Kam Wan Gudfala Man Blong Givhan Long Wok Blong Prij
1. ?Wanem gudfala samting i save kamaot taem yumi wok tutu long wok blong prij?
1 Wan taem, Jisas i sanem 70 disaepol oli go prij, mo hem i “sanem olgeta oli go tutu.” (Luk 10:1) Plan ya blong Jisas blong sanem ol disaepol oli go tutu, hemia blong oli save givgivhan mo lefleftemap tingting blong olgeta taem oli stap prij. ?Taem yu joen wetem wan narafala pablisa long wok blong prij, olsem wanem yu save givhan long hem?
2. ?Taem pablisa i stap toktok, olsem wanem yu soemaot se yu stap lesin gud? ?Mo from wanem yu mas lesin?
2 Yu Mas Lesin: Lesin gud long narafala, taem hem i stap toktok. (Jem. 1:19) Sipos hem i stap ridim wan vas, i gud yu folem vas ya long prapa Baebol blong yu. Lukluk stret long man we i stap toktok, nating se hemia pablisa we yu folem hem no man blong haos. Sipos yu lesin gud long storian blong yufala, hemia bambae i pulum man blong haos tu blong i mekem sem mak.
3. ?Wetaem maet pablisa we yu folem hem i glad se yu toktok?
3 Luksave Wetaem i Stret Blong Toktok: Taem pablisa i stap toktok, yu save soem respek long hem sipos yu letem hem i gohed long storian blong hem. (Rom 12:10) Yu no mas katem toktok blong hem. ?Be olsem wanem sipos pablisa ya i fogetem samting we hem i wantem talem? No maet man blong haos i tokbaot wan defren poen, no i askem wan kwestin, nao pablisa ya i lukluk yu blong yu givhan long hem. Ale, i gud yu joenem storian blong hem nomo, i bitim we yu statem wan niufala poen. (Prov. 16:23; Pri. 3:1, 7) Sipos yu joenem storian i go, ol tok we yu talem oli mas laenap wetem ol samting we yufala i tokbaot finis.—1 Kor. 14:8.
4. ?Wanem samting we bambae i mekem se yumi glad mo kasem plante frut long wok blong prij?
4 Taem ol 70 disaepol we oli go tutu, oli finis long wok blong prij, oli “kambak bakegen, we oli glad tumas.” (Luk 10:17) Sipos yumi lesin gud, mo luksave stret taem we yumi save toktok blong givhan long hemia we yumi kampani wetem, bambae yumi tu, yumi save kasem glad, mo yumi save kasem plante frut long wok blong prij.