Givhan Long Ol Hasban No Waef We Oli No Stap Long Trutok
1 Taem hasban mo waef tufala evriwan oli folem trufala wosip, samting ya i givim bigfala glad. Be, long plante famle, wan long tufala nomo i folem trutok. ?Olsem wanem yumi save givhan long ol hasban no waef we oli no stap long trutok, blong oli joen wetem yumi long wosip blong Jeova?—1 Tim. 2:1-4.
2 Kasem Save Long Tingting Blong Olgeta: Maet sam man mo woman olsem, oli gat strong fasin agens. Be plante blong olgeta, oli no intres nomo long trutok, no maet oli no gat stret save long saed blong ol Wetnes. Maet oli harem se hasban no waef blong olgeta we i jes stat blong intres long ol samting long saed blong speret, i no moa tingbaot olgeta, mo maet oli jelas from. Wan hasban i tingtingbak long fasin blong hem bifo, i se: “Taem mi bin stap mi wan long haos, mi harem se mi no gat fren nating. Mi bin harem olsem se waef mo ol pikinini blong mi oli stap seraot long mi.” (Lukluk Wajtaoa (Engglis mo Franis), blong Ogis 15, 1990, pej 20-23.) Hemia nao from wanem i moagud blong pulum hasban blong joen wetem woman blong hem long Baebol stadi, taem yumi jes stat nomo blong stadi wetem wan woman.
3 Joen Tugeta Blong Mekem Wok Ya: Wan hasban mo waef we tufala i Wetnes, oli mekem gudfala wok taem oli joen tugeta blong halpem ol narafala hasban mo waef blong kasem trutok. Taem sista ya i stat stadi wetem wan woman, brata i go luk hasban blong woman ya. Plante taem, brata ya i statem wan stadi wetem hasban.
4 Soem Fasin Fren Mo Singaot Olgeta Oli Kam Long Haos Blong Yu: Ol famle long kongregesen oli save givhan taem oli soem intres long ol narafala famle we sam long olgeta oli no stap long trutok. Sipos sam samtaem oli go luk hasban no waef ya we i no wan Wetnes, mo soem fasin fren, maet man no woman ya i luksave se ol Wetnes blong Jeova oli Kristin man we oli gat kaengud fasin, oli tingbaot narafala, mo oli wantem mekem i gud long ol man.
5 Sam samtaem, ol elda oli save tokbaot wanem i bin kamaot long ol manis we oli pas blong givhan long ol hasban no waef we oli no stap long trutok, mo wanem samting moa we oli save mekem blong traem pulum olgeta oli kam long Jeova.—1 Pita 3:1, futnot NW.