Yumi Gat Janis Blong Prij Moa Long Ol Manis Klosap Long Memoriol
1. ?From wanem i gud we yumi tingbaot blong prij moa long manis Maj, Eprel, mo Mei?
1 ?Olsem wanem? ?Long yia ya, yu yu save mekem moa long wok blong prij long ol manis bifo mo afta long Memoriol? Sam pablisa bambae oli spel long wok blong olgeta mo long skul, mo oli save yusum taem ya blong prij. Stat long 2 Eprel, bambae yumi joen long wan spesel wok. Spesel wok ya i blong singaotem ol man we oli intres, blong oli kam long Memoriol long 17 Eprel. Mo afta, bambae yumi gobak blong luk ol man we oli bin kam long Memoriol, mo yumi traehad blong pulum tingting blong olgeta i go moa long Baebol. Mo tu, bambae yumi singaotem olgeta blong oli kam lesin long spesel tok we bambae i stap long wik blong 25 Eprel. Yes, i gat plante risen from wanem i gud we yumi tingbaot blong prij moa long manis Maj, Eprel, mo Mei.
2. ?Wanem wan nambawan rod blong prij moa?
2 Wok Blong Haftaem Paenia: Wan nambawan rod blong prij moa, hemia blong mekem wok blong haftaem paenia. From we yumi evriwan i bisi, plante taem yumi mas mekem plan fastaem, mo yumi mas jenisim sam samting long program blong yumi. (Prov. 21:5) Maet blong smoltaem, yu mas lego sam wok we yu stap mekem oltaem mo we oli no impoten tumas. (Fil. 1:9-11) I gud yu tokbaot long ol narafala long kongregesen se yu wantem mekem wok blong haftaem paenia, blong luk sipos sam narafala oli wantem mekem wok ya tu.
3. ?Ol famle oli save mekem wanem blong oli save prij moa?
3 Long nekis wik, taem yufala i mekem Famle Wosip blong yufala, i gud we yufala evriwan long famle, yufala i tokbaot mak ya. (Prov. 15:22) Sipos evriwan long famle oli wok wetem wan tingting, maet sam long famle oli save mekem wok blong haftaem paenia long wan manis, no maet moa long wan manis. ?Be olsem wanem sipos yufala i luk se i no gat rod blong yufala i mekem wok ya? Famle blong yufala i save mekem plan yet blong prij moa long sam sapa, no blong prij longtaem moa long ol wiken.
4. ?Long ol manis klosap long Memoriol, wanem ol blesing we bambae yumi kasem sipos yumi prij moa?
4 Jehova i luk olgeta samting we yumi lego, blong yumi save mekem moa long wok blong hem, mo hem i glad from ol samting ya. (Hib. 6:10) Sipos yumi givim taem mo paoa blong yumi long Jehova mo yumi givhan long ol narafala, bambae yumi glad we yumi glad. (1 Kron. 29:9; Wok 20:35) ?Olsem wanem? ?Yu yu save prij moa long ol manis klosap long Memoriol mo kasem bigfala glad mo plante blesing?