Refrens Blong Kristin Wok Mo Laef Buk Blong Miting
4-10 MEI
OL GUDGUDFALA SAMTING LONG BAEBOL | JENESIS 36-37
“Ol Brata Blong Josef Oli Spolem Hem From Oli Jalus”
“Plis Yufala i Traem Harem Drim Blong Mi”
Baebol i talem se: “Mo taem ol brata blong hem oli luk we papa blong olgeta i lavem hem moa, i winim we i lavem olgeta, olgeta oli no moa laekem hem nating, oli agens long hem, nao oli no moa save toktok gud long hem.” (Jenesis 37:4) Maet yumi kasem save from wanem ol brata blong Josef oli jalus, be oli soemaot se oli no waes taem oli letem filing blong jalus i lidim olgeta. (Ol Proveb 14:30; 27:4) ?Samtaem yu yu harem se yu kam jalus taem wan man i kasem wok o ona we yu bin wantem kasem? Tingbaot ol brata blong Josef. Fasin jalus blong olgeta i lidim olgeta blong mekem samting we biaen oli rigret bigwan from. Eksampol blong olgeta i givhan long ol Kristin blong oli tingbaot bakegen se i waes moa blong oli ‘glad wetem olgeta we oli glad.’—Rom 12:15.
Josef i luksave se ol brata blong hem oli no laekem hem. Be, ?olsem wanem? ?Hem i haedem flas kot blong hem taem ol brata blong hem oli stap klosap long hem? Maet hem i wantem mekem olsem. Tingbaot, Jekob i wantem se kot ya i stap olsem wan saen blong lav. Josef i wantem se papa blong hem i gohed blong trastem hem, taswe hem i gohed blong werem kot ya. Hem i wan gudfala eksampol long yumi. Nating se Papa blong yumi long heven i mekem i sem mak long evri man, samtaem hem i soemaot klia se hem i lavem samfala. Mo tu, hem i talem long olgeta blong oli stap longwe long kruked fasin mo rabis fasin blong wol. Olsem spesel kot blong Josef, fasin blong ol trufala Kristin i mekem olgeta oli defren long ol narafala man. Fasin blong olgeta i save mekem se ol man oli jalus mo oli no laekem olgeta. (1 Pita 4:4) ?Olsem wanem? ?I stret blong wan Kristin i no talemaot long ol narafala se hem i wan man blong wok blong God? Nogat. Yumi mas mekem olsem Josef we i no haedem kot blong hem.—Luk 11:33.
“Plis Yufala i Traem Harem Drim Blong Mi”
Ol drim ya oli kam long Jehova God. Oli ol profet tok, mo God i wantem se Josef i talemaot mesej ya long ol man. I luk olsem se, Josef i mas mekem wok olsem ol profet we oli laef afta long hem, we oli stap talemaot ol mesej mo ol jajmen blong God long ol man blong God.
Wetem waes fasin Josef i talem long ol brata blong hem se: “[“Plis,” NW] yufala i traem harem drim blong mi.” Ol brata blong hem oli kasem save long drim ya, mo oli no wan harem nating wan haf blong hem. Oli se: “?Weswe? ?Yu ting se bambae yu yu kam king, yu rulum mifala?” Nao stori i gohed se: “Oli stap agens long hem moa yet from ol drim blong hem, mo from ol tok we hem i stap talem.” Taem Josef i talemaot seken drim blong hem long papa blong hem mo ol brata blong hem, oli kros moa long hem. Yumi ridim se: “papa blong olgeta i tok long hem, i talem se, “?Wanem drim ya? ?Yu ting se mi mo mama blong yu mo ol brata blong yu, bambae mifala i kam bodaon long yu? ?Wanem ya?’” Nating se i olsem, Jekob i gohed blong tingting long samting we Josef i talem. ?Olsem wanem? ?I tru we Jehova i stap toktok wetem boe ya?—Jenesis 37:6, 8, 10, 11.
Josef i no faswan o laswan wok man blong Jehova we i mas talemaot ol profet tok we man i no tinghevi long hem mo ol man oli agensem hem from. Jisas i nambawan man blong talemaot ol mesej blong God mo hem i talem long ol man blong hem se: “Sipos oli ronem mo kilim mi, bambae oli ronem mo kilim yufala tu.” (Jon 15:20) Olgeta Kristin, ol pikinini, yangfala mo olfala oli save lanem plante samting from bilif mo strong tingting blong yangfala Josef.
Traem Faenem Ol Gudfala Samting Ya
it-1 pej 678
Edom
(Eʹdom) [Red], Ol Man Edom (Eʹdom·ites).
Edom hem i seken nem we oli givim long Esao, twin brata blong Jekob. (Je 36:1) Hem i karem nem ya from we hem i salemaot raet blong hem olsem fasbon blong kasem red supsup. (Je 25:30-34) Mo tu, taem Esao i bon hem i red fulwan (Je 25:25), mo kala blong graon we hem mo ol laen blong hem oli stap long hem, i red tu.
it-1 pej 561-562
Wok Blong Lukaot Long Wan Man, Animol, o Wan Narafala Samting
Taem wan man blong lukaot long ol sipsip o ol animol, i talem se bambae hem i lukaot long sam animol, hemia i soemaot se hem i agri blong protektem olgeta, folem loa. I olsem we hem i promes long man we ol animol ya i blong hem, se bambae hem i fidim ol animol ya mo bambae man i no stilim olgeta. Sipos no, bambae hem i givimbak mane blong ol animol we hem i no lukaot gud long olgeta. Be folem loa, i gat samtaem we hem i no nid blong givimbak mane blong ol animol we oli lus, hemia taem wan samting i hapen we hem i no naf blong blokem, olsem taem wan wael animol i kakae olgeta. Be fastaem, hem i mas soemaot pruf long man we ol animol ya oli blong hem, se samting ya i hapen. Maet hem i soemaot ded bodi blong sipsip we wael animol i kakae. Taem hem i luk pruf ya, hem i mas talemaot desisen blong hem se man ya i mas givim mane blong sipsip ya o nogat.
Oli mas folem sem loa ya long ol narafala samting tu we man i lukaotem long bihaf blong narafala, mo hemia i minim insaed long famle tu. Fasbon boe insaed long wan famle i gat wok ya blong lukaot gud long ol brata mo sista blong hem we oli yang moa. Taswe, yumi kasem save from wanem Ruben we i fasbon boe, i no wantem se Josef i lusum laef blong hem, taem ol narafala brata blong hem oli wantem kilim hem i ded. Long Jenesis 37:18-30 Ruben i talem se, “‘No, i nogud yumi kilim hem i ded. Bambae yumi no spolem hem. . . . ’ Hem i talem olsem from we i mekem plan blong hem finis, se bambae i tekemaot hem long han blong olgeta, i tekem hem i gobak long papa blong olgeta.” Mo taem Ruben i luk se Josef i no moa stap, hem i wari we i wari, gogo “i stap terem klos blong hem from” mo i talem se: “!Ei, olgeta! Josef i no moa stap! ?Bambae mi mi mekem olsem wanem nao?” Hem i save se, folem loa, hem i gat fol from we Josef i lus. Blong oli no kasem panis from, ol brata blong Josef oli giaman se wan wael animol i kilim Josef i ded. Oli draonem spesel kot blong Josef long blad blong wan nani, mo oli soemaot kot ya long Jekob, we i papa blong olgeta mo i jaj insaed long famle. Jekob i no panisim Ruben from samting we i hapen, from we taem hem i luk blad long kot ya, hem i ting se wan wael animol i kilim Josef i ded.—Je 37:31-33.
11-17 MEI
OL GUDGUDFALA SAMTING LONG BAEBOL | JENESIS 38-39
“Jehova i Neva Lego Josef”
“!Nogat! !Mi Mi No Save Mekem Olsem!”
“Nao taem ol laen blong Ismael oli tekem Josef i go long Ijip, oli salemaot hem bakegen i go long wan haeman blong king blong kantri ya. Haeman ya, nem blong hem Potifa, mo hem i kapten blong ol gad blong haos blong king.” (Jenesis 39:1) Ol tok ya, oli givhan long yumi blong tingbaot filing blong wan yangfala, we oli salem hem tu taem. !Hem i olsem wan samting nating nomo! Yu traem tingbaot, Josef i stap folem niufala masta blong hem, we i wan haeman blong king blong Ijip mo oli stap wokbaot i go long ples we Josef bambae i stap long hem. Long rod we oli folem, i gat fulap man mo i gat plante ples tu blong mekem maket.
Taem Josef i kasem niufala hom blong hem, hem i harem se ples ya i no olsem prapa hom blong hem. From we, hem i gruap long wan famle we oltaem oli stap muv long wan ples i go long narafala ples, mo oli slip long ol haos tapolen nomo, mo oli lukaot long ol sipsip blong olgeta. Be long Ijip, ol rijman olsem Potifa, oli gat ol naesfala haos we oli pentem wetem ol naesfala kala. Ol man blong digim graon oli faenemaot se ol man Ijip bifo, oli gat ol naesfala garen, we oli planem ol tri blong mekem sado, mo oli gat ol pul blong wota blong planem ol papiras, lotus mo ol narafala tri we oli gru long wota. Sam haos oli wokem insaed long ol garen, mo oli gat ol vranda we plante win i pas long hem. Long ol haos ya i gat ol bigfala windo blong win i save pas, mo i gat plante rum insaed long hem. I gat wan bigfala rum blong kakae mo i gat ol rum blong ol wokman.
“!Nogat! !Mi Mi No Save Mekem Olsem!”
Yumi no gat plante save long saed blong ol kalabus long Ijip, long taem ya. Ol man blong digim graon oli faenemaot se ol stonwol blong ol kalabus ya oli strong gud. Josef i tokbaot ples ya olsem wan hol we i no gat laet long hem, mo we man i no save mekem wan gudfala samting long ples ya. (Jenesis 40:15) Buk blong Ol Sam i tokbaot samting we oli mekem long Josef taem hem i stap long kalabus. Hem i talem se: “Ol jen oli fasemtaet leg blong hem, mo bigfala aean i holemtaet nek blong hem.” (Ol Sam 105:17, 18) Samtaem ol man Ijip, oli mekem i nogud tumas long ol man we oli putum olgeta long kalabus. Sam long ol man ya, oli pulum han blong olgeta i go biaen long bak blong olgeta, mo oli fasemtaet olgeta. Samfala oli putum jen i goraon long nek blong olgeta. Yu traem tingbaot, Josef i safa blong nating nomo.
I nogat wan samting we i save blokem Josef. Baebol i talem se: “Josef i go stap long kalabus ya.” Hem i spenem plante yia long rabis kalabus ya. Hem i no save se bambae oli letem hem i fri no nogat. Josef i stap long kalabus longtaem, be ?olsem wanem hem i no letem tingting blong hem i foldaon?
Baebol i talemaot klia se: “Oltaem Hae God i stap wetem hem, i stap blesem hem.” (Jenesis 39:21) Ol strong stonwol blong kalabus ya, ol jen, mo hol ya we i nogat laet, oli no save blokem lav we Jehova i gat long gudfala man ya blong hem. (Rom 8:38, 39) Yu traem tingbaot Josef, taem hem i stap prea mo i stap talemaot ol filing blong hem long Papa blong hem long heven. Mo afta, hem i kasem pis ya we i kam long “God ya we i stamba blong fasin blong givhan.” (2 Korin 1:3, 4; Filipae 4:6, 7) ?Wanem samting bakegen we Jehova i mekem long Josef? Baebol i talem se Jehova i gohed blong givhan long Josef, i se: “Nao bos blong kalabus ya i glad long hem.”
“!Nogat! !Mi Mi No Save Mekem Olsem!”
Baebol i talemaot klia se: “Oltaem Hae God i stap wetem hem, i stap blesem hem.” (Jenesis 39:21) Ol strong stonwol blong kalabus ya, ol jen, mo hol ya we i nogat laet, oli no save blokem lav we Jehova i gat long gudfala man ya blong hem. (Rom 8:38, 39) Yu traem tingbaot Josef, taem hem i stap prea mo i stap talemaot ol filing blong hem long Papa blong hem long heven. Mo afta, hem i kasem pis ya we i kam long “God ya we i stamba blong fasin blong givhan.” (2 Korin 1:3, 4; Filipae 4:6, 7) ?Wanem samting bakegen we Jehova i mekem long Josef? Baebol i talem se Jehova i gohed blong givhan long Josef, i se: “Nao bos blong kalabus ya i glad long hem.”
Traem Faenem Ol Gudfala Samting Ya
it-2 pej 555
Onan
(Oʹnan) [i kamaot long tok we i minim “paoa i kam niuwan bakegen; bigfala paoa”].
Boe blong Juda, we i sekenbon boe blong dota blong Sua, wan man Kenan. (Je 38:2-4; 1Kr 2:3) Jehova i kilim i ded bigfala brata blong Onan, we nem blong hem Ere, from we hem i mekem rabis fasin. From we Ere i nogat pikinini, Juda i talem long Onan blong hem i mared long wido blong brata blong hem. Sipos wan pikinini boe i kamaot long tufala, bambae boe ya i no blong Onan, be bambae i karem nem blong brata blong hem. Nao bambae pikinini boe ya i kasem graon blong Ere we i fasbon, i gat raet blong kasem. Be sipos tufala i no gat wan pikinini boe, Onan bambae i kasem graon ya blong hem wan. Taem Onan i slip wetem Tamara, hem i “stap mekem long fasin we woman ya bambae i no save karem pikinini.” Hemia i no minim se Onan i pleplei wetem seks blong hem, from we vas i talem se, “taem hem i stap slip wetem” Tamara. I luk olsem Onan i minim nomo blong i no givim wota blong man long Tamara. Jehova i kilim Onan i ded we hem i nogat pikinini, i no from we hem i pleplei wetem seks blong hem, be from we hem i no obei long papa blong hem, i wantem samting we i blong narafala, mo i no respektem plan blong God long saed blong mared.—Je 38:6-10; 46:12; Na 26:19.
w04 15/1 pej 30 haf 4-5
Wan Kwestin
Juda i no mekem i stret taem hem i no holem promes blong hem blong mekem Tamara i mared long boe blong hem Sela. Mo tu hem i slip wetem wan woman we hem i ting se i woman blong rod. Samting ya i agens long plan blong God, we i talem se man i save slip nomo wetem woman we hem i mared long hem. (Jenesis 2:24) Be blong talem stret, Juda i no rili slip wetem wan woman blong rod. Hem i tekem ples blong Sela nomo blong folem kastom ya blong bifo, mo taswe hem i kam papa long wan pikinini we i stret folem loa.
Mo long saed blong Tamara, wanem we hem i mekem i no soem se hem i wan woman we i stap slip olbaot. Ol man oli no ting se tufala twin ya blong hem oli pikinini blong rod. Taem Boas blong Betlehem i tekem woman Moab ya Rut, hem tu i folem kastom ya blong bifo. Ol olfala long Betlehem oli talem ol gudfala tok long saed blong pikinini blong Tamara, hemia Peres, taem oli talem long Boas se: “Bambae oli mekem famle blong yu i olsem famle blong Peres, we papa blong hem Juda ya bifo, mo mama blong hem [Tamara].” (Rut 4:12) Mo tu Peres i stap long lis blong ol olfala bubu blong Jisas Kraes.—Matiu 1:1-3; Luk 3:23-33.
18-24 MEI
OL GUDGUDFALA SAMTING LONG BAEBOL | JENESIS 40-41
“Jehova i Sevem Josef”
“Paoa Blong Talemaot Mining Blong Drim i Stap Long God Nomo”
Maet man we i bos long ol man blong karem waen blong King i fogetem Josef, be Jehova i no fogetem hem. Wan naet Jehova i mekem Fero i luk wan drim we hem i no save fogetem. Long faswan drim, hem i luk seven kao we oli fatfat gud mo skin blong olgeta i saen gud, we oli kamaot long Nael Reva. Mo i gat seven kao we oli kamaot folem olgeta, be oli bunbun nogud. Oli girap oli kakae ol seven kao ya we oli fatfat gud. Biaen hem i luk wan stik blong wit we i gat seven bandel we oli nambawan. Mo hem i luk wan narafala stik blong wit we i gat seven bandel we oli slak mo oli smosmol. Nao ol seven slak bandel ya, oli kakae ol seven gudfala bandel wit ya. Long moning taem Fero i wekap, tingting blong hem i trabol tumas, nao hem i singaot ol waesman blong hem mo ol man blong mekem majik blong oli talemaot mining blong drim ya. Be olgeta evriwan oli no naf blong talemaot. (Jenesis 41:1-8) Maet oli sek mo oli talem ol tingting we i olbaot, we yumi no save. Taswe, tingting blong Fero i foldaon, mo hem i wantem save mining blong drim ya.
!Wantaem nomo, man we i bos long ol man blong karem waen blong King, i tingbaot Josef! Tingting blong hem i stikim hem, nao hem i talemaot yangfala man ya we i stap long kalabus, we tu yia bifo hem i bin talemaot mining blong drim blong hem, mo man we i bos blong karem bred blong King. Kwiktaem nomo Fero i singaot Josef blong i kam luk hem.—Jenesis 41:9-13.
“Paoa Blong Talemaot Mining Blong Drim i Stap Long God Nomo”
Jehova i lavem ol man we oli gat tingtingdaon mo oli bilif long hem, taswe hem i givim ansa long Josef we i daonem ol waesman mo ol pris blong Ijip. Josef i talem se tufala drim we Fero i luk i minim sem samting nomo. Jehova i soemaot se hem i “mekem plan blong ol samting ya finis, i no save jenisim” from we Fero i luk drim ya tu taem. Ol seven kao we oli fatfat mo ol seven bandel blong wit, oli minim seven yia we bambae i gat plante kakae long Ijip, mo ol kao we oli bunbun mo ol wit we oli slak, oli minim ol seven yia we bambae kakae i sot long Ijip. Long taem ya, bambae kakae i sot long olgeta ples.—Jenesis 41:25-32
“Paoa Blong Talemaot Mining Blong Drim i Stap Long God Nomo”
Fero i holem promes blong hem. Hem i givim long Josef, wan waet klos we i beswan we oli wokem long linen. Mo i hangem wan gol jen long hem, mo i putum wan spesel ring long fingga blong hem, mo i givim wan kat we hos i pulum. Mo King i givim raet long hem blong go olbaot long kantri ya, mo talemaot ol plan blong hem. (Jenesis 41:42-44) Long wan dei nomo, Josef i aot long kalabus mo i go stap long haos blong King. Mo biaen, hem i ded olsem wan haeman we i namba tu long King Fero. Hemia i pruvum klia se Josef i bilif long Jehova. Mo Jehova i luk ol nogud samting we oli hapen long laef blong Josef, taem hem i stap long kalabus. Hem i stretem ol trabol ya long stret taem mo long stret fasin. Jehova i no stretem nomo ol trabol blong Josef, be hem i stanemap wan rod blong lukaotgud long nesen blong Isrel. Long nekis haf we bambae i kamaot, bambae yumi luk wanem i kamtru.
Traem Faenem Ol Gudfala Samting Ya
?Yu Yu Save?
?From wanem Josef i mas sef fastaem bifo we hem i go luk Fero?
Buk blong Jenesis i talem se Fero i singaotem Josef, we i stap long kalabus blong i go luk hem kwiktaem blong i talemaot mining blong ol drim blong hem. Long taem ya, Josef i stap sam yia finis long kalabus. Nating se Fero i wantem luk hem kwiktaem, hem i tekem taem blong i sef. (Jenesis 39:20-23; 41:1, 14) Man we i raetem buk blong Jenesis i talemaot ol save ya, blong soemaot se hem i save gud kastom blong ol man Ijip.
Fasin ya blong lego mustas i gru, i wan fasin we plante nesen long taem bifo oli stap mekem, mo ol man Isrel tu oli mekem. Be ol man Ijip bifo oli no mekem olsem. McClintock and Strong’s Cyclopedia of Biblical, Theological, and Ecclesiastical Literature i tokbaot olgeta se, “nesen blong Ijip i gat wan kastom we ol man blong hem oli no mas lego mustas i gru, be oli mas sevemaot.”
?Olsem wanem? ?Oli sevem mustas blong olgeta nomo? Magasin ya Biblical Archaeology Review i talem se, taem wan man i rere blong go luk Fero, hem i mas mekem olsem se hem i go long wan ples blong wosip. From risen ya nao, Josef i mas sevemaot olgeta hea long hed mo bodi blong hem.
w09 1/11 pej 31 haf 14
Mekem Ol Fasin We Oli Soemaot Respek, Olsem Ol Man Blong God
14 Long taem blong Baebol, ol papa mama we oli onagud long God, oli meksua se ol pikinini blong olgeta oli lanem ol fasin we oli soemaot respek insaed long famle. Tingbaot respek we Ebraham mo Aesak tufala i soemaot taem tufala i stap storian tugeta. Stori ya i stap long Jenesis 22:7. Fasin blong Josef tu i soemaot se papa mama blong hem tufala i bin tijimgud hem. Taem Josef i stap long kalabus, hem i toktok wetem respek long ol narafala presina. (Jen. 40:8, 14) Tok we Josef i talem long Fero i soemaot se hem i lanem finis stret fasin blong toktok long ol man we oli gat hae posisen.—Jen. 41:16, 33, 34.
25-31 MEI
OL GUDGUDFALA SAMTING LONG BAEBOL | JENESIS 42-43
“Josef i Soemaot Bigwan Fasin Blong Bos Long Tingting”
“Mi Mi No Save Mekem Mi Mi Olsem God”
?Olsem wanem long Josef? !Wantaem nomo hem i luksave ol brata blong hem! Taem olgeta oli bodaon long fes blong hem, hem i tingtingbak long yangtaem blong hem. Baebol i talem se “hem i tingbaot tufala drim ya blong hem we i bin luk bifo.” Drim ya i talemaot se wan dei, bambae ol brata blong hem oli bodaon long hem, olsem we oli stap mekem naoia. (Jenesis 37:2, 5-9; 42:7, 9) ?Josef bambae i mekem wanem? ?Bambae hem i putum han blong hem i goraon long olgeta? ?No, hem i givimbak long olgeta?
“Mi Mi No Save Mekem Mi Mi Olsem God”
Maet samting olsem i no save hapen long yu. Be, fasin ya blong no agri, mo fasin seraot, i stap long plante famle tede. Taem yumi kasem trabol insaed long famle, maet yumi folem samting we i stap long hat blong yumi, mo maet yumi tekem aksen blong folem tingting blong yumi nomo. I moa waes blong folem fasin blong Josef, mo traem luksave fasin we God i wantem yumi blong mekem. (Ol Proveb 14:12) I gud blong tingbaot se, i impoten blong mekem pis insaed long famle blong yumi, be i impoten moa blong gat pis wetem Jehova mo Pikinini blong hem.—Matiu 10:37.
“Mi Mi No Save Mekem Mi Mi Olsem God”
Josef i mekem sam samting blong faenemaot samting we i stap long hat blong ol brata blong hem. Hem i yusum wan man blong i tanem tok blong hem, blong ol brata blong hem oli kasemsave. Hem i tok strong se olgeta oli kam blong lukluksave ol ples long Ijip. Ol brata blong hem oli tokbaot famle blong olgeta, blong oli protektem olgeta. Oli talem tu se oli gat wan smol brata we i stap long haos yet. Josef i no mekem olsem se hem i glad. ?I tru se smol brata blong hem i laef yet? Naoia Josef i save rod we bambae hem i yusum blong faenemaot olgeta. Hem i talem se: “!I gat rod i stap blong faenemaot yufala!” Mo biaen, hem i talem long olgeta se hem i mas luk smol brata blong olgeta. Hem i agri blong letem olgeta oli gobak long Kenan blong tekem lasbon brata blong olgeta sipos wan long olgeta i agri blong stap long kalabus.—Jenesis 42:9-20.
it-2 pej 108 haf 4
Josef
Taem ol haf brata blong Josef oli luk ol samting we i hapen, oli ting se God i stap givimbak samting we oli mekem long Josef plante yia bifo, taem oli salem hem blong i kam slef long Ijip. Oli tokbaot nogud samting we oli mekem long fored blong Josef, we oli no luksave hem nating. Taem Josef i harem ol toktok blong olgeta we i soemaot se oli tanem tingting from samting we oli mekem, hem i aot long olgeta, nao i go krae. Biaen, hem i talem long ol man blong hem blong oli fasem Simeon i stap, go kasem we ol brata blong hem oli kambak wetem lasbon brata blong olgeta.—Je 42:21-24.
Traem Faenem Ol Gudfala Samting Ya
it-2 pej 795
Ruben
Ruben i soemaot sam gudfala fasin taem hem i pulum ol naen brata blong hem blong oli no kilim Josef i ded, be oli sakem hem i go stap nomo long wan wel we i drae. Hemia from we hem i plan se biaen bambae i gobak blong tekemaot hem bakegen long fasin haed. (Je 37:18-30) Bitim 20 yia afta, ol man long Ijip oli wantem panisim ol brata blong Josef from we oli ting se oli ol spae, mo ol brata blong Josef oli stap taltalem long olgeta se trabol ya i kasem olgeta from we oli mekem i nogud long Josef. Long taem ya, Ruben i mekem olgeta oli tingbaot se hem i no bin joen long plan blong olgeta blong kilim Josef i ded. (Je 42:9-14, 21, 22) Mo taem Jekob i no wantem se Benjamin i folem ol brata blong hem i gobak long Ijip, Ruben nao i mekem wan strong promes long hem, i se: “Sipos mi no tekem [Benjamin] i kambak, bambae yu save kilim tufala pikinini boe ya blong mi i ded.”—Je 42:37.
w04 15/1 pej 29 haf 1
Ol Bigfala Poen Long Buk Blong Jenesis —Haf 2
43:32—?From wanem i tabu blong ol man Ijip oli kakae wetem ol man Hibru? Maet hemia from we ol man Ijip oli no laekem nating man blong narafala skul mo oli flas from kantri blong olgeta. Mo tu, ol man Ijip oli no laekem nating ol man blong lukaot long sipsip. (Jenesis 46:34) ?From wanem? Maet from we long tingting blong ol man Ijip, wok blong lukaot long sipsip i daon olgeta. No maet from we graon blong mekem garen i no plante, taswe ol man Ijip oli no laekem nating olgeta we oli yusum graon ya blong ol sipsip oli kakae long hem.