Ol Refrens Blong Kristin Wok Mo Laef—Buk Blong Miting
2-8 OKTOBA
OL GUDGUDFALA SAMTING LONG BAEBOL | DANIEL 7-9
“Daniel i Tokbaot Taem We Mesaea i Kam”
it-2 pej 902 haf 2
Seventi Wik
Fasin blong brekem loa mo sin bae i finis. From we Jisas i ded, i laef bakegen, mo i go long heven, samting ya i mekem se “bambae hem i blokem ol fasin blong brekem loa, i mekem sin i finis, mo i tekemaot ol sin blong ol man.” (Dan 9:24) Kontrak blong Loa i soemaot se ol man Jiu oli ol sinman, oli nogud, mo oli ol man blong brekem loa. Be nating se sin i kam “plante moa” tru long Loa blong Moses, fasin sore blong Jehova tu i kam bigwan moa. Hem i soemaot samting ya taem i sanem Mesaea i kam. (Rom 5:20) Tru long sakrefaes blong Mesaea, God i finisim fasin blong brekem loa mo i fogivim o i tekemaot sin blong olgeta we oli tanem tingting blong olgeta.
it-2 pej 900 haf 7
Seventi Wik
Mesaea i Kam Afta Long ‘Sikisti Naen Wik.’ Mo i gat “sikisti tu wik” (Dan 9:25), we i haf blong 70 wik. Hem i seken wik we profet tok ya i tokbaot, mo bae i gohed kasem en blong “seven wik.” Taem we ‘toktok” i goaot blong stanemap Jerusalem bakegen kasem taem we “Mesaea we God i jusumaot,” hem i 7 plas 62 “wik,” o 69 “wik,” we i minim 483 yia. Ol yia ya oli stat long yia 455 Bifo Kraes kasem yia 29 Kristin Taem. Olsem yumi tokbaot finis, long yia 29 Kristin Taem, long taem we ol lif blong ol tri oli folfoldaon, Jisas i baptaes long wota, tabu spirit i makemaot hem, mo i stat blong mekem wok blong prij olsem “Mesaea we God i jusumaot.”—Luk 3:1, 2, 21, 22.
it-2 pej 901 haf 2
Seventi Wik
Mesaea “i ded” long medel blong wan wik. Gabriel i talem sam moa samting long Daniel se: “Mo long en blong taem ya [sikisti tu wik], Mesaea ya we God i jusumaot, bambae oli kilim hem i ded long fasin we i no stret.” (Dan 9:26) Hemia samtaem afta long en blong ‘seven plas sikisti tu wik.’ Samwe tri mo haf yia afta long taem ya, Kraes i ded long wan pos, olsem wan ransom blong pemaot sin blong ol man. (Ae 53:8) I gat pruf we i soemaot se Jisas i spenem faswan haf blong wan “wik” (tri yia haf) long wok blong prij. Wan taem, hemia samwe long yia 32 Kristin Taem, Jisas i talem wan pijatok. Long pijatok ya, hem i tokbaot ol man Jiu se oli olsem wan fig tri (skelem wetem Mt 17:15-20; 21:18, 19, 43) we i no karem frut blong “tri yia.” Nao man we i wok long plantesen ya i se: “Masta, i gud yu livim i stap wan yia bakegen, blong mi save digimraon long stamba blong hem, mo mi putum sitsit blong buluk long hem. Sipos long fiuja hem i karem frut, hemia i gud, be sipos no, yu save katemdaon.” (Luk 13:6-9) Maet Jisas i talem pijatok ya blong tokbaot taem we bae hem i prij long ol man Jiu ya we oli no wantem lesin long hem. Hem i prij tri yia go kasem namba fo yia.
it-2 pej 901 haf 5
Seventi Wik
‘Wan wik, mo haf’ hem i long medel blong seven yia, o afta tri yia haf blong wan “wik” ya. From we 70 “wik” i stat long en blong yia 29 Kristin Taem, hemia taem we Jisas i baptaes mo i kam Kraes, haf blong wan wik ya (tri yia haf) bae i stap kasem yia 33 Kristin Taem, taem ol tri oli stat blong putum flaoa, o taem blong Pasova (Nisan 14) long yia 33. Folem kalenda blong Gregori, dei ya hem i namba 1 Eprel long yia 33 Kristin Taem. (Yu luk LORD’S EVENING MEAL [Time of Its Institution].) Aposol Pol i talem se Jisas i kam ‘blong mekem ol samting we God i wantem’ we hemia blong ‘finisim samting we i stap fastaem [ol sakrefaes mo ol presen we oli givim folem loa] blong stanemap samting we i kam biaen.’ Hem i mekem olsem taem hem i givim bodi blong hem olsem wan sakrefaes.—Hib 10:1-10.
9-15 OKTOBA
OL GUDGUDFALA SAMTING LONG BAEBOL | DANIEL 10-12
“Jehova i Save Finis Fiuja Blong Ol King”
dp pej 212-213 haf 5-6
Tu King i Faet
5 Ol faswan trifala king, hemia, Bigfala Sirus, Kambises 2, mo Darias 1 (Hystaspes). From we Bardiya (o maet wan narafala nem blong hem Gaumata) i rul blong seven manis nomo, profet tok ya i no stap tokbaot hem. Long yia 490 Bifo Kraes, namba tri king, Darias 1, i traem blong faet agensem Gris blong seken taem. Be, ol man Gris oli winim hem long Marathon nao oli ronwe go long Esia Maena. Nating se i olsem, Darias 1 i bin rere gud blong go faet agensem Gris bakegen, be fo yia biaen hem i ded, ale hem i no moa faet agensem olgeta. Biaen boe blong hem king Sekses 1 i tekem ples blong hem, mo hem nao i namba “fo king” long profet tok ya. Hem i King Ahasuerus we i mared long Esta.—Esta 1:1; 2:15-17.
6 Sekses 1 i “girap i mekem ol man oli mekem faet agens long king blong Gris.” Buk ya The Medes and Persians—Conquerors and Diplomats i talem se: “Ol haeman blong Sekses oli pusum hem blong i go faet agensem Gris.” Buk ya i gohed i se: “Sekses i pas long graon mo long solwota blong atakem olgeta.” Wan man Grik we i stadi long ol yia 400 Bifo Kraes, i raetem se “i no gat sam narafala grup blong ol man we oli mekem olsem.” Hem i talem tu se namba blong ol ami blong Sekses we oli pas long solwota “i kasem 517,610. Namba blong ol ami we oli wokbaot hem i 1,700,000; mo namba blong ol ami we oli sidaon long hos hem i 80,000; mo tu i gat ol man Arab we oli sidaon long kamel, mo ol man Libia we oli pas long ol kat, we maet namba blong olgeta i kasem 20,000. Total namba blong evriwan ya i kasem 2,317,610.”
dp pej 213 haf 8
Tu King i Faet
8 Nao enjel ya i talem se: “Nao biaen bambae i gat wan narafala king i girap we hem i no save fraet long faet. Bambae hem i rul long plante ples, mo bambae hem i mekem evri samting we hem i wantem.” (Daniel 11:3) Aleksanda i “girap” olsem king blong Masedonia long yia 336 Bifo Kraes, taem hem i gat 20 yia blong hem. Hem i kam wan strongfala king—Bigfala Aleksanda. Hem i folem plan blong papa blong hem, Filip 2, taem hem i winim ol provins blong Pesia long Medel Is. Hem mo ol 47, 000 man blong hem oli krosem Yufretes mo Taegris reva, nao oli kilim ded 250, 000 soldia blong Darias 3 long Gaugamela. Biaen, Darias i ronwe mo oli kilim hem i ded, mo hemia nao en blong rul blong famle blong hem we oli rul long Pesia. Gris i kam wol paoa, mo Aleksanda i ‘rul long plante ples, mo hem i mekem evri samting we hem i wantem.’
dp pej 214 haf 11
Tu King i Faet
11 Taem Aleksanda i ded, kingdom blong hem i “seraot long fo haf.” Ol haeman blong hem oli raorao long olgeta blong rul long ol ples we hem i rul long hem. Man ya Antigonus 1 we wan ae blong hem i nogud, i traem blong rul long olgeta ples we Aleksanda i rul long hem. Be hem i ded long wan faet long Ipsus long Frijia. Long yia 301 Bifo Kraes, fo haeman blong ol ami blong Aleksanda oli rul antap long ol ples we ol komanda blong olgeta oli winim long faet. Kasanda i rul long Masedonia mo Gris. Laesimas i rul long Esia Maena mo Tres. Selusus 1 Nicator i rul long Mesopotamia mo Siria. Mo Tolemi Lagus i rul long Ijip mo Palestaen. Profet tok ya i tru nomo, ol ples we Aleksanda i rul long hem i seraot long fo kingdom.
Traem Faenem Ol Gudfala Samting Ya
dp pej 315 haf 18
Jehova i Promes Blong Givim Wan Nambawan Pei Long Daniel
18 Buk blong Daniel i finis wetem wan long ol nambawan promes we God i mekem. Enjel blong Jehova i talem long Daniel se: “Bambae yu laef bakegen blong kasem pei blong yu long en blong wol.” ?Enjel ya i minim wanem? !Bifo we enjel ya i talem promes ya, hem i se “bambae yu yu ded,” taswe enjel ya i stap minim se bae Daniel i laef bakegen! Sam man blong stadi long Baebol oli talem strong se faswan taem we Hibru Haf Blong Baebol i tokbaot laef bakegen, hem i long Daniel japta 12. (Daniel 12:2) Be oli rong. Daniel i save finis hop ya se bae wan dei ol dedman oli laef bakegen.
16-22 OKTOBA
Ol GUDGUDFALA SAMTING LONG BAEBOL | HOSEA 1-7
“Jehova i Glad Long Man We i Gat Lav—?Yu Tu?”
Traem Faenem Ol Gudfala Samting Ya
g05 9/8 pej 12 haf 2
Taem Bae Fulwol i Gat Pis
Ol man blong God we bae oli laef long wol ya, bae oli kasem trufala pis, from we God bae i tijim olgeta olsem wanem blong lukaot gud long wol ya. Mo bae hem i “mekem promes” wetem evri anamol we oli stap kakae man, taem hem i mekem se oli gat pis wetem ol man mo oli stap aninit long han blong ol man.—Hosea 2:18; Jenesis 1:26-28; Aesea 11:6-8.
23-29 OKTOBA
OL GUDGUDFALA SAMTING LONG BAEBOL | HOSEA 8-14
“Givim Beswan Blong Yu Long Jehova”
Givim Sakrefaes We i Mekem God i Glad
Antap long ol sakrefaes we yumi mekem, Jehova i luk tu se ol toktok we yumi talem blong presem hem, oli olsem wan sakrefaes we yumi mekem i go long hem. Profet Hosea i talem tok ya, “ol toktok blong mifala oli olsem we mifala i kilim yangfala buluk,” blong soemaot se God i luk ol toktok we i kamaot long maot blong yumi blong presem hem se i olsem wan long ol beswan sakrefaes we yumi save givim long hem. (Hosea 14:2, NW) Aposol Pol tu i talem long ol Hibru Kristin se: “I gud we oltaem yumi yusum maot blong yumi blong talemaot nem blong God long ol narafala man, hemia i olsem wan sakrefaes we yumi givim i go long hem blong presem hem. Mo yumi mekem samting ya tru long Jisas.” (Hibrus 13:15) Tede, ol Witnes blong Jehova oli bisi gud blong talemaot gud nius mo prij long ol man blong olgeta neson. (Matiu 24:14; 28:19, 20) Fasin ya i olsem se oli stap mekem sakrefaes i go long God long dei mo long naet, raon long fulwol.—Revelesen 7:15.
jd pej 87 haf 11
Mekem Wok Blong Jehova Folem Ol Loa Blong Hem
11 Hosea 14:9 i pulum yumi tu blong luk gudfala samting we i save kamaot taem yumi folem ol stret fasin. Taem yumi folem ol fasin we God i wantem, yumi save kasem blesing. From we God nao i wokem yumi, hem i save gud yumi. Taswe, samting we hem i wantem yumi blong mekem i blong mekem i gud long yumi. Fasin fren blong yumi wetem God i olsem wan trak mo man we i wokem. Man we i wokem trak ya i savegud olsem wanem ol pat blong trak ya oli wok. Hem i save se trak ya i nidim we oli jenisim oel blong hem evritaem. ?Be, wanem bae i hapen sipos yu no jenisim oel blong trak ya evritaem, from we yu ting se trak ya i stap ron gud nomo? I no longtaem, enjin blong trak ya bae i kam nogud mo i brokdaon. Samting olsem i save hapen tu long ol man. Man ya we i wokem yumi, i givim ol loa long yumi. Yumi mekem i gud long yumi wan, taem yumi folem ol loa ya. (Aesea 48:17, 18) Sipos yumi agri se ol loa blong God oli save mekem i gud long yumi, samting ya bae i pusum yumi blong folem ol samting we God i wantem long laef blong yumi mo obei oltaem long ol loa blong hem.—Ol Sam 112:1.
30 OKTOBA–5 NOVEMBA
OL GUDGUDFALA SAMTING LONG BAEBOL | JOEL 1-3
“Ol Boe Mo Ol Gel Bambae Oli Talemaot Ol Tok We Mi Givim”
jd pej 167 haf 4
“Go Talemaot Long Ol Man Blong Ol Narafala Kantri”
4 Long wan narafala taem, Jehova God i talem long profet Joel se i gat wan taem we olgeta man bambae oli talemaot tok blong hem, Hem i se: “Nao biaen, mi bambae mi givim Spirit blong mi long olgeta man, we bambae olgeta evriwan oli kasem fulpaoa blong hem. Ol pikinini blong yufala, ol boe mo ol gel, bambae oli save talemaot ol tok we mi bambae mi givim long olgeta. Mo ol olfala blong yufala bambae oli save drim long ol drim. Mo ol yang man blong yufala bambae oli save luk ol vison we mi bambae mi soemaot long olgeta.” (Joel 2:28-32) Long dei blong Pentekos long yia 33 Kristin Taem, aposol Pita i talem se profet tok ya i kamtru taem tabu spirit i kam fulap long olgeta we oli joen wanples long Jerusalem long wan rum antap, mo biaen oli stap talemaot “ol bigbigfala wok blong God.” (Ol Wok 1:12-14; 2:1-4, 11, 14-21) Mo long taem blong yumi, profet tok blong Joel i kamtru stat long ol yia 1900. Olgeta we tabu spirit i makemaot olgeta, ol man, ol woman, ol olfala, ol yangfala oli stat blong “talemaot” “ol bigbigfala wok blong God” hemia i minim tu gud nius blong Kingdom, we naoia i stanap finis long heven.