Yumi Lefleftemap Tingting Blong Yumi Taem Yumi Stap Prij
1 Yumi evriwan i haremgud taem wan man i talem ol ‘tok long prapa taem blong hem’ we i leftemap tingting blong yumi. (Prov. 25:11, NW) ?Taem yumi prij wetem ol narafala, olsem wanem yumi save sua se ol storian blong yumi oli rili leftemap tingting blong olgeta?
2 Ol Tok We i Leftemap Tingting: Yumi leftemap tingting blong ol brata sista we yumi prij wetem, taem yumi storian tugeta long ol samting we i save mekem fasin fren blong yumi wetem God i stap strong. (Sam 37:30) Yumi save tokbaot ol fastok we yumi stap yusum, no wan gudfala samting we i bin hapen i no longtaem long wok blong prij. (Wok 15:3) ?Olsem wanem long ol poen we oli pulum tingting blong yumi long Baebol riding blong yumi, long wan niufala magasin, no long miting blong kongregesen? Maet yumi save tokbaot tu ol gudfala poen we yumi bin harem i no longtaem long wan pablik tok long Haos Kingdom.
3 Tingting blong yumi i save foldaon sipos yumi no save olsem wanem blong ansa long wan tok we man blong haos i talem blong blokem yumi. Blong givhan long yumi, i gud blong tekem smol taem afta we yumi lego haos ya, blong tokbaot wanem samting yumi save mekem nekis taem wan man i talem tok olsem. Maet i gud blong lukluk long Reasoning buk. Mo tu, sipos brata no sista we yumi prij wetem i storian gud long man blong haos, yumi save talem gudfala toktok long hem from fastok we hem i bin yusum.
4 Tekem Faswan Step: ?I gat sam brata mo sista long Buk Stadi grup blong yumi we longtaem finis yumi no moa prij wetem olgeta? Yumi save askem olgeta blong yumi prij tugeta. Nao long rod ya ‘bilif blong olgeta i save givhan long yumi, olsem we bilif blong yumi tu i save givhan long olgeta.’ (Rom 1:12) Olgeta we oli mekem haftaem mo fultaem paenia oli glad blong wok wetem ol narafala, speseli long eli moning mo sapa, taem i no gat plante brata sista i kam long wok blong prij. Yumi save joen wetem ol paenia ya blong sapotem olgeta long wok blong prij. ?Olsem wanem? ?I gat wan pablisa we hem i siksik mo i no naf blong prij plante? Yumi save mekem plan blong hem i joen wetem yumi, maet blong mekem wan Baebol stadi. Long fasin ya, yumi stap givgivhan long yumi.—Prov. 27:17.
5 Ol gudfala tok mo ol tok blong talem tangkiu, oltaem oli leftemap tingting, nating we oli smol nomo. I gud yumi holem tingting ya taem yumi wok wetem ol narafala long wok blong prij, from we yumi wantem gohed blong ‘givgivhan long yumi.’—1 Tes. 5:11.