‘Jeova i Stap Givhan Long Mi’

¹ Taem Jisas i sanemaot ol faswan disaepol blong hem blong prij, hem i talem long olgeta se: “Yufala i luk. Mi mi sanem yufala i go, olsem we mi sanem ol sipsip oli go long ol wael dog.” (Mat. 10:16) ?Samting ya i mekem olgeta oli fraet mo i mekem tingting blong olgeta i slak? No gat. Oli holem tingting we aposol Pol i tokbaot biaen, taem hem i talem long ol Kristin se: ‘Yumi save mekem tingting blong yumi i strong blong talem se “Jeova i stap givhan long mi, mi mi no save fraet. ?Wanem samting bambae ol man oli save mekem long mi?” ’ (Hib. 13:6) Oli glad tumas we God i ting se oli naf blong kasem trabol from nem blong Jisas, mo oli gohed blong tijim ol man mo blong talemaot gud nyus we oli no kam slak nating.​—Wok 5:41, 42.

² Naoia, yumi stap mekem laswan haf blong wok blong prij. Olsem Jisas i talemaot, plante man bambae oli no laekem yumi. (Mat. 24:9) Plante oli agensem wok blong prij blong yumi, oli jikim yumi, mo long sam ples long wol, gavman i putum tabu long wok ya. Sipos bilif blong yumi i no strong, maet yumi fraet. Be, taem yumi save se Jeova i stap givhan long yumi, ale, yumi haremgud, mo samting ya i givim paoa long yumi blong gohed.

³ Strong tingting i minim se yumi wok wetem paoa, yumi no fraet, yumi gohed nomo. Hem i defren olgeta long fasin fraet, fasin blong sem, mo slak tingting. Long ol yia we oli pas finis, olgeta disaepol blong Jisas oli mas gat strong tingting blong oli save stanap strong. Yumi nidim strong tingting tu, blong mekem se ol tingting mo fasin blong wol ya we i olsem enemi blong God, oli no daonem yumi mo slakem tingting blong yumi. !Nambawan eksampel blong Jisas we i winim wol ya, i save leftemap tingting blong yumi bigwan! (Jon 16:33) Tingbaot tu, ol aposol we oli kasem bigfala traem, nao oli talemaot wetem strong tingting se: “Mifala i mas obei long God, mifala i no save obei long ol man nomo.”​—Wok 5:29.

⁴ Yumi No Tanraon Blong Gobak: Yumi mas traehad oltaem blong holem wan gudfala tingting long saed blong wok blong yumi. (Hib. 10:39) Oltaem, yumi mas tingbaot se Jeova nao i sanem yumi blong mekem wok ya, mo hem i mekem olsem from we hem i laekem mo i gat sore long olgeta man. Hem i neva askem ol man blong hem blong mekem samting we i blong nating nomo. Evri wok we hem i givim long yumi, long en blong hem, bambae i mekem i gud long ol man we oli laekem God.​—Rom 8:28.

⁵ Gudfala tingting long saed blong wok blong yumi bambae i mekem se yumi gohed nomo blong traem faenem ol man long ples blong yumi, we oli gat fasin olsem sipsip. Taem ol man oli no intres mo oli no kea long mesej blong yumi, yumi mas tingbaot se hemia from we oli harem nogud mo oli no gat hop. Lav i mas pusum yumi blong soem sore mo blong gat longfala tingting long olgeta. Evri taem we yumi livim wan buk wetem man no yumi luk se wan man i intres smol, yumi mas gobak kwik mo mekem intres i gru moa. Yumi neva mas ting se yumi no naf blong statem wan Baebol stadi mo blong gohed blong lidim stadi ya. Long defren fasin, oltaem yumi mas prea mo lukaot help mo advaes blong Jeova, nao yumi save sua se bambae hem i givhan long yumi.

⁶ Yumi bilif strong se Jeova bambae i lidim wok ya gogo i finis olgeta. (Skelem wetem Filipae 1:6.) Fasin blong yumi blong trastem hem fulwan olsem Man blong Givhan long yumi, bambae i givim paoa long yumi. Olsem nao, bambae yumi “no kam slak blong mekem ol gudfala fasin.”​—Gal. 6:9.