“Mekem Hat Blong Yufala i Strong”
“Be yufala i mas mekem tingting blong yufala i longfala, blong yufala i save mekem ol samting we God i wantem. Nao bambae yufala i save kasem ol samting ya we hem i promes blong givim long yufala.”—HIBRUS 10:36.
1, 2. (a) ?Wanem i hapen long samfala Kristin long faswan handred yia? (b) ?From wanem bilif i save kam slak isi nomo?
LONG olgeta man blong raetem Baebol, aposol Pol i toktok moa long saed blong bilif, bitim ol narafala. Plante taem hem i talem se sam man, bilif blong olgeta i kam slak no i ded. Wan eksampel, Haemeneus mo Aleksanda, “bilif blong olgeta i foldaon finis.” (1 Timoti 1:19, 20) Demas i lego Pol from we hem “i laekem tumas ol samting blong laef long wol ya.” (2 Timoti 4:10) Samfala we oli no mekem ol Kristin wok blong olgeta, oli no karem responsabiliti blong olgeta, oli “no moa holem fasin blong bilif.” Samfala, sam man oli tok long olgeta wetem giaman fasin waes, nao oli “gowe finis long fasin blong bilif.”—1 Timoti 5:8; 6:20, 21.
2 From wanem ol Kristin ya we God i makemaot, oli go lus long ol rod olsem? From we man we i gat bilif “i save wet strong long ol samting we hem i hop long olgeta, mo i save pruvum klia we sam samting we yumi no save luk, be oli rili stap.” (Hibrus 11:1, NW) Yumi bilif long ol samting we yumi no save luk. Yumi no nidim blong bilif long ol samting we yumi luk. Taswe i isi moa blong ronem ol gudfala samting blong bodi we yumi luk, bitim ol gudfala samting blong spirit we yumi no luk. (Matiu 19:21, 22) Plante samting we yumi luk—olsem “man i wantem tumas ol rabis samting we tingting [bodi, NW] blong hem i wantem, mo i wantem tumas ol samting we ae blong hem i luk”—oli save gat strong paoa long yumi sinman mo oli save slakem bilif blong yumi.—1 Jon 2:16.
3. ?Ol Kristin man oli mas wokem wanem kaen bilif?
3 Be Pol i talem se: “Sipos wan man i wantem kam long God, hem i mas bilif we God i stap, mo we i stap mekem i gud long olgeta we oli stap traem faenem hem.” Moses i gat bilif olsemia. “Oltaem hem i stap luk long pei we God bambae i givim long hem” mo i “olsem we i stap luk God ya we man i no save luk long ae blong hem.” (Hibrus 11:6, 24, 26, 27) Ol Kristin man oli nidim wan bilif olsemia. Olsem yumi luk long ol pej bifo, Ebraham i soemaotgud rod long yumi long saed ya.
Ebraham i Soemaot Rod Blong Bilif
4. ?From bilif blong hem, Ebraham i jusumaot wanem kaen laef?
4 Taem Ebraham i stap yet long Uru, God i mekem promes long hem se bambae hem i kam stamba blong wan laen we bambae i save blesem ol man long olgeta nesen. (Jenesis 12:1-3; Ol Wok 7:2, 3) Ebraham i trastem promes ya, nao hem i obei long Jeova, i muf i go long Haran fastaem, mo long Kenan biaen. Long ples ya, Jeova i promes blong givim kantri ya long laen blong Ebraham. (Jenesis 12:7; Nehemaea 9:7, 8) Be bighaf blong ol promes ya oli mas kamtru taem we Ebraham i ded finis. Eksampel, Ebraham i neva ona long wan pis graon long Kenan—I tru we hem i pem wan pis graon, hemia hol blong ston long Makpela, be hem i beregraon nomo. (Jenesis 23:1-20) Be nating we i no gat graon, hem i bilivim tok blong God. Antap moa, hem i bilif long wan samting we i mas kam long fiuja, hemia “wan taon we fandesen blong hem i save stap oltaem nomo. Taon ya, God i mekem ol plan blong hem.” (Hibrus 11:10) Bilif ya i mekem hem i strong long ful laef blong hem.
5, 6. ?Olsem wanem God i traem bilif blong Ebraham long promes blong hem?
5 Wan samting we i kamaot i soemaot poen ya. Hemia long saed blong promes we laen blong Ebraham i mas kam wan bigfala nesen. Ebraham i nidim wan pikinini fastaem, blong bambae promes ya i save kamtru. Be Ebraham i wet longtaem, gogo hem i kasem blesing ya. Yumi no save stret long wanem yia God i mekem promes ya fastaem long saed blong wan pikinini. Be taem Ebraham i kasem Haran, Jeova i no givim pikinini ya long hem yet. (Jenesis 11:30) Hem i stap long Haran longtaem, gogo hem i hivimap plante samting mo plante man tu we i mekem wok blong hem. Taem hem i aot long Haran, hem i gat 75 yia blong hem mo Sera i gat 65. Be i no gat pikinini yet. (Jenesis 12:4, 5) Taem Sera i kasem samwe long 75 yia blong hem, hem i ting se naoia hem i olfala finis, i no moa save givim wan pikinini long Ebraham. Taswe hem i folem kastom blong olgeta long taem ya. Gel we i slef blong hem, nem blong hem Hega, be Sera i givim hem long Ebraham blong hem i save gat pikinini from woman ya. Be God i no bin promes long pikinini ya. Biaen, Ebraham i mas sanem Hega mo boe blong hem Ismael oli gowe. Be taem Ebraham i tok long Jeova from tufala, Jeova i promes blong blesem Ismael tu.—Jenesis 16:1-4, 10; 17:15, 16, 18-20; 21:8-21.
6 Long stret taem we God i jusumaot—longlongtaem afta promes blong hem fastaem—taem Ebraham i gat 100 yia blong hem mo Sera i gat 90, tufala i gat wan boe, Aesak. !Maet tufala i haremgud bitim mak! Long tufala olfala, i olsem we bodi blong tufala i ded finis mo i girap bakegen blong wokem wan niufala laef. (Rom 4:19-21) Oli wet longtaem, be taem we promes ya i kamtru, oli glad blong wet olsem.
7. ?Weswe bilif i laenap wetem fasin blong stanap strong oltaem?
7 Eksampel blong Ebraham i soemaot bakegen long yumi se bilif i no jes blong smoltaem. No gat. Pol i talem se bilif i laenap wetem fasin blong stanap strong oltaem, i se: “Be yufala i mas mekem tingting blong yufala i longfala, blong yufala i save mekem ol samting we God i wantem. Nao bambae yufala i save kasem ol samting ya we hem i promes blong givim long yufala. . . . Yumi no save tanemraon blong gobak, nao yumi lus, nogat. Yumi man blong bilif long God, mo hem bambae i sevem yumi.” (Hibrus 10:36-39) Plante man oli wet longtaem gogo promes blong God i kamtru. Samfala oli wet ful laef blong olgeta. Oli gat strong bilif we i givim paoa long olgeta. Mo olsem Ebraham, olgeta bambae oli mas kasem pei long stret taem we Jeova i jusumaot.—Habakuk 2:3.
Lesin Long God
8. ?Olsem wanem blong lesin long God tede? mo ?Olsem wanem samting ya i givim paoa long bilif blong yumi?
8 I gat fo samting we oli givim paoa long bilif blong Ebraham, mo ol samting ya oli save halpem yumi tede tu. Faswan, hem i pruvum bilif blong hem se ‘God i rili stap’ from we hem i lesingud taem Jeova i tok. Hem i no olsem ol man Jyu long taem blong Jeremaea we oli talem se oli bilif long Jeova, be oli no bilivim ol tok blong hem. (Jeremaea 44:15-19) Tede, Jeova i tok long yumi tru long Baebol, tok ya we i kamaot long spirit blong hem, mo Pita i talem se “hem i olsem wan laet we i saen long tudak . . . long hat blong yufala.” (2 Pita 1:19, NW) Taem yumi ridimgud Baebol, i “olsem we ol tok ya oli gudfala kakae” blong “bilif long God.” (1 Timoti 4:6; Rom 10:17) Mo tu, long ol las dei ya, “slef we i stret mo waes” i givim kakae blong spirit “long stret taem blong hem.” Hem i halpem yumi blong kasemsave long ol gudfala rul blong Baebol mo long ol profet tok blong Baebol. (Matiu 24:45-47) Yumi mas lesin long Jeova we i tok long yumi olsemia, blong yumi save gat strong bilif.
9. ?Sipos yumi rili bilif long hop blong ol Kristin man, bambae wanem frut i kamaot?
9 Bilif blong Ebraham i stanap long hop we hem i gat. “Hem i stanap long hop, blong hem i gat bilif, blong bambae hem i save kam papa blong plante nesen.” (Rom 4:18, NW) Hemia nao nambatu samting we i save halpem yumi. Yumi mas neva foget se Jeova i save “givim pei long olgeta we oli rili lukaotem hem.” Aposol Pol i talem se: “Yumi stap hadwok we yumi stap traehad tumas, from we yumi putum hop blong yumi long wan God we i rili laef i stap.” (1 Timoti 4:10, NW) Sipos yumi rili bilif long hop blong ol Kristin man, bambae long ful laef blong yumi, yumi soemaot we yumi gat bilif, stret olsem Ebraham bifo.
Toktok Wetem God
10. ?Wanem kaen prea oli save givim paoa long bilif blong yumi?
10 Ebraham i toktok wetem God, hemia nao namba tri samting we i givim paoa long bilif blong hem. Tede, yumi tu, yumi save toktok wetem Jeova sipos yumi prea long hem tru long Jisas Kraes. (Jon 14:6; Efesas 6:18) Jisas i talem wan pijatok blong soemaot we yumi mas prea oltaem, nao hem i putum kwestin ya, i se: “?Be taem mi, mi Pikinini blong Man, mi kambak long wol ya bakegen, bambae mi save faenem plante man we oli bilif long mi, no nogat?” (Luk 18:8) Sipos yumi tingtinggud long ol tok we yumi stap talem long prea mo yumi no olsem nasiviru, bambae ol prea ya oli save wokem strong bilif long yumi. Ol prea oli mas kamaot long hat blong yumi. Eksampel, taem yumi mas mekem wan bigfala disisen long laef blong yumi, mo taem tingting blong yumi i foldaon, i impoten tumas blong yumi prea long fulhat blong yumi.—Luk 6:12, 13; 22:41-44.
11. (a) ?Olsem wanem Ebraham i kasem paoa taem hem i talemaot tingting blong hem fulwan long Jeova? (b) ?Stori ya blong Ebraham i tijim yumi long wanem?
11 Taem Ebraham i kam olfala mo Jeova i no givim long hem yet pikinini ya we hem i promes finis long hem, hem i talemaot tingting blong hem fulwan long God from we hem i wari long bisnes ya. Nao Jeova i talem long hem bakegen se promes ya i sua. ?Wanem i kamaot? Ebraham “i bilif strong long Hae God, mo from we hem i bilif olsem, Hae God i luk se hem i wan stret man long fes blong hem.” Nao Jeova i mekem wan samting olsem merikel blong soemaot we gudfala toktok blong hem i tru. (Jenesis 15:1-18) Sipos taem yumi prea long Jeova yumi rere blong lesin long hem long fulhat blong yumi, mo sipos yumi agri long ol promes we hem i mekem long Baebol, Tok blong hem, mo tu sipos yumi obei long hem from we yumi bilif tru, nao bambae Jeova i save mekem we bilif blong yumi tu i kam strong moa.—Matiu 21:22; Jud 20, 21.
12, 13. (a) ?Ebraham i kasem wanem blesing taem hem i folem ol rul blong Jeova? (b) ?Wanem kaen stori oli save givim paoa long bilif blong yumi?
12 Namba fo samting we i givim paoa long bilif blong Ebraham, hemia we Jeova i halpem hem taem hem i obei long ol rul blong hem. Taem Ebraham i go karemaot Lot long han blong ol king we oli kam mekem faet, Jeova i mekem Ebraham i winim olgeta. (Jenesis 14:16, 20) Taem Ebraham i stap olsem wan strenja long kantri ya we bambae i blong laen blong hem, Jeova i givim plante gudfala samting long hem. (Lukluk wetem Jenesis 14:21-23.) Jeova i lidim wan man blong wok blong hem i go blong faenem wan gudfala woman blong Aesak. (Jenesis 24:10-27) Yes, Jeova “i stap blesem [Ebraham] long evri samting we hem i stap mekem.” (Jenesis 24:1) From we bilif blong hem i strong olsemia mo from we hem i frengud wetem Jeova God, taswe Jeova i talem long saed blong Ebraham, se: “fren blong mi.”—Aesea 41:8; Jemes 2:23.
13 ?Olsem wanem? ?Yumi save gat sem bilif tede? Yes. Olsem Ebraham, yumi mas obei long ol oda blong Jeova blong traem save we hem i tru. Nao bambae hem i blesem yumi tu, mo i givim paoa long bilif blong yumi. Eksampel, Ripot blong Sevis Yia 1998 i soemaot klia we plante man oli kasem ol nambawan blesing from we oli obei long oda blong talemaot gud nius.—Mak 13:10.
Ripot i Soemaot Bilif Tede
14. ?Jeova i mekem wanem blong blesem wok blong seremaot ol Kingdom Nius namba 35?
14 Long Oktoba 1997, ol pablisa oli seremaot traket ya, Kingdom Nius namba 35, long olgeta ples long wol, mo plante frut i kamaot. Samting ya i hapen from we bitim faef milyan Witnes oli strong mo glad long wok blong olgeta. Samting olsem i kamaot long kantri Gana. Oli seremaot klosap 2.5 milyan kopi blong traket ya long fo lanwis, mo frut blong wok ya, klosap 2,000 man oli wantem statem wan Baebol stadi. Long aelan Saepras, tu Witnes oli stap givimaot ol traket mo oli luk wan pris we i biaenem olgeta, gogo oli givim wan traket i go long hem. Be hem i talem se hem i kasem traket ya finis, mo i talem se: “Mesej ya i mekem mi mi sek, nao mi wantem tangkiu long ol man we oli mekem hem.” Long Denmak, oli givimaot 1.5 milyan kopi blong Kingdom Nius long ol man mo oli gat gud risal. Wan woman we wok blong hem i blong mekem ol man oli save toktok gud tugeta, i talem se: “Traket ya i gat wan mesej blong evriwan. I isi blong kasemsave long hem, mo hem i save tajem hat blong ol man blong oli wantem save moa long samting ya. !Hem i rili kasem mak blong hem wantaem!”
15. ?Wanem stori oli soemaot we Jeova i blesem bigfala wok blong traem kasem ol man long olgeta ples?
15 Long 1998, oli traehad blong kasem ol man long ol haos blong olgeta, mo long eni narafala ples tu. Long kantri Côte d’Ivoire, tufala misinari we i mared, tufala i visitim 322 sip long wan haba. Oli givimaot 247 buk, 2,284 magasin, 500 buklet, mo plante handred traket. Mo tu oli givim sam video blong ol kru oli save lukluk taem sip i stap long solwota. Long Kanada wan Witnes i go long wan woksap blong trak. Masta blong woksap i gat intres, nao brata ya i stap fo aoa haf wetem man ya, nating we tufala i save toktok long wan aoa nomo, from olgeta kastoma we oli stap go mo kam. Biaen, tufala i mekem wan stadi tugeta long ten klok long sapa. Samtaem tufala i no save stat bifo medel naet, nao tufala i storeyan go kasem tu klok long moning. I no isi blong folem program ya, be sam gud frut oli kamaot. Man ya i klosem woksap blong hem long sande, blong hem i save kam long ol miting. Hem wetem famle blong hem oli stap gohed gud yet.
16. ?Wanem stori oli soemaot we Buklet ya Wanem mo buk Save, tufala i gat paoa long wok blong prij mo tij?
16 Buklet ya Wanem Samting We God i Wantem Yumi Blong Mekem mo buk Save Blong Lidim Yu Long Laef We i No Save Finis oli nambawan long wok blong prij mo tij tu. Long Itali, wan katolik sista we i stap wet long bas i kasem wan traket. Long dei biaen, ol pablisa oli tok long hem bakegen mo hem i tekem buklet ya Wanem. Nao evri dei we hem i stap long 10 no 15 menet long ples blong bas, hem i gat wan Baebol stadi long ples ya. Wan manis haf biaen, hem i mekem disisen blong lego haos blong ol katolik sista mo i gohom long Gwatemala blong gohed long stadi blong hem. Long Malawi, wan strong woman blong Jos, nem blong hem Lobina, i harem nogud taem tufala gel blong hem oli stat stadi wetem ol Witnes blong Jeova. Be tufala gel oli serem trutok blong Baebol wetem mama blong olgeta, taem oli gat jans blong mekem olsem. Long Jun 1997, Lobina i luk wan buk Save, mo i sek long tok ya “Save Blong Lidim Yu.” Long Julae, hem i agri long wan Baebol stadi. Long Ogis hem i go long Distrik Asembli, mo i lesingud long olgeta tok. Long en blong manis ya, hem i livim jos finis mo i stret blong kam wan pablisa we i no baptaes. Hem i baptaes long Novemba 1997.
17, 18. ?Olsem wanem ol video blong Sosaeti oli halpemgud ol wanwan man blong “luk” ol samting blong spirit?
17 Ol Video blong Sosaeti oli halpem plante man blong “luksave” ol samting blong spirit. Long aelan Morisas, wan man i livim Jos blong hem from we ol man oli no joengud insaed long hem. Wan misinari i yusum video ya United by Divine Teaching blong soemaot long man ya fasin joengud blong ol Witnes blong Jeova. Nao man ya i talem se: “!Yufala ol Witnes blong Jeova, yufala i olsem paradaes ya!” Hem i agri long wan Baebol stadi. Long Japan, wan sista i soemaot video ya Jehovah’s Witnesses—The Organization Behind the Name long hasban blong hem we i no stap long trutok, ale, samting ya i pulum hem blong statem wan Baebol stadi evri wik. Biaen, hem i lukluk long video ya United by Divine Teaching, nao hem i wantem kam wan Witnes blong Jeova. Narafala video we i gat tri haf long hem, The Bible—A Book of Fact and Prophecy i halpem hem blong mekem ol rul blong Baebol oli wok long laef blong hem. Mo tu narafala video, Jehovah’s Witnesses Stand Firm Against Nazi Assault, i soemaot long hem we Jeova i givim paoa long ol man blong hem blong fesem ol faet blong Setan. Man ya i baptaes long Oktoba 1997.
18 Hemia samfala eksampel nomo long medel blong olgeta gudfala samting we oli hapen long sevis yia ya we i pas finis. Oli soem we ol Witnes blong Jeova oli hadwok from bilif blong olgeta, mo Jeova i blesem wok blong olgeta blong givim paoa long bilif ya blong olgeta.—Jemes 2:17.
Wokem Wan Strong Bilif Tede
19. (a) ?From wanem i stret blong talem se i moa isi long yumi blong bilif, bitim Ebraham? (b) ?Hamas man evriwan oli kam las yia blong tingbaot ded blong Jisas we i olsem sakrefaes? (c) ?Long wanem kantri i gat bigfala namba blong ol man oli kam long Memoriol las yia? (Lukluk ol namba long ol pej 12 kasem 15.)
19 I gat plante risen blong talem se i moa isi long yumi blong bilif, bitim Ebraham bifo. Yumi save finis we Jeova i mekem promes blong hem long Ebraham i kamtru. Ol man long laen blong Ebraham oli kasem kantri ya Kenan i ples blong olgeta, mo oli kam wan bigfala nesen. (1 King 4:20; Hibrus 11:12) Mo tu, 1,971 yia biaen we Ebraham i aot long Haran i go, wan pikinini long laen blong hem, Jisas, i baptaes long wota. Taem Jon Baptaes i baptaesem hem, tabu spirit i foldaon long hem blong hem i kam Mesaea, trufala Laen blong Ebraham long saed blong spirit. (Matiu 3:16, 17; Galesia 3:16) Long manis Naesan namba 14, 33 K.T., Jisas i mekem presen long laef blong hem olsem wan ransom blong pemaot olgeta man we oli wokem bilif long hem. (Matiu 20:28; Jon 3:16) Plante milyan man oli save blesem olgeta nomo long rod blong Jisas. Long las yia, 13,896,312 oli joen wanples long Naesan 14 blong tingbaot nambawan fasin blong lav ya we Jisas i mekem. Olgeta ya oli soemaot we Jeova i stret, yes, !hem i Trufala Man blong Holem ol Promes blong hem!
20, 21. ?Olsem wanem ol man blong olgeta nesen, oli kasem blesing long faswan handred yia tru long Laen blong Ebraham? mo ?Olsem wanem ol man oli mekem sem mak tede?
20 Long faswan handred yia, plante man blong ol man Isrel fastaem mo plante man blong olgeta nesen biaen, oli wokem bilif long Laen ya blong Ebraham, mo oli kam ol pikinini blong God we hem i makemaot. Ale, oli joen long long wan niufala “Isrel blong God” long saed blong spirit. (Galesia 3:26-29; 6:16; Ol Wok 3:25, 26) Oli save se bambae oli mas go tekem wan laef long heven we i no save ded samtaem, blong oli king wanples long Kingdom blong God. I gat 144,000 man nomo we oli mas kasem pei ya, mo smol namba blong olgeta i stap yet long wol. (Revelesen 5:9, 10; 7:4) Las yia, 8,756 man oli wantem soemaot bilif blong olgeta se oli insaed long kampani ya, nao oli tekem pat long bred mo waen long taem blong Memoriol.
21 Klosap olgeta Witnes blong Jeova evriwan tede oli blong “bigfala kampani” ya we Revelesen 7:9-17 i talem se hem i mas kamtru. From we oli kasem blesing tru long Jisas, oli gat hop blong stap laef blong olwe long Paradaes long wol. (Revelesen 21:3-5) Olgeta 5,888,650 we oli joen long wok blong prij long 1998 oli pruvum gud we kampani ya i rili “bigfala.” Yumi glad tumas blong harem we Rasia mo Yukren, tufala kantri ya i bitim mak blong 100,000 pablisa, fastaem long tufala. !Mo tu, i gat nambawan ripot long Yunaeted Stet—1,040,283 pablisa long Ogis! Hemia tri nomo long ol 19 kantri we las yia oli bitim mak blong 100,000 pablisa.
Hop Blong Yumi i Save Kamtru Kwiktaem
22, 23. (a) ?From wanem yumi mas mekem hat blong yumi i strong tede? (b) ?Olsem wanem yumi save soemaot se yumi olsem Ebraham, yumi no olsem olgeta we oli no gat bilif, we Pol i tokbaot?
22 Olgeta we i kam long Memoriol, tok blong Memoriol i talem long olgeta we plante promes blong Jeova oli kamtru finis long taem blong yumi. Long 1914, Jisas i kam king finis long Kingdom blong God long heven, nao hem i stat blong stap bakegen long paoa blong Kingdom. (Matiu 24:3; Revelesen 11:15) !Yes, Laen ya blong Ebraham i rul naoia long heven! Jemes i talem long ol Kristin long taem blong hem se: “Yufala i mas mekem tingting blong yufala i longfala, mo yufala i mas mekem hat blong yufala i strong tu, from we taem ya blong Masta blong yumi bambae i stap, i kamtru i no longtaem.” (Jemes 5:8, NW) !Mo hem i rili stap finis! !From ol risen ya tu, yumi mas mekem hat blong yumi i strong!
23 Sipos yumi stadi oltaem mo yumi prea long fulhat blong yumi, bambae samting ya i mekem we yumi gat niufala paoa blong bilif long ol promes blong God. I gud yumi kasem oltaem ol blesing blong Jeova from we yumi obei long Tok blong hem. Ale, bambae yumi olsem Ebraham, yumi no olsem olgeta we bilif blong olgeta i kam slak mo i ded, olsem we Pol i talem. I no gat wan samting i save seraotem yumi long tabu bilif blong yumi. (Jud 20) Yumi prea blong bilif blong yumi i stap strong olsemia, yumi olgeta man blong wok blong Jeova, long yia 1999 mo biaen tu, gogo i no save finis.
?Yu Yu Save Finis?
◻ ?Olsem wanem blong lesin long God tede?
◻ ?Yumi save kasem wanem frut sipos yumi prea long God long fulhat blong yumi?
◻ ?Sipos yumi obei long ol rul blong Jeova we i stap lidim yumi, olsem wanem bambae bilif blong yumi i kam strong?
◻ ?Wanem ol fasin blong ripot blong yia (ol pej 12 kasem 15) we yu yu intres moa long olgeta?
[Tok Blong Pija Long Pej 16]
Sipos yumi lesin long Tok blong Jeova, bambae yumi harem we yumi trastem moa ol promes blong hem
[Tok Blong Pija Long Pej 18]
Bilif blong yumi i kam moa strong taem yumi joen long wok blong prij