‘Bambae Ol Man Oli Mas Talemaot Gud Nius Ya Blong Kingdom’
1. ?Olsem wanem yumi save se i no gat wan samting we i save stopem wok blong prij?
1 Jeova bambae i mekem olgeta samting oli kamtru olsem we hem i wantem. I no gat wan samting nating we i save blokem hem. (Aes. 14:24) Jaj Gideon mo ol 300 man blong hem oli mas faet agensem bigfala ami blong ol man Midian, we i gat 135,000 soldia blong hem. I luk olsem se Gideon bambae i no save win nating. Be Jeova i talem long hem se: “Mi nao mi sanem yu. . . . Yu mas go tekemaot ol man ples ya blong yu we oli stap long han blong ol man Midian ya, yu mas sevem olgeta.” Ale Gideon i winim olgeta. (Jaj. 6:14) ?Olsem wanem tede? ?Wanem wok we Jeova i givhan long ol man blong hem blong mekem? Jisas i talem se: “Gud nius ya blong kingdom, bambae ol man oli talemaot long olgeta ples long wol.” (Mat. 24:14, NW) !I no gat man we i save stopem wok ya!
2. ?Olsem wanem yumi save se Jeova bambae i halpem yumi wanwan long wok blong prij?
2 Jeova i Halpem Yumi Wanwan: Yumi trastem Jeova fulwan se bambae hem i lukaot gud long ogenaesesen blong ol Witnes blong hem. ?Be olsem wanem long wanwan man insaed long ogenaesesen ya? ?Jeova i save halpem olgeta wanwan? Taem aposol Pol i harem se hem i no moa gat paoa, Jeova i halpem hem. Jeova i yusum Pikinini blong hem, Jisas, blong mekem olsem. (2 Tim. 4:17) Yes, yumi save trastem Jeova se bambae hem i blesem ol traehad blong yumi wanwan taem yumi mekem wok blong hem.—1 Jon 5:14.
3. ?Wetaem nao Jeova i save givhan long yumi?
3 ?Ol wari blong laef oli mekem we yu yu no moa gat plante paoa blong prij? Tingbaot se, “olgeta we oli taed, [Jeova] i stap givim paoa long olgeta.” (Aes. 40:29-31) ?I gat man i stap kilim yu no i stap agensem yu from we yu yu wan man blong Jeova? Ale, ‘yu mas putum ol trabol blong yu long Hae God, nao hem bambae i blokem yu, i sevem yu.’ (Sam 55:22) ?Samtaem yu gat tingting ya se yu no naf? Jeova i talem se: “Yu go . . . Bambae mi mi givhan long yu long toktok blong yu, mo bambae mi talem long yu wanem we yu yu mas talemaot.” (Eks. 4:11, 12) ?Yu stap siksik, nao yu no save mekem plante samting long wok blong Jeova? Jeova i tinghae long ol wok we yu mekem wetem fulhat blong yu. Nating se wok blong yu i smol nomo, Jeova i save yusum wok ya blong mekem ol samting oli kamtru olsem we hem i wantem.—1 Kor. 3:6, 9.
4. ?Sipos yumi trastem Jeova, bambae yumi mekem wanem?
4 Jeova “i stretem han blong hem finis . . . mo i no gat man i save blokem hem.” (Aes. 14:27) Yumi trastem Jeova se bambae hem i blesem wok blong prij we yumi mekem. Ale i gud ‘yumi no fraet,’ yumi gohed blong talemaot gud nius nao Jeova bambae i ‘givim paoa long yumi’ blong mekem wok ya.—Wok 14:3.