Yumi Prij Long ‘Ol Defdefren Kaen Man’
1. ?Ol man we oli gat gudhan blong talemaot gud nius, oli sem mak olsem wanem long ol man we oli gat gudhan blong katem naesfala pija long wud?
1 Wan man we i gat gudhan blong katem naesfala pija long wud, hem i gat plante tul we hem i save yusum. Hem i save olsem wanem blong yusum ol tul ya wanwan, mo wetaem blong yusum olgeta. Long sem fasin, yumi gat plante tul we oli givhan long yumi blong mekem gud wok ya blong talemaot gud nius. Yumi gat ol buklet we oli tokbaot plante defdefren samting. Oli givhan long yumi blong prij long ‘ol defdefren kaen man.’ (1 Kor. 9:22) Pepa we i stap insaed long Kingdom Wok ya, i tokbaot sam long ol buklet ya. Hem i eksplenem se oli stret long wanem kaen man, mo i soemaot olsem wanem yumi save seremaot olgeta.
2. ?Wetaem i stret blong yumi seremaot ol buklet long wok blong prij?
2 ?Wetaem i Stret Blong Yumi Yusum Ol Buklet?: Man we i katem pija long wud, hem i yusum wan tul eni taem we hem i save se bambae i givhan long wok blong hem. Long sem fasin, i gud we yumi givimaot wan buklet eni taem we yumi save se bambae i givhan long man, be yumi no givimaot long ol manis ya nomo we yumi seremaot buklet. Olsem nao, sipos yumi stap seremaot buk ya, Baebol Tijim, be yumi prij long wan man we i no bilif long Jisas mo i no wantem save long Baebol, i moa gud yumi seremaot wan buklet we i stret long hem. Yumi pulum tingting blong hem blong i wantem save moa long Baebol, ale biaen, yumi save soemaot buk ya Baebol Tijim.
3. ?From wanem yumi mas gat gudhan blong yusum ol tul we oli givhan long yumi long wok blong prij?
3 Baebol i talem ol gudfala toktok long olgeta we oli gat gudhan long wok blong olgeta. (Prov. 22:29) Be i no gat wan wok we i impoten moa i bitim tabu wok ya blong “talemaot gud nius.” (Rom 15:16) Sipos yumi wantem ‘kam prapa man blong wok we yumi no gat sem long wok blong yumi,’ yumi mas traehad blong yusum gud ol tul blong yumi, mo yumi mas gat gudhan long olgeta.—2 Tim. 2:15.