Ansa Long Wan Kwestin
◼ Taem wan i askem kongregesen blong givhan blong berem wan dedman, maet ol kwestin ya oli stanap:
?Hu nao i mas mekem sevis blong berem dedman? Ol famle blong dedman bambae oli mekem disisen ya. Oli save jusum wan brata we i baptaes finis, mo we hem i gudfala eksampel insaed long kongregesen. Sipos famle i askem long ol elda blong jusum wan man mekem sevis blong berem dedman ya, kolosap oltaem oli jusum wan elda we i nafgud, mo bambae hem i givim wan tok we i stanap long plan we Sosaeti i givim finis. Bambae hem i no presem dedman ya bitim mak, be maet i stret we hem i tokbaot sam gudfala fasin we man ya i bin soemaot.
?I stret blong yusum Haos Kingdom? Yes, sipos ol elda oli agri, mo sipos samting ya i no blokem kongregesen blong mekem wan miting we oli stap mekem oltaem. Oli save yusum Haos Kingdom sipos man ya i bin mekem ol gudfala fasin, mo sipos hem i wan memba blong kongregesen no wan pikinini blong wan memba blong kongregesen. Sipos ol man oli save se man ya i bin mekem ol fasin we oli no stret blong wan Kristin man, no sipos i gat sam narafala samting we bambae i givim badnem long kongregesen, maet ol elda oli mekem disisen blong no letem Haos Kingdom blong berem dedman ya.—Lukluk buk ya Minista Wok Blong Yumi, pej 62 mo 63.
Kolosap oltaem, oli no yusum ol Haos Kingdom blong mekem sevis blong dedman we i no bin stap long trutok. Maet oli yusum nomo sipos sam famle blong dedman ya oli pablisa long kongregesen we oli baptaes finis, sipos plante man lelebet long kongregesen oli savegud se dedman ya i bin laekem trutok mo i gat gudnem long velej from gudfala fasin blong hem, mo sipos i no gat ol kastom blong wol i joen wetem fasin blong berem dedman ya.
Taem ol elda oli givim raet blong yusum Haos Kingdom, oli save tingbaot sipos ol man bambae oli folem fasin blong karem bokis blong dedman i kam long sevis blong berem hem. Sipos yes, maet oli letem olgeta oli karem i kam long Haos Kingdom.
?Olsem wanem blong berem wan man blong wol? Sipos ol man long velej oli save se dedman ya i bin gat gudfala fasin, maet wan brata i givim wan tok long beregraon, blong soem ol tingting blong Baebol mo blong leftemap tingting blong ol man. Bambae kongregesen i no mekem sevis blong berem wan dedman we ol man oli save se hem i wan man blong mekem rabis fasin long saed blong seks, man blong brekem loa, no wan man we fasin blong laef blong hem i agensem ol rul blong Baebol bigwan. Bambae wan brata i no joen wetem wan lida blong jyos blong mekem wan sevis blong berem dedman, mo bambae hem i no joen long wan sevis we oli mekem long wan jyos blong Bigfala Babilon.
?Olsem wanem sipos kongregesen i bin sakemaot man ya bifo we hem i ded? Kolosap oltaem, kongregesen i no joen long wan bisnes olsem, mo oli no yusum Haos Kingdom blong berem wan man olsem. Sipos hem i bin soem se hem i tanem tingting blong hem from sin we hem i bin mekem, mo hem i soem se hem i wantem kambak insaed long kongregesen, maet tingting blong wan brata i no jajem hem sipos hem i givim wan tok we i stanap long Baebol, long beregraon. Samting ya bambae i givim wan wetnes long ol man we oli no stap long trutok, mo bambae i leftemap tingting blong famle blong dedman ya. Bifo we brata ya i tekem disisen blong mekem samting ya, hem i waes sipos hem i toktok wetem ol elda, mo tingting long ol advaes we oli givim. Sipos i no waes we brata ya i mekem tok ya, maet i stret se wan brata we hem i famle wetem man ya we i ded bambae i givim wan tok blong leftemap tingting blong ol famle blong dedman ya.—Lukluk Wajtaoa (Engglis) Septemba 15, 1981, pej 31; mo Jun 1, 1977, pej 347 mo 348.
I gat moa advaes i stap long Wajtaoa (Engglis mo Franis) blong Oktoba 15, 1990, pej 30 mo 31; Wajtaoa (Engglis) Septemba 15, 1981, pej 31; Maj 15, 1980, pej 5-7; Jun 1, 1978, pej 5-8; Jun 1, 1977, pej 347-348; Maj 15, 1970, pej 191 mo 192; mo Wekap! (Engglis mo Franis) blong Septemba 8, 1990, pej 22 mo 23 mo Wekap! (Engglis) Maj 22, 1977, pej 12-15.