Lavem God mo Ol Man Raonabaot —?Olsem Wanem Blong Wokem Lav Ya?

Nating se ol Kristin oli no moa folem loa blong Moses, be yet i gat tu loa we i hae moa we Jehova i wantem se yumi folem, hemia—blong lavem God mo ol man raonabaot long yumi. (Mt 22:37-39) Lav ya i no save kamaot olsem nomo. Yumi mas wokem. ?Olsem wanem blong wokem? Wan impoten rod hemia blong ridim Baebol evridei. Taem yumi tingbaot ol defdefren fasin blong God we Baebol i tokbaot, i olsem we yumi stap lukluk “ol gudgudfala fasin blong hem.” (Sam 27:4) Long rod ya, lav we yumi gat long Jehova bambae i gru mo bambae yumi gat sem tingting olsem hem. Hemia i pulum yumi blong obei long ol loa blong God, mo blong soemaot lav long ol narafala. (Jon 13:34, 35; 1Jo 5:3) I gat tri rod we i save givhan long yu blong laekem blong ridim Baebol:

• Yu pijarem yu wan long stori we yu ridim. Yu pijarem yu wan insaed long stori. ?Wanem nao ol samting we yu yu luk, yu harem, mo yu smelem? ?Wanem filing blong ol man insaed long stori ya?

  

• Jenjenisim fasin blong yu blong ridim Baebol. Hemia sam rod: Yu rid wetem strong voes, o yu folem riding taem yu stap lesin long wan rikoding. Yu save ridim stori blong wan man long Baebol o wan topik, i bitim we yu ridim ol japta folem oda. Eksampol, yu save yusum Appendix A7 o B12 we i stap long New World Translation of the Holy Scriptures blong ridim stori blong Jisas. Yu ridim ful japta blong vas we i kamaot long vas blong dei. Yu ridim ol buk blong Baebol folem oda.

  

• Yu rid blong kasemsave. Ridim wan japta evri dei blong kasemsave mo tingting dip long hem, i bitim we yu ridim plante japta jes blong finisim ful Baebol. Yu traem ridim stori ya bakegen. Traem Kasemsave long ful stori. Yu yusum ol map mo ol refrens. Yu mekem risej long wan poen we yu no kasemsave. Sipos i stret, yu save spenem semfala taem ya evri dei blong tingting dip long samting we yu ridim.