Refrens Blong Kristin Wok Mo Laef Buk Blong Miting
2-8 NOVEMBA
OL GUDGUDFALA SAMTING LONG BAEBOL | EKSODAS 39-40
“Moses i Folemgud Ol Instraksen”
w11 15/9 pej 27 haf 13
?Jehova i Save Yu?
13 Fasin blong Moses i defren olgeta long Kora. “Hem i wan man we tingting blong hem i stap daon moa, i no gat wan narafala man long wol we tingting blong hem i stap daon olsem hem.” (Nam. 12:3) Hem i soemaot we tingting blong hem i stap daon from we hem i mekem ol samting, stret olsem we Jehova i talem long hem. (Eks. 7:6; 40:16) Long Baebol, yumi no luk se Moses i stap komplen oltaem long saed blong rod we Jehova i yusum blong mekem ol samting, mo i no stap kros from we hem i mas folem ol tok blong Jehova. Taem Jehova i talem long Moses blong wokem haos tapolen, hem i talem ol smosmol samting we hem i mas mekem. Hem i talem kala blong ol tred we oli mas yusum mo i talem namba blong ol rop we oli mas somap long ol kaliko. (Eks. 26:1-6) Sipos wan elda long ogenaesesen blong God i talem long yu ol smosmol samting we yu mas mekem long wan wok, maet samtaem yu harem nogud. Be Jehova i lukaot long ogenaesesen blong hem long wan fasin we i stret gud olgeta. Hem i givim wok long ol man blong hem, mo i trastem olgeta se bambae oli mekem gud wok ya. Sipos hem i mas talem plante smosmol samting we oli mas mekem, hemia from wan gudfala risen. Taem Jehova i talem long Moses ol smosmol samting we hem i mas mekem, Moses i no kros long Jehova mo i no ting se Jehova i stap daonem hem. Moses i no ting se Jehova i stap blokem hem blong i mekem samting long tingting blong hem. Be Moses i meksua se ol man blong wok oli “wokem evri samting stret olsem we Hae God i talem.” (Eks. 39:32) !Yes, Moses i gat tingting daon! Moses i save se wok ya i blong Jehova, mo hem i wan man blong wok nomo.
w05 15/7 pej 27 haf 3
?Yu Yu Stap Mekem i Stretgud Long Evri Samting?
3 Hibrus 3:5 i tokbaot Moses se hem “i stap mekem i stret long ol wok blong hem.” ?From wanem Baebol i talem se Moses i mekem i stret? From we taem Moses i wokem plan mo i bildim haos prea, hem i “mekem evri samting ya, stret olsem we Hae God i talem.” (Eksodas 40:16) Yumi ya we yumi wosipim Jehova, yumi soemaot se fasin blong yumi i stretgud, taem yumi obei oltaem. Hemia i minim se yumi stap tru long Jehova taem yumi fesem ol bigbigfala traem mo strong trabol. Be yumi no mas ting se sipos yumi winim wan bigfala traem, hemia nomo i save pruvum se fasin blong yumi i stretgud. Nogat. Jisas i talem se: “Man we i stap mekem i stret gud long smol samting nomo, hem i save mekem i stret gud long bigfala samting tu.” (Luk 16:10, Nyutesteman wetem Ol Sam long Bislama) Yes, yumi mas mekem i stretgud long ol smosmol samting tu.
Traem Faenem Ol Gudfala Samting Ya
it-2 pej 884 haf 3
Skin Blong Animol Ya Sil
?Olsem Wanem Ol Man Isrel Oli Kasem Animol Ya? Sipos Hibru wod ya taʹchash we Baebol i yusum, i minim wan kaen sil, yumi save askem se: ?Hao nao i posibol blong ol man Isrel oli kasem ol skin blong animol ya? Plante taem ol sil oli laef long ol ples we i kolkol bitim mak, olsem ol rijen blong Aktik mo Antaktik, be sam long olgeta oli save stap long ol ples we i hot. Tede, i gat sam sil yet long Mediterenean Si, wetem ol narafala ples we solwota blong olgeta i hot. Long ol handred yia we oli pas, ol man oli kilim ol sil, mekem se i no moa gat plante sil long wol, be long taem we oli raetem Baebol, i bin gat plante animol ya long Mediterenean Si mo long Red Si. Bifo olgeta, long yia 1832, wan Inglis buk (Calmet’s Dictionary of the Holy Bible, pej 139) i talem se: “Ol man oli save faenem ol sil long ol smol aelan blong Red Si mo raon long ol so blong hem, long Sinae.”—Luk buk ya tu The Tabernacle’s Typical Teaching, blong A. J. Pollock, London, pej 47.
w15 15/7 pej 21 haf 1
?I impoten Se Hu i Luk Wok Blong Yu?
Taem oli wokem tabenakel finis, wan klaod i “bigfala klaod i stat blong kavremap tent blong miting, mo glori blong Jehova i fulumap tabenakel ya.” (Eks. 40:34) !Man, hemia i soem klia se Jehova i glad long haos ya! ?Yu ting se wanem filing blong Bejalehel mo Oholiab long taem ya? Nating se nem blong tufala i no stap long ol samting we tufala i wokem, be i sua se tufala i haremgud blong save se blesing blong God i stap long olgeta samting we tufala i traehad blong mekem. (Prov. 10:22) Long ol yia we i kam biaen, i sua se tufala i glad tumas blong luk se ol samting we tufala i wokem, ol pris oli stap yusum long wok blong Jehova. Long niufala wol, taem Bejalehel mo Oholiab i laef bakegen, !i sua se bambae tufala i glad tumas blong harem se oli stap yusum tabenakel blong wosip blong samwe 500 yia!
9-15 NOVEMBA
OL GUDGUDFALA SAMTING LONG BAEBOL | LEVITIKAS 1-3
“Risen Blong Ol Ofring”
it-2 pej 525
Ol Ofring
Ofring we i bon fulwan. Man we i givim ofring ya, hem i givim fulwan i go long God, i no holemtaet wan pat blong ofring ya. (Skelem Ja 11:30, 31, 39, 40.) Ofring ya i blong askem long Jehova blong i akseptem, o blong soemaot se hem i akseptem finis, ofring blong sin we samtaem i go wetem ofring we i bon fulwan. Jisas Kraes i olsem wan “ofring we i bon fulwan,” hem i givim hem fulwan i go long God.
it-2 pej 528 haf 4
Ol Ofring
Sid ofring. Man we i givim sid ofring, hem i givim wetem ofring blong pis, ofring we i bon fulwan, mo ofring blong sin. Mo ofring ya i save kam ol fasfrut tu we hem i givim. Sam narafala taem, oli save givim ofring ya hem wan nomo. (Eks 29:40-42; Le 23:10-13, 15-18; Na 15:8, 9, 22-24; 28:9, 10, 20, 26-28; japta 29) Ofring ya i blong soem se man we i givim, hem i luksave gudfala fasin ya blong God blong givim plante blesing mo blong mekem man i gat plante samting. Plante taem, oli givim ofring ya wetem oel mo frangkinsens. Sid ofring ya, maet hemia flaoa we i nambawan, o sid we oli rusum, raon bred o tintin bred we oli bekem, oli fraenem, o oli kukum long wan bigfala sospen. Sam long ol sid ofring ya, oli putum long olta blong sakrefaes, mo sam, ol pris oli kakae, mo samfala, oli putum long ofring blong pis we man we i givim ofring ya, i save kakae sam haf blong hem. (Le 6:14-23; 7:11-13; Nu 18:8-11) Ol sid ofring ya we oli putum long olta, oli no mas gat is long olgeta, o “hani” (maet hemia jus blong fig o blong ol frut) we i save tanem i kam is.—Le 2:1-16.
it-2 pej 526 haf 1
Ol Ofring
Ofring blong pis. Ofring blong pis we Jehova i akseptem, i soem se man i gat pis wetem hem. Man we i kam wosip, wetem olgeta long haos blong hem, oli joen blong kakae ofring ya (long yad blong tabenakel. Folem ol stori, i gat ol selta insaed long bigfala kaliko we i raonem yad. Long tempol, i gat ol rum blong kakae). Pris we i wok long ofring ya, hem i kasem wan haf blong ofring ya, mo ol pris we oli wok long dei ya, oli kasem wan narafala haf. Mo taem oli bonem ol gris blong ofring ya, i olsem se Jehova i kasem gudfala smel we i kamaot long smok blong hem. Blad we i representem laef, oli givim se i blong God. Taswe, ol pris, wetem olgeta we oli mekem wosip, mo Jehova, oli joen tugeta blong kakae ofring ya, mo oli joengud long pis. Taem man i kakae ofring ya, be hem i no klin (i no klin from eni samting we Loa i talem) o i kakae mit blong ofring ya we oli kipim i stap bitim stret taem we Loa i talem (long hot taem, mit ya i bae i sting finis) oli mas aotem hem long medel blong ol man blong God. Hem i mekem kakae ya i kam doti, i no moa tabu, from we hem i no klin, o from we i kakae wan samting we i nogud long fes blong Jehova God, mo hem i no respektem samting we i tabu.—Le 7:16-21; 19:5-8.
Traem Faenem Ol Gudfala Samting Ya
w04 15/5 pej 22 haf 1
Ol Bigfala Poen Long Buk Blong Levitikas
2:13—?From wanem oli mas putum sol long “evri ofring”? I no blong mekem sakrefaes ya i tesgud. Raon long wol, plante man oli putum sol long wan samting blong kipim hem i stap longtaem. Long sem fasin, sol we oli putum long ol ofring i blong soem we ol ofring ya oli gud, oli no roten mo sting.
it-1 pej 813
Gris
Risen blong loa ya. Aninit long kontrak blong Loa, blad mo gris oli blong Jehova nomo. Jehova nao i givim laef we i stap long blad, taswe blad i blong hem. (Le 17:11, 14) Long lukluk blong God, gris i rij moa long ol narafala pat blong bodi blong animol. Taem man i givim gris blong animol i go long Jehova, hemia i soem se hem i agri we beswan haf blong animol i blong Jehova, mo se hem i wantem givim beswan samting i go long God. Samting ya i saen blong beswan samting we ol man Isrel oli givim long Jehova, blong wosipim hem, taswe Baebol i tokbaot smok antap long olta se, “kakae” mo wan “smel we i mekem God i glad.” (Le 3:11, 16) From samting ya, sipos wan man i kakae gris, hem i tekem wan samting we hem i no gat raet blong tekem, wan samting we i tabu, i blong God nomo. Man we i kakae gris bae i mas kasem panis blong ded. Ol pris oli save yusum blad long wan samting nomo. Be gris, oli save yusum long sam nara samting tu, sipos wan animol i ded hem wan, o wan nara wael animol i kilim hem i ded.—Le 7:23-25.
w04 15/5 pej 22 haf 2
Ol Bigfala Poen Long Buk Blong Levitikas
3:17. Oli ting se gris blong anamol i beswan haf, wan nambawan kakae. Taswe, taem God i talem se i tabu blong kakae gris, ol man Isrel oli kasem save we beswan haf i mas go long Jehova. (Jenesis 45:18) Samting ya i mas pulum yumi blong mekem bes blong yumi long wok blong Jehova.—Ol Proveb 3:9, 10; Kolosi 3:23, 24.
16-22 NOVEMBA
OL GUDGUDFALA SAMTING LONG BAEBOL | LEVITIKAS 4-5
“Givim Beswan Blong Yu Long Jehova”
it-2 pej 527 haf 9
Ol Ofring
Ofring blong tekemaot fol. Man we i givim ofring blong tekemaot fol, hem i givim from wan sin, mo from eni fol we i kamaot from sin ya. Ofring ya i blong ol spesel sin we i mekem se man i gat fol, mo hem i defren smol long ofring blong sin. Ofring blong tekemaot fol i blong mekem se wan man i tekembak wan raet we hem i bin lusum, nomata se hem i raet blong Jehova o raet blong tabu nesen blong Hem, we i bin lus from sin blong man ya. Ofring ya i blong mekem Jehova i glad bakegen long raet we man ya i bin spolem, o blong putumbak sam raet we man ya i save kasem long kontrak, mo blong i no kasem panis from sin blong hem.—Skelem Aes 53:10.
w09 1/6 pej 26 haf 3
God i Tingbaot Ol Samting We Yumi No Naf Blong Mekem
Makemgud samting we Jehova i talem long saed blong loa ya, we i soem se hem i kaengud mo i tingbaot narafala. Hem i se: “Sipos hem i no save givim wan sipsip, hem i mas givim long Jehova tu sotleg o tu yang pijin olsem nawimba.” (Vas 7) Tok ya “sipos hem i no save givim,” oli save tanem i kam tu, “sipos han blong hem i no naf blong kasem.” Sipos wan man Isrel i pua tumas, nao i no naf blong givim wan sipsip, be God i glad blong tekem samting we man ya i naf blong givim, olsem tu sotleg no tu nawimba.
w09 1/6 pej 26 haf 4
God i Tingbaot Ol Samting We Yumi No Naf Blong Mekem
?Olsem wanem sipos man ya i no naf tu blong givim tu pijin? Loa ya i gohed se: “Sipos hem i no naf blong givim tu sotleg o tu yang pijin olsem nawimba, hem i mas fulumap flaoa we i nambawan long wan kontena blong tu lita olsem wan ofring, mo i givim blong mekem ofring blong sin.” (Vas 11) Long saed blong olgeta we oli pua tumas, Jehova i jusum blong letem olgeta oli givim presen we i no gat blad long hem, blong tekemaot sin blong olgeta. Long Isrel bifo, maet sam man oli puaman, be samting ya i no blokem olgeta blong oli no save kasem fogiv from ol sin blong olgeta, mo blong oli gat pis wetem God.
Traem Faenem Ol Gudfala Samting Ya
Folem Eksampol Blong Ol Man Blong Jehova We Oli Holemstrong
14 Yu save soemaot se yu holemstrong long Jehova mo ol narafala taem yu kaen long olgeta. Eksampol. Maet yu gat pruf se wan brata i mekem wan bigfala sin. Long taem olsem, maet yu harem se yu no wantem talemaot sin we hem i mekem from we hem i wan gudfala fren blong yu, no hem i wan famle blong yu. Be, yu yu save se i moa impoten blong holemstrong long Jehova. Taswe, olsem Natan, yu mas obei long Jehova mo yu kaen long brata blong yu. Yu talem long brata ya blong i go luk ol elda kwiktaem mo tokbaot problem blong hem long olgeta. Sipos hem i no mekem, yu nao yu mas go talemaot samting ya long ol elda. Taem yu mekem olsem, yu soemaot se yu holemstrong long Jehova. Mo tu, hemia i soemaot se yu kaen long brata blong yu, from we ol elda oli save givhan long hem blong hem i fren gud wetem Jehova bakegen. Ol elda bambae oli toktok gud long hem blong stretem hem.—Ridim Levitikas 5:1; Galesia 6:1.
it-1 pej 1130 haf 2
Tabu
Ol Animol Mo Ol Kakae. Ol fasbon pikinini man blong ol buluk, sipsip, mo nani, Jehova i talem se oli tabu, oli blong hem, mo ol man oli no mas pembak olgeta. Oli mas givim olgeta olsem sakrefaes, mo wan haf blong ol animol ya i mas go long ol pris. (Na 18:17-19) Ol fasfrut mo ol taet oli tabu, wetem evri sakrefaes, mo evri presen we oli mekem i tabu blong givim i go long tabu ples. (Eks 28:38) Evri holi samting we oli talem se i blong Jehova, oli tabu mo ol man oli no mas yusum long ol samting olbaot, o long wan wei we bae i mekem oli no moa tabu. Eskampol, hemia ol taet. Sipos wan man i putum sam samting olsem maet ol kakae, i stap blong i kam taet we bambae hem i givim, be afta hem o wan narawan long haos blong hem, i mestem nao i tekem sam long ol samting ya blong kukum o blong mekem wan nara samting wetem, man ya i gat fol from we i brekem loa long saed blong ol tabu samting. Loa i talem se hem i mas pem wan faen i go long tabu ples, eksampol sipos praes blong ol kakae ya i 5,000 be hem i mas ademap 1,000 antap long hem, mo tu, hem i mas givim wan man sipsip we i no gat samting i rong long bodi blong hem, blong givim olsem wan sakrefaes. Long rod ya, ol man oli mas gat bigfala respek long ol tabu samting we oli blong Jehova.—Le 5:14-16.
23-29 NOVEMBA
OL GUDGUDFALA SAMTING LONG BAEBOL | LEVITIKAS 6-7
“Sakrefaes Blong Talem Tangkiu”
Samting We Yumi Lanem Long Buk Blong Levitikas
9 Seken samting we yumi lanem: Yumi mekem wok blong Jehova blong talem tangkiu long hem. Blong kasem save samting ya, bambae yumi tokbaot wan narafala impoten samting long wosip blong ol man Isrel, hemia sakrefaes ya we oli bonem haf mo oli kakae haf. Buk blong Levitikas i talem se wan man Isrel i save mekem sakrefaes ya “blong talem tangkiu” long Jehova. (Lev. 7:11-13, 16-18) Hem i mekem sakrefaes ya from we hem nomo i wantem, i no from we hem i mas mekem. Mo tu, from we hem i lavem God blong hem Jehova. Man ya, famle blong hem, mo ol pris, oli kakae mit blong animol ya, be oli givim sam haf i go long Jehova. ?Weswan haf?
w00 15/8 pej 15 haf15
Ol Sakrefaes We God i Glad Long Hem
15 Wan narafala sakrefaes we i olsem presen, hemia sakrefaes we i blong frengud wetem God. Levitikas japta 3 i tokbaot sakrefaes ya. Sakrefaes ya, yumi save kolem tu se, “wan sakrefaes we i olsem presen blong mekem pis.” Long Hibru lanwis, tok ya “pis” i gat mining we i go moa, i no jes minim nomo se ples i kwaet, i no gat faet no trabol. Buk ya, Studies in the Mosaic Institutions i talem se: “Long Baebol, hem i minim samting ya, be tu hem i minim se man i gat pis wetem God, gat plante samting, gat fasin glad, mo haremgud.” Taswe, sakrefaes ya we i blong frengud wetem God, hem i no blong mekem pis, olsem fasin blong mekem God i no kros, be hem i blong soem tangkiu no selebretem pis we God i gat wetem olgeta we hem i glad long olgeta, we i olsem wan blesing. Afta we ol pris oli tekem blad mo gris, oli mekem sakrefaes i go long Jehova, ol pris wetem man we i mekem sakrefaes oli joen blong kakae anamol ya we oli bin yusum long sakrefaes. (Levitikas 3:17; 7:16-21; 19:5-8) Samting ya i nambawan tumas. I olsem se man ya we i mekem sakrefaes, wetem ol pris, mo Jehova God, oli joen wanples blong kakae, mo samting ya i makem pis we i stap long medel blong olgeta.
w00 15/8 pej 19 haf 8
Ol Sakrefaes Blong Presem Jehova We Hem i Glad Long Hem
8 ?Olsem wanem long man we i mekem sakrefaes? Loa i talem se man we i kam long fored blong Jehova, hem i mas klin, mo i no gat poen long hem. Man we i no klin, fastaem hem i mas mekem wan sakrefaes blong tekemaot sin no rong blong hem, blong hem i save kam klin bakegen long fored blong Jehova. Olsem nao, bambae God i glad long sakrefaes we i blong bon evriwan mo sakrefaes we i blong frengud wetem God. (Levitikas 5:1-6, 15, 17) ?Yumi luksave from wanem i impoten tumas blong holem ol fasin we oli klin long fored blong Jehova? Sipos yumi wantem se God i agri long wosip blong yumi, yumi mas hareap blong stretem ol rong we yumi mekem agensem loa blong God. Yumi mas hareap tu blong yusumgud help we God i givim long yumi—hemia ‘ol elda blong kongregesen’ mo “rod blong God i tekemaot sin blong yumi,” hemia Jisas Kraes.—Jemes 5:14; 1 Jon 2:1, 2.
Traem Faenem Ol Gudfala Samting Ya
it-1 pej 833 haf 1
Faea
Faea long tabenakel mo long tempol. Faea i gat ples blong hem long wosip we i stap gohed long tabenakel, mo biaen long tempol. Evri moning mo afta we san i godaon, hae pris i mas bonem insens long olta blong insens. (Eks 30:7, 8) Loa blong God i talem se faea i mas gohed blong laet long olta blong sakrefaes we i bon fulwan. (Le 6:12, 13) I gat wan kastom stori blong ol man Jiu, we i se tru God nao i faswan blong laetem faea long olta ya, tru long wan merikel. Nating se plante man oli bilif long stori ya, be hem i no stanap long Baebol. Folem ol faswan instraksen we Jehova i givim long Moses, ol boe blong Eron oli mas “laetem faea long olta, mo oli putum ol wud long faea ya” bifo we oli putum sakrefaes long olta. (Le 1:7, 8) Samting we i hapen afta we God i putumap Eron i kam pris, mo afta we oli bonem ol sakrefaes blong seremoni ya, hemia se faea blong Jehova we maet i kamaot long klaod antap long tabenakel, i kam bonem ol ofring we i stap long olta. Taswe, faea ya we i kamaot long wan merikel, hem i no bonem ol faeawud long olta ya, be i “bonem ofring ya we i blong bon fulwan mo ol gris we oli stap long olta.” Faea we i gohed blong laet long olta, hem i faea we i kamaot long God wetem faea we i stap laet finis long olta ya. (Le 8:14–9:24) Long sem fasin, stret afta we Solomon i prea long dedikesen blong tempol, Jehova i mekem faea i kamaot nao i bonem ol sakrefaes we i stap.—2Kr 7:1; mo luk Ja 6:21; 1Ki 18:21-39; 1Kr 21:26 oli tokbaot ol nara eksampol we Jehova i mekem faea i kamaot taem i akseptem ol ofring blong ol man blong hem.
si pej 27 haf 15
Baebol Buk Namba 3—Levitikas
15 (3) Sipos wan man i mestem nao i mekem sin, hem i mas givim wan ofring blong sin. Animol we bae oli givim olsem ofring, i dipen long wanem kaen man we i mekem sin ya, maet i wan pris, o i wan grup blong ol man, o wan jif, o wan man olbaot. Man i save jusum sipos hem i wantem givim ofring we i bon fulwan mo ofring blong pis. Be hemia i no sem mak long ofring blong sin. Sipos man i mekem sin, hem i mas givim ofring ya.—4:1-35; 6:24-30.
30 NOVEMBA–6 DISEMBA
OL GUDGUDFALA SAMTING LONG BAEBOL | LEVITIKAS 8-9
“Pruf Se Jehova i Blesem Olgeta”
it-1 pej 1207
Putumap Ol Pris
Moses i wasem Eron mo ol boe blong hem, Nadab, Abihu, Eleasara, mo Itamara (o, hem i talem blong oli wasem olgeta wan) long kopa besin we i stap long yad, biaen i mekem Eron i werem naesfala klos blong hae pris. (Na 3:2, 3) Afta we Eron i werem naesfala klos ya, hem werem ol samting we i representem ol fasin mo wok blong hem olsem hae pris. Biaen Moses i makemaot tabenakel, wetem olgeta samting we i mas stap insaed long hem, mo ol samting we bambae oli yusum. Mo i makemaot olta blong sakrefaes we i bon fulwan, wetem besin mo ol samting we bae oli yusum long olta ya. Hemia i mekem se oli kam tabu, oli stap blong yusum nomo long wok blong God. Biaen Moses i makemaot Eron taem i kafsaedem oel long hed blong hem.—Le 8:6-12; Eks 30:22-33; Sam 133:2.
it-1 pej 1208 haf 8
Putumap Ol Pris
Long namba 8 dei, ol pris oli mekem wok blong olgeta blong faswan taem (we Moses i no givhan long olgeta), from we oli gat evri samting we oli nidim mo God i putumap olgeta long wok ya. Oli mekem atonmen blong nesen blong Isrel, blong mekem oli kam klin from sin we oli gat, be speseli from we Jehova i no glad long aksen blong olgeta taem oli no obei nao oli wokem wan smol buluk long gol. (Le 9:1-7; Eks 32:1-10) Long en blong faswan wok we ol niufala pris ya oli mekem, Jehova i soem se hem i glad long olgeta mo i agri long wok blong olgeta, nao i sanem wan faea we maet i kamaot long bigfala klaod antap long tabenakel, mo faea ya i bonem sam sakrefaes we i stap yet long olta.—Le 9:23, 24.
Samting We Yumi Lanem Long Buk Blong Levitikas
13 Namba fo samting we yumi lanem: Jehova i stap blesem oganaesesen blong hem long wol. Tingbaot samting we i hapen long 1512 bifo Kraes, taem oli stanemap haos tapolen blong God long stamba blong Hil ya Sinae. (Eks. 40:17) Moses i mekem wan seremoni blong putumap Eron mo ol boe blong hem oli kam pris. Ol man Isrel oli kam wanples blong luk ol niufala pris ya taem oli mekem fas sakrefaes blong olgeta. (Lev. 9:1-5) ?Olsem wanem Jehova i soemaot se hem i glad long olgeta? Taem Eron mo Moses i blesem ol man, Jehova i mekem faea i kamdaon mo i bonem sakrefaes we i stap long olta.—Ridim Levitikas 9:23, 24.
Traem Faenem Ol Gudfala Samting Ya
w14 15/11 pej 10-11 haf 6
?From Wanem Yumi Mas Tabu?
6 ?Yumi lanem wanem long ol pris blong Isrel we oli mas klin long bodi blong olgeta? Plante man we yumi mekem Baebol stadi long olgeta, oli luk we yumi klin mo yumi jenis gud, mo haos wosip blong yumi i klin. Be sipos yumi wantem wosipim Jehova, ‘tingting blong yumi tu i mas klin.’ (Ridim Ol Sam 24:3, 4; Aesea 2:2, 3.) Taswe, taem yumi mekem wok blong Jehova, tingting mo hat mo bodi blong yumi i mas klin. Oltaem yumi wanwan, yumi mas jekem yumi bakegen. Maet yumi faenemaot se yumi mas mekem sam bigfala jenis blong kam klin mo tabu. (2 Korin 13:5) Olsem nao, sipos wan man we i baptaes i stap lukluk ol rabis pija, i gud hem i askem se: ‘?Fasin ya blong mi i soemaot se mi mi tabu?’ Afta, hem i mas askem long ol elda blong oli givhan long hem blong i sakemaot rabis fasin ya.—Jemes 5:14.
it-2 pej 437 haf 3
Moses
God i putumap Moses se i medel man blong kontrak blong Loa mo ol man Isrel, hemia wan posisen we wan man i neva bin gat bifo, be Jisas Kraes nomo we i Medel Man blong niufala kontrak. Moses i tekem blad blong ol sakrefaes blong animol, nao i saksakem long buk blong kontrak we i representem Jehova se i wan “grup,” mo ol man (maet ol elda we oli representem ol man) we oli narafala “grup.” Hem i ridim buk blong kontrak long ol man, mo oli ansa se: “Mifala i glad blong mekem evri samting we Jehova i talem.” (Eks 24:3-8; Hib 9:19) Taem Moses i mekem wok ya blong medel man, hem i gat privilej ya blong lukaot long wok blong bildim tabenakel mo ol samting blong hem, folem plan we God i givim long hem. Mo hem i gat privilej ya blong stanemap ol pris long wok blong olgeta, mo blong makemaot tabenakel mo hae pris ya Eron, long wan spesel oel we oli miksim. Biaen hem i lukaot long faswan sevis blong stanemap ol niufala pris.—Eks japta 25-29; Le japta 8, 9.