Refrens Blong Kristin Wok Mo Laef Buk Blong Miting
7-13 JENUWARE
OL GUDGUDFALA SAMTING LONG BAEBOL | OL WOK 21-22
“I Gud Samting We Jehova i Wantem, i Kamtru”
bt pej 177-178 haf 15-16
“I Gud Samting We Jehova i Wantem, i Kamtru”
15 Taem Pol i stap wetem Filip, i gat wan narafala man i kam, hemia Agabus. Ol man we oli stap long haos blong Filip long Taem ya oli save we Agabus i wan profet; mo hem nao i bin talemaot se bambae kakae i sot long taem we Klodias i rul. (Ol Wok 11:27, 28) Maet oli stap tingting se: ‘?From wanem Agabus i kam? ?Hem i karem wanem mesej i kam?’ Taem oli stap lukluk yet, Agabus i tekem strap blong Pol mo i fasem ol han mo leg blong hem wan. Strap ya i wan longfala pis kaliko we man i save putum mane mo sam narafala samting long hem, mo fasem i goraon long bel blong hem. Nao Agabus i se: “Tabu spirit i talem se, ‘Man we strap ya i blong hem, bambae ol man Jiu long Jerusalem oli fasem hem long fasin ya nao. Mo bambae oli putum hem long han blong ol man blong ol neson.’”—Ol Wok 21:11.
16 Profet tok ya i pruvum se bambae Pol i go long Jerusalem. Mo tu, i soemaot se ol man Jiu we Pol i prij long olgeta long Jerusalem, bambae oli “putum hem long han blong ol man blong ol neson.” Profet tok ya i gat bigfala paoa long ol man we oli stap long taem ya. Luk i raetem se: “Taem mifala i harem tok ya, mifala wetem ol man blong ples ya, mifala i stap talem strong long hem blong hem i no go long Jerusalem. Be Pol i talem se: ‘?From wanem yufala i stap krae olsem, mo yufala i stap spolem tingting blong mi olsem? Mi mi rere finis blong oli fasem mi olsem. Be i no hemia nomo. Mi mi rere blong ded long Jerusalem from nem blong Masta Jisas.’”—Ol Wok 21:12, 13.
bt pej 178 haf 17
“I Gud Samting We Jehova i Wantem, i Kamtru”
17 Traem tingbaot samting we i hapen. Luk wetem ol narafala brata, oli talem strong long Pol blong i no go long Jerusalem, mo i gat samfala tu we oli krae. Pol i luksave se oli lavem hem, taswe hem i talem long olgeta se samting ya i stap “spolem tingting” blong hem, o sam transleta oli tanem tok ya se “brekem hat blong hem.” Be yet, hem i gat strong tingting blong mekem samting we Jehova i wantem. Taswe bambae hem i no letem ol toktok o ol krae blong olgeta i stopem hem blong i no go, sem mak taem hem i mitim ol brata long Taea. Pol i eksplenem from wanem hem i mas go. !Hem i gat strong tingting mo i no fraet nating! Olsem Jisas, Pol i gat strong tingting se hem i mas go long Jerusalem. (Hib. 12:2) Nao sipos hem i go, mo samting ya i hapen, hemia bambae i wan ona blong hem i stap olsem wan disaepol blong Kraes Jisas.
bt pej 178 haf 18
“I Gud Samting We Jehova i Wantem, i Kamtru”
18 ?Ol brata oli mekem wanem? Oli respektem tingting blong hem. Baebol i talem se: “Taem mifala i luk we mifala i no save blokem hem, mifala i lego, nao mifala i talem se: ‘I gud samting we Jehova i wantem, i kamtru.’” (Ol Wok 21:14) Olgeta we fastaem oli traem blokem Pol blong i no go long Jerusalem, oli no moa blokem hem. Oli lesin long Pol mo oli luksave se hemia nao samting we Jehova i wantem se hem i mekem, nating se i had long olgeta blong mekem. Pol i save se sipos hem i go, bambae hem i ded. Taswe bambae i isi moa long Pol, sipos ol narafala oli no bin traem stopem hem.
Traem Faenem Ol Gudfala Samting Ya
bt pej 184-185 haf 10-12
“Bambae Mi Eksplenem Samting We i Hapen”
10 Nating se i olsem, Pol i kasem save se i gat samfala we oli laekem yet blong folem kastom blong ol man Jiu, olsem fasin ya blong no wok long Sabat dei o no kakae sam kaen kakae. (Rom 14:1-6) Mo hem i no putum eni rul long saed blong sakomsaes. Be, Pol i mekem sakomsaes long Timoti blong ol man Jiu oli no luk daon long hem, from we papa blong hem i wan man Gris. (Ol Wok 16:3) Wanwan man i save jusum sipos hem i wantem mekem sakomsaes o nogat. Pol i talem long olgeta long Galesia se: “Sipos olgeta we oli joen long Kraes Jisas oli sakomsaes no oli no sakomsaes, hemia i nating nomo, from we samting we i impoten, hemia bilif we i kamaot from lav.” (Gal. 5:6) Be sipos man i sakomsaes from we hem i wantem folem Loa, o i ting se samting ya bambae i mekem Jehova glad long hem, hemia i soemaot se hem i nogat bilif.
11 Nating se ol toktok ya oli no tru, be ol Kristin we oli man Jiu oli harem se wan samting ya i no stret. Taswe ol elda oli talem long Pol se: “I gat fo man long ples ya we oli bin mekem wan strong promes. Yu tekem ol man ya i go, mo yufala evriwan i mekem ol samting we i blong mekem yufala i klin folem Loa. Mo i gud yu pem ol samting blong olgeta ya, nao bambae oli save sevemaot hea blong olgeta. Long fasin ya, bambae olgeta man oli save we ol tok ya we ol man oli stap talem i no tru, be yu yu stap mekem samting we i stret, mo yu stap holem Loa yet.”—Ol Wok 21:23, 24.
12 Maet Pol i save talem long ol elda se hem i no stamba blong problem ya, be hemia ol Kristin we oli man Jiu we oli strong blong folem Loa Blong Moses. Nating se i olsem, hem i rere nomo blong mekem samting we ol elda ya oli talem, we i no agensem ol rul blong God. Bifo we problem ya i hapen, hem i bin raetem se: “Mi mi no stap aninit long loa, be long olgeta we oli stap aninit long loa, mi mi kam olsem we mi tu mi stap aninit long loa, blong mi save pulum olgeta.” (1 Kor. 9:20) Taswe long taem ya, Pol i mekem samting we ol elda long Jerusalem oli talem, mo hem i mekem olsem we hem tu i “stap aninit long loa.” Hemia i wan gudfala eksampol blong yumi tede. Yumi mas wok wanples wetem ol elda mo yumi no mekem samting long prapa tingting blong yumi.—Hib. 13:17.
nwtsty not blong stadi long Wok 22:16
singaot long nem blong hem blong wasemaot ol sin blong yu: O “wasemaot ol sin blong yu mo singaot long nem blong hem.” Hemia i no minim se man i mas baptaes long wota blong wasemaot ol sin blong hem, be hem i mas singaot long nem blong Jisas. Blong mekem samting ya, man i mas bilif long Jisas mo i soemaot bilif ya tru long ol Kristin wok we hem i mekem.—Wok 10:43; Jem 2:14, 18.
14-20 JENUWARE
OL GUDGUDFALA SAMTING LONG BAEBOL | OL WOK 23-24
“Oli Talem Se Hem i Stamba Blong Plante Trabol”
bt pej 191 haf 5-6
“!Tingting Blong Yumi i Save Strong!”
5 Ol Tok ya oli leftemap tingting blong Pol long stret taem. Long nekis dei, bitim 40 man Jiu “oli mekem wan rabis plan mo oli mekem wan strong promes se bambae oli no kakae mo dring gogo oli kilim Pol i ded.” “Strong promes ya” i soemaot se oli wantem tumas blong kilim Pol i ded. Sipos plan blong olgeta i no kamtru, oli ting se bambae wan nogud samting i hapen long olgeta. (Ol Wok 23:12-15) Ol jif pris mo ol haeman oli agri wetem plan blong ol man Jiu ya, blong tekem Pol i gobak long Sanhedrin blong lukluk moa long bisnes ya. Be long rod, olgeta oli plan blong wet long hem mo kilim hem i ded.
6 Be boe blong sista blong Pol i harem plan ya mo i go talemaot long Pol. Nao Pol i sanem boe ya blong i go talemaot samting ya long komanda blong ol soldia blong Rom, hemia Klodias Lisias. (Ol Wok 23:16-22) Nating se yumi no save nem blong boe ya, be yumi save se Jehova i lavem ol yangfala we oli no fraet blong halpem ol man blong God, mo we oli mekem bes blong olgeta blong sapotem Kingdom.
bt pej 192 haf 10
“!Tingting Blong Yumi i Save Strong!”
10 Long Sisaria, ol soldia oli putum Pol long ‘hedkwota we King Herod i bin wokem bifo, mo oli gad gud long hem’ go kasem taem we olgeta long Jerusalem we oli stap agensem hem oli kamtru. (Ol Wok 23:35) Faef dei biaen, Hae Pris Ananaeas, mo Tetalas we i wan loea, wetem sam elda oli kamtru. Fastaem, Tetalas i talem ol gudfala tok blong leftemap Filiks from ol samting we hem i mekem blong ol man Jiu. Hem i mekem olsem blong traem switim Filiks blong i tekem saed blong olgeta. Nao hem i tokbaot Pol se: “Man ya i stamba blong plante trabol. Olbaot long wol, hem i stap pulum ol man Jiu blong oli girap, oli agensem olgeta bakegen, mo hem i lida blong olgeta we oli stap folem tijing blong ol man Nasaret.” Mo tu, ol narafala man Jiu “oli joen long toktok ya, oli talem se ol tok ya i tru nomo.” (Ol Wok 24:5, 6, 9) Tetalas i talem se Pol i stap agensem gavman, hem i stap lidim ol narafala blong folem wan defren tijing, mo mekem haos tempol i no moa tabu. Ol samting ya oli save mekem wan man i kasem panis blong ded.
bt pej 193-194 haf 13-14
“!Tingting Blong Yumi i Save Strong!”
13 Sipos samfala oli putum yumi long kot mo oli talem ol giaman tok se yumi stap agensem gavman, o yumi wan ‘krangke grup we i denja,’ eksampol blong Pol i save givhan long yumi. Pol i no traem blong switim Filiks olsem we Tetalas i mekem. Pol i stap kwaet nomo mo hem i soem respek. Mo hem i talemaot klia samting we i tru. Pol i talem se ol “man Jiu blong provins ya Esia” we oli stap tok agensem hem se hem i mekem haos tempol i no moa tabu oli no stap. Be folem loa, oli sud stap blong talemaot ol poen blong olgeta long Filiks.—Ol Wok 24:18, 19.
14 Impoten samting we yumi lanem long fasin blong Pol, hemia se hem i tekem janis ya blong talemaot bilif blong hem. Pol i no fraet blong tokbaot bilif blong hem long saed blong laef bakegen, mo samting ya i mekem se olgeta we oli stap long Sanhedrin oli raorao. (Ol Wok 23:6-10) ?Be from wanem Pol i tokbaot laef bakegen? From we hem i stap talemaot trutok long saed blong Jisas mo olsem wanem Hem i laef bakegen. Hemia wan samting we ol man ya oli no save agri long hem. (Ol Wok 26:6-8, 22, 23) Taswe samting we oli stap raorao from hemia topik blong laef bakegen, be speseli long saed blong Jisas we i laef bakegen.
Traem Faenem Ol Gudfala Samting Ya
nwtsty not blong stadi long Wok 23:6
Mi mi wan Farisi: Sam long ol man we oli stap long taem ya, oli save Pol. (Wok 22:5) Oli kasem save se sipos papa mo ol bubu blong hem oli ol Farisi, hemia i min se hem tu i wan Farisi. Taswe oli save se Pol i no giaman taem hem i talem se hem i wan Farisi, from we sam long ol Farisi we oli stap long Sanhedrin oli save se Pol i kam wan Kristin. Be long ples ya, Pol i wantem soemaot se hem i wan Farisi be i no wan Sadusi from we hem i gat sem bilif olsem ol Farisi long saed blong laef bakegen. From samting ya, ol tok blong hem i pulum tingting blong samfala we oli stap long Sanhedrin long taem ya. (Wok 23:7-9) Ol tok blong Pol long Wok 23:6 i joen wetem ol tok we hem i talem long King Agripa blong difendem hem. (Wok 26:5) Mo biaen, taem hem i raet i go long ol Kristin long Filipae, hem i talem bakegen se hem i wan Farisi. (Fil 3:5) Be fasin blong hem i defren long ol narafala Kristin we bifo olgeta tu oli ol Farisi we Wok 15:5 i tokbaot olgeta.—Yu luk not blong stadi long Wok 15:5.
nwtsty not blong stadi long Wok 24:24
Drusila: Namba tri pikinini gel blong Herod we Wok 12:1 i tokbaot, we hemia Herod Agripa 1. Drusila i bon samwe long yia 38 Kristin Taem, mo hem i sista blong Agripa 2 mo Benis. (Yu luk not blong stadi long Wok 25:13 mo Diksonari, “Herod.”) Hedgavman ya Filiks i nambatu hasban blong hem. Fastaem Drusila i mared long man Siria ya, King Asisus blong Emesa. Be biaen tufala i divos mo hem i mared bakegen wetem Filiks, samwe long yia 54 Kristin Taem, mo long taem ya, hem i gat samwe long 16 yia. I luk olsem se hem i bin stap long taem ya we Pol i tokbaot “stret fasin, mo fasin blong bos long tingting, mo jajmen we i stap kam,” long Filiks. (Wok 24:25) Be taem Festas i tekem ples blong Filiks olsem hed gavman, Filiks i livim Pol i stap long kalabus from we hem i wantem “mekem ol man Jiu oli glad long hem.” Be samfala oli ting se hem i mekem samting ya blong mekem yangfala waef blong hem i glad, we i wan Jiu.—Wok 24:27.
21-27 JENUWARE
OL GUDGUDFALA SAMTING LONG BAEBOL | OL WOK 25-26
“Pol i Apil Long Sisa Mo i Prij Long King Herod Agripa”
bt pej 198 haf 6
“!Mi apil long Sisa!”
6 Sipos Festas i folem samting we ol man Jiu ya oli wantem, ating bambae oli kilim Pol i ded. Taswe, Pol i yusum raet blong hem olsem wan sitisen blong Rom. Hem talem long Festas se: “Mi mi stanap long fored blong ples we Sisa i stap jajem ol man long hem. Mo hemia nao ples we yufala i sud jajem mi long hem. Mi mi no mekem wan samting nating we i rong long ol man Jiu, mo yu yu savegud samting ya . . . !Mi apil long Sisa blong i jajem bisnes ya!” Taem Pol i mekem apil, ol man oli no moa save jenisim samting ya. Taswe Festas i talem se: “Bambae yu go long Sisa from we yu apil long Sisa.” (Ol Wok 25:10-12) Samting we Pol i mekem blong apil i go long wan haeman, i wan gudfala eksampol blong ol Kristin tede. Taem ol man blong agens oli traem “mekem ol loa” blong mekem trabol, ol Witnes Blong Jehova oli yusum loa blong difendem gud nius.—Sam 94:20.
bt pej 198-201 haf 10-16
“!Mi apil long Sisa!”
10 Wetem respek, Pol i talem tangkiu long King Agripa blong givim janis blong hem i save difendem hem, mo hem i talemaot long King se hem i glad from we King i savegud ol kastom mo samting we ol man Jiu oli stap raorao from. Biaen, Pol i tokbaot laef blong hem bifo se: “Bifo mi stap folem tijing blong ol Farisi, mo yu save we olgeta ya oli strong moa long wosip i bitim ol narafala man Jiu.” (Ol Wok 26:5) Olsem wan Farisi, Pol i bilif se Mesaea bambae i kam. Be taem hem i kam wan Kristin, hem i no fraet blong talemaot se Jisas Kraes i man ya we olgeta oli stap wet long hem. Taswe risen from wanem oli putum Pol long kot, hemia from we hem mo ol man we oli agensem hem oli gat sem bilif long saed blong promes we God i bin mekem bifo, wetem ol bubu blong olgeta long saed blong Mesaea. Hemia i mekem Agripa i intres tumas blong lesin long Pol.
11 Pol i tokbaot ol nogud samting we hem i bin mekem long ol Kristin bifo i se: “Bifo mi tu mi bilif strong se mi mas mekem plante samting blong agensem nem blong man Nasaret ya, Jisas . . . Mi mi kros tumas long olgeta [ol man blong Kraes], nao mi stap go long ol narafala taon tu blong ronem mo kilim olgeta.” (Ol Wok 26:9-11) Ol samting we Pol i talem oli tru, mo plante man oli save ol nogud samting ya we hem i bin mekem long ol Kristin. (Gal. 1:13, 23) Maet Agripa i stap tingting se: ‘?Wanem i jenisim fasin blong man ya?’
12 Ol nekis tok blong Pol i ansa se: “Wan taem, ol jif pris oli givim raet long mi mo oli talem strong long mi blong mi mas mekem olsem long Damaskes. Taem mi stap go, long medel dei mi luk wan bigfala laet long skae, we i saen i bitim laet blong san. King, laet ya i saenaot i kam kasem mi mo ol man we oli stap wetem mi. Nao mifala evriwan i foldaon long graon, nao mi harem wan voes we i talem long mi long lanwis Hibru se: ‘Sol, Sol. ?From wanem yu stap mekem i nogud long mi? Fasin ya i stap spolem yu nomo. Yu yu olsem buluk we i stap kikbak long stik we i sap, nao stik ya i stikim hem moa.’ Nao mi askem se: ‘?Masta, yu yu hu?’ Nao Masta i talem se: ‘Mi mi Jisas ya we yu stap mekem i nogud long mi.’”—Ol Wok 26:12-15.
13 Bifo we Pol i luk vison ya, hem i ‘stap spolem hem wan nomo.’ Sem mak olsem wan buluk we i stap kikbak long stik we i sap, nao stik ya i stap stikim hem moa. Pol i stap spolem hem wan, taem hem i stap mekem samting we i go agensem wil blong God. Taswe long rod we i go long Damaskes, Jisas i kamtru long hem mo i jenisim tingting blong hem.—Jon 16:1, 2.
14 Pol i mekem bigfala jenis long laef blong hem. Hem i talem long Agripa se: “Mi mi stap obei long vison ya we i kamaot long heven. Mi go fastaem long ol man long Damaskes, mo biaen long olgeta long Jerusalem, mo long olgeta ples long Judia, mo long ol narafala neson tu. Mi stap talemaot se oli mas tanem tingting blong olgeta, mo oli bilif long God. Nao oli mas mekem ol wok we oli soemaot se oli tanem tingting blong olgeta.” (Ol Wok 26:19, 20) Blong plante yia, Pol i mekem ol samting we Jisas i askem hem blong mekem. ?Mo wanem i hapen? Olgeta we oli glad blong lesin long gud nius we hem i talemaot, oli tanem tingting blong olgeta from ol nogud samting we oli stap mekem mo oli wosipim God. Mo olgeta ya oli kam ol gudfala sitisen we oli stap folem loa.
15 Be hemia i no minim wan samting nating long ol man we oli stap agensem Pol. Hem i se: “From samting ya nao ol man Jiu oli holemtaet mi long haos tempol mo oli traem kilim mi mi ded. Be kam kasem tede, mi mi stap gohed blong givim witnes long ol haeman mo ol man we oli no gat nem, from we God i stap givhan long mi.”—Ol Wok 26:21, 22.
16 Olsem ol tru Kristin, yumi mas “rere oltaem” blong difendem bilif blong yumi. (1 Pita 3:15) Taem yumi tokbaot bilif blong yumi long ol jaj mo long ol haeman, yumi save mekem olsem Pol we i toktok wetem respek long King Agripa mo Festas. Wetem kaen fasin, yumi save tokbaot olsem wanem trutok i givhan long yumi wan mo long ol man we oli lesin long gud nius. Maet samting ya i save jenisim tingting blong ol haeman ya.
bt pej 202 haf 18
“!Mi apil long Sisa!”
18 Be Pol i talem long hedgavman ya se: “Masta Festas, mi mi no lusum hed, be mi mi stap talem ol tok we oli tru, mo oli stret nomo. King i savegud ol samting ya, taswe mi mi no sem blong tokbaot ol samting ya long hem . . . King Agripa. ?Yu yu bilif long ol tok blong ol profet? Mi save se yu yu bilif.” Nao Agripa i ansa se: “I luk olsem se smol taem moa, bambae yu pulum mi mi kam wan Kristin.” (Ol Wok 26:25-28) Ol tok blong Agripa oli soemaot se samting we Pol i talem i gat bigfala paoa long hem.
Traem Faenem Ol Gudfala Samting Ya
nwtsty not blong stadi long Wok 26:14
kikbak long stik we i sap: Wan longfala stik we i sap long en, we ol fama oli yusum blong fosem animol blong i wok. (Ja 3:31) Tok ya “kikbak long stik we i sap,” hem i wan proveb we i stap long buk blong ol man Gris. Tok ya i kamaot folem fasin blong wan bul we i stap kikbak long aean we i stap stikim hem, nao i kasem kil from. Bifo we Sol i kam wan Kristin, hem i gat fasin ya. Taem Pol i stap faet agensem ol man blong Jisas we oli stap mekem samting we Jehova God i wantem, hem i putum hem wan long denja mo i stap kasem kil from. (Skelem wetem Wok 5:38, 39; 1Ti 1:13, 14.) Long Pri 12:11 oli yusum tok ya, “sap stik we man blong lukaot long sipsip i stap karem blong stikim ol sipsip blong hem,” blong tokbaot ol tok blong wan waes man we i save pulum narafala blong folem.
nwt diksonari
Stik we i sap. Hemia wan longfala stik we i gat wan aean long en blong hem we i sap. Ol fama oli stap yusum blong fosem animol blong i wokbaot. Baebol i soemaot se stik ya i sem mak long tok blong wan waes man, hem i save pusum man we i lesin blong hem i folem ol advaes we oli waes. Tok ya “kikbak long stik we i sap,” i kamaot long aksen we wan bul i mekem taem hem i kikbak long aean we i stap stikim hem, ale hem i kasem kil from.—Wok 26:14; Ja 3:31.
w03 15/11 pej 16-17 haf 14
Halpem Ol Narafala Blong Oli Bilif Long Tok Blong Kingdom
14 Pol i save se Agripa i rili wan man Isrel, mo hem i gat save long saed blong skul blong ol man Jiu. Pol i tingbaot samting ya taem hem i talem se hem i stap talemaot “sem tok nomo we ol profet mo Moses tu oli talemaot fastaem bifo,” hemia long saed blong Mesaea we i ded mo i laef bakegen. (Ol Wok 26:22, 23) Nao Pol i askem stret long Agripa se: “King Agripa. ?Yu yu bilif long ol tok blong ol profet?” Agripa i no save ansa long kwestin ya. Sipos hem i talem no, bambae hem i spolem gudnem we hem i gat olsem wan man Jiu we i bilif strong. Sipos hem i talem yes, hem i soemaot long fes blong ol man se hem i agri long aposol Pol, nao maet oli ting se hem i wan Kristin. Ale, wetem waes fasin, Pol i ansa long kwestin blong hem bakegen, i se: “Mi save se yu yu bilif.” ?Hat blong Agripa i pulum hem blong talem wanem? Hem i se: “I luk olsem se smol taem moa, bambae yu pulum mi mi kam wan Kristin.” (Ol Wok 26:27, 2) Nating se Agripa i no kam wan Kristin, be i klia se Pol i tajem hat blong hem wetem Tok blong God.—Hibrus 4:12.
28 JENUWARE–3 FEBRUARI
OL GUDGUDFALA SAMTING LONG BAEBOL | OL WOK 27-28
“Pol i Tekem Sip i Go Long Rom”
bt pej 208 haf 15
‘Bambae i No Gat Wan Long Yufala i Ded’
15 Ating Pol i prij long ol man long sip ya long saed blong “promes ya we God i mekem long ol olfala” blong olgeta bifo. (Ol Wok 26:6; Kol. 1:5) Be naoia we bambae sip i rek, Pol i mas tokbaot wan samting we i save givim moa hop long olgeta. Hem i talem se: “Las naet, God blong mi we mi stap mekem wok blong hem, hem i sanem wan enjel i kam long mi, mo i talem se: ‘Pol, yu no fraet. Yu mas stanap long fes blong Sisa. Mo from samting ya, God i glad blong sevem laef blong ol man ya we oli stap wetem yu long sip.’” Mo hem i talem strong long olgeta se: “Taswe ol fren, yufala i no mas fraet. Mi mi bilif long God, se bambae evri samting oli save kamtru stret olsem we enjel ya i talem long mi. Be yumi mas rek long wan aelan.”—Ol Wok 27:23-26.
bt pej 209 haf 18
‘Bambae i No Gat Wan Long Yufala i Ded’
18 I luk olsem se ol man ya oli go so long aelan blong Molta, we i stap long saot blong Sisili. Mo ol man we oli stap long aelan ya oli “kaen tumas” long olgeta. (Ol Wok 28:2) Oli mekem faea blong ol man we oli kam so mo oli stap seksek from oli kolkol. Faea ya i halpem olgeta blong stap wom nating se ples i kolkol mo i gat ren. Be tu, i gat wan merikel we i hapen long taem ya.
bt pej 210 haf 21
‘Bambae i No Gat Wan Long Yufala i Ded’
21 Publias i lida blong aelan ya mo hem i laef long eria ya. Maet hem nao i bigfala lida blong Rom we i stap lukaot long aelan blong Molta. Luk i talem se hem i “lida blong aelan ya,” we hemia ol semfala taetel we oli faenem long tu ston we i stap long Molta. Hem i kaen tumas long Pol mo tufala we i folem hem, nao i tekem olgeta oli go stap long haos blong hem mo i lukaotgud long olgeta blong tri dei. Be, papa blong Publias i sik tumas, mo Luk i tokbaot klia sik blong hem. Hem i tokbaot se man ya “i stap slip long bed from we hem i fiva mo i stap sitsitblad.” Nao Pol i prea mo i putum han blong hem long man ya, mo man ya i kamgud bakegen. Ol man blong aelan ya oli glad tumas long merikel ya, nao oli stap tekem ol man we oli sik oli kam long Pol blong i hilim olgeta. Mo tu, oli stap givim ol presen mo ol narafala samting we Pol mo ol narafala man ya oli nidim.—Ol Wok 28:7-10.
bt pej 213 haf 10
‘Eksplenemgud Trutok’
10 Taem sip i kasem Rom, “oli letem Pol blong hem i stap hem wan long wan haos, mo wan soldia i stap gad long hem.” (Ol Wok 28:16) Blong wan man we i kalabus long haos i no ronwe, plante taem oli putum jen long han blong hem wetem soldia we i stap gad long hem. Mo nating we oli putum jen long Pol, hemia i no stopem hem blong talemaot gud nius blong Kingdom. Tri dei biaen, hem i singaotem ol haeman blong ol man Jiu we oli stap long Rom blong talemaot from wanem hem i stap ya mo i prij long olgeta.
Traem Faenem Ol Gudfala Samting Ya
nwtsty not blong stadi long Wok 27:9
Dei Blong Stretem Sin: P.T., “livim kakae.” Long lanwis Grik tok ya “livim kakae” i blong tokbaot samting we oli mekem blong folem Loa Blong Moses, mo hemia i joen wetem Dei Blong Stretem Sin we oli mekem evri yia, mo tu oli singaot se Yom Kippur (Hibru tok, yohm hak·kip·pu·rimʹ, “dei blong kavremap”). (Le 16:29-31; 23:26-32; Na 29:7; yu luk Diksonari, “Dei Blong Stretem Sin.”) Tok ya “mekem i strong long yu wan,” i joen tu wetem Dei Blong Stretem Sin, we i save minim tu se yu mekem bodi blong yu i harem nogud, olsem fasin ya blong livim kakae. (Le 16:29) Taem oli yusum tok ya “livim kakae” long Wok 27:9, hemia i sapotem tingting blong mekem bodi blong yu i harem nogud long Dei Blong Stretem. Dei Blong Stretem Sin i save stap long lashaf blong Septemba o fashaf blong Oktoba.
nwtsty not blong stadi long Wok 28:11
Ol Pikinini Blong Sus: Folem kastom blong ol man Gris mo Rom, “Ol Pikinini Blong Sus” (Grik, Di·oʹskou·roi) hemia Kasto mo Polakis, tufala twin blong god ya Sus (Jupita) mo Kwin Leda. Tufala i lukaot long ol samting long solwota mo tu tufala i save sevem ol man we oli travel long solwota. Hemia i pruvum se man we i raetem stori ya, i luk toktok we i stap long fored blong sip ya.