Jeova i Mas Stap Olsem Man Ya We Yu Trastem Fulwan
“Jeova hem wan bambae i man ya we yu save trastem fulwan.”—PROVEB 3:26.
1. Fulap man oli talem se oli trastem God be, ?wanem i soemaot se oli no rili trastem God?
“YUMI Trastem God.” Tok ya i stap long mane blong Yunaeted Stet blong Amerika. Be, ?olgeta man we oli stap yusum mane ya, long Amerika mo long ol narafala ples tu, oli rili trastem God? no ?oli trastem mane ya moa i winim God? Fasin blong trastem mane, long Amerika no long ol narafala kantri, i no save laenap wetem fasin blong trastem God blong lav. God ya we i gat Olgeta Paoa i neva yusum paoa blong hem long fasin we i no stret, mo hem i no gat fasin griri. Tru tumas, God i tok klia nomo se hem i agensem fasin griri.—Efesas 5:5.
2. ?Ol trufala Kristin oli gat wanem tingting long saed blong paoa blong ol sas samting?
2 Ol trufala Kristin oli trastem God nomo, i no ol sas samting we oli gat ‘paoa blong trikim yumi’ nomo. (Matyu 13:22) Oli luksave se paoa we mane i gat blong givim glad mo givhan long laef blong olgeta, i smol tumas. Be, paoa blong God ya we i gat Olgeta Paoa i no olsem. (Sefanaea 1:18) !Taswe, advaes ya i waes tumas se: “I nogud yufala i mekem fasin ya we yufala i laekem mane tumas. Sipos yufala i gat wanem samting, be yufala i mas harem gud long hem. From we God i talem finis se ‘Bambae mi mi no save livim yu yu stap yu wan. Bambae mi mi no save lego yu samtaem’ ”!—Hibrus 13:5.
3. ?Olsem wanem ol vas raonabaot long Dutronome 31:6, oli mekem se vas ya we Pol i yusum bakegen i kam klia moa?
3 Taem aposol Pol i raetem ol tok ya i go long ol Hibru Kristin, hem i yusum ol tok we Moses i bin talem long ol man Isrel smoltaem bifo we hem i ded, se: “Tingting blong yufala i mas strong, mo yufala i mas stanap strong oltaem. Bambae yufala i no mas fraet long olgeta. Hem i God blong yumi, mo hem i no save gowe long yufala samtaem. Bambae hem i no save lego yufala, oltaem bambae hem i stap wetem yufala.” (Dutronome 31:6) Ol vas raonabaot long tok ya, oli soemaot se Moses i stap pulum ol man Isrel blong trastem Jeova moa, bitim we oli trastem nomo se bambae hem i givim ol samting we oli nidim long saed blong bodi. ?Olsem wanem oli save trastem God moa?
4. ?Olsem wanem God i pruvum long ol man Isrel se oli save trastem hem?
4 Long ol 40 yia we ol man Isrel oli wokbaot long draeples, oltaem God i givim olgeta samting we oli nidim blong laef. (Dutronome 2:7; 29:5) Mo tu, hem wan i lidim olgeta. Hem i soemaot samting ya taem hem i yusum wan klaod blong lidim olgeta long dei mo wan faea blong lidim olgeta long naet. Hem i mekem olsem gogo ol man Isrel oli go insaed long “kantri ya we i fulap long melek mo eg blong sugabag.” (Eksodas 3:8; 40:36-38) Taem ol man Isrel oli stap rere blong go insaed long Promes Lan, Jeova i jusum Josua blong i tekem ples blong Moses. Ating ol man long kantri ya oli save agensem ol man Isrel. Be Jeova i bin wokbaot wetem ol man blong hem blong plante yia finis, taswe oli no nid blong fraet. !Ol man Isrel oli gat plante gudfala risen blong bilif fulwan se Jeova i wan God we oli save trastem!
5. ?Olsem wanem ol samting long laef blong ol Kristin tede i sem mak long ol man Isrel, bifo we oli go insaed long Promes Lan?
5 Ol Kristin tede tu, oli stap wokbaot long wan draeples, hemia rabis wol ya, blong go insaed long nyufala wol blong God. Sam long olgeta oli bin stap wokbaot blong bitim 40 yia finis. Naoia oli stap kolosap nomo long nyufala wol blong God. Nating se i olsem, i gat plante enemi yet we oli stap traem blokem olgeta blong go insaed long ples ya we i olsem Promes Lan. Ples ya i moa naes i bitim olfala Promes Lan we i fulap long melek mo eg blong sugabag. !Taswe, tok blong Moses we Pol i talem bakegen, i stret nomo long ol Kristin tede, se: “Bambae mi mi no save livim yu yu stap yu wan. Bambae mi mi no save lego yu samtaem”! Olgeta man we tingting blong olgeta i strong mo we oli no fraet, oli bilif fulwan, mo oli trastem Jeova, oli sua blong kasem pei.
Tras We i Stanap Long Save Mo Fasin Fren
6, 7. (a) ?Wanem i traem fasin blong Ebraham blong trastem Jeova? (b) ?Maet Ebraham i gat wanem filing taem hem i mekem trep i go long ples we bambae hem i mas kilim Aesak i ded olsem wan sakrifaes?
6 Wan taem, olfala bubu blong ol man Isrel, Ebraham, i kasem oda blong kilim i ded pikinini boe blong hem Aesak, blong givim olsem wan sakrifaes i go long God. (Jenesis 22:2) ?Wanem i givhan long papa ya, we i laekem pikinini blong hem tumas, blong trastem Jeova fulwan, mo i rere blong obei long oda ya? Hibrus 11:17-19 i ansa se: “From we Ebraham i stap bilif long God, taswe taem God i traem hem, hem i rere blong kilim pikinini blong hem Aesak, blong givim i go long God. God i mekem ol promes ya long Ebraham, mo Ebraham i gat wan pikinini nomo blong hem, be hem i rere blong kilim blong givim i go long God. God i talemaot long hem finis, i se ‘Long Aesak ya, bambae laen blong yu oli plante, blong holem nem blong yu.’ Be Ebraham i stap tingbaot we God i save mekem man i laef bakegen long ded. Mo hem i kasem pikinini blong hem Aesak bakegen, kolosap olsem we hem i laef bakegen long ded.”
7 Tingbaot se Ebraham mo Aesak, tufala i mas wokbaot tri dei blong go kasem ples ya we bambae tufala i mekem sakrifaes long hem. (Jenesis 22:4) Ebraham i gat inaf taem blong jenisim tingting blong hem, blong no mekem samting we God i askem long hem. !Traem tingbaot filing blong hem long ol dei ya! Ebraham i bin glad bigwan taem Aesak i bon. Nambawan merikel ya blong God i mekem se Ebraham mo woman blong hem Sera, we fastaem i no save karem pikinini, tufala i frengud moa wetem God. Stat long taem ya we Aesak i bon, i sua se tufala i stap tingbaot fyuja blong Aesak mo ol pikinini blong hem. !Be, naoia i luk olsem se drim blong tufala i lus wantaem nomo from samting we God i askem!
8. ?Olsem wanem Ebraham i soemaot se fasin blong hem blong trastem Jeova i go moa, i bitim we hem i bilif nomo se God i save mekem Aesak i laef bakegen long ded?
8 Nating se i olsem, Ebraham i trastem God fulwan, from save we hem i gat long God, olsem wan man we i savegud fren blong hem. Ebraham, we i “Fren blong God,” i stap “bilif long God. Mo from we hem i bilif long God olsem, God i mekem hem i stret man long fes blong hem.” (Jemes 2:23) Fasin blong Ebraham blong trastem Jeova i go moa, i bitim we hem i bilif nomo se God i save mekem Aesak i laef bakegen long ded. Ebraham i suagud se samting we Jeova i askem hem blong mekem, i stret, nating se Ebraham i no kasem save yet long samting we bambae i kamaot biaen. Hem i no gat tingting nating sipos samting we God i askem long hem i stret no i no stret. Biaen, fasin blong Ebraham blong trastem Jeova, i kam strong moa taem wan enjel blong Jeova i blokem hem blong i no kilim Aesak i ded olsem wan sakrifaes.—Jenesis 22:9-14.
9, 10. (a) ?Wetaem Ebraham i bin soemaot se hem i trastem Jeova fulwan? (b) ?Wanem impoten samting we yumi save lanem long eksampel blong Ebraham?
9 Samwe long 25 yia bifo, Ebraham i bin stap soemaot semkaen fasin ya we hem i trastem stret fasin blong Jeova. Taem hem i kasem woning se bambae Sodom mo Gomora oli lus olgeta, hem i stat wari from ol stret man we oli laef long taon ya, olsem nefyu blong hem Lot. Ebraham i krae i go long God, i se: “Long tingting blong mi, yu yu no save spolem olgeta evriwan. Sipos yu kilim ol man nogud, be yu no save kilim ol stret man tu wetem olgeta. !Hemia i no fasin blong yu ya! Sipos yu mekem olsem, hemia i min se taem yu panisim ol man, yu stap mekem i sem mak nomo long man we i mekem i stret mo man we i mekem i no stret. !Be hemia i krangke olgeta! Yu yu man blong jajem olgeta man blong wol. !Yu yu stap jajem man long stret fasin nomo!”—Jenesis 18:25.
10 Olfala Ebraham i suagud se Jeova i neva mekem wan samting we i no stret. Sam taem biaen, man blong raetem Ol Sam i singsing se: “Fasin blong Hae God i stret gud, mo olgeta samting we hem i stap mekem i stap soemaot samting ya. Hem i God blong sore, mo olgeta wok blong hem i stap soemaot fasin ya blong hem.” (Ol Sam 145:17) I gud blong askem long yumi wanwan se: ‘?Wanem tingting blong mi long ol samting we Jeova i letem se oli kasem mi? ?Mi mi trastem ol stret fasin blong hem? ?Mi mi bilif fulwan se olgeta samting we Jeova i letem blong oli kasem mi, oli blong mekem i gud long mi mo long ol narafala tu?’ Sipos yumi save ansa se yes, i minim se yumi lanem wan impoten samting from eksampel blong Ebraham.
Trastem Ol Disisen Blong Jeova
11, 12. (a) ?Ol man blong God oli nidim blong trastem hu bakegen? (b) ?Wanem samting i save kam wan problem long yumi sam samtaem?
11 Olgeta we oli trastem Jeova, oli trastem tu ol man we Jeova i jusumaot blong mekem ol stampa tingting blong hem oli kamtru. Long saed blong ol man Isrel, hemia i minim se oli mas trastem Moses mo Josua, we biaen i tekem ples blong Moses. Long saed blong ol faswan Kristin, i minim se oli mas trastem ol aposol mo ol elda long kongregesen blong Jerusalem. Long saed blong yumi tede, i minim se yumi mas trastem ‘slef we i stret mo waes,’ we i stap givim kakae long saed blong speret, “long stret taem blong hem.” Mo tu yumi mas trastem ol narafala man ya we oli joen long Hed Kampani.—Matyu 24:45.
12 Tru tumas, yumi kasem blesing taem yumi trastem ol man ya we oli stap lidim yumi long Kristin kongregesen. Yumi kasem advaes ya se: “Yufala i mas ona long ol man we i stap lidim yufala, mo yufala i mas obei long ol tok blong olgeta. Olgeta ya oli stap lukaot long Kristin laef blong yufala, we oli no save spel, mo bambae oli mas talemaot long God we oli holem wok ya blong olgeta olsem wanem. Yufala i mas mekem olgeta oli harem gud long wok ya blong olgeta. Sipos yufala i stap mekem olgeta oli harem nogud long wok ya, fasin ya bambae i no givhan long yufala nating.”—Hibrus 13:17.
Blokem Fasin Blong Traem Faenem Poen Long Ol Disisen Blong Jeova
13. ?Wanem sam risen we yumi gat blong trastem olgeta we Jeova i jusumaot blong lidim yumi?
13 Baebol i halpem yumi blong skelemgud fasin blong yumi blong trastem olgeta ya we oli stap lidim ol man blong Jeova. Maet yumi askem long yumi wan se: ‘?Moses i mekem mastik samtaem? ?Ol aposol oli soem oltaem tingting blong Kraes, tingting ya we Jisas i wantem blong oli soem?’ Ansa blong ol kwestin ya i klia nomo. Jeova i mekem disisen blong yusum sam man, we oli stap tru mo oli fasgud long hem, blong oli lidim ol man blong hem, nating se ol man ya oli sinman. From samting ya, nating se ol elda tede oli sinman, yumi mas tingbaot olgeta olsem we ‘tabu speret i putumap olgeta, blong lukaot long kongregesen blong God, olsem we man blong lukaot long sipsip i stap lukaot long ol sipsip blong hem.’ Taswe, yumi mas sapotem mo respektem olgeta.—Ol Wok 20:28.
14. ?Wanem samting yumi save makem long fasin ya we Jeova i jusum Moses, be i no Eron no Miriam blong lidim ol man Isrel?
14 Eron i olfala moa i bitim Moses long tri yia, be sista blong tufala, Miriam, i bon fastaem long tufala. (Eksodas 2:3, 4; 7:7) Mo from we Eron i gat gudhan blong toktok i bitim Moses, God i jusum hem blong wok olsem man blong toktok long nem blong brata blong hem. (Eksodas 6:29–7:2) Be, blong lidim ol man Isrel, Jeova i no jusum hemia we i olfala moa, olsem Miriam, no man we i gat gudhan blong toktok, olsem Eron. Hem i jusum Moses from we hem i luksave fulwan wanem i stretgud mo ol nid blong ol man long taem ya. Wan taem, from we Eron mo Miriam, tufala i fogetem poen ya, tufala i stat toktok smol se: “?Olsem wanem? ?Jeova i toktok tru long Moses hem wan? ?Hem i no stap toktok tru long yumitufala tu no?” Miriam, we maet hem nao i statem fasin ya blong toktok smol, i kasem panis from we hem i no soem respek long man we Jeova i jusumaot. Hem mo Eron, tufala i mas luksave se Moses i man ya we “tingting blong hem i stap daon i winim ol narafala man long wol.”—Namba 12:1-3, 9-15.
15, 16. ?Olsem wanem Kaleb i pruvum se hem i trastem Jeova fulwan?
15 Taem 12 spae oli go blong lukluk Promes Lan, 10 long olgeta oli kambak wetem nogud ripot. Oli mekem ol man Isrel oli fraet taem oli tokbaot se ol man Kenan oli “ol bigbigfala man.” Samting ya i pulum ol man Isrel blong stat “toktok smol agensem Moses mo Eron.” Be, i no olgeta spae ya evriwan we oli soem fasin ya blong no trastem Moses mo Jeova. Yumi ridim se: “Nao ol man ya we oli stap hivap raon long Moses oli fraet, mo oli stap toktok tumas, be Kaleb i tok blong kwaetem olgeta, i talem se, ‘I moa gud yumi go kilim olgeta ya naoia, yumi holem ples ya. !Yumi strong ya! !Yumi naf blong winim olgeta!’ ” (Namba 13:2, 25–33; 14:2) Wan narafala spae we nem blong hem Josua, i gat sem strong tingting olsem fren blong hem, Kaleb. Tufala tugeta i soem se tufala i trastem Jeova taem tufala i talem se: “Sipos Hae God i glad long yumi, bambae hem i tekem yumi i go long ples ya, mo bambae hem i givim graon ya long yumi we kakae blong hem i nambawan. . . . !Yufala i no mas fraet long olgeta ya! . . . Hae God i stap wetem yumi, mo hem i winim finis ol god ya blong olgeta we oli stap givhan long olgeta. !From samting ya, yumi no mas fraet!” (Namba 14:6-9) Tufala i kasem blesing from fasin ya we tufala i trastem Jeova. Long olgeta bigman we oli laef long taem ya, Kaleb, Josua, mo sam Livaet, olgeta ya nomo oli gat jans blong go insaed long Promes Lan.
16 Sam yia biaen, Kaleb i talem se: “Mi mi stap obei long [Hae God] oltaem. . . . Be i stat long taem ya we Hae God i givim tok ya long Moses kam kasem tede, fote faef yia i pas finis. Promes ya i kamaot long taem ya we yumi stap wokbaot long draeples yet. Be Hae God i holem mi mi stap laef kam kasem tede, olsem we hem i promes. Naoia, mi mi gat eitefaef yia finis, be mi mi strong yet, sem mak olsem long taem ya bifo we Moses i sanem yumi.” (Josua 14:6-11) Kaleb i gat gudfala tingting, strong bilif, mo strongfala bodi. Nating se i olsem, Jeova i no jusum Kaleb blong tekem ples blong Moses. Jeova i givim spesel wok ya long Josua. Yumi save trastem se i mas gat risen from wanem Jeova i mekem olsem, mo hemia i beswan disisen.
17. ?Wanem sam samting i pulum samfala blong ting se i no stret blong Pita i holem wan spesel wok?
17 Aposol Pita i talem tri taem se hem i no save Masta blong hem. Mo tu, hem i traem stretem wan bisnes long prapa tingting blong hem, taem hem i katemaot sora blong slef blong hae pris. (Matyu 26:47-55, 69-75; Jon 18:10, 11) Maet samfala oli talem se Pita i wan man blong fraet, tingting blong hem i olbaot, mo i no stret blong hem i kasem sam spesel wok. Be, ?hu ya i kasem ol ki blong Kingdom, wetem spesel wok ya blong openem rod blong tri defren grup blong man blong oli go long heven? Hemia Pita.—Ol Wok 2:1-41; 8:14-17; 10:1-48.
18. ?Wanem mastik, we Jud i tokbaot, we yumi mas blokem?
18 Ol eksampel ya, oli soemaot se yumi mas lukaotgud blong no jajem narafala from samting we yumi luk. Sipos yumi trastem Jeova, bambae tingting blong yumi i no save hafhaf long ol disisen we hem i mekem. Nating se olgeta man insaed long ol kongregesen blong God long wol ya oli ol sinman nomo, mo oli no save talem se oli naf blong mekem evri samting i stretgud, Jeova i stap yusum olgeta bigwan. Jud, we i kasin brata blong Jisas, i givim woning long ol Kristin blong faswan handred yia se oli mas stap longwe long ol man we oli ‘no gat respek long hemia we i masta, mo oli stap tok nogud long ol haeman.’ (Jud 8-10) Yumi neva mas mekem olsem olgeta ya.
19. ?From wanem yumi no gat risen blong traem faenem poen long ol disisen we Jeova i mekem?
19 I klia se, Jeova i stap jusum sam man we oli nafgud blong mekem sam kaen wok blong lidim ol man blong Hem long rod we hem i wantem olgeta blong folem long ol taem ya. Yumi mas traehad blong luksave samting ya. I nogud yumi traem faenem poen long ol disisen we God i tekem. Be, yumi wanwan i mas glad mo holem tingting daon blong mekem wok blong Jeova long eni ples we hem i wantem yumi blong stap long hem. Long rod ya, yumi soemaot se yumi trastem Jeova fulwan.—Efesas 4:11-16; Filipae 2:3.
Soemaot Se Yumi Trastem Stret Fasin Blong Jeova Fulwan
20, 21. ?Yumi save lanem wanem from fasin we God i mekem long Moses?
20 Sipos yumi trastem yumi tumas i bitim we yumi trastem Jeova, i gud yumi tingbaot eksampel blong Moses. Taem hem i gat 40 yia, hem i traehad hem wan nomo, blong mekem ol man Isrel oli gofri long kalabus long Ijip. Hem i gat gudfala tingting taem hem i wantem mekem olsem. Be, ol traehad blong hem oli no mekem ol man Isrel oli fri wantaem, mo i pulum trabol nomo i kam long prapa laef blong hem. Ol samting we oli kamaot oli fosem hem blong ronwe. Be, afta long 40 yia we hem i kasem strongfala trening long narafala kantri, God i luk se Moses i naf blong mekem samting ya we hem i bin wantem mekem fastaem. Naoia, Moses i save suagud se Jeova i sapotem hem, from we ol samting oli hapen folem stret taem we Jeova i makemaot finis.—Eksodas 2:11–3:10.
21 Maet wanwan long yumi i askem se: ‘?Samtaem, mi mi stap go fastaem long Jeova mo ol elda we hem i putumap insaed long kongregesen? ?Mi mi stap traem blong pusum ol narafala mo mekem ol samting folem prapa tingting blong mi? ?Mi mi rere blong agri long trening ya we mi stap kasem, i bitim we mi tingting nogud from we mi no kasem sam spesel wok?’ Bigfala poen se, ?yumi lanem wan impoten samting long eksampel blong Moses?
22. Nating se Moses i lusum wan bigfala blesing, ?hem i gat wanem filing long saed blong Jeova?
22 Yumi save lanem wan narafala samting long eksampel blong Moses. Namba 20:7-13 i tokbaot wan mastik blong Moses, we i mekem se hem i lusum wan bigfala samting. Yes, hem i lusum spesel blesing ya blong lidim ol man Isrel i go insaed long Promes Lan. Long taem ya, ?Moses i talem se disisen blong Jeova long bisnes ya i no stret? ?Hem i go stap hem wan long wan ples, i kros from we i olsem se God i stap mekem i no stret long hem? ?Moses i no moa trastem stret fasin blong Jeova? Yumi save faenem ansa blong ol kwestin ya long ol tok we Moses hem wan i talem long ol man Isrel, smoltaem bifo we hem i ded. Moses i tokbaot Jeova i se: “Ol wok blong Hem oli stretgud olgeta, from we olgeta rod blong hem oli stret. God ya i holem olgeta promes blong hem, i no save mekem i no stret. Hem i stret we i stret.” (Dutronome 32:4) I sua se, Moses i gohed blong trastem Jeova gogo kasem we hem i ded. ?Olsem wanem long yumi? ?Yumi wanwan i stap mekem sam samting blong kam strong moa long fasin blong trastem Jeova mo stret fasin blong hem? ?Olsem wanem yumi save mekem samting ya? Bambae yumi luk.
?Bambae Yu Yu Ansa Olsem Wanem?
◻ ?Wanem ol risen we oli mekem se ol man Isrel oli save trastem Jeova?
◻ Long saed blong fasin blong trastem Jeova fulwan, ?yumi save lanem wanem long store blong Ebraham?
◻ ?From wanem yumi mas blokem long fasin ya blong traem faenem poen long ol disisen we Jeova i mekem?
[Tok Blong Pija Long Pej 13]
Sipos yumi trastem Jeova fulwan, hemia i min se yumi gat respek tu long olgeta we oli stap lidim kongregesen