Ol Buklet—Ol Nambawan Tul Blong Minista Wok
1 Wan man we i gat gudhan long wok blong hem, oltaem i karem ol defren tul, wanwan long olgeta i stret long wan stret wok. Olsem ol man blong talemaot Kingdom, yumi gat fulap buklet blong halpem yumi blong gat gudhan blong fulumap nid long saed blong speret blong ol man we yumi stap prij long olgeta. (Prov. 22:29) Long wan doa maet yu faenem wan man we tingting blong hem i foldaon. Long wan narafala doa maet man blong haos i wantem tumas wan gavman we i folem stret fasin, ating wan narafala man i stap tingbaot sipos i gat risen long laef. ?Olsem wanem yumi save yusum ol buklet blong yumi blong givhan long ol man ya?
2 Taem yu stap seremaot buklet ya “?God i Rili Kea Long Yumi?,” yu save talem samting olsem se:
◼ “Sam man we oli luk fasin blong harem nogud mo ol fasin we oli no stret we oli stap long wol, oli talem se God i stampa blong olgeta. Oli talem se from we God i gat olgeta paoa, bambae hem i finisim ol trabol ya sipos Hem i rili kea long yumi. ?Wanem tingting blong yu long samting ya? [Wet long ansa.] Ol Sam 72:12-14 i soem se, i tru, God i rili kea long yumi. Hem i no stampa blong fasin blong harem nogud mo ol fasin we oli no stret. Hem i promes se ol man we oli stap mekem nogud bambae oli lus i no longtaem. Buklet ya, ?God I Rili Kea Long Yumi?, i soem wanem bambae Hem i mekem mo olsem wanem yumi save haremgud from.” Maet yu save gohed long storeyan wetem ol tok long pej 27, paragraf 22.
3 Sipos yu stap yusum buklet ya “Speret Blong Ol Dedman”, maet yu wantem statem storeyan olsem se:
◼ “Samtaem long laef blong olgeta man, oli wantem save long saed blong ded. ?I stret blong laef 70 no 80 yia nomo mo afta yumi ded? ?No i gat laef afta ded? ?Wanem tingting blong yu? [Wet long ansa.] Long Revelesen 21:3, 4, yumi save luk nambawan hop we God i givim long ol man.” Afta we yu ridim vas, openem buklet i go long pija long pej 31, mo talem sam moa poen blong soem se laef bambae i olsem wanem long Paradaes.
4 Bifo yumi soem “Gavman” buklet, yumi save talem se:
◼ “Ol man oli kasem plante trabol stat long taem bifo i kam. ?Yu ting se wanem nao risen blong samting ya? [Wet long ansa.] Baebol i eksplenem se man i no naf blong rulumgud hem wan. [Ridim Eklesiastis 8:9.] Vas ya i soem se man i no save stanemap wan gavman we i save karem glad blong olwe. God nomo i save mekem samting ya. Makem wanem Baebol i talem se gavman blong God bambae i mekem.” [Ridim Maeka 4:3, 4.] Yu save finisim taem yu talem se: “Blong givhan long yu blong kasem save olsem wanem gavman blong God bambae i mekem paradaes, yu save karem buklet ya long wan smol praes blong 40 VT.”
5 Yu save yusum fastok ya taem yu seremaot buklet ya “!Yu Yu Save Harem Gud Blong Olwe Long Wol!”:
◼ “Plante man oli ting se bambae oli mas go long heven blong oli save haremgud long laef we i no save finis. Be, ?yu ting olsem wanem long saed blong laef blong olwe long wol ya? [Wet long ansa.] Baebol i promes long yumi se yumi save gat laef we i no save finis, mo hem i talem long yumi olsem wanem blong kasem mak ya.” Ridim Jon 17:3. Afta, soem pija 49 long man blong haos mo askem se: “?Yu wantem laef long wan wol olsem?” Askem hem blong karem buklet, mo mekem plan blong wan visit bakegen.
6 Ol buklet oli soemaot ol poen we ol man oli stap tingbaot naoia, ansa long ol kwestin blong ol man, mo mekem man i haremgud. Sipos yumi gat gudhan blong yusum ol tul ya, bambae yumi save halpem ol man we hat blong olgeta i stret blong oli ‘kasem stret save long trutok.’—1 Tim. 2:4.