?Bambae Yu Yu Mekem Wok Blong Haftaem Paenia?
1. Taem blong Memoriol i wan gudfala taem blong prij moa. ?From wanem?
1 Taem blong Memoriol i wan gudfala taem blong prij moa. Long taem ya, yumi stap tingbaot we Jehova i lavem yumi tumas, nao hem i givim Pikinini blong hem blong i ded from yumi. (Jon 3:16) Yumi wantem talem tangkiu long hem. Yumi wantem tumas blong tokbaot Jehova long ol narafala, mo blong talem long olgeta ol samting we hem i stap mekem blong ol man. (Aes. 12:4, 5; Luk 6:45) Mo tu, long taem blong Memoriol, yumi joen long wan spesel wok blong singaot ol man oli kam long miting ya. Afta, yumi givhan moa long olgeta we oli kam. ?Olsem wanem? ?Bambae yu yu traehad blong prij moa long trifala manis ya Maj, mo Eprel, mo Mei? ?Bambae yu yu joen long wok blong haftaem paenia?
2. Manis Maj i wan gudfala manis blong mekem wok blong haftaem paenia. ?From wanem?
2 Yu Save Mekem Se Manis Maj i Spesel: Manis Maj i wan gudfala manis blong mekem wok blong haftaem paenia. Yu save mekem 30 aoa no 50 aoa, i stap long yu nomo. Sipos eria elda i visitim kongregesen long Maj, ol haftaem paenia oli save joen long ful miting we hem i mekem wetem ol fultaem paenia mo ol spesel paenia. Mo tu, long namba 1 Maj, bambae yumi statem spesel wok ya blong singaot ol man oli kam long Memoriol long Tusde, 26 Maj 2013. Long yia ya, bambae wok ya i longfala moa i bitim ol narafala yia. Mo tu, i gat faef wiken long Maj. I gud yu traem mekem plan blong joen long wok blong haftaem paenia, mo yu mekem manis ya i kam wan spesel manis.
3. ?Yu save mekem plan olsem wanem blong prij moa?
3 I Gud Yu Mekem Plan Naoia: Naoia i stret taem blong yu tingting gud long program blong yu. Yu save tingbaot wanem samting we yu mas jenisim blong yu save mekem wok blong haftaem paenia. Evriwan long famle oli mas wok blong mekem plan ya i kamtru. Taswe long Famle Wosip blong yufala, i gud yufala i tokbaot wanem we yufala wanwan i wantem mekem, mo yufala i mekem wan program. (Prov. 15:22) Sipos yu yu no naf blong mekem wok blong haftaem paenia, yu no mas harem nogud. Long ol dei we oltaem yu stap prij long olgeta, maet yu save spenem sam aoa moa long wok blong prij. Sipos no, maet yu save ademap wan dei bakegen long program blong yu blong prij.
4. ?Sipos yumi prij moa long trifala manis ya, bambae yumi kasem wanem blesing?
4 Sipos yumi prij moa long trifala manis ya Maj, mo Eprel, mo Mei, bambae yumi luk we yumi glad moa, mo yumi harem gud tumas blong mekem wok blong Jehova mo blong givhan long ol narafala man. (Jon 4:34; Wok 20:35) Samting we i moa impoten, se taem yumi lego samting blong mekem wok blong Jehova, yumi mekem hem i glad tumas.—Prov. 27:11.