‘Yumi Wokbaot From Bilif, i No From Ol Samting We Yumi Luk’

‘Yumi wokbaot from bilif, i no from ol samting we yumi luk.’​—2 KORIN 5:7.

1. ?I minim wanem se yumi ‘wokbaot from bilif’?

EVRITAEM we yumi prea folem fasin we Baebol i makemaot, yumi soem se yumi gat bilif. Taem yumi stat blong prij long ol narafala long saed blong Kingdom blong God, hemia tu i soemaot bilif. Mo taem yumi givim laef blong yumi i go long Jeova, yumi soemaot se yumi wantem ‘wokbaot from bilif,’ hemia se, yumi wantem we bilif i lidim laef blong yumi.​—2 Korin 5:7; Kolosi 1:​9, 10.

2. ?From wanem man i no soem se hem i gat bilif taem hem i jes joen long sam wok blong kongregesen nomo?

² Sipos yumi rili wantem folem fasin ya long laef blong yumi, yumi nidim bilif we i stanap long wan strong faondesen. (Hibrus 11:​1, 6) Plante man oli laekem ol Wetnes blong Jeova, from we ol Wetnes oli folem ol gudfala fasin mo oli gat lav. I gud we ol man ya oli gat tingting olsem, be samting ya i no soemaot se oli gat bilif. Sam narafala oli mared long wan man no woman we i bilif, no maet papa mama blong olgeta i gat strong bilif. Sam samtaem, oli mekem sam wok long saed blong speret wetem hemia we oli laekem tumas. I tru, i wan bigfala blesing blong gat wan long famle we i soem nambawan eksampel olsemia, be i nidim yet we olgeta evriwan oli gat prapa lav mo bilif blong olgeta long God.​—Luk 10:​27, 28.

3. (a) Blong gat bilif we i stanap long wan strong faondesen, ?yumi wanwan i mas suagud long wanem samting long saed blong Baebol? (b) ?From wanem i isi moa long samfala blong bilif se Baebol i kamaot long God?

³ Ol man we oli rili wokbaot from bilif, oli suagud se Baebol i Tok blong God. I gat fulap pruf blong soem se Tabu Baebol i rili “kamaot long God.”a (2 Timote 3:​16) ?Wan man i mas stadi long hamas pruf bifo we hem i bilif long Baebol? Maet samting ya i dipen long ples mo fasin we man ya i gruap long hem. Pruf we i naf long wan man, maet i no naf blong mekem narafala man i bilif. Samfala, nating se oli luk fulap pruf we i klia nomo, maet oli no bilif yet long ol samting we pruf ya i soemaot. ?From wanem? From ol samting we olgeta nomo oli wantem long hat blong olgeta. (Jeremaea 17:​9) Taswe, nating we wan man i talem se hem i intres long stampa tingting blong God, maet long hat blong hem, hem i wantem tumas we ol man blong wol oli laekem hem. Maet hem i no wantem lego long fasin blong laef we i agensem ol rul blong Baebol. Be, sipos wan man i rili hanggri from trutok, mo sipos hem i no traem gyaman long hem wan bakegen long saed blong trufala filing long hat blong hem, mo sipos hem i gat tingtingdaon, ale, bambae hem i luksave se Baebol i Tok blong God.

4. ?Man i mas mekem wanem blong kasem bilif?

⁴ Plante man we oli stadi Baebol blong sam manis nomo, oli lanem naf pruf finis blong bilif se Baebol i Tok blong God. Nao sipos oli letem tijing ya blong Jeova i kasem hat blong olgeta, ale, ol dip tingting mo filing blong olgeta, wetem ol tingting we oli pusum olgeta, bambae oli jenis sloslou folem ol samting we oli stap lanem. (Ol Sam 143:10) Rom 10:10 i talem se, wan man i soemaot bilif ‘wetem hat’ blong hem. Bilif i pusum man ya blong soemaot trufala filing blong hem, mo bambae yumi luk samting ya long fasin blong laef blong hem.

Noa i Wok Folem Bilif We i Stanap Long Strong Faondesen

5, 6. ?Bilif blong Noa i stanap long wanem?

⁵ Noa i gat bilif we i stanap long wan strong faondesen. (Hibrus 11:7) ?Wanem stampa blong bilif blong hem? Noa i gat Tok blong God. Ol tok ya i no stap long wan buk, be God i talem ol tok ya long Noa. Yumi ridim long Jenesis 6:​13 se: ‘God i talem long Noa se: “Bambae mi spolem olgeta man long wol ya, from we wol ya i fulap long rabis fasin blong olgeta.” ’ Ale, Jeova i talem long Noa blong bildim wan sip, mo i givim save long hem olsem wanem blong bildim. Nao God i gohed, i se: “Bambae mi mi mekem bigfala wora i kam long wol ya blong draonem olgeta samting ya we i laef, blong spolem olgeta. Evri samting long wol ya bambae i ded.”​—Jenesis 6:​14-17.

⁶ ?Olsem wanem? ?Ren i bin foldaon bifo long taem ya? Baebol i no talem stret. Jenesis 2:5 i talem se: ‘Jeova God i no bin mekem ren i foldaon yet long graon.’ Be, hemia tok blong Moses, we i laef plante handred yia biaen. Hem i yusum fasin ya blong eksplenem samting we i bin hapen longtaem bifo we Noa i laef. Jenesis 7:​4 i soemaot se Jeova i toktok wetem Noa long saed blong ren, mo i klia se Noa i kasem save long samting we hem i stap tokbaot. Be, bilif blong Noa i no stanap long samting we hem i save luk. Aposol Pol i raetem se, ‘God i talemaot ol samting long Noa, we i no gat man i luk yet.’ God i talem long Noa se, bambae “i kavremap wol ya fulwan wetem wora,” no bambae “i mekem olgeta wora blong heven i foldaon long wol ya,” olsem futnot blong New World Translation i talem long Jenesis 6:​17. Long ol yia bifo long taem blong Noa, samting ya i neva hapen. Be ol samting we God i bin wokem mo we Noa i luk raonabaot, oli soemaot klia long hem se God i naf blong mekem bigfala wora i foldaon blong spolem wol. Ale, bilif i pusum hem blong wokem wan sip.

7. (a) ?Noa i no nidim wanem blong pulum hem blong obei long tok blong God? (b) ?Olsem wanem bilif blong Noa i givhan long yumi, mo olsem wanem bilif blong yumi i save givim blesing long sam narafala?

⁷ God i no talem long Noa, wanem dei stret bambae hem i mekem Bigfala Wora ya i foldaon. Be Noa i no yusum samting ya olsem wan eskyus, blong wet fastaem mo luk sipos tok blong God bambae i kamtru, no nogat. Hem i no putum wok blong bildim sip mo wok blong prij long seken ples long laef blong hem. Long stret taem, God i talem long Noa blong go insaed long sip. Be bifo long taem ya, “Noa i mekem olgeta samting we Jeova i talem long hem. Hem i mekem stret olsem Jeova i talem.” (Jenesis 6:​22, NW) Noa i wokbaot from bilif, i no from ol samting we hem i luk. !Yumi glad tumas we hem i mekem olsem! Bigfala bilif blong hem i mekem se yumi stap laef tede. Long saed blong yumi tu, bilif we yumi soemaot i save jenisim fyuja blong yumi, wetem fyuja blong ol pikinini blong yumi, mo ol man raonabaot long yumi.

Bilif Blong Ebraham

8, 9. (a) ?Bilif blong Ebraham i stanap long wanem? (b) ?Long wanem fasin Jeova i ‘soemaot hem’ long Ebraham?

⁸ Tingbaot wan narafala man​—⁠hemia Ebraham. (Hibrus 11:​8-​10) ?Bilif blong Ebraham i stanap long wanem? Hem i gruap long taon blong Uru long Koldia. Long ples ya, ol man oli wosip long aedol mo oli ronem ol sas samting blong laef. Be, sam narafala samting oli gat paoa long laef blong Ebraham. I klia se, Ebraham i save storeyan wetem Sem we i pikinini blong Noa, from we Ebraham i bon 150 yia bifo we Sem i ded. Ebraham i bilif strong se Jeova i “Hae God ya we i Antap Tumas, we i mekem skae mo graon.”​—Jenesis 14:22.

⁹ I gat wan narafala samting tu we i gat paoa long laef blong Ebraham. Jeova “i soemaot hem long. Ebraham, taem Ebraham i stap long kantri blong hem, Koldia, long bigfala ples ya Mesopotemia. Long taem ya hem i no go mekem ples blong hem long taon ya Haran yet. God i talem long hem, i se ‘Yu mas aot long famle blong yu, mo ples blong yu, blong go long wan ples we bambae mi mi soemaot long yu.’ ” (Ol Wok 7:​2, 3) ?Jeova i yusum wanem rod blong ‘soemaot hem’ long Ebraham? Ebraham i no luk God stret. No gat. (Eksodas 33:20) Be, maet Jeova i bin soemaot hem long wan drim, we Ebraham i luk sam bigbigfala saen no laet blong soem paoa blong Jeova. Sipos no, maet Jeova i bin sanem wan enjel i go long Ebraham. (Skelem wetem Jenesis 18:​1-3; 28:⁠10-​15; Levitikas 9:​4, 6, 23, 24.) Nomata wanem rod Jeova i yusum blong soemaot hem long Ebraham, man ya blong bilif i suagud se God i stap givim wan nambawan blesing long hem. Ale, bilif i pusum hem blong obei.

10. ?Olsem wanem Jeova i mekem bilif blong Ebraham i strong?

¹⁰ Blong gat bilif, Ebraham i no nidim plante save long saed blong kantri we God bambae i soem long hem. No gat. Hem i no nidim blong save wetaem God bambae i givim kantri ya long hem, bifo we hem i bilif. Hem i bilif from we hem i save se Jeova i God ya we i Antap Olgeta. (Eksodas 6:⁠3) Jeova i talem long Ebraham se bambae hem i gat pikinini. Plante taem, Ebraham i tingbaot olsem wanem samting ya i save kamtru, from we hem i stap kam olfala tumas. (Jenesis 15:3, 4) Blong mekem bilif blong Ebraham i strong, Jeova i talem long hem blong lukluk i go antap long skae, mo traem kaontem ol sta. Nao hem i talem se: “Ol pikinini we bambae oli kamaot biaen long yu, bambae oli plante olsem ol sta ya.” Tok ya i gat bigfala paoa long filing blong Ebraham. Long tingting blong hem, i klia nomo se Man we i Wokem ol samting ya blong sapraes long skae, hem i naf blong mekem promes blong hem i kamtru. Ale, Ebraham i ‘bilif long Jeova.’ (Jenesis 15:​5, 6) Ebraham i no bilif nomo from we ol tok we Jeova i talem oli mekem hem i glad. No gat. Bilif blong hem i stanap long wan strong faondesen.

11. (a) ?Ebraham we i gat kolosap 100 yia, i mekem wanem taem God i promes se olfala Sera bambae i gat wan pikinini boe? (b) ?Wanem kaen bilif i givhan long Ebraham blong winim traem we hem i mas tekem boe blong hem long Hil blong Moria mo kilim hem olsem sakrifaes?

¹¹ Taem Ebraham i gat kolosap 100 yia, mo waef blong hem, Sera, i gat kolosap 90 yia, Jeova i talem promes blong hem bakegen, se bambae Ebraham mo Sera i gat wan pikinini boe. Ebraham i tingbaot se tufala i olfala finis. Be “tingting blong hem i no seksek long promes blong God, bilif blong hem i stap strong. Mo hem i kasem paoa from we i bilif. Nao hem i leftemap nem blong God, from we i savegud we bambae God i save mekem olgeta samting we hem i promes blong mekem.” (Rom 4:​19-​21) Ebraham i sua se God i no save brekem promes blong hem. Biaen, bilif blong Ebraham i pusum hem blong obei long tok blong God blong tekem pikinini blong hem Aesak i go long kantri blong Moria, mo blong givim hem olsem wan sakrifaes long God. (Jenesis 22:​1-​12) Ebraham i bilif fulwan se God ya we i bin mekem wan merikel blong givim pikinini ya long hem fastaem, i save mekem hem i laef bakegen long ded tu, blong holem ol narafala promes we Hem i bin mekem long saed blong boe ya.​—Hibrus 11:17-​19.

12. ?Ebraham i gohed hamas yia blong wokbaot from bilif, mo hem wetem famle blong hem bambae oli kasem wanem pei from strong bilif blong olgeta?

¹² Ebraham i soem se bilif i lidim hem, i no jes sam samtaem nomo, be oltaem long laef blong hem. Long olgeta yia we hem i laef, hem i no kasem wan haf blong Promes Lan, olsem prapa graon blong hem. (Ol Wok 7:⁠5) Be, hem i no kam taed, we i wantem tanraon mo gobak long Uru blong Koldia. Blong 100 yia, go kasem we hem i ded, hem i stap long haos tapolen nomo, long kantri ya we God i bin soem long hem. (Jenesis 25:7) Hibrus 11:16 i tokbaot Ebraham mo waef blong hem Sera, wetem boe blong tufala Aesak, mo smol bubu blong tufala, Jekob, i se: “God i no gat sem from we olgeta oli stap talem se hem i God blong olgeta, from we hem i mekem wan taon i stap rere blong olgeta finis.” Yes, Jeova i mekem wan ples i rere blong olgeta, blong bambae oli stap long wol ya aninit long rul blong Kingdom blong Mesaea.

13. ?Hu ya ol man blong Jeova tede we oli soemaot se oli gat bilif olsem Ebraham?

¹³ I gat sam man blong Jeova tede we oli olsem Ebraham. Blong plante yia, oli bin wokbaot from bilif. Long paoa we God i givim, oli bin winim plante trabol, we oli bigwan olsem ol bigfala hil. (Matyu 17:20) Bilif blong olgeta i no seksek, from we oli no save stret taem we God bambae i givim presen we hem i promes finis blong givim. Oli save se tok blong Jeova i no save rong, mo oli haremgud long nambawan blesing blong stap olsem ol Wetnes blong hem. ?Hemia filing blong yu tu?

Bilif We i Pusum Moses

14. ?Wanem samting i putum faondesen blong bilif blong Moses?

¹⁴ Wan narafala man blong bilif, hemia Moses. ?Wanem faondesen blong bilif blong hem? Samting ya i stat taem hem i wan bebi nomo. Gel blong Fero i faenem Moses, taem hem i stap flot long Reva Nael long wan basket we oli wokem long gras, mo gel ya i karem Moses olsem pikinini blong hem. Nating se i olsem, stret mama blong Moses, Hibru woman ya Jokebed, hem nao i givim titi long boe ya mo lukaotgud long hem long ol faswan yia blong laef blong hem. I klia se Jokebed i tijimgud Moses, blong i laekem Jeova tumas, mo blong i gat tangkyu long hat blong hem from ol promes we Jeova i bin mekem long Ebraham. From we Moses i olsem wan pikinini blong Fero, biaen “oli tijim hem long waes blong ol man Ijip.” (Ol Wok 7:​20-​22; Eksodas 2:​1-​10; 6:​20; Hibrus 11⁠:23) Be, nating se Moses i gat haenem olsemia, hem i stap tingting moa long ol man blong God we oli wok slef long Ijip.

15. ?Moses i mekem wanem blong soemaot se hem i wantem go joen wetem ol man blong Jeova?

¹⁵ Taem Moses i gat 40 yia, hem i kilim i ded wan man Ijip we i stap mekem raf fasin long wan man Isrel. Samting ya i soemaot filing we Moses i gat long ol man blong God. Yes, “Moses i stap bilif long God, taswe taem hem i kam bigman finis, hem i no save letem olgeta oli talem se hem i pikinini blong gel blong Fero.” Hem i no wantem ‘haremgud blong smoltaem long wan laef we i fulap long sin,’ olsem wan pikinini blong king blong Ijip. Bilif i pusum hem blong soemaot se hem i wantem go joen wetem ol man blong God we oli stap safa.​—Hibrus 11:24, 25; Ol Wok 7:23-25.

16. (a) ?Jeova i givim wanem wok long Moses, mo olsem wanem God i halpem hem? (b) ?Olsem wanem Moses i soem bilif taem hem i mekem wok ya?

¹⁶ Moses i wantem tumas blong mekem wan samting blong givhan long ol manples blong hem. Be i no stret taem blong God yet blong mekem olgeta i fri. Ale, Moses i mas aot long Ijip. Fote yia biaen nomo, Jeova i sanem wan enjel blong talem long Moses se hem i mas gobak long Ijip mo lidim ol man Isrel oli aot long kantri ya. (Eksodas 3:​2-​10) ?Moses i mekem wanem? Hem i no talem se Jeova i no naf blong mekem ol man Isrel oli fri, be hem i harem se hem nao i no naf blong mekem bigfala wok ya we God i givim long hem. Wetem lav, Jeova i givim help we Moses i nidim blong mekem tingting blong hem i strong. (Eksodas 3:⁠11–4:​17) Ale, bilif blong Moses i kam strong. Nao, hem i gobak long Ijip mo i tok stret long Fero bakegen mo bakegen. Hem i givim woning long rula ya se ol bigbigfala trabol bambae oli kasem Ijip sipos hem i no letem ol man Isrel oli gofri blong mekem wosip long Jeova. Moses i no naf long prapa paoa blong hem blong mekem ol trabol ya oli kamaot. Hem i wokbaot from bilif, i no from ol samting we hem i luk. Hem i bilif long Jeova mo long tok blong hem. Ale, Fero i tok nogud long Moses, be Moses i stanap strong. “From we Moses i stap bilif long God, taswe hem i aot long Ijip, we i no fraet long king ya we i kros tumas. Hem i no save tanraon blong gobak, i stap gohed nomo, olsem we i stap luk oltaem long pei we bambae God i givim long hem.” (Hibrus 11:27) Moses i no stretgud olgeta. Hem i mekem sam mastik. (Namba 20⁠:​7-12) Be, afta we God i givim wok ya long hem, bilif nomo i lidim laef blong hem.

17. ?Fasin blong wokbaot from bilif i mekem wanem long Noa, Ebraham, mo Moses, nating se trifala i no luk nyufala wol blong God long taem blong trifala?

¹⁷ I gud sipos bilif blong yu i olsem Noa, Ebraham, mo Moses. I tru se nyufala wol blong God i no kamtru long taem blong trifala ya. (Hibrus 11:39) Hemia i no stret taem blong God yet. I gat sam narafala samting we oli mas hapen blong mekem stampa tingting blong hem i kamtru. Be, bilif blong trifala ya long Tok blong God i no seksek nating, mo nem blong trifala i stap long buk blong laef.

18. ?From wanem olgeta we God i singaot olgeta blong laef long heven oli nidim blong wokbaot from bilif?

¹⁸ Aposol Pol i raetem se: ‘God i tingbaot blong mekem samting we i moagud long yumi.’ Hemia i min se, God i mekemrere wan samting we i moagud blong olgeta olsem Pol, olgeta we Hem i singaot olgeta blong laef wetem Kraes long heven. (Hibrus 11:40) Hemia nao ol man we Pol i stap tingbaot taem i raetem tok ya long 2 Korin 5:​7 se: ‘Yumi wokbaot from bilif, i no from ol samting we yumi luk.’ Taem hem i raetem tok ya, i no gat wan long olgeta we i go long heven yet. Oli no save luk presen ya blong laef long heven wetem prapa ae blong olgeta, be oli bilif strong long hem. Jisas Kraes i laef bakegen finis long ded, olsem faswan man blong kasem blesing ya blong laef long heven. Mo bitim 500 man oli bin luk hem, bifo we hem i aot long wol ya blong go antap long heven. (1 Korin 15:​3-8) Samting ya i naf blong pulum olgeta blong letem bilif i lidim laef blong olgeta. Yumi tu i gat plante risen blong wokbaot from bilif.

19. ?Hibrus 1:​1, 2 i soem se God i toktok long yumi tru long hu?

¹⁹ Tede, Jeova i no yusum ol enjel blong toktok long ol man blong hem, olsem hem i yusum blong toktok long Moses long tri ya we faea i laet long hem. God i yusum Pikinini blong hem blong toktok long yumi. (Hibrus 1:​1, 2) God i mekem se ol man oli raetemdaon tok blong Hem we Jisas i talemaot, mo naoia, Baebol i stap long ol defren lanwis blong ol man raon long wol.

20. ?From wanem i moa isi long yumi i bitim Noa, Ebraham, mo Moses?

²⁰ Yumi gat plante moa samting i bitim Noa, Ebraham, mo Moses. Yumi gat fulwan Baebol, we bighaf blong ol tok blong hem oli kamtru finis. Long Baebol, yumi save ridim store blong ol man mo woman we oli bin pruvum se oli ol wetnes blong Jeova we oli gat bilif, taem oli stanap strong tru long plante hadtaem. From samting ya, Hibrus 12:1 i talem se: “Yumi mas lego ol samting we oli stap blokem yumi, mo ol sin we oli stap holemtaet yumi, nao yumi mas mekem tingting blong yumi i strong, blong yumi resis long rod ya we i stap long fes blong yumi.” Yumi no mas ting nating long bilif blong yumi. ‘Sin we i stap holemtaet yumi,’ hemia fasin blong sot long bilif. Yumi mas traehad fulwan, blong gohed oltaem blong ‘wokbaot from bilif.’

[Futnot]

?Wanem Ansa Blong Yu?

◻ ?Yumi mas mekem wanem blong ‘wokbaot from bilif’?

◻ ?Olsem wanem fasin blong Noa blong soemaot bilif i save givhan long yumi?

◻ ?Olsem wanem fasin blong Ebraham blong soemaot bilif i save halpem yumi?

◻ ?From wanem Baebol i yusum Moses olsem wan eksampel long saed blong bilif?

[Tok blong pija long pej 10]

Ebraham i wokbaot from bilif

[Tok blong pija long pej 10]

Moses mo Eron i soemaot bilif taem tufala i stap fored long Fero