Yusum Gud Ol Buklet Long Julae
1 Blong mekem wok ya blong tijim ol man i spid moa, ogenaesesen blong Jeova hem i kaen, from we hem i givimaot plante defren kaen buk. Sam long olgeta ya, oli go stret long wanwan stampa, olsem plan blong God long wol ya, Triniti, nem blong God, Kingdom gavman, mo God i letem rabis fasin i stap. ?Olsem wanem yumi save yusumgud ol buklet ya, blong halpem ol man long teritori blong yumi?
2 Buklet ya ?God i Rili Kea Long Yumi? i eksplenem ol poen we i stret nomo long saed blong wan nyufala wol we bambae i fri long ol nogud fasin, i kolosap. ?Olsem wanem yumi save seremaot? Yumi save lukluk long Reasoning buk aninit long stampa tok ya “Suffering,” we i stat long pej 393 (374 long Franis), no maet yu laekem moa blong luk long fastok long pej 12 (13 F.) aninit long stampa tok ya “Injustice/Suffering.”
3 Maet yu save talem se:
◼ “Samtaem yu stap tingbaot se: ‘?God hem i stap kea long ol man we oli stap kasem trabol, mo oli stap harem nogud?’ ” Letem man i ansa. Ridim Ol Sam 72:12-14. Nao openem buklet ya ?God i Rili Kea Long Yumi? pej 22 mo tokbaot stampa tok ya long haf 10, no yusum pija mo tokbaot mining blong pija we i stap long pej 23. Sipos hem i no wantem buklet ya, i gud blong givim wan traket Mekem Man We Tingting Blong Hem i Foldaon i Haremgud Bakegen no Laef Long Pis Blong Nyufala Wol.
4 Wan gudfala gavman hem i wan samting we ol man oli stap tingbaot tede. Plante oli stap tingbaot sipos rul blong man bambae i mekem wol i joen gud. Yumi save faenem sam gudfala advaes aninit long “Government” stat long pej 152 (172 F.), long Reasoning buk.
5 Maet yu save askem se:
◼ “?Yu ting se man i naf blong stanemap wan gavman we i save putum gladtaem we i save stap longtaem?” Letem man i ansabak, mo yu save askem se: “?Ol ripot long saed blong histri blong man i soemaot wanem?” Mo afta yu save luk long Jeremaea 10:23, no maet yu save lukluk i go long pej 152 (172 F.) long Reasoning buk mo ridim ol stret vas mo ol toktok we oli stap long hem. Biaen yu save tanem long pej 24 mo 25 long buklet ya Gavman mo yusum ol pija mo ol vas we oli stap. Eksplenem olsem wanem gavman blong God bambae i mekem ol man blong olgeta ples oli save joen wanples. Sipos man blong haos i no agri blong karem buklet, maet yu save givimaot traket ya ?Wol bambae i Lus No i Stap?
6 Sipos man we i stap kolosap long yu hem i fraet long fasin blong brekem loa, maet fastok ya we i kam biaen i save pulum tingting blong hem.
7 Yu save talem se:
◼ “Plante man oli stap tingting se, ‘Sipos God i gat lav, ?from wanem hem i letem ol rabis fasin oli stap?’ ?Samtaem yu stap tingbaot samting ya tu?” Letem man i talem tingting blong hem, mo yu save talem se: “Tingbaot Proveb 19:3 we i givim woning long fasin ya we ol man oli stap tok nogud long God from ol nogud fasin we ol man oli stap mekem.” Afta we yu ridim vas, lidim hem i go long pej 15 blong buklet ya “Look! I Am Making All Things New” mo ridim paragraf 27. Samting ya i save lidim hem blong laekem blong tokbaot ol nekis paragraf.
8 Taem yumi yusum ol buklet blong tijim gud nyus long ol man we oli olsem ol sipsip, hemia i wan wok we yumi evriwan i save mekem. Yumi save halpem ol defren kaen man blong joen long ogenaesesen blong God. Hem i wan jans blong yumi blong joen long wok blong prij mo mekem wok ya blong yusumgud ol buklet.