Seremaot Kingdom Nyus Namba 35 Long Evri Ples
1 Bambae yumi evriwan i bisi tumas long manis Oktoba mo Novemba. Long Oktoba 1 kasem 11, bambae yumi seremaot ol Wajtaoa mo Wekap! Stat long Sande, Oktoba 12 go kasem Sande, Novemba 16, bambae yumi joen long wan wok we i gohed long olgeta ples blong wol, hemia blong seremaot Kingdom Nyus Namba 35. Yumi gat bigfala blesing ya blong karem wan impoten mesej long ol man long ples blong yumi. Mesej ya hem i ansa blong kwestin ya: “?I Save Gat Wan Taem We Olgeta Man Bambae Oli Laeklaekem Olgeta?” Long spesel taem ya, bambae yumi seremaot Kingdom Nyus Namba 35 long ol dei blong wik. Long ol wiken, bambae yumi seremaot ol nyufala Wajtaoa mo Wekap! wetem Kingdom Nyus tu.
2 ?Hu i Gat Raet Blong Joen Long Wok Ya? Olsem oltaem, ol elda bambae oli lidim wok ya. Olgeta evriwan oli haremgud blong seremaot Kingdom Nyus, mo i sua se plante pablisa bambae oli fulumap pepa blong kam haftaem paenia long wan no tufala manis blong spesel wok ya. Ol narafala pablisa bambae oli glad blong spenem moa taem long wok blong prij i bitim wanem we oli mekem long ol narafala manis.
3 ?Yu yu stap stadi Baebol wetem wan man we i finisim bighaf blong Save buk finis, mo we i no longtaem bambae hem i naf blong joen long wok blong prij? Maet hem i save kam wan pablisa we i no baptaes, mo joen long wok blong seremaot Kingdom Nyus. Yumi nidim blong talem sam isi tok nomo blong seremaot traket ya. Eksampel, yu save talem se: “Mesej ya i impoten tumas, taswe long manis ya, mifala i stap seremaot pepa ya long olgeta ples blong wol long 169 lanwis. Mi glad blong givim hemia long yu.” Ol yangfala pikinini tu oli save joen long wok ya we i givim bigfala glad.
4 Ol brata we oli lidim wan Buk Stadi long kongregesen, oli mas traem pulum ol wanwan man long grup blong olgeta blong joen fulwan long wok ya blong seremaot Kingdom Nyus Namba 35. Mo tu, maet i gat sam pablisa we oli no moa prij blong longtaem lelebet, be we oli save prij bakegen sipos narafala i leftemap tingting blong olgeta. Bifo we spesel wok ya i stat, ol elda oli mas go luk ol pablisa we oli slak olsemia, mo luksave wanem we oli save mekem blong givhan long ol pablisa ya blong joen long spesel wok ya wetem wan brata no sista we i stap prij longtaem finis.
5 ?Yumi Save Prij Wetaem? Blong mekem bigfala wok ya, i nidim se ol plan blong prij long kongregesen oli mas stret mo gud long evriwan. Sipos i gat rod, i gud blong mekem wan miting blong prij long ol wanwan dei blong wik, long wiken, mo long sapa. Ol miting ya blong prij oli mas stap long wan taem we i mekem se ol pablisa mo paenia oli save yusum olgeta taem we oli bin makemaot blong prij. Mo tu, i save gat ol miting blong prij long sapa blong givhan long ol studen long skul, olgeta we oli wok, mo sam narafala bakegen. Elda we i lukaot long wok blong prij i mas meksua se i gat plante teritori blong prij long olgeta haos wanwan mo long ol stoa mo ofis tu. Olsem nao, evriwan oli save joen fulwan long wok ya. Sipos plante pablisa oli wok wanples, oli mas luksave wanem namba blong man i waes blong putum long wan teritori.
6 ?Olsem Wanem Long Ol Haos We Oli No Gat Man? Yumi wantem mitim olgeta man mo eksplenem from wanem oli mas ridim Kingdom Nyus Namba 35. Taswe, sipos i no gat man long haos, raetemdaon adres mo gobak long wan narafala taem. Sipos laswan wik blong spesel wok ya i kamtru be yu no mitim wan man long ol haos ya yet, yu save livim wan Kingdom Nyus i stap kolosap long doa, long wan ples we ol man we oli pas long rod oli no save lukluk. Long taon, yu no mas fogetem blong seremaot Kingdom Nyus long ol wanwan man we oli stap wokbaot long rod. Long bus mo long ol ples we yumi no save prij plante taem long olgeta long spesel wok ya, yu save livim wan Kingdom Nyus long haos we i no gat man, long faswan taem we yu prij long haos ya.
7 ?Yumi Wantem Kasem Wanem Mak? Ol kongregesen oli mas traehad blong yusum olgeta Kingdom Nyus we oli gat, blong wokem olgeta teritori blong kongregesen bifo we spesel wok ya i finis long Novemba 16. Sipos teritori blong kongregesen i bigwan, i gud blong wok wanwan i bitim we yufala i go tutu, sipos i sef blong mekem olsem. Samting ya bambae i mekem se olgeta evriwan oli gat jans blong toktok wetem plante man we oli laekem mesej ya blong gud nyus. (Mat. 10:11) Maet i gud blong karem sam traket ya long han blong yu mo wan Baebol long poket no long wan smol basket blong yu, i bitim we yu yusum wan bigfala basket blong prij. Yu mas meksua se yu raetemgud nem blong olgeta man we oli soem intres.
8 ?Yu Yu Rere Blong Stat? Ol elda oli mas kaontem hamas moa Wajtaoa mo Wekap! bambae oli nidim, mo oli mas jenisim oda blong olgeta folem namba ya. Yufala i no nidim blong odarem Kingdom Nyus Namba 35, from we bambae Sosaeti i sanem wan stret namba long ol wanwan kongregesen. Ol spesel, fultaem, mo haftaem paenia bambae oli kasem 250 traket blong seremaot. Ol wanwan pablisa long kongregesen bambae oli kasem 50. Yumi gat wan bigfala wok blong mekem. ?Yu yu glad blong joen long nambawan wok ya? I sua se yu glad tumas. !Yumi mas seremaot impoten mesej long Kingdom Nyus Namba 35 we i stanap long Baebol, long olgeta man we yumi save mitim!