Ansa Long Wan Kwestin

◼ ?Wetaem i stret blong statem wan grup we bambae i mekem miting long narafala lanwis?

Taem i gat plante man lelebet blong wan lanwis, we oli stap long teritori blong kongregesen, ol elda oli mas traem bes blong olgeta blong mekem plan blong samfala oli prij long ol man we oli toktok lanwis ya. (km 7/02 pej 1 Inglis; km 2/98 pej 3-4 Inglis) Maet ol man we oli toktok lanwis ya oli stap long teritori blong ol narafala kongregesen raonabaot tu. Long saed ya, seket elda bambae i givim advaes blong halpem ol kongregesen blong oli wok tugeta blong prij long ol teritori ya. Wanwan taem, maet lanwis grup ya i mekem plan blong gat wan pablik tok no Wajtaoa Stadi long lanwis blong olgeta blong luk hamas man bambae oli kam blong lesin.

Kongregesen i save statem wan grup we i mekem miting long narafala lanwis sipos: (1) I gat sam pablisa no sam man we oli intres, we i isi moa long olgeta blong kasem save gud nius long lanwis ya. (2) I gat wan elda no man blong givhan we i save lidim miting mo lukaot long miting blong grup ya evri wik. (3) I gat wan grup blong ol elda we oli glad blong lukaot long ol nid blong grup ya. Taem i gat trifala samting ya long wan kongregesen, ol elda oli save talemaot long branj ofis, nao Sosaeti bambae i luksave grup ya mo i givim moa advaes long saed ya.

Plante grup olsem, oli stat fastaem blong mekem Buk Stadi evri wik. Biaen, ol elda oli save agri se oli mekem sam narafala miting, olsem Pablik Tok mo Wajtaoa Stadi. Sipos i gat wan elda no man blong givhan we i toktok lanwis ya mo i naf blong lukaot long Tiokratik Skul, ale, taem grup ya i joen wetem kongregesen blong mekem miting ya, oli save go long wan narafala rum blong Haos Kingdom blong mekem Tok namba 2, 3, mo 4. Be grup ya i mas joen wetem kongregesen blong lesin long Tok namba 1, ol bigfala poen blong Baebol Riding, mo Miting Blong Kingdom Wok. Grup ya i save mekem plan tu blong mekem miting blong prij tugeta.

Olgeta memba blong grup ya oli wok folem plan blong ol elda blong kongregesen. Ol elda oli mas gat fasin blong skelemgud ol samting taem oli lidim grup ya, mo oli mas rere blong kea long ol nid blong grup ya. Taem seket elda i visitim kongregesen, hem i save mekem plan tu blong wok wetem grup ya blong givhan long hem blong stap strong long saed blong spirit. Wetem blesing blong Jeova, maet grup ya bambae i kam wan kongregesen.