DVD Ya: The Wonders of Creation Reveal God’s Glory
Plante man oli laekem tumas blong lukluk ol samting raonabaot long olgeta we God i mekem. Be sam nomo oli luksave se taem oli stap lukluk ol samting ya, oli stap faenemaot smol, wanem i stap long tingting mo hat blong Hae God Jehova we i mekem olgeta samting. (Rom 1:20) Long taem bifo, Deved i faenemaot ol tingting mo fasin blong Jehova taem hem i harem ol tok blong Jehova. Be taem hem i tingting dip long ol samting we Jehova i mekem, i olsem se hem i “luk” Jehova tu, mo hem i kam klosap long Hem. (Sam 8:3, 4) DVD ya The Wonders of Creation Reveal God’s Glory (Ol Nambawan Samting We God i Mekem Oli Soemaot Bigfala Paoa Blong Hem) i save givhan long yumi, ol pikinini blong yumi, mo olgeta we yumi mekem Baebol stadi long olgeta. DVD ya i givhan long yumi blong yumi lukluk gud long ol samting we Jehova i mekem. Nao yumi luksave ol gudfala fasin blong hem, mo yumi kam klosap moa long hem. I gud yu lukluk DVD ya, mo yu traem ansa long ol kwestin ya.
(1) ?From wanem yu gat bigfala respek long Jehova taem yu tingbaot we yunives i bigwan tumas mo ol sta oli folem stret rod blong olgeta oltaem? (Aes. 40:26) (2) Taem yumi tingbaot wota, ?yumi luksave wanem fasin blong God ya we i mekem wota? (Rev. 14:7) (3) ?Yumi luksave waes blong Jehova olsem wanem, taem yumi tingbaot saes blong wol mo ples we hem i stap long hem longwe long san? (4) ?Wanem wok blong mun? (Sam 89:37) (5) ?Jehova i mekem man long wanem fasin, blong hem i save harem gud long laef? (6) ?Wanem ya DNA? (Sam 139:16) (7) ?Wanem i mekem se man i defren long ol narafala samting we Jehova i mekem long wol? (Jen. 1:26) (8) ?Wanem samting we yu yu wantem mekem long niufala wol?
Sam Narafala Samting (Extra Features): (9) ?Wanem i mekem se i gat ol defdefren kala? (10) Graviti i mekem se wota we i stap antap i ron i kamdaon. Sipos i olsem, ?wanem i mekem se wota we i stap long graon i save go kasem top blong ol tri? (11) ?Wota i mekem wanem wok insaed long bodi blong yumi? (12) ?Wanem sam laef samting we oli stap wok wanples? (13) ?Wanem i mekem se wan laef samting i luksave narafala laef samting we tufala i mas wok wanples? (14) ?Wanem ya “golden angle”? ?Yumi luk “golden angle” long wanem samting we Jehova i mekem?
Yumi “Traem Tingbaot” Ol Samting We Jehova i Mekem: Jisas i talem se yumi mas ‘traem tingbaot ol pijin we oli stap flae olbaot’ mo ‘ol flaoa we oli stap gru olbaot.’ (Mat. 6:26, 28) Sipos yumi mekem olsem, bilif blong yumi bambae i kam strong moa, mo bambae yumi trastem moa God ya we i mekem olgeta samting. Bambae yumi luksave tu se Jehova i waes tumas, i gat paoa blong sevem man, mo i lavem yumi. I nogud yumi tingting tumas long ol samting long wol we man i mekem. I moagud yumi spenem taem mo paoa blong yumi blong tingting gud long ol nambawan samting we Jehova i mekem. Mo i gud yumi traem luksave ol nambawan fasin blong God ya blong yumi, long ol samting we yumi luk.—Sam 19:1.