Givhan Long Ol Narafala Long Wok Blong Prij
1 Taem Kristin kongregesen i stat kam kasem naoia, ol man insaed long hem oli man blong talemaot gud nyus. Jisas hem wan i trenem ol disaepol blong hem blong prij. Fastaem, hem i sanemaot olgeta “oli go olbaot long ol ples, tu i go wan ples, tu i go wan ples.” (Mak 6:7, 11; Luk 8:1) Aposol Pol i tokbaot ‘ol man we oli wok wetem hem’ long kongregesen blong Filipae. Olgeta oli ‘hadwok finis long ol wok blong gud nyus blong Kraes, wetem hem.’ (Fil. 4:3) Tru, i no evritaem we man i nidim wan narafala blong kampani wetem hem long wok blong prij. Be kolosap yumi evriwan i no laekem blong wok yumi wan nomo, yumi laekem kampani. (Ekles. 4:9) ?Oraet nao, olsem wanem yumi save leftemap tingting mo givhan long narafala taem yumi prij wetem hem?
2 ?From wanem yumi evriwan i kam wanples bifo we yumi go prij? Wan risen: Blong givhan long ol nyufala pablisa we oli no gat ekspiryens yet. (om pej 77, 97) Ating sam nyufala paenia tu oli wantem wok wetem sam pablisa we oli gat ekspiryens, no wetem wan elda no wan man blong givhan. !Hemia nao nambawan jans blong ‘bambae bilif blong yu i save givhan long hem, olsem we bilif blong hem tu i save givhan long yu’!—Rom 1:12.
3 Long sam ples, ating i moa sef we ol pablisa oli wok tu tu. Mo samtaem maet yumi mas jenisim plan we yumi mekem wetem wan pablisa, blong yumi save joen wetem wan narafala pablisa we i no gat plante ekspiryens. Sipos brata we i mekem miting blong prij i askem long yumi blong mekem olsem, nao yumi obei, yumi stap soemaot lav. Nating we evritaem yumi stap wok wetem sem fren blong yumi, be sipos yumi rere blong jenis blong “givhan long olgeta we oli no strong,” yumi stap soemaot lav.—Wok 20:35.
JOEN GUD LONG WOK YA
4 Taem yumi joen wetem ol narafala long wok blong prij, yumi mas joen gud, olsem wan tim nomo. (Ridim 1 Korin 3:6, 9.) Tufala we i prij tugeta tufala i save joen blong storeyan long ol haos. Maet wan long tufala i statem storeyan long fas haos, nao narawan i statem storeyan long nekis haos. Gudfala Kristin fasin bambae i pulum yumi blong lesin gud long ol tok blong brata no sista we i wok wetem yumi.
5 Maet wan long tufala nomo i statem storeyan, be samtaem narawan i save joen long storeyan tu. Be hem i mas yusum fasin luksave. Hem i no mas katem toktok blong narafala, taem hem i luksave we storeyan blong narafala i stap pulum gud tingting blong man blong haos. Be sipos pablisa we i stap storeyan i no gat plante ekspiryens, nao taem man blong haos i stanemap kwestin, hem i no save olsem wanem blong ansa, i klia se bambae hem i glad sipos fren blong hem we i prij wetem hem i givhan long hem.—Ekles. 4:12.
6 Taem yumi aot long wan haos, nao yumi wokbaot blong go long nekis haos, yumi save tokbaot olsem wanem blong mekem storeyan blong yumi i moa gud long wok blong prij. Ating yumi save tokbaot ol fas tok long Reasoning buk. No yumi save tokbaot sam advaes we Kingdom Wok Blong Yumi i bin talem. Mo tu, taem yumi joen wetem narafala long wok blong prij, hemia i wan jans blong kasem moa save long hem, nao yumi save mekem fasin joen gud mo lav long kongregesen i kam strong moa.
7 Minista wok blong yumi i wan sas samting we yumi mas tinghae long hem. (2 Korin 4:1, 7) Taem yumi wok wetem narafala long wok blong prij, yumi save storebaot olsem wanem yumi tinghae long tabu wok ya. Semtaem, hem i save leftemap tingting blong yumi tu, mo tufala i save tijim sam samting long tufala. From samting ya, bambae yu yu glad moa, bambae yu kam gud moa long wok blong prij, mo bambae yu joen gud moa wetem ol brata mo sista.—Sam 133:1.