?Yu Yu Tinghae Long Fasin Blong Joen Wetem Ol Narafala Kristin?

¹ “I no stret we man i stap hem wan, olsem wan aelan.” Tok ya i kamaot long wan man blong raetem stori we i laef long ol yia 1600. Man ya i talem sem samting we Baebol i talem long saed blong wan stamba nid blong olgeta man—hemia fasin blong joen wetem narafala. (Prov. 18:1) Fasin blong ol Kristin blong joen tugeta oltaem i stap fulumap nid ya. ?Long wanem gudfala rod?

² Long Minista Wok: Wan gudfala frut we i impoten tu, hemia we ol brata oli givhan mo sapotem yumi long minista wok. Jisas i sanem ol disaepol blong hem oli go “tutu” blong prij. (Mak 6:7; Luk 10:1) Taem yumi folem eksampol ya mo prij wetem ol narafala, yumi luk we tok blong Prija 4:9, 10 i tru tumas. Taem yumi gohed blong mekem minista wok tugeta, bambae bilif, fasin obei, mo lav blong ol brata sista i givim paoa long yumi blong no fraet mo blong gat tingting we i strong moa blong mekem wok ya.

³ Oli Givhan Long Laef: Ol brata sista oli save leftemap tingting blong yumi, halpem yumi blong dil wetem ol traem, mo blong blokem ol samting we oli save pulum yumi blong lego stret fasin. Maet sam Kristin fren blong yumi oli soem sam vas long Baebol we oli save givhan long problem we yumi fesem. Mo tu, maet oli prea from yumi, olsem we yumi stap prea from olgeta. (2 Kor. 1:11) Antap long hemia, gudfala eksampol blong olgeta bambae i pusum yumi blong mekem ol gudfala wok, mo bambae i givim paoa long yumi tu.

⁴ Long Ol Miting: Sipos yumi stap oltaem long ol miting, bambae yumi kasem blesing from fasin blong joen wetem ol narafala Kristin. (Hib. 10:24, 25) Ol miting ya oli fulap long tijing long saed blong spirit, mo sipos yumi stap oltaem long miting, bambae yumi stap klosap long olgeta we oli gat sem bilif. Ol miting oli givim janis long yumi blong harem ol brata sista oli talemaot bilif blong olgeta, nomata sipos oli talem tok antap long platfom no oli talem long jea blong olgeta. (Rom 1:12) Fasin joen blong yumi i kam moa gud taem yumi storian wetem olgeta bifo mo afta ol miting. Long taem olsem, yumi gat janis blong talemaot sam samting we oli kamaot long laef blong yumi, we oli mekem bilif blong yumi i kam strong. Taem yumi joengud wetem olgeta we oli lavem Jeova, Tok blong hem, wok blong hem, mo ol man blong hem, samting ya i mekem fasin blong yumi i kam gud moa.—Fil. 2:1, 2.

⁵ Yumi nidim ol Kristin fren blong yumi. Sipos yumi no gat ol fren olsem, bambae i had moa blong wokbaot long rod we i strong, blong go kasem laef. Wetem lav mo help blong olgeta, yumi save gohed go kasem niufala wol we bambae Jeova i mekem stret fasin i stap long hem.—Mat. 7:14.