Yu Mekem Plan Naoia Blong Yu Prij Moa
1. ?Wanem i impoten long ol manis klosap long Memoriol? ?Mo yumi save rere from samting ya olsem wanem?
1 Evri yia, long ol manis klosap long Memoriol, yumi gat plante moa janis blong “talem tangkiu tumas long Hae God.” (Sam 109:30) ?Olsem wanem? ?Bambae yu yu prij moa long manis Maj, from we yu wantem talem tangkiu long God ya we i givim ransom blong pemaot yumi? Ale, i gud yu stat naoia blong mekem ol plan blong yu.—Prov. 21:5.
2. ?Yu wetem ol narafala, yufala i mekem wanem taem aoa we ol haftaem paenia oli mas kasem long manis Eprel, i godaon?
2 Haftaem Paenia: Las yia, ol kongregesen oli glad tumas taem oli harem se aoa we ol haftaem paenia oli mas kasem long manis Eprel, i godaon. Wan brata i raetem se: “Mi mi stap yet long hae skul, mo i no isi blong mi mekem wok blong fultaem paenia. Be long manis Eprel, bambae mi fulumap pepa blong 30 aoa, mo bambae mi traehad blong kasem 50 aoa.” Wan sista we i wok evri dei, i raetem se: “!Toti aoa! !I isi nomo blong kasem aoa ya!” Taem ol elda oli talemaot niufala plan ya long kongregesen, wan olfala sista we i gat 80 yia, mo we i paenia bifo, i talem se: “!Hemia nao samting we mi stap wet long hem! !Jehova i save se samting we mi laekem moa long laef blong mi, hemia wok blong paenia!” Ol narafala we oli no save mekem wok blong haftaem paenia, oli plan blong prij moa.
3. ?From wanem i gud yumi mekem haftaem paenia long manis Maj, Eprel, mo Mei?
3 Manis Maj i wan nambawan manis blong mekem wok blong haftaem paenia, from we bambae yumi gat janis bakegen blong kasem 30 aoa no 50 aoa. Mo tu, stat long Sarede 17 Maj, bambae yumi joen long spesel wok ya blong singaotem ol man oli kam long Memoriol long namba 5 Eprel. Plante pablisa bambae oli glad tumas long wok we oli mekem taem oli prij moa, ale bambae oli wantem kam haftaem paenia tu long manis Eprel mo Mei, blong kasem 50 aoa.
4. ?Yumi save mekem wanem blong yumi prij moa? ?Wanem frut bambae i kamaot from?
4 Long nekis Famle Wosip blong yufala, i gud yufala evriwan i tokbaot samting we yufala i save mekem, blong yufala i prij moa long ol manis klosap long Memoriol. (Prov. 15:22) I gud yu askem long Jehova blong hem i blesem yu taem yu traehad blong prij moa. (1 Jon 3:22) Sipos yu prij moa, bambae yu presem Jehova moa. Be i no hemia nomo. Bambae yu mekem se glad blong yu tu i kam bigwan moa.—2 Kor. 9:6.