Singaot Olgeta Man We Oli Tosta Blong Oli Kam
1 Olsem profet Emos i bin talemaot, olgeta man tede oli “tosta, i no from wora, be blong harem tok blong Jeova.” (Emos 8:11) Blong givhan long ol man we oli tosta long saed blong speret, yumi talemaot long olgeta ol samting we God i mekem blong tekemaot sin mo ded long ol man we oli obei long hem. Laswan japta blong Revelesen i tokbaot ol samting ya olsem ‘wan reva blong wora blong laef.’ Yumi gat nambawan jans blong singaot ol man we oli tosta from stret fasin, blong oli kam “tekem wora ya blong laef, we i olsem presen.” (Rev. 22:1, 17) ?Olsem wanem yumi save mekem samting ya long Febuwari? Yumi save givimaot buk ya Revelesen—Kolosap i Kasem Nambawan En Blong Hem! long ol man we oli rili intres. Maet yu traem ol storeyan olsem:
2 Plante man oli intres long ol samting long saed blong helt, taswe maet toktok ya i wokgud:
◼ “Plante man oli wari from we praes blong meresin mo dokta i stap go antap oltaem. Ating yu tu yu bin tingbaot samting ya. [Wet long ansa.] ?I gat wan rod blong winim problem ya blong olwe? [Wet long ansa.] Baebol i tokbaot wan nambawan hop.” Ridim Revelesen 22:1, 2. Nao openem Revelesen buk i go long pija long pej 308 mo 309, mo yusum haf 22 long pej 311 blong eksplenem pija ya. Yu save finisim storeyan blong yu olsemia: “Buk ya i eksplenem olgeta vas blong Revelesen.” Askem man blong haos blong karem buk ya, mo putum wan stret taem blong kambak.
3 Taem yu visitim man ya bakegen, yu save gohed blong storeyan olsemia:
◼ “Lastaem, yumitu storeyan long saed blong wan rod we i save winim ol problem blong helt blong olwe. ?Yu ting se bambae i gat wan taem we i no moa gat sikman? [Wet long ansa.] Traem luk nambawan tok ya blong Baebol.” Ridim Aesea 33:24. Nao openem buklet ya Samting We God i Wantem, i go long stadi 5, mo tokbaot haf 5 mo 6. Askem ol kwestin long stat blong stadi ya we oli stret long tufala haf ya, mo ridim sam vas. Talem se wok ya blong God blong tekemaot sik mo ded bambae i mekem wan haf blong stampa tingting blong hem long saed blong wol ya i kamtru. Putum wan stret taem blong kambak blong tokbaot haf 1-4 mo haf 7 long semfala stadi.
4 Sipos nyus i jes kamaot se wan impoten man i ded, maet yu traem samting ya:
◼ “Ating yu harem nyus ya finis [talem nyus ya we i jes kamaot]. Taem wan aksiden no wan narafala samting i kilim wan man i ded wantaem nomo, plante man oli traem tingbaot wan rod blong leftemap tingting blong famle blong hem. ?Wanem tingting blong yu long saed ya?” Wet long ansa. Nao openem Revelesen buk i go long pej 299, mo soem pija blong laef bakegen long ded. Gohed olsem: “Plante man oli sapraes taem oli kasem save se ol stret man mo ol man we oli no stret tu bambae oli laef bakegen long Paradaes long wol ya. [Ridim Ol Wok 24:15 long haf 9 long pej 297, mo yusum ol tok blong haf 10 blong eksplenem.] Buk ya i talem plante narafala gudfala samting long saed blong stampa tingting blong God long fyuja. Sipos yu wantem kasem moa save long saed ya, yu save karem buk ya.” Putum wan stret taem blong kambak, mo makemgud ol samting we man ya i intres mo wari long hem.
5 Taem yu gobak, mekem storeyan blong yu i laenap wetem samting we man blong haos i intres long hem. Maet yu talem se:
◼ “Lastaem we yumitu storeyan, mi mi laekem wan tok we yu bin talem long saed blong stampa tingting blong God long wol ya. [Talem tok blong man ya bakegen.] Mi mi faenem sam save we mi ting se bambae yu intres long hem.” Openem buklet ya Samting We God i Wantem i go long stadi 5. Ridim mo tokbaot sam haf blong stadi ya, be no bitim mak gogo yu luk se man i stat lusum intres. Putum wan stret taem blong kambak blong gohed long storeyan ya, mo givim smol pepa long man ya blong talemaot taem blong ol miting blong kongregesen. Eksplenem Pablik Tok, mo askem hem blong kam.
6 Sipos yu laekem moa blong yusum wan isi rod blong storeyan wetem traket, yu save talem se:
◼ “Mi glad blong givim smol pepa ya long yu ?Olsem Wanem Long Ol Fren Blong Yumi We Oli Ded?” Givim traket long man blong haos, nao askem long hem blong ridim faswan haf wetem yu. Wet long hem blong ansa long kwestin long en blong faswan haf ya. Nao ridim haf 2. Openem Revelesen buk i go long pija long pej 299. Gohed olsem: “Buk ya i givim plante moa save long saed blong laef bakegen long ded mo ol narafala nambawan promes we Baebol i talemaot long saed blong fyuja. Sipos yu glad blong ridim buk ya, yu save karem blong 350 VT.” Mekem plan blong kambak.
7 Sipos yumi yusum ol gudfala toktok blong singaot ol man, maet oli glad blong kam dring long wora blong laef we Jeova i stap wantem blong givim long olgeta. Taswe, yumi mas talem long olgeta man we oli tosta se: “Yu kam.”—Rev. 22:17.