Ansa Long Wan Kwestin
◼ ?From wanem i gud blong joen long kongregesen blong teritori we yumi stap long hem?
Long kongregesen, yumi kasem ol gudfala toktok blong “mekem yumi strong blong lavem ol man, mo blong mekem ol gudfala fasin.” (Hib. 10:24, 25) Long kongregesen, yumi lanem trutok mo yumi kasem ol samting we yumi nidim blong mekemgud wok ya blong pulum ol man oli kam disaepol. (Mat. 28:19, 20) Mo tu, yumi kasem paoa blong stanap strong taem ol samting i traem yumi. I gat ol elda tu, we from lav blong olgeta, oli givhan long yumi blong winim ol bigfala trabol mo wari. I klia se, blong stap laef long saed blong spirit, yumi nidim kongregesen. ?Be, from wanem i gud blong joen long kongregesen blong teritori we yumi stap long hem?
I tru se, laef blong yumi evriwan i defdefren. Mo kongregesen we yumi jusum blong go long hem i dipen long plante samting, olsem wok blong yumi, hasban no waef we i no stap long trutok, mo transpot. Be, taem yumi joen long kongregesen blong teritori we yumi stap long hem, samting ya i save mekem i gud long yumi long saed blong spirit mo long sam narafala rod tu. Olsem nao, sipos i gat wan trabol i kamaot, ol elda oli save pasem toktok i go long ol pablisa kwiktaem nomo. Sam Kingdom Wok, long haf ya Ansa Long Wan Kwestin, oli tokbaot plante narafala risen from wanem i gud blong go long kongregesen blong teritori we yumi stap long hem.—Mei 1991, Maj 1976, mo Jenuware 1967.
Klosap oltaem i moa gud blong joen long ol miting we oli klosap. Olsem nao, yu save kam eli long miting mo toktok wetem ol narafala, mekem ol wok we yu yu mas mekem, mo joen long faswan singsing mo prea. Mo tu, i moa isi long yumi blong go luk olgeta we oli intres sipos oli stap long eria blong yumi. I moa isi blong mekem Baebol stadi wetem olgeta tu, mo pulum olgeta oli joen long miting we i klosap moa long olgeta.
Mifala i save se hed blong ol wanwan famle bambae i prea long saed blong bisnes ya, mo bambae hem i skelem ol samting blong luk wanem i moagud long famle blong hem long saed blong spirit mo bodi.—1 Tim. 5:8.