“Niu Mileniam—?Wanem Fiuja Blong Yu?”
1 Kwestin ya i stap long tingting blong ol man raonabaot long wol. I tru se long ol handred yia we oli pas, ol man oli mekem plante bigfala samting. Be, plante man oli lusum hop from we ol bigfala problem we oli mekem hadtaem long laef blong olgeta blong plante taosen yia finis, oli stap yet. (Job 14:1; Sam 90:10) ?Man i save faenem rod blong harem gud long weples?
2 Long manis blong Oktoba mo Novemba, bambae yumi gat spesel janis ya blong givhan long ol man raonabaot long yumi blong kasem ansa blong kwestin ya. ?Bambae yumi mekem samting ya olsem wanem? Taem yumi seremaot Kingdom Nius No. 36. Hem i karem stamba tok ya se “Niu Mileniam—?Wanem Fiuja Blong Yu?” Long stat blong Oktoba, bambae yumi seremaot Wajtaoa mo Wekap! Ale, long Mande, Oktoba 16, i go kasem Fraede, Novemba 17, bambae yumi joen long bigfala wok ya blong seremaot Kingdom Nius No. 36. Long spesel taem ya, bambae yumi seremaot Kingdom Nius No. 36 hem wan nomo long ol dei blong wik. Ale, long ol wiken bambae yumi seremaot pepa ya wetem ol magasin tu.
3 ?Bambae Yu Joen Fulwan Long Wok Ya? Ol elda, man blong givhan, mo paenia bambae oli rere blong lidim spesel wok ya, from we olgeta nao oli mas soem eksampol long saed ya. Plante pablisa oli mekem plan finis blong joen long wok blong haftaem paenia long wan long tufala manis ya, no long tufala manis ya tugeta. Sam narafala pablisa oli mekem plan blong spenem moa taem long wok ya i bitim ol narafala taem.
4 Ol brata we oli lukaot long ol Buk Stadi long Kongregesen, oli save givhan bigwan blong leftemap tingting blong evri memba blong grup blong olgeta blong oli joen fulwan long wok ya blong seremaot Kingdom Nius No. 36. Maet i gat sam pablisa we oli no moa joen long wok blong prij longtaem. Ol elda oli save visitim olgeta ya blong luk wanem we maet oli save mekem blong halpem olgeta. Maet oli save mekem plan se wan pablisa we i gat gudhan long wok blong prij i tekem hemia we i no moa prij i go wetem hem long tufala spesel manis ya. Wok blong seremaot Kingdom Nius No. 36 maet hemia nao samting we i nidim blong givim paoa bakegen long ol pablisa ya we oli no moa prij.
5 Ol Baebol studen we klosap oli finisim Save buk, mo we oli naf finis blong kam ol pablisa we oli no baptaes yet, oli gat janis long spesel taem ya blong stat joen long wok blong prij. Ol yangfala tu oli save joen moa long gudfala wok ya.
6 Wan sotfala fastok we i isi, hemia nomo samting we yu nidim. Maet yu talem se:
◼ “Mi glad blong yusum taem blong mi fri nomo, blong seremaot wan pepa we mesej blong hem i impoten tumas long evri famle long [talem nem blong taon no kantri]. Hemia wan kopi blong yu. Plis yu ridim pepa ya.” Ating i gud sipos yumi no karem wan basket blong prij taem yumi joen long wok ya blong seremaot Kingdom Nius No. 36.
7 Ol Miting Blong Prij We Yumi Reremgud: Ol elda oli mas meksua se ol plan blong prij oli stret long olgeta man mo oli wokgud. Brata we i lukaot long wok blong prij, hem i mas meksua se i gat inaf teritori long ol haos wanwan mo long ol stoa blong bambae evriwan i save joen fulwan long wok ya. Long enitaem we i stret, i mas gat plan blong gat ol miting blong prij long evri dei blong wik, long ol wiken, mo long sapa. I gud blong mekem plan long let aftenun blong mitim ol studen long skul, ol man we oli wok, mo ol narafala man bakegen.
8 Yumi Mekem Wanem Taem i No Gat Man Long Haos: Mak blong yumi hem i blong toktok wetem evri man we yumi save kasem. Sipos i no gat man long haos taem yu pas, makem haos ya mo kambak long wan narafala taem long dei. Nao, sipos long laswan wik blong spesel wok ya yu no kasem wan man long haos ya yet, maet yu save putum wan kopi blong Kingdom Nius No. 36 i stap long haos ya, long wan ples we ol man long rod bambae oli no save luk. Long ol teritori we oli stap longwe no long ol ples we teritori i bigwan tumas, ol elda oli save givim advaes long kongregesen blong oli putum wan kopi blong Kingdom Nius No. 36 i stap long eni haos we oli no faenem man long hem fastaem.
9 !Yumi Mas Bisi! Ol kongregesen oli mas traehad blong kavremap fulwan teritori blong olgeta bifo we spesel wok ya i kasem en blong hem long Novemba 17. Sipos teritori blong yu i bigwan lelebet, maet sam pablisa oli save wok wanwan, long ol ples we i sef blong mekem olsem. Long rod ya maet oli save kasem plante moa man we oli stret blong kasem trutok. Meksua se yu makem olgeta man we oli soem bigfala intres long nius ya.
10 Ol elda oli mas tingbaot hamas moa magasin we bambae kongregesen i nidim mo pasem wan oda folem nid ya. I no nid blong odarem Kingdom Nius No. 36, from we oda i stap finis blong olgeta kongregesen. Ol wanwan spesel, fultaem, mo haftaem paenia bambae oli kasem 250 kopi blong pepa ya blong seremaot, mo ol wanwan pablisa bambae oli save kasem 70 kopi. ?Yu yu rere mo yu wantem tumas blong joen long spesel wok ya? !Hem i rili wan blesing long yumi blong talemaot long ol man raonabaot long yumi wanem we God i promes blong mekem i no longtaem!