Mekem Fasin Blong Yumi Blong Trastem God i Kam Strong Moa
“Mi mi wantem talemaot ol waes tok ya long yu naoia, from we mi wantem se oltaem yu mas trastem [Jeova].”—PROVEB 22:19.
1, 2. (a) ?From wanem ol Wetnes blong Jeova oli soemaot se oli trastem Jeova? (Proveb 22:19) (b) ?Wanem i soemaot se sam man oli nidim blong mekem fasin blong olgeta blong trastem Jeova i kam strong moa?
OL TRUFALA Kristin oli kasem blesing ya blong gat stret save long Jeova mo ol stampa tingting blong hem. Wan ‘slef we i stret mo waes’ i stap givim kakae long saed blong speret long olgeta, long “stret taem blong hem.” (Matyu 24:45) Save we oli kasem, i givhan long olgeta blong wokem wan strong faondesen we fasin blong trastem God i stanap long hem. Taswe, olgeta Wetnes blong Jeova olsem wan grup, oli soemaot nambawan fasin ya blong trastem Jeova mo stret fasin blong hem.
2 Be, i luk olsem se, sam long ol wanwan Wetnes ya, oli nidim blong mekem fasin blong olgeta blong trastem God, i kam strong moa. Wan wantaem, Sosaeti i kasem leta blong sam man we oli talem se oli no suagud long sam poen we hem i eksplenem long ol buk blong hem. Ol tingting ya we oli hafhaf, maet oli kamaot from we ol man ya oli mas jenisim wanem we oli bin kasem save long hem longtaem finis i kam. Mo tu, maet ol nyufala save ya oli tokbaot sam poen we i stikim olgeta, nao oli harem nogud.—Skelem wetem Jon 6:60, 61.
3. Nating se wan man blong Jeova i gat strong bilif, ?wanem i save hapen, mo from wanem?
3 Ol trufala man blong Jeova, oli luksave se tok blong Eklesiastis 9:11 i tru nomo se: “Narafala samting tu we mi luk long wol ya i olsem. I no ol nambawan man blong resis nomo we oli stap win long resis, mo i no ol strong man blong faet nomo we oli stap win long faet. I no ol waes man nomo we oli stap kasem gudfala laef, mo i no ol man ya nomo we oli gat hed we oli stap kam rijman. Mo i no ol gudfala man blong wok nomo we oli stap kasem haenem. From we ol taem mo ol samting we man i no save long hem, oli hapen long evriwan.” ?Olsem wanem tok ya i stap kamtru long saed blong speret? Maet yumi save sam Kristin we oli kwik blong folem ol advaes blong Baebol, oli strong blong blokem ol tok we oli daonem ol trutok, oli savegud olsem wanem blong folem ol rul blong Baebol long laef blong olgeta, mo oli traehad blong kasem stret save. Be from we ol “taem mo ol samting we man i no save long hem, oli hapen long evriwan,” samfala oli luksave se oli no moa naf blong mekem sam long ol samting ya we oli bin mekem bifo, maet from we oli kasem wan akseden no oli kam olfala. Maet oli stap tingting se bambae oli laef go kasem we nyufala wol blong God i kamtru no, no gat.
4, 5. ?From wanem ol Kristin oli no gat risen blong no moa tastem stret fasin blong Jeova?
4 Taem wan Kristin i lusum hasban no waef blong hem, soa we hem i kasem i bigwan tumas. Ating tufala i bin mekem wok blong Jeova tugeta blong plante yia. Hasban no waef we i laef i stap yet, i save se ded nao i brekem fasin joen blong mared.a (1 Korin 7:39) Naoia hem i mas bos bigwan long ol filing blong hem blong no letem fasin blong hem blong trastem God, i godaon sloslou.—Skelem Mak 16:8.
5 !I waes we yumi tingbaot ded blong hasban no waef, papa no mama, pikinini no gudfala Kristin fren, olsem wan jans blong soemaot se yumi trastem Jeova! Taem yumi lusum wan samting we yumi laekem tumas, yumi sua se Jeova i no save mekem i no stret long yumi. Yumi save sua fulwan se eni man we i kasem laef we i no save finis—nating se hem i laef tru long bigfala trabol no i laef bakegen long ded—bambae i save glad bigwan. Man blong raetem Ol Sam i tokbaot God, i se: “Yu stap givim plante kakae long olgeta we oli hanggri, yu stap mekem olgeta evriwan oli harem gud. Fasin blong Hae God i stret gud, mo olgeta samting we hem i stap mekem i stap soemaot samting ya. Hem i God blong sore, mo olgeta wok blong hem i stap soemaot fasin ya blong hem. Oltaem hem i stap kolosap long olgeta we oli stap singaot i go long hem, we hemia olgeta ya we oli wantem tru blong hem i givhan long olgeta. Olgeta we oli stap ona long hem, oltaem hem i stap givim ol samting long olgeta we oli sot long hem, oltaem hem i stap harem krae blong olgeta, mo i stap sevem olgeta.”—Ol Sam 145:16-19.
Taem Yumi Gat Tingting Ya Se Yumi Safa Blong Nating Nomo
6, 7. (a) ?From wanem sam Wetnes blong Jeova we oli safa bifo, maet naoia oli gat save we i defren? (b) ?From wanem yumi no mas ting se Jeova i mekem i no stret, taem hem i letem sam man oli safa bifo?
6 Long ol yia we oli pas, samfala Wetnes blong Jeova oli bin safa bigwan from we oli no wantem joen long sam wok we naoia voes blong hat blong olgeta i letem olgeta blong mekem. Eksampel, sam yia bifo, maet oli bin jusum blong no joen long sam kaen wok we oli joen wetem ami. Be, naoia maet wan brata i tingting se sipos hem i mekem ol wok ya, tingting blong hem i no moa stikim hem, from we ol wok ya oli no agensem Kristin fasin ya blong no joen long wol.
7 ?Jeova i mekem i no stret taem i letem brata ya i safa from we hem i no wantem mekem samting we naoia maet hem i oraet nomo blong mekem? Bighaf blong ol brata we oli bin safa from we oli bin mekem wan disisen olsem, oli no gat tingting ya. Oli glad from we oli tingbaot samting ya olsem jans blong soemaot klia long ol man raonabaot se oli gat strong tingting blong sapotem hae rul blong God. (Skelem wetem Job 27:5.) Wan man i no gat risen blong sore from we tingting blong hem i bin pulum hem blong stanap strong long saed blong Jeova. Taem wan man i strong blong folem ol Kristin rul, mo i traehad blong lesin long tingting blong hem we i jajem hem, hem i pruvum se hem i naf blong kam fren blong Jeova. Tru tumas, i waes blong blokem ol samting we oli save mekem se tingting blong yumi i stikim yumi, mo we maet i save mekem narafala i foldaon. Long saed ya, yumi save tingbaot nambawan eksampel we aposol Pol i soemaot.—1 Korin 8:12, 13; 10:31-33.
8. ?From wanem ol Kristin man Jyu, we fastaem oli stap aninit long Loa, oli no gat risen blong tok agensem stret fasin blong Jeova?
8 Blong mekem Jeova i glad, ol man Jyu oli mas obei long Ten Komanmen wetem kolosap 600 narafala smosmol loa bakegen. Biaen, taem Kristin skul i stanap, ol man Jyu mo eni narafala man, oli no moa nidim blong obei long ol loa ya long wosip blong Jeova, olsem ol man Jyu bifo oli bin mekem. Sam long ol loa ya we oli finis, hemia loa blong sakomsaes, kipim Sabat, mekem sakrifaes long anamol, mo ol defdefren rul long saed blong kakae. (1 Korin 7:19; 10:25; Kolosi 2:16, 17; Hibrus 10:1, 11-14) Ol man Jyu—ol 12 aposol tu—we oli kam Kristin, oli no moa stap aninit long ol loa we oli mas folem taem oli joen long kontrak blong Loa. ?Oli toktok smol agensem God se hem i mekem i no stret long olgeta from we hem i letem olgeta i folem sam loa we naoia i no moa nidim? Nogat. Oli glad from we oli kasem moa save long saed blong ol stampa tingting blong Jeova.—Ol Wok 16:4, 5.
9. ?Wanem samting i bin hapen long sam Wetnes blong Jeova long ol taem we i pas, be from wanem ol samting ya oli no mekem oli sore?
9 Long taem blong yumi, i gat sam Wetnes blong Jeova we oli strong tumas long saed blong ol samting we oli mas mekem mo ol samting we oli no mas mekem. From samting ya oli safa moa i bitim ol narafala. Biaen, taem oli kasem moa save long ol defren bisnes, samting ya i givhan long olgeta blong jenisim tingting blong olgeta. Be, oli no sore se fastaem oli bin lesin long voes blong hat mo tingting blong olgeta, nating se oli mas safa bigwan from. Yumi save presem olgeta ya from we oli rere blong safa blong stap tru long Jeova, mo “mekem olgeta samting ya from gud nyus.” Jeova i blesem ol man we oli fasgud long hem olsem. (1 Korin 9:23; Hibrus 6:10) Aposol Pita i waes taem hem i raetem se: “Sipos yufala i mekem i stret nomo, mo oli givim panis long yufala, nao yufala i mekem tingting blong yufala i longfala blong karem panis ya, hemia God bambae i blesem yufala from.”—1 Pita 2:20.
Store Blong Jona i Tijim Yumi
10, 11. Olsem wanem Jona i soem se hem i no trastem Jeova (a) ?taem hem i kasem oda ya blong go long Nineve? (b) ?taem God i no moa spolem ol man Nineve?
10 Taem Jona i kasem oda blong go long Nineve, hem i soemaot se hem i no tinghae long fasin ya we Jeova i trastem hem. Afta we Jona i kasem bigfala trabol from stronghed fasin blong hem blong no wantem obei, hem i stat tingting. Hem i luksave mastik blong hem, i agri blong go long ples ya we God i sanem hem blong wok, mo hem i givim woning long ol man Nineve se jajmen blong olgeta i kolosap. Be nao, ol samting we oli hapen oli no olsem we Jona i stap tingbaot. From we ol man Nineve oli tanem tingting blong olgeta from sin blong olgeta, Jeova i no moa gat tingting blong mekem olsem we hem i bin talem, hem i no moa wantem spolem taon ya.—Jona 1:1–3:10.
11 ?Jona i mekem wanem? Hem i harem nogud tumas, i komplen long God tru long wan prea. Samting we i mekem hem i harem nogud, hemia: ‘Mi save finis se bambae ol samting oli hapen olsemia. Hemia nao risen from wanem mi mi no wantem kam long Nineve fastaem. Wan bigfala fis i solemdaon mi we i mekem mi fraet tumas mo i mekem sem long mi, mi hadwok blong givim woning long ol man Nineve se jajmen blong olgeta i kolosap, mo naoia, afta we olgeta samting ya oli hapen long mi, ?hemia nao samting we bambae i kamaot? !Mi hadwok mo mi safa blong nating nomo! !I moagud mi ded!’—Jona 4:1-3.
12. ?Yumi save lanem wanem long store blong Jona?
12 ?Jona i gat gudfala risen blong komplen olsemia? ?Jeova i mekem i no stret, taem hem i soemaot sore long ol man ya we oli tanem tingting from sin blong olgeta? !Ating, i moagud sipos Jona i glad, from we naoia plante taosen man bambae oli no moa lus! (Jona 4:11) Be, fasin blong hem blong no gat respek mo blong komplen, i soemaot se hem i no rili trastem stret fasin blong Jeova. Hem i tingbaot hem wan tumas, be i no tingbaot ol narafala. Store ya blong Jona i mas tijim yumi blong no tingbaot yumi nomo, mo blong no tingbaot ol samting we yumi nomo i save harem gud long hem. Yumi mas agri se i stret nomo blong obei long Jeova, folem ol rod blong lidim yumi we hem i givim tru long ogenaesesen blong hem, mo agri long ol disisen blong Hem. Yumi sua fulwan se “olgeta we oli fraetgud long trufala God bambae oli kasem gudfala samting.”—Eklesiastis 8:12.
!Naoia i Taem Blong Mekem Fasin Blong Yumi Blong Trastem God i Kam Strong Moa!
13. ?Olsem wanem yumi wanwan i save mekem fasin blong trastem Jeova i kam strong moa?
13 Yumi soem se yumi waes taem yumi mekem fasin blong yumi blong trastem Jeova i kam strong moa. (Proveb 3:5-8) Yes, i no naf blong prea nomo long Jeova blong i halpem yumi blong trastem hem moa, nogat. Yumi mas mekem moa. Fasin blong trastem Jeova i save gru sipos hem i stanap long stret save. Taswe, fasin blong stadi wanwan, ridim Baebol mo ol buk we oli eksplenem Baebol, i mas ol fasin we yumi mekem long laef blong yumi evri dei. I impoten tumas blong go long olgeta Kristin miting, mo i impoten tu blong reregud mo blong joen fulwan long ol miting ya, go kasem mak we yumi naf blong kasem. Sipos yumi rere oltaem blong serem ol trutok blong Baebol wetem ol narafala, mo save olsem wanem blong winim ol man we oli agyu, bambae yumi mekem fasin blong yumi blong trastem Jeova mo Tok blong hem, i go dip moa. Long rod ya, yumi stap joen moa wetem hem evri dei long laef blong yumi.
14. ?From wanem i no longtaem, ol man blong God bambae oli rili nidim blong trastem God moa i bitim ol narafala taem bifo?
14 I no longtaem nating, wan bigfala trabol, we neva man i luk bifo, bambae i kamaot wantaem nomo. (Matyu 24:21) Long taem ya, bitim ol narafala taem bifo, ol man blong God bambae oli nidim moa blong trastem stret fasin blong Jeova mo rod we hem i givim blong lidim olgeta tru long ogenaesesen blong Hem. Nao i olsem we oli folem oda ya blong God se: “Ol man blong mi, yufala i go long ol rum blong yufala we i stap insaed olgeta long haos, mo yufala i satemgud ol doa biaen long yufala. Yufala i go haed smoltaem, kasem we ol tok panis oli pas.” (Aesea 26:20) Yes, oli go insaed finis long sefples, hemia bitim 85,000 kongregesen long 232 kantri. Sipos i gat sam narafala samting we yumi mas mekem blong folem oda ya se, “yufala i go long ol rum blong yufala,” yumi suagud se bambae Jeova i givhan long yumi blong folem oda ya.
15. ?Olsem wanem yia 1998 i mekem i klia se yumi mas trastem God, mo from wanem samting ya i stret nomo?
15 I impoten tumas blong mekem fasin blong yumi blong trastem God i kam strong moa naoia. Sipos yumi no trastem ol Kristin brata sista blong yumi, ogenaesesen blong Jeova, mo antap long hemia, sipos yumi no trastem Jeova hem wan, bambae yumi no save sef. !Taswe, i stret nomo we stampa vas blong yia ya 1998, i mekem ol Wetnes blong Jeova long olgeta ples blong wol, oli tingbaot oltaem se ‘olgeta we oli singaot long nem blong Jeova, hem bambae i sevem olgeta’! (Rom 10:13) Yumi mas gohed blong trastem tok ya fulwan. Sipos yumi luksave se yumi slak lelebet long fasin ya, ale, yumi mas wokhad naoia blong mekem se hem i kam strong bakegen.
Jajmen Blong Jeova Bambae i Stretgud
16. ?Sipos yumi no mekem fasin blong trastem God i gru, wanem i save hapen, mo olsem wanem yumi save blokem samting ya?
16 Long Hibrus 3:14, ol tabu Kristin oli kasem woning ya se: “Yumi evriwan i stap joen long Kraes blong kasem haf blong ol promes blong God. Be yumi mas holem bilif ya blong yumi blong fastaem, i stap strong, gogo kasem en blong laef blong yumi.” Ol tok ya oli stret tu long ol Kristin we oli gat hop blong laef long wol ya. Tras we yumi gat fastaem, i save lus sipos yumi no mekem i gru. Taswe, i impoten tumas blong gohed blong kasem stret save. !Long rod ya, bambae yumi mekem se fasin blong yumi blong trastem God, i stanap long wan strongfala faondesen!
17. ?From wanem yumi save trastem fulwan se Jisas i mekem i stret nomo taem hem i jajem wan man se i mas kasem laef?
17 I no longtaem, bambae Kraes i jekemap olgeta nesen blong ‘seraotem ol man, olsem man blong lukaot sipsip i seraotem ol sipsip blong hem long ol nani.’ (Matyu 25:31-33) Yumi save sua fulwan se bambae Kraes i mekem i stret nomo taem hem i talem hu i gat raet blong kasem laef. Jeova i givim waes, save, mo sam narafala fasin we Jisas i nidim blong ‘jajem olgeta man long wol long fasin we i stret nomo.’ (Ol Wok 17:30, 31) I gud yumi gat sem tingting olsem Ebraham, we i talem se: “Long tingting blong mi, yu [Jeova] yu no save spolem olgeta evriwan. Sipos yu kilim ol man nogud, be yu no save kilim ol stret man tu wetem olgeta. !Hemia i no fasin blong yu ya! Sipos yu mekem olsem, hemia i min se taem yu panisim ol man, yu stap mekem i sem mak nomo long man we i mekem i stret mo man we i mekem i no stret. !Be hemia i krangke olgeta! Yu yu man blong jajem olgeta man blong wol. !Yu yu stap jajem man long stret fasin nomo!”—Jenesis 18:25.
18. ?From wanem yumi no mas wari tumas long ol poen we naoia yumi no save yet?
18 Sipos yumi trastem stret fasin blong Jeova fulwan, bambae yumi no nidim blong wari long ol kwestin olsem se: ‘?Olsem wanem bambae Jisas i jajem ol bebi mo ol smol pikinini? ?Bambae i gat fulap man yet we oli no kasem gud nyus taem Amageden i kam? ?Olsem wanem long ol man we oli krangke? ?Olsem wanem long . . . ?’ Yes, yumi no save yet olsem wanem bambae Jeova i ansa long ol kwestin ya. Be, bambae hem i mekem long fasin we i stret nomo. Yumi neva mas gat tingting we i hafhaf long saed ya. Yes, maet yumi sapraes mo yumi glad tumas taem yumi luk we hem i ansarem ol kwestin ya long wan rod we yumi neva tingbaot bifo.—Skelem wetem Job 42:3; Ol Sam 78:11-16; 136:4-9; Matyu 15:31; Luk 2:47.
19, 20. (a) ?From wanem i no rong blong askem ol kwestin we oli stret? (b) ?Wetaem bambae Jeova i givim ol ansa we yumi nidim?
19 Sam man blong agens, oli talem se ogenaesesen blong Jeova i stap daonem ol man we, long stret taem, oli askem kwestin we i kamaot long hat blong olgeta. Be samting ya i no tru. (1 Pita 1:10-12) Baebol i givim advaes se yumi mas lego fasin blong askem ol kwestin olbaot, ol kwestin we yumi save se i no gat ansa blong olgeta yet. (Taetas 3:9) Sipos yumi askem ol gudfala kwestin mo traem faenem ansa blong olgeta long Tok blong God mo ol narafala Kristin buk, bambae stret save blong yumi i kam antap moa. Be tu, bambae yumi mekem fasin blong yumi blong trastem God i kam strong moa. Ogenaesesen blong Jeova i folem eksampel blong Jisas. Jisas i no givim ansa long ol kwestin we hem i save se i no stret taem yet blong ansarem. Hem i eksplenem se: “Mi mi gat plante narafala samting yet blong talem long yufala. Be naoia yufala i no save kasem olgeta, oli strong tumas yet long yufala.” (Jon 16:12) Mo tu, Jisas i talem stret se long taem ya, i gat sam samting we hem i no save.—Matyu 24:36.
20 I gat plante samting yet we Jeova i mas soemaot long yumi. I waes tumas blong wet long hem, mo trastem fulwan se hem bambae i mekem ol stampa tingting blong hem oli kamtru long stret taem blong hem. Yumi save trastem fulwan se long dei we stret taem blong Jeova i kamtru, bambae yumi glad tumas blong kasem moa save long ol rod blong Hem. Yes, bambae yumi kasem blesing, sipos yumi soemaot se yumi trastem fulwan Jeova, mo ogenaesesen we hem i stap yusum. Proveb 14:26 i mekem sua long yumi se: “Fasin fraetgud long Jeova i mekem man i trastem God fulwan. Mo man ya wetem ol pikinini blong hem bambae oli gat ples blong haed.”
[Futnot]
a Lukluk Wajtaoa, Oktoba 15, 1967, pej 638; Jun 1, 1987, pej 30.
?Wanem Tingting Blong Yu?
◻ ?From wanem i no waes nating blong letem ol filing blong yumi oli spolem fasin blong yumi blong trastem Jeova?
◻ ?Yumi save lanem wanem long store blong Jona?
◻ ?From wanem fasin blong stadi Baebol mo blong go long ol miting i impoten tumas?
[Tok Blong Pija Long Pej 16]
Evri man we oli kasem laef long taem ya bambae oli glad
[Tok Blong Pija Long Pej 18]
?Yu yu sua se yu trastem Jeova fulwan?