (Wok 20:24) Haf blong gud nius ya we yumi mas mekem man i save long hem, se i no longtaem bambae Jeova i finisim “ol las dei” mo putum wan niufala wol we stret fasin nomo i stap long hem. Long taem ya nao bambae “ol samting ya blong bifo oli lus olgeta.” (2 Tim. 3:1-5, NW; Rev. 21:4) Bambae i no moa gat man we i talem se hem i sik. (Aes. 33:24) Ol famle mo ol fren we oli ded finis, bambae oli aot long beregraon blong olgeta, mo bambae oli joen bakegen wetem yumi. (Jon 5:28, 29) Olgeta ples long wol bambae oli kam wan naesfala paradaes. (Aes. 65:21-23) !Hemia nao sam long olgeta gud nius ya we yumi tokbaot long ol man!
2. ?From wanem trifala manis klosap long Memoriol oli givim nambawan janis long yumi blong talemaot gud nius?
2 Yumi gat nambawan janis blong talemaot gud nius long manis blong Maj, Eprel, mo Mei. Long trifala manis ya, weta long plante ples long wol i gud, mo delaet bambae i longfala moa, taswe yumi save spenem moa taem long wok blong talemaot gud nius long olgeta man. Antap long samting ya, yumi mas tingbaot wan impoten taem blong yia hemia, Memoriol blong ded blong Jisas, we bambae i stap long fulwol long Sarede, Maj 22, afta we san i godaon. Naoia i stret taem blong mekem rere ol plan, blong yumi save mekem moa long wok blong prij.
3. ?Wanem samting we bambae i halpem ol famle blong oli mekem moa long wok blong prij?
3 Haftaem Paenia: ?Yu yu save mekem plan blong joen long wok blong haftaem paenia long wan manis, tu manis, no long trifala manis ya? ?Yu yu gat tingting blong tokbaot plan blong yu wetem famle long nekiswan famle stadi? Sipos olgeta memba blong famle oli toktok gud tugeta mo mekem wan gudfala plan, ating wan no moa memba blong famle oli save joen long wok blong haftaem paenia. (Prov. 15:22) I gud yu prea long Jeova long saed ya, mo bambae yu luk we hem i blesem traehad blong yu. (Prov. 16:3) Sipos i no gat wan long famle we i save joen long wok blong haftaem paenia, maet olgeta memba blong famle oli save traehad blong putum sam mak we oli naf blong kasem, blong oli save mekem moa long wok blong prij wetem olgeta we oli naf blong paenia.
4. ?Sipos yumi wok fultaem, olsem wanem yumi save mekem wan program blong joen long haftaem paenia?
4 Nating we yu wok fultaem, yu save joen long wok blong haftaem paenia sipos yu mekem wan gudfala plan. Yu save tekem janis blong prij long ples blong wok, long taem blong spel blong yu long dina. Yu save askem brata we i lukaot long teritori, blong i givim wan teritori we i klosap long haos blong yu, no klosap long ples blong wok blong yu, mo yu save prij wan no tu aoa bifo no afta long wok. Sipos yu wantem gat moa taem blong prij, yu save jenisim program blong yu mo putum sam wok we oli no impoten tumas oli go long narafala manis, nao yu save joen ful dei long wok blong talemaot gud nius long ol wiken. I gat samfala we oli bin tekem wan no tu dei blong spel blong olgeta, blong talemaot gud nius.
5. ?Olsem wanem yu save givhan long ol olfala mo long olgeta we oli siksik, blong oli joen long wok blong haftaem paenia?
5 Nating se yu yu wan olfala no yu no moa strong from we yu stap siksik, yu save joen yet long haftaem paenia sipos yu spenem smol taem evri dei long wok blong prij. Yu save prea long Jeova blong hem i givim ‘paoa ya we i bigwan tumas i blong hem, i no blong yumi.’ (2 Kor. 4:7) !Wan sista we i gat 106 yia, hem i joen long wok blong haftaem paenia! Sista ya i kasem gud mak blong hem, from we ol famle blong hem we oli Witnes, mo ol narafala long kongregesen oli bin givhan gud long hem. Oli halpem hem blong prij long olgeta haos wanwan, mekem ol visit, joen long ol Baebol stadi, mo tu long ol narafala haf blong wok blong prij. Sista ya i bin givhan blong statem ten Baebol stadi. Hem i talem se: “Taem mi tingtingbak long janis we mi bin gat blong joen long wok blong haftaem paenia, hat blong mi i fulap gud long lav mo tangkiu long Jeova, Pikinini blong hem, mo long gudfala ogenaesesen blong Hem. !Mi mi rili wantem talem se, ‘tangkiu Jeova!’”
6. ?Ol yangfala we oli baptaes finis mo oli skul yet, oli naf blong joen long wok blong haftaem paenia?
6 Yufala ol yangfala we yufala i baptaes finis mo yufala i stap skul yet, yufala tu i naf blong joen long wok blong haftaem paenia. Yufala i save mekem plan olsem olgeta ya we oli wok fultaem, mo yusum gud ol wiken blong joen long wok blong prij. Mo long sam dei, yufala i save mekem plan blong prij wan aoa afta skul. ?Olsem wanem? ?Yufala i save joen long wok blong prij long ol holide blong skul, mo long ol narafala holide tu? Sipos yufala i wantem joen long wok blong haftaem paenia, yu save storian wetem papa mama blong yufala long saed ya.
7. ?Ol elda oli save mekem wanem blong givhan long yumi blong stap glad long wok blong prij, long ol manis klosap long Memoriol?
7 Bildimap Glad: Sipos ol elda oli glad blong prij, eksampol blong olgeta i save givhan long kongregesen blong olgeta tu oli glad blong prij. (1 Pita 5:2, 3) Ol elda oli save stanemap sam narafala miting blong prij, maet long eli moning, afta skul, mo long sapa, blong olgeta we oli skul mo wok. Elda we i lukaot long wok blong prij i mas meksua se i gat ol pablisa we oli nafgud blong lidim wok blong prij, mo i gat plante teritori we bambae oli save prij long hem, mo plante buk mo magasin we bambae oli save yusum long taem blong spesel wok long ol manis ya.
8. ?Yumi lanem wanem from ol gudfala samting we i bin kamaot long wan kongregesen?
8 Long wan kongregesen, plante manis bifo long Memoriol, ol elda oli bin leftemap tingting blong ol brata mo sista, blong oli joen long wok blong haftaem paenia. Mo evri wik long taem blong miting, oli talemaot hamas pablisa oli fulumap pepa blong joen long wok blong haftaem paenia. Samting ya i leftemap tingting blong ol narafala we oli wantem mekem moa long wok blong prij, se ol paenia ya bambae oli givhan gud long olgeta. Long taem ya, ol elda oli bin stanemap ol narafala miting blong prij long eli moning mo long sapa, blong ol pablisa ya oli save joen long wok blong prij. Wan gudfala frut i bin kamaot se, long manis Eprel, i gat 53 pablisa we oli joen long wok blong haftaem paenia, hemia i klosap stret haf blong kongregesen ya.
9. ?From wanem ol manis bifo mo afta long Memoriol oli gudfala taem blong olgeta we oli naf blong talemaot gud nius oli kam pablisa?
9 Halpem Ol Narafala Blong Oli Prij: Sipos i gat ol niufala pablisa mo ol yangfala we oli naf blong kam pablisa, oli save prij wetem olgeta we oli pablisa longtaem finis. Ating bambae oli gat janis blong mekem olsem bifo no afta long Memoriol, from we hemia nao taem we plante long kongregesen bambae oli mekem moa long wok blong prij. ?Yu yu gat wan Baebol studen we i gohed gud, mo i stap mekem laef blong hem i laenap gud wetem ol stret rul blong Jeova? ?Ol papa mama, yufala i gat ol pikinini we oli no pablisa yet, be oli gat ol gudfala fasin mo oli stap gohed gud? Sipos oli talemaot long yufala se oli wantem kam pablisa we oli no baptaes yet, mo yufala i luk se oli naf, yufala i mas toktok wetem wan elda. Presiden elda bambae i talemaot long tu elda blong tufala i kam storian wetem pikinini blong yufala, no wetem studen blong yu.
10. ?Ol elda oli save mekem wanem blong halpem olgeta we oli no moa prij?
10 Long ol manis we oli stap kam, bambae i nambawan taem long olgeta we oli no moa prij, blong oli save prij wetem kongregesen bakegen. Ol elda we oli lukaot long ol buk stadi, mo ol narafala elda tu, oli mas traehad moa blong visitim olgeta ya we oli no moa prij, mo oli mas askem olgeta long kaen fasin sipos oli save prij wetem olgeta. Be sipos i gat sam brata we oli no moa prij longtaem, tufala elda i mas visitim olgeta fastaem blong luk sipos i no gat sam samting we i blokem olgeta blong oli no save prij.—km 11/00 p. 3.
11. ?Wanem nao beswan rod we i soem se “God i lavem yumi tumas, mo i stap mekem i gud tumas long yumi?”
11 Rere From Memoriol: Ransom i beswan rod we i soemaot se “God i lavem yumi tumas, mo i stap mekem i gud tumas long yumi.” (Wok 20:24) Plante milian man long olgeta ples long wol we oli gat tangkiu from ransom ya, bambae oli joen wanples long taem blong Memoriol blong tingbaot ded blong Kraes, we bambae i stap long Sarede, Maj 22, afta we san i godaon. Yumi save singaot olgeta we hat blong olgeta i stret, mo givhan long olgeta blong oli kam long impoten miting ya, we bambae i soemaot se Jeova i lavem yumi tumas mo i stap mekem i gud tumas long yumi.
12. ?Bambae yumi singaot hu blong oli kam long Memoriol?
12 Raetemdaon nem blong olgeta we yu wantem singaot olgeta blong oli kam long Memoriol. Maet yu wantem singaot ol famle, ol man raonabaot long yu, olgeta we yu wok wetem olgeta, ol fren long skul, ol Baebol studen, olgeta we yu bin stadi wetem olgeta bifo, mo ol narafala we yu stap visitim olgeta oltaem. Sipos oli askem kwestin long saed blong Memoriol, yu save yusum wan haf blong Diksonari long buk ya, Baebol Tijim, long pej 206-208, we i tokbaot Kakae Blong Masta. Taem yu soem buk ya we yumi stap mekem ol Baebol stadi long hem, maet bambae yu yu gat wan gudfala janis blong statem wan Baebol stadi.
13. ?Wanem blesing we Jeova i givim long tufala pablisa we tufala i traehad blong singaot plante narafala oli kam long Memoriol?
13 Wan sista i bin raetemdaon nem blong 48 famle we hem i wantem se oli kam long Memoriol. Afta we hem i givim wan pepa i go long wan famle, hem i putum mak long nem ya, mo i raetem dei we hem i givim pepa ya. Hem i stap mekem olsem long evri famle gogo hem i makemaot evri nem. Sista ya i glad tumas from we i bin gat 26 famle we hem i singaot olgeta oli kam long Memoriol. Wan brata we hem i gat wan stoa, hem i givim pepa long wan man we i wok long stoa blong hem. Man ya i wan pris bifo. Man ya i go long Memoriol, mo biaen i talem se: “Mi mi lanem plante moa save blong Baebol long wan aoa, i bitim ol 30 yia we mi stap long Katolik jos.” I no longtaem afta long Memoriol, pris ya i akseptem wan Baebol stadi long buk ya Baebol Tijim.
14. ?Wanem spesel wok we bambae i stat long Maj 1, long fulwol?
14 Spesel Wok Ya: Stat long Sarede, Maj 1, go kasem Maj 22, bambae yumi mekem wan spesel wok long ful wol, blong singaot ol man oli kam long Memoriol. Olgeta pablisa we oli naf blong joen long wok ya, oli save joen fulwan long spesel wok ya long fulwol. I impoten we yumi givim pepa stret long man blong haos, i bitim we yumi putum pepa long doa. Be sipos yumi stap long wan teritori we i bigwan tumas, mo yumi no save kavremap kwiktaem, maet ol elda oli save talem se yumi save putum wan pepa long ol haos we i no gat man, be long wan ples we ol man long rod oli no save luk. Long wiken, bambae yumi save givimaot ol niufala magasin tu long ol man.
15. ?Yumi save talem wanem, taem yumi singaot ol man oli kam long Memoriol?
15 Yumi no gat wan longfala taem blong singaot ol man oli kam long Memoriol, taswe tok blong yumi i mas sot nomo. Yumi mas kaen mo soemaot we yumi glad blong luk olgeta. Yumi save talem olsem: “Mifala i wantem singaot yu, famle blong yu, mo ol fren blong yu, blong yufala i kam long wan impoten miting we bambae i stap long Maj 22. Hemia pepa blong yu. Ol samting we yu wantem save, oli stap long pepa ya.” Sipos man blong haos i askem kwestin, no maet hem i soemaot se hem i glad blong kam, i gud blong raetemdaon nem blong hem wetem olgeta we oli soem intres, mo gobak visitim hem bakegen.
16. ?Wanem gudfala samting i kamaot, we i soemaot se i impoten blong singaot ol man oli kam long Memoriol?
16 Long yia 2006, wan man we i wan ami, i faenem wan pepa blong singaot ol man oli kam long Memoriol, long doa blong hem. Hem i gat tingting blong go, be fastaem, hem i mas askem long bos blong hem we i wan bigman long ami. Taem hem i soem pepa ya long bos blong hem, bos i no toktok. Biaen, bos i talem se papa mama blong hem tufala i Witnes blong Jeova, mo bifo, hem i bin go wetem tufala long ol miting. Gudfala samting we i kamaot se, soldia mo bos blong hem tugeta, oli go long Memoriol.
17. ?Yumi mekem wanem blong soemaot we yumi no letem gladhat blong God i go blong nating nomo?
17 Soemaot Se Yumi Gat Tangkiu: Naoia yumi kam klosap long manis blong Memoriol 2008, taswe yumi evriwan i mas tingbaot bakegen olsem wanem Jeova i lavem yumi mo i mekem i gud long yumi. Aposol Pol i talem se: “Mifala i talem long yufala bakegen, se God i givhan long yufala finis, long gladhat blong hem. Plis yufala i no letem gudfala wok ya blong hem i go blong nating nomo.” (2 Kor. 6:1) ?Olsem wanem yumi soemaot we yumi no letem gladhat blong God i go blong nating nomo? Pol i raetem se: “Long olgeta samting we mifala i mekem, mifala i stap soemaot we mifala i man blong wok blong God.” (2 Kor. 6:4) From we Jeova i givim nambawan presen ya long yumi, yumi save soem se yumi gat tangkiu taem yumi wokem ol gudfala fasin long laef blong yumi mo yumi gat strong tingting blong talemaot gud nius. Long ol manis bifo mo afta long Memoriol, yumi gat nambawan janis blong mekem moa long wok blong talemaot gud nius.
[Bokis blong pija long pej 3]
?Hu Olgeta Ya We Oli Save Joen Long Wok Blong Haftaem Paenia?
◼ Ol famle
◼ Olgeta we oli wok fultaem
◼ Ol olfala mo olgeta we oli stap siksik
◼ Ol yangfala we oli skul yet
[Bokis blong pija long pej 4]
Taem Yumi Singaot Ol Man Blong Oli Kam Long Memoriol:
◼ Toktok i mas sot mo yumi glad blong toktok
◼ Raetemdaon nem blong olgeta we oli soem intres
◼ Givimaot Wajtaoa mo Wekap! long ol wiken