Yumi Glad Taem Yumi Joen Olsem Wan Grup Blong Prij
1 Taem Jisas i sanem ol 70 disaepol blong hem oli go prij, hem i talem wanem samting we bambae oli talemaot, hem i seraotem olgeta oli go tutu, mo i givim wan teritori long olgeta. Hemia nao sam samting we i mekem se ol disaepol ya oli glad long wok blong olgeta. (Luk 10:1-17) Tede tu i sem mak. Taem ol man blong God oli joen olsem wan grup blong prij, samting ya i halpem olgeta blong kasem wanem we oli nidim blong mekem gudfala wok, i mekem tu se oli wok folem oda, mo i leftemap tingting blong olgeta blong prij.
2 Ol Elda Oli Lidim Wok Ya: Ol elda oli mekem bighaf blong wok ya blong halpem evriwan blong joen oltaem long wok blong prij. Elda we i lukaot long wok blong prij i mas mekem ol plan blong wok blong prij long ol dei blong wik. Ol brata we oli lukaot long wan buk stadi oli mas lukaot long wok blong prij long wanwan grup blong olgeta, antap moa long wiken. Taem ful kongregesen i joen long sem miting blong prij, ol brata we oli lukaot long ol wanwan buk stadi oli mas lukaot long ol memba blong grup blong olgeta.
3 “Long Fasin We i Stret Gud, We Ol Man Oli Glad Long Hem”: Brata we oli jusum hem blong mekem miting blong prij i mas stat long stret taem mo i no mas bitim 10 no 15 menet. I moagud sipos hem i seraotem ol man long ol grup mo i givim teritori long olgeta (hem i no nid blong mekem olsem long dei we ol brata we oli lukaot long ol wanwan buk stadi oli mas lukaot long wok ya, olsem yumi talem antap), bifo we hem i mekem prea. Rod ya i mekem se, taem ol pablisa oli kasem teritori, oli no nid blong hivap bakegen long ol grup blong faenem ples we oli mas go long hem. Fasin ya i save mekem ol man oli ting se wok blong yumi i olbaot nao oli lusum respek long yumi. Hemia i laenap tu wetem advaes ya blong Pol we i se: “Yufala i mas mekem olgeta samting long fasin we i stret gud, we ol man oli glad long hem.” (1 Kor. 14:40) Evriwan we oli kam long miting blong prij oli save givhan blong mekem plan ya i rongud sipos oli kam long stret taem, oli lesingud mo folemgud wanem we brata i talem olgeta blong mekem, mo oli no tektaem tumas blong go long teritori afta we miting blong prij i finis.
4 Yumi Joengud Moa: Plan ya blong prij olsem wan grup i givim janis long yumi blong save ol defdefren memba blong kongregesen. I tru, samtaem i gud yumi mekem plan fastaem blong prij wetem narafala, be i gud tu sipos yumi no mekem plan. Nao long miting blong prij maet bambae oli putum yumi wetem wan we yumi no savegud hem, ale yumi save “openem hat blong yumi moa” blong soem lav blong yumi.—2 Kor. 6:11-13, NW.
5 Wok blong prij olsem wan grup i leftemap tingting blong yumi mo i pulum yumi blong joen gud moa ‘long ol wok blong talemaot trutok.’ (3 Jon 8) !I gud yumi joen oltaem wetem grup blong prij!