Toktok Long Prapa Fasin Blong Yu

SIPOS yu toktok long prapa fasin blong yu, sloslo ol narafala bambae oli trastem yu. Yu traem tingbaot: ?Bambae yu yu trastem toktok blong wan man we i putum wan giaman fes? Ating nogat. ?Bambae yu yu trastem hem sipos giaman fes ya i moa naes i bitim prapa fes blong hem? Nogat. Taswe, yu no mas giaman, yu mas toktok long prapa fasin blong yu.

Sipos yu toktok long prapa fasin blong yu, hemia i no min se toktok blong yu i olbaot, olsem we yu no kea long fasin blong yu blong toktok. Yu mas lukaot gud yet blong folem ol rul blong lanwis blong yu, yu talem gud ol wod, mo yu openem gud maot blong yu. Yu no mas yusum ol toktok blong rod. Oltaem toktok mo fasin blong yumi i mas pulum narafala blong i respektem yumi. Man we i toktok long prapa fasin blong hem, i no toktok olsem we i stap long fored blong wan haeman, mo i no wari tumas se hem i mas toktok long fasin we i mekem ol narafala oli glad long hem.

Long Wok Blong Prij. ?Olsem wanem? Taem yu yu stap wokbaot i go long wan haos long wok blong prij, no yu go klosap long wan man we yu wantem prij long hem long rod, ?yu harem se yu stap seksek smol? Bighaf blong yumi i olsem, mo i had blong samfala oli winim fraet ya. Sipos yu taetem yu, voes blong yu i save kam narakaen no maet i seksek. Mo maet yu muvum han mo hed blong yu long fasin we i narakaen.

I gat plante risen from wanem wan pablisa i save gat problem ya. Maet hem i stap wari long tingting blong ol man, no i stap tingbaot ol tok blong hem se bambae i gud no nogat. I no rong blong tingbaot ol samting ya, be problem i save kamaot sipos yu tingting tumas long saed ya. Sipos yu seksek taem yu stap prij, ?wanem i save givhan long yu? Yu mas rere gud, mo tu, yu mas prea long Jehova wetem fulhat blong yu. (Wok 4:29) I gud yu tingbaot bigfala sore we Jehova i gat, taem hem i givim janis long ol man blong oli laef olwe long Paradaes wetem wan bodi we i strong. Yu tingbaot olgeta we yu stap traehad blong givhan long olgeta, mo yu tingbaot we oli nidim tumas gud nius ya.

Yu mas rimemba tu se, wok blong yu i blong prij nomo long ol man. Olgeta ya oli fri blong jusum rod we bambae oli folem. Taswe, oli save jusum blong lesin taem yu prij long olgeta no oli save jusum blong no lesin. Samting ya i sem mak long ol man Isrel we Jisas i prij long olgeta. (Mat. 24:14) Nating sipos man i no wantem storian wetem yu, be taem hem i luk yu yu stanap long doa blong hem, hemia nomo i naf blong givim witnes long hem. Yu yu win finis, from we yu letem Jehova i yusum yu blong mekem wok blong hem. Be sipos yu gat janis blong storian wetem wan man, ?bambae yu toktok olsem wanem? Yu mas lanem blong tingbaot nid blong ol narafala, olsemia, ol man bambae oli glad long ol tok blong yu, mo bambae yu toktok long prapa fasin blong yu.

Taem yu tokbaot trutok long wan man, nao ol aksen mo ol tok blong yu oli olsem we yu stap mekem evri dei, man ya bambae i no fraet blong storian wetem yu. Ating bambae hem i glad tu blong lesin long ol tingting blong Baebol we yu wantem serem wetem hem. I nogud yu mekem olsem we yu stap givim wan pablik tok long hem, yu mas storian nomo. Yu toktok long hem olsem wan fren. Yu soemaot se yu wantem save gud hem, mo yu talem tangkiu long hem from ol samting we hem i talem. Long sam kantri, man we i toktok long wan strenja i mas mekem sam fasin blong soemaot respek. Sipos i olsem long ples blong yu, yu mas folem ol fasin ya. I gud tu se oltaem yu rere blong smael mo soemaot glad long fes blong yu.

Long Miting. Taem yu stap toktok long wan grup, long taem ya tu, i moa gud yu toktok long prapa fasin blong yu. I tru, sipos grup ya i bigwan, bambae yu mas putum moa paoa long voes blong yu. Be sipos yu traem lanem tok blong yu baehat, no sipos yu raetem evri wod blong hem, ating bambae yu wari tumas blong talem ol stret wod. Ol stret wod oli impoten, be sipos yu wari tumas long olgeta, bambae yu no save toktok long prapa fasin blong yu. Yu mas tingting gud fastaem long ol poen we yu wantem talem, mo taem yu stap mekem tok blong yu, yu mas tingting moa long ol poen ya i bitim ol stret wod we yu talem.

Sem mak taem wan brata i askem sam kwestin long yu antap long stej. Yu mas rere gud, be i nogud blong ridim ol ansa no lanem olgeta baehat. Taem yu toktok, i gud yu jenisim voes blong yu olsem we yu stap toktok evri dei, nao ol man bambae oli glad blong lesin long ol ansa blong yu.

Nating se yu folem ol gudfala fasin blong toktok, be sipos yu bitim mak, ol man we oli lesin bambae oli luk se hemia i no prapa fasin blong yu blong toktok. Yu traem tingbaot fasin blong toktok klia mo talem gud ol wod. Sipos yu bitim mak, bambae yu no moa toktok long prapa fasin blong yu. Taem yu muvum han mo bodi blong yu long stret fasin blong givim paoa long tok blong yu no blong eksplenem wan samting, yu mekem tok blong yu i laef. Be sipos yu bitim mak no yu mekem long fasin we i no prapa fasin blong yu, bambae yu pulum tingting blong ol man i gowe long samting we yu stap talem. Voes blong yu tu i mas strong taem yu toktok, be i no mas bigwan tumas. Mo i gud we samtaem yu toktok wetem glad, be yu no mas bitim mak nao i kam olsem we yu stap mekem sinema. Taem yu jenisim voes blong yu, mo yu glad blong toktok, mo yu soemaot ol defren fasin long voes blong yu, yu no mas pulum tingting blong ol man i kam long yu nomo, mo yu no mas mekem olgeta oli sem.

Prapa fasin blong samfala i blong talem evri tok i stret gud. Maet oli toktok olsem evri dei, i no long taem we oli stap givim tok nomo. Sam narafala oli no talem evri tok i stret gud olsem. Samting we i impoten, se yu mas toktok gud evri dei mo yu mas mekem ol gudfala Kristin fasin we oli pulum ol narafala blong oli respektem yu. Nao taem yu mekem wan tok long miting, bambae i isi moa blong yu toktok mo mekem aksen long prapa fasin blong yu.

Taem Yu Rid Long Fored Blong Ol Man. Taem yu rid long fored blong ol man, i no isi blong toktok long prapa fasin blong yu. Blong rid long prapa fasin blong yu, yu mas luksave ol bigfala tingting insaed long riding blong yu mo ol tok we i mekem ol tingting ya oli kamaot. Ol bigfala tingting ya oli mas stap klia long maen blong yu. Sipos oli lus, bambae yu stap ridim ol wod nomo, be bambae oli no gat bigfala mining. I gud yu jekem ol wod we yu no save olgeta, mo yu faenemaot stret rod blong talem. Yu mas rid plante long bigfala voes, nao bambae yu lanem blong jenisim voes blong yu, mo yu luksave ol wod we yu mas ridim olsem wan grup blong mekem ol tingting oli kamaot klia. I gud yu ridim bakegen mo bakegen gogo riding blong yu i rongud. Yu mas kasem save gud long stori long riding blong yu, nao taem yu rid long bigfala voes, bambae i olsem se yu stap storian long wan man we yu glad blong toktok long hem. Hemia nao prapa fasin blong yu blong toktok.

Bighaf blong ol riding we yumi mekem long fored blong ol man, oli kamaot long ol buk blong yumi we oli tokbaot Baebol. Yumi mekem ol riding long Tiokratik Skul, mo yumi ridim ol vas long wok blong prij mo taem yumi mekem wan tok long miting. Sam brata oli ridim ol haf long Wajtaoa Stadi mo Baebol Stadi Blong Kongregesen. Long distrik asembli, sam brata we oli naf, oli mekem wan tok we oli ridim nomo. Nating se yu stap ridim Baebol no wan narafala pepa no buk, be taem yu ridim toktok blong wan man, yu mas rid long fasin we i laef. Sipos yu ridim toktok blong plante defren man, i gud yu jenjenisim voes blong yu lelebet. Be lukaot: Yu no mas bitim mak mo mekem olsem we yu stap long wan muvi. Yu mas mekem riding blong yu i laef, mo yu mas rid long prapa fasin blong yu.

Taem yu rid long prapa fasin blong yu, riding blong yu i olsem we yu stap storian nomo. Yu no stap mekem wan giaman fasin, mo riding blong yu i soemaot bilif.