Kamgud Moa Long Wok Blong Prij—Yu Trenem Baebol Stadi Blong Yu Blong Gat Gudfala Fasin Blong Stadi Hem Wan
?From Wanem i Impoten?: Sipos wan Baebol stadi i wantem gohed gud long trutok, hem i mas fidim tingting mo hat blong hem long ol dip save long Baebol, be i no long ol stamba tijing nomo. (Hib. 5:12–6:1) Taem yumi stadi, yumi joenem ol niufala save we yumi lanem wetem ol save we yumi gat finis, mo yumi luk olsem wanem yumi yusum ol save ya blong givhan long yumi. Taswe yumi mas tekem taem blong mekem prapa stadi blong yumi. (Prov. 2:1-6) Taem wan Baebol stadi i lanem blong mekem prapa stadi blong hem, samting ya bambae i givhan long hem blong i yusum ol buk mo magasin blong faenem ansa long ol kwestin blong Baebol. Taem hem i mekem olsem, samting ya bambae i givhan long hem blong stanap strong taem ol samting oli traem bilif blong hem.—Luk 6:47, 48.
Yu Traem Mekem Samting Ya Long Manis Ya:
Taem yu kasem en blong wan smol stamba tok no japta long stadi blong yu, i gud yu askem long hem blong tokbaot ol bigfala tingting long haf ya. Sipos yu no gat wan Baebol stadi, yu save ridim wan japta blong Baebol no wan haf blong Wajtaoa mo yu makemaot ol bigfala tingting we i stap long hem. Samting ya bambae i givhan long yu blong yu kasemsave samting we yu stap ridim.