Hem i Sakem Tu Smol Mane Nomo

Taem yumi givim presen mane blong givhan long wok blong prij long fulwol, yumi stap mekem wan impoten samting blong sapotem Kingdom. ?Be olsem wanem sipos yumi no gat mane?

Jisas i luk wan wido woman long haos prea. Woman ya we i pua i sakem tu smol mane nomo long bokis blong presen mane. Hem i lavem Jehova, taswe nating se hem i pua, “hem i sakem olgeta mane we hem i gat, we i blong pem kakae blong hem long hem.” (Mak 12:41-44) Jisas i luk samting ya, mo hem i talem se God i glad tumas long smol mane we woman ya i sakem. Long taem blong ol aposol tu, ol Kristin oli glad tumas blong givim presen mane, nating se oli rij no oli pua. Pol i tokbaot ol Kristin long Masedonia we “oli puaman tru.” Nating se i olsem, “oli stap askem plante taem . . . blong oli joen blong givhan” long ol narafala.”—2 Kor. 8:1-4.

Maet yumi naf blong sakem “tu smol mane” nomo, be i gud yumi tingbaot se ol smosmol mane olsem i save kam bigfala mane sipos yumi evriwan i gohed blong sakem. Taem yumi givim presen wetem fulhat blong yumi, Papa blong yumi long heven i glad. Hem i “lavem man we i save givim samting long gladhat blong hem.”—2 Kor. 9:7.