Ansa Long Wan Kwestin

◼ ?I gud blong tingbaot wanem samting long saed blong ridim ol haf blong Wajtaoa mo ol buk long ol miting?

Bighaf blong taem we yumi spenem long Wajtaoa Stadi mo long Buk Stadi, i blong ridim ol haf. Samting ya i minim se brata we i ridim ol haf ya i gat bigfala wok blong mekem olsem wan tija. Hem i mas rid long fasin we i ‘givim mining’ long ol tok we hem i stap ridim. Olsem nao, ol man we oli stap lesin bambae oli kasem save, be tu, bambae ol tok ya i pusum olgeta blong mekem wok. (Neh. 8:⁠8) Taswe, hemia we i ridim ol haf i mas reregud long wok ya. (1 Tim. 4:​13; lukluk stadi 6 blong School Guidebook.) Hemia nao sam impoten samting blong mekem ol tok we hem i ridim i karem mining.

Makemgud sam wod. Traem luksave bifo long miting wanem ol tok we yu mas makemgud, blong mekem se stret mining i kamaot klia.

Talem ol wod long stret fasin. Talem ol tok long fasin we i stret mo klia. Yu mas mekem olsem, blong halpem ol man we oli lesin, blong oli kasem save long olgeta tok we i stap insaed long buk. Jekem mining blong ol tok we yu no save olgeta no yu no yusum oltaem, long diksonari.

Tok long bigfala voes mo wetem laef. Taem yu tok long bigfala voes mo wetem laef, samting ya i wekemap intres blong ol man, i pulum filing blong olgeta, mo i pusum olgeta blong tekem aksin.

Tok wetem filing mo long fasin blong storeyan. Yu mas save olsem wanem blong ridgud, blong mekem se yu save rid long sem fasin olsem we yu storeyan nomo. Sipos yu reregud mo yu ridim bakegen mo bakegen, bambae yu save rid long isi fasin. Samting ya bambae i mekem se ol man oli glad blong lesin, mo oli no les.​—Hab. 2:⁠2.

Ridim ol tok stret olsem oli bin raetem. Oltaem i gud blong ridim ol futnot mo ol save we i stap insaed long ol braket, sipos i blong halpem ol man blong kasem moa klia, mining blong haf ya. Be yu no nid blong ridim ol tok we i jes talem ples we ol save ya i kamaot long hem. Yu mas ridim futnot taem paragraf i tokbaot futnot ya. Yu save talem nomo se: “Futnot i talem olsem . . .” Afta we yu ridim, gohed long las haf blong paragraf.

Taem wan man i rid gud long fored blong ol man, hemia wan impoten rod blong ‘tijim ol narafala blong obei long ol tok’ we Bigfala Tija i talem long yumi.​—Mat. 28:⁠20.