Ansa Long Wan Kwestin

● ?From wanem i gud we ol pablisa oli stap go long kongregesen we i stret long ples we olgeta oli stap long hem?

I impoten blong folem tiokratik oda, mo blong mekem evri samting i stret nomo, i no olbaot. Aposol Pol i talem se: “God i no stampa blong fasin ya we olgeta samting oli paspas. Hem i stampa blong pis ya. . . . Yufala i mas mekem olgeta samting long fasin we i stret gud, we ol man oli glad long hem.”​—⁠1 Korin 14:​33, 40.

Kolosap evri taem i gud we ol brata mo sista oli go long kongregesen we i stret long ples we oli stap long hem. Samtaem maet oli no save mekem olsem from we i hadwok blong faenem transpot, from program blong wok blong olgeta, no from we narafala kongregesen i nidim sam elda. Be sipos yumi obei long tiokratik oda ya, i moa isi long yumi blong go long wok blong prij. Mo yumi no nidim blong wokbaot longwe blong joen wetem wan grup we i farawe long ples blong yumi. Mo tu, yumi save joen wetem olgeta we oli blong kongregesen blong yumi nomo. Mo yumi save lidim ol nyuwan we oli kam long kongregesen oli go long ples blong miting we i moa isi long olgeta. Mo tu, yumi save kam kolosap moa long ol brata mo sista blong eria blong yumi, nao oli save givhan long yumi taem yumi nidim.

Yumi mas blokem independen tingting. Yumi mas putum ol samting long saed blong Kingdom long fas ples. Mo yumi mas folem ol plan we kongregesen i mekem. (Luk 16:10) Taem i gat wan nyu kongregesen i stanap, no i gat nyufala plan blong ol Buk Stadi long kongregesen, maet yumi wantem stap kolosap long sam fren blong yumi. Be sipos yumi obei long nyufala plan, yumi save mekem sam nyufala fren mo save gud sam narafala long kongregesen. Mo tu, taem ol pablisa oli stap insaed long stret teritori blong kongregesen, i moa isi long ol elda blong lukaot gud long ol sipsip mo blong mekem kon­gregesen i kam moa strong long saed blong speret.