Toktok Olsem We Yu Storian Nomo

OL MAN oli no fraet blong toktok wetem ol fren blong olgeta. Oli no nid blong tingting tumas long ol tok we bambae oli talem, toktok i kamaot isi nomo. Sam man, toktok blong olgeta i laef. Sam narafala, oli toktok long fasin we i kwaet moa. Nating se i olsem wanem, taem oli toktok olsem we oli storian nomo, ol man oli glad blong lesin.

Taem yumi toktok long wan strenja, i no stret blong toktok olsem we hem i wan fren blong yumi finis mo yumi save gud hem. Long sam kantri, i gat sam spesel tok we man i mas talem blong statem wan storian wetem ol strenja. Afta we man i talem ol tok ya blong soemaot respek, maet hem i luksave se i gud blong jenisim toktok blong hem blong mekem i kam olsem we i storian nomo.

Taem yu givim wan tok long miting nao yu toktok olsem we yu storian nomo, long taem ya tu yu mas lukaot gud. Sipos yu bitim mak, maet i luk olsem se yu no tinghae long Kristin miting mo long ol tok we man i mas tinghevi long hem. Long sam lanwis, man i mas yusum sam spesel tok taem i toktok long wan olfala, wan tija, wan haeman, no papa mama blong hem. (Traem luk Ol Wok 7:2 mo Ol Wok 13:16.) Be man ya i yusum tok we i defren olgeta taem hem i toktok long woman blong hem no long wan gudfala fren. Taem yu mekem wan tok long kongregesen, i no nid blong yu yusum ol spesel tok olsem. Mo nating se yu toktok olsem we yu storian, yu no bitim mak. Ol tok blong yu oli mas soemaot respek.

I gat sam samting we oli save mekem se yu no stap toktok olsem we yu storian nomo. Wan samting, hemia fasin blong yu blong joenem ol tok oli kam wan ful toktok, no blong joenem ol wod long grup. Trabol i save kamaot taem yu traem talem ol tok stret olsem we i stap long wan buk no wan pepa. Klosap oltaem, yumi raetem ol tok i defren long fasin we yumi talem. I tru, taem yu lukaot moa save blong yusum long wan tok, klosap oltaem yu lukaot save ya long ol buk. Sipos no, yu yusum wan plan we oli raetem ol tingting long hem finis. Be sipos yu talem ol tingting ya stret olsem we oli raetem, no sipos yu ridim olgeta nomo long plan blong tok, bambae yu no toktok olsem we yu storian. Sipos yu wantem toktok olsem we yu storian, yu mas yusum ol prapa tok blong yu blong talemaot ol tingting. Mo yu no mas yusum ol longfala toktok we i mekem tingting blong man i fasfas.

Wan narafala samting se yu mas jenisim spid blong yu blong toktok. Sipos yu gohed blong toktok nomo long sem spid oltaem, bambae ol toktok blong yu i no olsem storian. Taem yumi stap storian, samtaem yumi tok spid, samtaem yumi slodaon, mo plante taem yumi spel, maet blong smoltaem no blong longfala taem lelebet.

Taem yu toktok long plante man wantaem, yu save mekem yet long fasin we yu storian nomo, be yu mas mekem voes blong yu i strong moa, i gat moa paoa, mo yu mas glad blong toktok. Olsem nao, bambae ol man oli lesin gud long yu.

Sipos yu wantem se, long wok blong prij, yu toktok olsem we yu stap storian nomo, ale yu mas toktok long fasin ya evri dei. I no nid blong yu skul gud blong mekem olsem. Be i gud yu wokem fasin blong toktok we bambae i pulum ol narafala blong oli lesin wetem respek. Taswe, yu mas lukluk ol advaes biaen, mo yu traem luk weswan long ol poen ya we yu yu mas wok long hem, long toktok blong yu evri dei.

1.  Yu meksua se yu talem ol tok we oli folem ol rul blong lanwis blong yu, mo yu no toktok olsem ol man we oli no folem ol fasin blong God. Advaes blong Kolosi 3:8 i talem se yumi no mas talem ol raf tok mo ol doti tok. Be sipos yu yusum sam isi tok we yu stap yusum evri dei, i oraet nomo. Ol tok ya oli olsem storian nomo, be oli laenap wetem ol rul blong lanwis blong yu.

2.  Yu no yusum sem tok bakegen mo bakegen blong talem ol defren tingting. Yu yusum ol wod we oli stret blong talemaot mining we yu wantem givim.

3.  Fastaem yu mas gat klia tingting long samting we yu wantem talem, nao biaen yu stat blong toktok. Olsemia, bambae yu no talem sam tok, nao yu gobak long stat mo talem sem tok bakegen.

4.  Yu no toktok tumas mo kavremap ol gudfala tingting we yu wantem givim. Yu mas lanem blong yusum ol isi tok blong talemaot klia ol poen ya we yu wantem se ol man oli holem long tingting blong olgeta.

5.  Yu toktok long fasin we i soemaot respek long ol narafala.