Refrens Blong Kristin Wok Mo Laef Miting Wokbuk
© 2023 Watch Tower Bible and Tract Society of Pennsylvania
1-7 JENUWARE
OL SAS SAMTING LONG BAEBOL | JOB 32-33
Givhan Long Olgeta We Oli Wari
it-1 710
Elihu
Elihu i mekem i sem mak long evriwan, i no traem blong leftemap eni man. Hem i luksave se hem i sem mak long Job, mo se God Ya We i Gat Olgeta, hem nao i krietem hem. Elihu i no traem mekem Job i fraet, be hem i toktok long hem olsem wan gudfala fren, i singaot Job long nem blong hem, hemia samting we Elifas, Bildad, o Jofara oli no mekem.—Job 32:21, 22; 33:1, 6.
?Yu Yu Gat Tingting Blong Jehova Long Olgeta We Oli No Strong?
8 ?Wanem bambae i givhan long yumi blong yumi kasem save moa long ol brata blong yumi we oli nidim help? Hemia taem yumi tingbaot se plante long olgeta oli harem nogud from we maet oli sik, tingting blong olgeta i foldaon, no from we olgeta nomo oli stap long trutok. Sipos ol trabol olsem oli kasem yumi, yumi wantem se ol narafala oli kasem save mo oli sore long yumi. Yu traem tingbaot ol man Isrel. Oli bin harem nogud tumas long Ijip, ale taem oli rere blong go insaed long Promes Lan, Jehova i talem se oli “mas givhan” long ol brata blong olgeta we oli pua mo oli no strong.—Dut. 15:7, 11; Lev. 25:35-38.
9 Yumi no mas hariap blong jajem ol brata mo sista from trabol we oli kasem, mo yumi no mas ting se yumi gud moa long olgeta. Be yumi mas givhan long olgeta taem oli no strong. (Job 33:6, 7; Mat. 7:1) Yu traem tingbaot wan man we i aksiden long moto, ale oli karem hem i go long hospital. Taem ol dokta mo ol nes oli luk hem, ?yu ting se oli traem blong faenemaot se hu i mekem aksiden ya? !Nogat! Bambae oli givhan kwiktaem long hem, blong hem i kamgud bakegen. Hemia i sem mak long yumi. Taem wan Kristin i kasem trabol nao i kam slak, yumi mas givhan long hem blong bilif blong hem i kam strong bakegen.—Ridim 1 Tesalonaeka 5:14.
10 Maet yu ting se sam brata mo sista oli no strong. Be sipos yu tingting gud long laef blong olgeta, maet yu faenemaot se bilif blong olgeta i strong. Yu traem tingbaot wan sista we laef blong hem i no isi, from we man blong hem i no stap long trutok. Yu traem tingbaot wan mama we i no gat man blong hem, be hem i wok had blong tijim ol pikinini blong hem mo i tekem olgeta i go oltaem long ol miting. Mo yu traem tingbaot ol yangfala we oli stanap strong evri dei, taem ol fren long skul oli traem pulum olgeta blong oli brekem loa blong God. Olgeta evriwan ya oli lavem Jehova tumas, mo oli holemstrong long hem. Taem yumi tingbaot ol samting we ol brata mo sista blong yumi oli mekem blong wosipim Jehova, bambae yumi luksave se oli “rijman long fasin blong bilif,” nomata se yumi ting se oli no strong.—Jem. 2:5.
?Wetaem i Stret Blong Toktok?
17 Namba fo man we i go luk Job, hemia Elihu, wan famle blong Ebraham. Hem i lesin nomo taem Job mo tri narafala man oli toktok. I klia se hem i lesin gud, from we biaen hem i givim gudfala advaes long kaen fasin, blong stretem tingting blong Job. (Job 33:1, 6, 17) Bigfala tingting blong Elihu i blong leftemap nem blong Jehova, i no hem wan o narafala. (Job 32:21, 22; 37:23, 24) Elihu i tijim yumi se i gat wan stret taem blong stap kwaet mo lesin. (Jem. 1:19) Yumi lanem tu se taem yumi stretem narafala, yumi mas gat tingting blong leftemap Jehova, be i no yumi.
18 Taem yumi folem advaes blong Baebol blong jusum stret taem mo stret fasin blong toktok, yumi soemaot se yumi tinghae long fasin blong toktok we God i givim olsem wan presen. Tabu spirit i pulum waes King Solomon blong raetem se: “Tok we wan man i talem long prapa taem blong hem, i olsem sam gol apol long wan plet silva.” (Prov. 25:11, NW) Taem yumi lesin gud long narafala mo yumi tingting gud bifo we yumi toktok, ol tok blong yumi i olsem ol apol we oli wokem long gol, from we i sas mo i naes tumas. Nating se yumi talem plante toktok o smol nomo, bambae Jehova i glad long yumi. (Prov. 23:15; Efes. 4:29) !Hemia wan gudfala rod blong talem tangkiu long God from presen ya we hem i givim!
Ol Gudgudfala Samting Long Baebol
Yu Mas Kam Klosap Long Jehova
10 I stret tu we yumi wantem luk naes. Be yumi no mas traehad bitim mak blong stap yangfala. Baebol i talem se: “Waet hea i olsem wan hat we i naes tumas long man we i mekem stret fasin.” (Prov. 16:31, NW) Tingting blong Jehova, hemia se i moa impoten we yumi gat ol gudfala fasin i bitim we bodi mo fes blong yumi i naes. Yumi mas gat sem tingting olsem hem. (Ridim 1 Pita 3:3, 4.) Taswe, ?yu ting se i waes blong letem dokta i katem yumi no yumi folem ol spesel tritmen, blong yumi kam naes moa? Sam long ol samting ya oli denja, mo yumi no nidim tu. Jehova nao “i stap mekem yumi glad.” Nating se yumi olfala tumas mo yumi sik, be glad ya we i stap long hat blong yumi i mekem se yumi naes yet. (Neh. 8:10) Long niufala wol nomo bambae yumi kam fri olgeta long sik, mo bambae yumi kam yangfala bakegen we yumi naes tumas. (Job 33:25; Aes. 33:24) Go kasem taem ya, yumi mas waes, yumi mas holem bilif we bambae i givhan long yumi blong stap klosap long Jehova, mo yumi mas glad nomo long laef we yumi gat.—1 Tim. 4:8.
8-14 JENUWARE
OL SAS SAMTING LONG BAEBOL | JOB 34-35
Taem Ol Nogud Samting i Stap Hapen Long Ol Gudfala Man
?Wanem Fasin Blong God?
Oltaem God i mekem samting we i stret. Baebol i askem se: “?Yufala i ting se [God] i save mekem samting we i no stret?” Nogat. (Job 34:10) Jehova i jajem man long stret fasin. Man blong raetem Sam i talem long Jehova se: “Yu yu stap jajem [ol man] long stret fasin.” (Ol Sam 67:4) Man we i gat tu fes i no save trikim Jehova. Hem i “stap lukluk long tingting blong [man],” taswe hem i luksave taem man i giaman mo i jajem hem long stret fasin. (1 Samuel 16:7) Mo tu, God i luk ol kruked fasin, taswe Baebol i promes se i no longtaem, “ol man nogud . . . bambae God i tekemaot olgeta.”—Ol Proveb 2:22.
?Wanem Bambae i Lus Taem Kingdom Blong God i Kam?
5 ?Jehova bambae i mekem wanem? Jehova i stap givim janis yet long ol rabis man, blong oli jenisim fasin blong olgeta. (Aesea 55:7) I no longtaem rabis wol ya bambae i lus, be Jehova i no jajem ol man yet. ?Olsem wanem long ol rabis man we oli no wantem jenisim fasin blong olgeta, be oli gohed blong sapotem rabis wol ya gogo kasem taem blong bigfala trabol? Jehova i promes se hem bambae i spolem olgeta. (Ridim Ol Sam 37:10.) Tede, plante man oli haedem ol rabis fasin blong olgeta, mo oli no kasem panis from. (Job 21:7, 9) Be Baebol i talem se: “[God] i stap wajem ol man long evri ples we oli pas long hem. I no gat tudak we i tudak olgeta, we man nogud i save go haed long hem blong God i no luk hem.” (Job 34:21, 22) Taswe, ol rabis man oli no save haed long Jehova. Hem i luk evri samting we oli stap mekem. Afta long faet blong Amagedon, bambae yumi luk ples we oli bin stap long hem, be yumi no moa luk olgeta. !Oli lus blong olwe!—Ol Sam 37:12-15.
?Bambae Yu Yu Stambol From Jisas?
19 ?Hemia i sem mak tede? Yes. Plante man tede oli stambol from yumi no joen long politik. Oli ting se yumi sud vot long ol taem blong eleksen. Be yumi luksave se long tingting blong Jehova, sipos yumi jusum wan lida blong wol blong i rulum yumi, hemia i olsem we yumi tanem baksaed long Jehova. (1 Saml. 8:4-7) Maet ol man oli gat tingting ya tu se yumi sud bildim ol skul, hospital, o mekem sam samting blong givhan long komuniti. Be taem oli luk we yumi putum tingting blong yumi i stap strong nomo long wok blong prij, mo yumi no traem blong stretem ol problem blong wol tede, hemia i mekem oli stambol.
20 ?Olsem wanem blong no stambol? (Ridim Matiu 7:21-23.) Men fokas blong yumi i blong mekem wok ya we Jisas i talem long yumi blong mekem. (Mat. 28:19, 20) Yumi no mas traem blong stretem ol problem blong wol ya. Yumi lavem ol man mo yumi harem nogud taem oli kasem trabol, be beswan rod blong givhan long olgeta, hemia taem yumi tijim olgeta long saed blong Kingdom blong God mo halpem olgeta blong oli fren wetem Jehova.
Ol Gudgudfala Samting Long Baebol
!Taem Yu Glad Blong Wok, Yu Presem Jehova!
3 Wan yangfala we nem blong hem Elihu, i stap lesin long storian blong Job mo trifala man ya. Taem trifala i toktok finis, Elihu i talem long Job se: “Sipos yu stap mekem i stret, be fasin ya tu i no save halpem [God]. Hem i no save kasem wan samting long yu we i save givhan long hem.” (Job 35:7) ?Olsem wanem? ?Elihu tu i stap talem se i blong nating nomo we yumi traehad blong mekem wok blong God? !Nogat! Jehova i stretem ol trifala man ya, be hem i no stretem Elihu. Elihu i wantem talem wan samting we i defren olgeta. Hem i wantem soemaot se Jehova i no dipen long wosip blong yumi. Yumi no save halpem Jehova blong i kam rij moa no i kam strong moa. Hem i stret gud finis. Antap long hemia, ol gudfala fasin mo save we yumi gat, oli kamaot long hem nomo, mo hem i stap luk olsem wanem yumi yusum.
15-21 JENUWARE
OL SAS SAMTING LONG BAEBOL | JOB 36-37
?From Wanem Yu Save Trastem Promes Blong God Long Saed Blong Laef We i No Save Finis?
?Yumi Save Faenem God?
GOD WE I LAEF OLWE: Baebol i tijim yumi se God i stap “longtaem finis i kam mo gogo i no save finis.” (Ol Sam 90:2) Wan narafala rod blong talem hemia se God i no gat stat blong hem mo bambae i no gat en blong hem. Long tingting blong yumi ol man, “namba blong ol yia blong hem i had blong kasemsave.”—Job 36:26.
?Save ya i halpem yu olsem wanem?: God i promes blong givim laef we i no save finis long yu, sipos yu tekem taem blong save gud hem. (Jon 17:3) Yumi no save trastem promes ya, sipos God i no laef olwe. “King blong olwe” nomo i save mekem promes ya i kamtru.—1 Timoti 1:17.
?Yu Soemaot Se Yu Glad Long Ol Presen We God i Givim?
6 Wota we i stap long wol ya i no save finis, from we wol i no klosap tumas mo i no longwe tumas long san. Sipos wol i stap klosap moa long san, bambae san i pulum olgeta wota i go antap, nao wol bambae i kam olsem ston nomo we i hot mo i drae. Sipos wol i stap longwe moa long san, olgeta wota bambae i kam aes, nao wol bambae i kolkol tumas blong ol laef samting oli stap long hem. From we Jehova i putum wol long stret ples, i gat wota oltaem long hem. San i pulum solwota mo narafala wota i go antap long skae blong mekem ol klaod. Evri yia, san i pulum plante milian lita i go antap. Wota i stap long skae blong samwe long ten dei, nao i foldaon olsem ren. Sloslo wota ya i ron i gobak long solwota mo ol lek. Rod ya we Jehova i mekem blong wol i gat wota oltaem, i soemaot waes mo paoa blong hem.—Job 36:27, 28; Pri. 1:7.
Mekem Hop Blong Yu i Stap Strong
16 Hop blong laef olwe hem i wan sas presen we God i givim. Yumi wantem tumas blong luk nambawan fiuja ya, we yumi sua se bambae i kamtru. Hop i olsem angka blong yumi, i mekem yumi stanap strong taem yumi fesem ol bigfala trabol, taem oli ronem mo kilim yumi, mo taem yumi fesem ded. Mo tu, hop i olsem wan hat blong faet, i protektem tingting blong yumi, nao yumi sakemaot ol samting we i rong, mo yumi gohed blong mekem samting we i stret. Hop ya we Baebol i givim, i halpem yumi blong save gud God, mo i soemaot se hem i lavem yumi tumas. Hop ya i givhan bigwan long yumi sipos yumi mekem se i stap strong, mo i klia gud long tingting blong yumi.
Ol Gudgudfala Samting Long Baebol
it-1 492
Rod Blong Pasem Ol Mesej
Long taem bifo, ol man oli yusum plante defren rod blong pasem infomesen mo ol tingting i go long narafala. Wan rod we oli yusum moa blong karem ol lokol nius mo nius blong ol narafala kantri i go long narafala, hemia tru long toktok we oli pasem. (2 Saml. 3:17, 19; Job 37:20) Plante taem, taem ol man we oli stap travel i go long ol defren ples oli stop long ol taon, o long ol ples blong spel, blong kakae, dring wota, mo tekem narafala samting we oli nidim, oli stap pasem ol nius blong ol narafala ples. Kantri blong Palestaen i defren long ol kantri long Esia, Afrika, mo Yurop, from hem i wan kantri we oltaem ol man blong travel oli pastru long hem. Taswe ol man blong kantri ya oli save kasem infomesen long saed blong ol samting we i stap hapen long ol narafala kantri. Plante taem oli kasem ol nius blong ol narafala nesen mo kantri, long taon long ples blong maket.
22-28 JENUWARE
OL SAS SAMTING LONG BAEBOL | JOB 38-39
?Yu Yu Tekem Taem Blong Lukluk Kriesen?
?Yu Yu Glad Blong Wet Long Jehova?
7 Taem Baebol i tokbaot olsem wanem Jehova i wokem wol ya, hem i tokbaot “ol mesamen blong hem,” “ol stamba blong hem,” mo “ol ston long kona blong hem.” (Job 38:5, 6) Hem i iven tekem taem blong hem, blong lukluk ol wok we hem i bin mekem. (Jen. 1:10, 12) Traem tingbaot filing blong ol enjel taem oli luk ol niufala samting ya we Jehova i krietem. !I sua se oli haremgud tumas! Mo from samting ya, oli stat blong “singaot from oli glad.” (Job 38:7) ?Yumi lanem wanem? I tekem plante taosen yia blong Jehova i finisim ol wok ya blong hem, be taem hem i luk ol samting ya we hem i krietem, hem i talem se “oli gud tumas.”—Jen. 1:31.
Laef Bakegen i Soem Lav, Waes, Mo Longfala Tingting Blong God
2 Fastaem, Jehova i wokem wan narafala blong givhan long hem. Biaen, hem i yusum fasbon Pikinini ya blong hem, blong wokem “olgeta narafala samting,” wetem plante milian spirit pikinini blong hem, hemia ol enjel. (Kol. 1:16) Jisas i glad long janis ya blong wok wetem Papa blong hem. (Prov. 8:30) Mo ol enjel tu oli glad, from we taem Jehova mo Jisas we i Nambawan Man Blong Wok blong hem i stap wokem heven mo wol, olgeta oli stap long taem ya mo oli luk. ?Ol enjel oli mekem wanem? Oli “glad tumas, oli stap singsingaot” taem Jehova i wokem wol, mo i sua se oli gohed blong singsingaot taem hem i wokem evri samting, wetem laswan wok blong hem tu we i nambawan tumas, hemia man. (Job 38:7; Prov. 8:31) Evri samting ya we Jehova i wokem, oli soemaot lav mo waes blong hem.—Sam 104:24; Rom 1:20.
Kasemsave Moa Long Jehova Tru Long Kriesen
8 Yumi save trastem Jehova. Jehova i halpem Job blong i trastem Hem moa. (Job 32:2; 40:6-8) Taem God i stap toktok wetem Job, Hem i tokbaot plante samting we hem i krietem olsem ol sta, ol klaod, mo ol laet blong laetning. Mo tu, Jehova i tokbaot ol animol olsem wael bul mo hos. (Job 38:32-35; 39:9, 19, 20) Olgeta samting ya oli no pruvum nomo se God i gat bigfala paoa, be oli soemaot tu se hem i gat lav mo i waes tumas. Storian ya we Job i gat wetem Jehova i mekem se hem i trastem Jehova moa i bitim bifo. (Job 42:1-6) Long sem fasin, taem yumi stadi long kriesen, bambae yumi luksave se Jehova i waes we i waes mo se hem i gat moa paoa i bitim yumi. Hem i naf mo bambae hem i finisim olgeta trabol blong yumi. Save ya we yumi gat long saed blong Jehova, i save halpem yumi blong trastem hem moa.
Ol Gudgudfala Samting Long Baebol
it-2 222
Man Blong Givim Loa
Jehova i Man Blong Givim Loa. Long ful yunives, Jehova nao i stret Man Blong Givim Loa. Yumi luk samting ya tru long ol loa we hem i putum long ol kriesen blong hem we oli no save toktok (Job 38:4-38; Sam 104:5-19), mo long ol animol. (Job 39:1-30) Mo tu, Jehova nao i wokem man taswe hem i putum wan loa long bodi blong hem, mo from we man i naf blong stap klin, i save mekem ol desisen, i save tingting, mo fren gud wetem God, hem i naf blong folem ol loa blong God. (Ro 12:1; 1Ko 2:14-16) Antap long hemia, Jehova i givim loa tu long ol enjel.—Sam 103:20; 2Pi 2:4, 11.
I no gat wan samting i save brekem loa we Jehova i putum long bodi blong man. (Jer 33:20, 21) Ol loa we Jehova i putum long ol samting long yunives we yumi save luk, oli no jenis mo man i save trastem. Ol saentis oli save ol loa ya, taswe oli naf blong kalkuletem stret spid blong mun, ol planet, mo ol narafala samting long spes. Man we i go agensem ol loa ya blong bodi, kwiktaem nomo hem i save kasem trabol from. Long sem fasin, ol loa blong God long saed blong stret fasin oli no save jenis, mo man we i brekem o i go agensem ol loa ya i no mas ting se hem i no save kasem panis. I sua se bambae hem i kasem trabol from, nating se trabol ya i no kamaot wantaem nomo. Mo hemia sem samting we bambae i hapen long man we i brekem loa we God putum long bodi blong yumi. “I no gat man i save trikim God. Wanem sid we man i planem, be frut blong hem nomo, man ya bambae i kasem.”—Gal 6:7; 1Ti 5:24.
29 JENUWARE–4 FEBRUARI
OL SAS SAMTING LONG BAEBOL | JOB 40-42
Ol Lesen We Yumi Lanem Long Ekspiriens Blong Job
‘?Hu Man We i Save Tingting Blong Hae God?’
4 Taem yumi tingting dip long ol wok blong Jehova, yumi mas blokem tingting ya se God i mas mekem samting we yumi ol man i ting se i stret. Long Ol Sam 50:21, Jehova i tokbaot tingting ya, hem i se: “!Yufala i ting se mi mi olsem yufala nomo!” Bitim 175 yia bifo, wan man blong stadi long Baebol i talem se: “Ol man oli gat wan fasin blong jajem God olsem se hem i wan man olsem olgeta. Mo oli ting se God i mas folem ol loa we oli ting se i stret blong ol man oli folem.”
5 Yumi mas lukaot blong no tingting se Jehova i wan man olsem yumi, se hem i wantem ol samting we yumi wantem, mo se hem i mas folem samting we yumi ting se i stret blong mekem. ?From wanem i impoten blong sakemaot tingting olsem? From we taem yumi stadi long Baebol, maet yumi save ting se sam samting we Jehova i mekem i no stret. Be yumi mas tingbaot se yumi sinman mo yumi no save evri samting. Ol man Isrel bifo oli foldaon long trap ya, ale oli gat rong tingting long saed blong fasin we Jehova i mekem long olgeta. Yumi save ridim samting we Jehova i talem long olgeta, i se: “Be yufala i talem se, ‘Hae God i Masta blong yumi, be ol fasin blong hem i no stret.’ Yufala ol laen blong Isrel, yufala i lesin long mi. ?Yufala i ting se fasin blong mi i no stret? !Yufala nao, fasin blong yufala i no stret!”—Esik. 18:25.
6 Wan samting we i save givhan long yumi blong no foldaon long trap ya, hemia blong luksave se yumi no save evri samting mo se samtaem tingting blong yumi i rong bigwan. Man ya Job, i lanem samting ya. Taem Job i harem nogud tumas from ol trabol we oli kasem hem, tingting blong hem i foldaon ale hem i tingbaot hem wan nomo. Hem i no tingbaot ol samting we oli moa impoten. Ale Jehova i givhan long hem blong tingbaot ol samting ya. Jehova i askem bitim 70 kwestin long Job, mo Job i no save ansa long olgeta. Olsem nao Jehova i givhan long Job blong kasem save se hem i no save evri samting. Job i gat tingting daon mo i mekem tingting blong hem i laenap wetem tingting blong Jehova.—Ridim Job 42:1-6.
Tingbaot Samting We i Moa Impoten
12 ?Olsem wanem? ?Jehova i strong tumas long Job? Nogat, mo Job i no tingting olsem tu. Hem i kasem save long ol tok blong Jehova, mo i glad long hem. Taswe hem i talem se: “Mi mi sem tumas long ol samting ya we mi stap talem, mi harem nogud tumas from. Naoia mi tanem tingting blong mi, mi lego ol fasin ya finis, mo mi stap sidaon long asis blong graon, mo long asis faea.” (Job 42:1-6) Yangfala man ya Elihu, hem tu i bin tok long Job blong stretem tingting blong hem. (Job 32:5-10) Job i lesin long ol gudfala advaes blong Jehova, mo i jenisim tingting blong hem, nao Jehova i talem long ol narafala se hem i glad tumas long Job, from we Job i holemstrong long hem.—Job 42:7, 8.
“Yu Mas Putum Hop Blong Yu Long Jehova”
17 Job i wan nomo long ol man blong Jehova we i gat strong tingting mo i stanap strong long plante trabol. Long leta we aposol Pol i raetem i go long ol Kristin long Hibru, hem i tokbaot plante narafala we hem i singaot olgeta se “wan bigfala hip blong ol witnes.” (Hib. 12:1) Olgeta ya oli bin fesem plante trabol, be oli gohed blong holemstrong long Jehova. (Hib. 11:36-40) ?Fasin blong olgeta blong stanap strong mo wok had i blong nating nomo? !Nogat! Nating se long ful laef blong olgeta oli no luk we ol promes blong God oli kamtru, be oli gohed nomo blong putum hop blong olgeta long Jehova. Mo from we oli save se Jehova i glad long olgeta, oli sua se bambae oli save luk ol promes ya blong God oli kamtru long fiuja. (Hib. 11:4, 5) Eksampol blong olgeta i givhan long yumi blong gohed nomo mo putum hop blong yumi long Jehova.
18 Tede yumi laef long wan wol we i stap kam moa nogud. (2 Tim. 3:13) Setan i no stop yet blong traem ol man blong God. Nating se bambae yumi fesem plante trabol yet long fiuja, be yumi save gat strong tingting blong wok strong long wok blong Jehova, mo trastem se “yumi putum hop blong yumi finis long God ya we i laef.” (1 Tim. 4:10) Tingbaot se ol samting we God i mekem long Job oli pruvum “se Jehova i lavem man tumas, mo i gat sore.” (Jem. 5:11) I gud yumi tu yumi gohed blong holemstrong long Jehova, mo trastem se bambae hem i blesem “ol man we oli stap traehad blong faenem hem.”—Ridim Hibru 11:6.
Ol Gudgudfala Samting Long Baebol
it-2 808
Tok Jik
Job i wan stret man we i gohed blong holemstrong long God nating se oli tok jikim hem. Be samtaem hem i gat nogud tingting mo i mekem mastik, taswe oli mas stretem hem. Elihu i talem long hem se: “?I gat wan narafala man i olsem Job, we i stap dring ol tok jik olsem wota?” (Job 34:7) Job i tingbaot moa blong traem pruvum se hem nao i stret moa i bitim God, mo i traem blong leftemap ol wok blong hem i bitim ol wok blong God. (Job 35:2; 36:24) Taem ol trifala “fren” blong Job oli tok jikim hem, hem i tingbaot se oli stap tok nogud long hem stret be i no long God. Long rod ya, hem i olsem wan man we i letem hem i go long ol man blong laf mo jikim hem, mo oli glad from. Mo hemia i olsem we hem i glad blong dring wota. Biaen God i eksplenem long Job se ol tok jik ya we oli stap talem long hem i olsem we oli talem ol giaman tok ya agensem God. (Job 42:7) Hemia sem tok we Jehova i talem long profet Samuel taem ol man Isrel oli askem blong gat wan king, hem i se: “I no yu we oli no wantem, be mi ya we olgeta oli no wantem blong mi king blong olgeta.” (1Sa 8:7) Mo Jisas i talem long ol disaepol blong hem se: “Ol man blong olgeta nesen bambae oli no laekem yufala nating [i no from samting we yufala nomo i mekem, be] from we yufala i holem nem blong mi.” (Mt 24:9) Ol tok ya oli save givhan long ol Kristin blong oli stap glad mo stanap strong taem ol man oli tok jikim olgeta mo Jehova bambae i blesem olgeta.—Lu 6:22, 23.
5-11 FEBRUARI
OL SAS SAMTING LONG BAEBOL | OL SAM 1-4
Tekem Saed Blong Kingdom Blong God
“Bambae Mi Seksekem Olgeta Nesen”
8 ?Wanem tingting blong ol man long mesej ya? Bighaf blong ol man oli no glad. (Ridim Ol Sam 2:1-3.) Ol nesen oli kam kros, mo oli no akseptem rula ya we Jehova i putumap. Long tingting blong olgeta, mesej ya blong Kingdom we yumi stap talemaot, i no wan “gud nius.” !Sam gavman oli blokem wok blong prij! Nating se plante long ol rula oli talem se oli mekem wok blong God, be oli no wantem lego paoa mo otoriti blong olgeta. Taswe, olsem ol rula long taem blong Jisas, ol rula tede oli agensem Man ya we Jehova i putumap, taem oli atakem ol man we oli biaen long hem.—Wok 4:25-28.
Yumi No Joen Long Politik
11 Laekem ol sas samting. Taem yumi laekem mane mo ol sas samting, i isi nomo blong yumi joen long politik. Afta long yia 1970, plante Witnes long Malawi oli mas lego evri samting blong olgeta from we oli no wantem joen long wan pati blong politik. Sore tumas, samfala oli no wantem lego ol samting we oli gat. Wan sista we nem blong Rut, i tokbaot taem ya, i se: “Samfala we oli go long kamp blong refuji wetem mifala, oli luk se laef i had nao oli no moa wantem stap long ples ya. Ale, oli joenem wan pati blong politik, blong oli save gobak blong harem gud long ol samting we oli gat long haos blong olgeta.” Be bighaf blong ol man blong God oli no olsem. Oli no joen long politik, nating se oli lusum mane blong olgeta mo evri samting we oli gat.—Hibru 10:34.
Ol Gudgudfala Samting Long Baebol
it-1 425
Skin Blong Wit
Hem i wan tintin samting we i kavremap o hem i wan sel we i protektem ol sid olsem bale mo wit. Baebol i tokbaot fasin blong klinim wit long taem blong ol man Isrel bifo, mo hem i tokbaot skin blong wit olsem pijatok. Afta long havest, skin o sel ya we i kavremap sid ya i kam olsem nating nomo, mo hemia i pijarem ol samting we oli no hevi, oli blong nating nomo, man i no wantem, samting we man i tekemaot long ol gudwan mo i sakemaot.
Faswan samting we i hapen long taem blong klinim wit, hemia se ol sid oli kamkamaot long ol skin blong olgeta. Biaen, ol skin we oli no hevi, win i bloemaot olgeta i go olsem das. Hemia i wan gudfala pijatok blong tokbaot olsem wanem Jehova bambae i tekemaot ol man blong apostasi long medel blong ol man blong Hem, mo tu i tekem ol rabis man mo ol nesen we oli agens. (Job 21:18; Sam 1:4; 35:5; Aes 17:13; 29:5; 41:15; Ho 13:3) Kingdom blong God bambae i smasem ol enemi blong hem oli kam olsem ol smosmol pis doti, we bambae i isi nomo blong win i blo long olgeta i go olsem skin blong wit.—Da 2:35.
Plante taem oli stap hivimap mo bonem ol skin blong wit we oli blong nating nomo, blong win i no bloem olgeta i kambak mo spolem ol sid blong wit we oli hivimap i stap. Long sem fasin, Jon we i stap baptaesem ol man, i bin tokbaot olsem wanem ol rabis man blong ol giaman skul bambae oli bon long faea. Hem i talem se Jisas Kraes we i Man Blong Klinim Wit bambae i hivimap ol wit, “be ol skin blong wit, bambae hem i bonem long faea we i no save ded samtaem.”—Mt 3:7-12; Lu 3:17.
12-18 FEBRUARI
OL SAS SAMTING LONG BAEBOL | OL SAM 5-7
Gohed Blong Holemstrong Nomata Wanem Samting Ol Narafala Oli Mekem Long Yu
?Olsem Wanem Baebol i Save Givim Paoa?
7 ?I bin gat wan fren o famle we i spolem yu? Sipos yes, stori blong Absalom we i boe blong King Deved bambae i givhan long yu. Hem i agensem papa blong hem mo i traem blong tekemaot kingdom long hem.—2 Saml. 15:5-14, 31; 18:6-14.
8 (1) Prea. Bifo we yu ridim stori ya, talem long Jehova olsem wanem yu harem nogud from we narafala i spolem yu. (Sam 6:6-9) Talemaot stret filing blong yu. Afta, askem Jehova blong i halpem yu blong faenem ol rul we i save lidim yu blong dil wetem jalens ya.
Bilif Strong Se Yu Gat Trutok
3 Bilif blong yumi i no save stanap nomo long lav we ol man blong God oli soemaot. ?From wanem? Traem tingbaot sipos wan long kongregesen i mekem wan bigfala sin. Maet hem i wan elda o wan paenia. Maet wan brata o sista i mekem yu yu harem nogud o i kam wan man blong apostasi, nao i talem se yumi no gat trutok. Sipos bilif blong yumi i dipen nomo long samting we ol narafala oli mekem, i isi blong yumi lego Jehova. Taswe, blong yumi gat strong bilif, yumi mas fren gud wetem Jehova. Bilif i olsem wan haos. Sipos ol samting we yu yusum blong wokem haos ya oli no strong, haos ya i save foldaon. Taswe, bilif blong yumi i no save stanap long ol filing nomo, be yumi mas stadi gud mo mekem risej. Yumi mas pruvum se Baebol i tijim trutok long saed blong Jehova.—Rom 12:2.
4 Jisas i talem se samfala oli “glad tumas” long trutok, be taem oli kasem hadtaem, bilif blong olgeta i kam slak. (Ridim Matiu 13:3-6, 20, 21.) Maet oli no kasem save se man we i biaenem Jisas bambae i kasem hadtaem. (Mat. 16:24) Maet oli ting se ol Kristin bambae oli kasem ol blesing nomo. Be long wol tede, i gat plante trabol. Ol samting long laef blong yumi oli save jenis, nao yumi no moa glad.—Sam 6:6; Pri. 9:11.
Ol Gudgudfala Samting Long Baebol
it-1 995
Gref
Long Rom 3:13 aposol Pol i talemaot bakegen ol tok we i stap long Ol Sam 5:9, we i talem se trot blong ol man nogud, mo ol man blong giaman i olsem “wan gref we i open i stap.” Wan gref i open i stap blong oli save putum dedman mo ol man we oli stap mekem ol kruked fasin i go long hem. Long sem fasin, trot blong olgeta i open i stap, blong oli talem ol tok we i spolem man mo ol tok we i no klin.—Skelem wetem Mt 15:18-20.
19-25 FEBRUARI
OL SAS SAMTING LONG BAEBOL | OL SAM 8-10
!“O Jehova, Bambae Mi Presem Yu”!
Glad Se Yu Pat Blong Famle Blong Jehova
6 Jehova i mekemrere wan spesel hom blong yumi. Bifo we hem i krietem faswan man, hem i mekemrere wol ya blong ol man. (Job 38:4-6; Jer. 10:12) Mo from we Jehova i kaen mo i glad blong givim samting, hem i wokem plante gudfala samting blong mekem yumi hapi. (Sam 104:14, 15, 24) Samtaem, hem i tingbaot bakegen ol samting we hem i krietem, mo “hem i luk se i gud.” (Jen. 1:10, 12, 31) Hem i ona long ol man, taem hem i putum olgeta blong oli “bos” long olgeta naesfala samting we hem i wokem long wol. (Sam 8:6) Plan blong God se ol man we oli stret gud bambae oli lukaot long ol naesfala samting ya blong olwe. ?Yu yu talem tangkiu long Jehova oltaem from nambawan promes ya?
?Yu Soemaot Se Yu Glad Long Ol Presen We God i Givim?
10 Taem yumi mitim wan man we i bilif long evolusen mo yumi eksplenem from wanem yumi bilif long God, yumi soemaot se yumi glad long fasin ya blong toktok we God i givim olsem wan presen. (Sam 9:1; 1 Pita 3:15) Olgeta we oli bilif long evolusen oli talem se wol ya mo ol laef samting oli kamaot olsem nomo, i no gat wan Man we i wokem olgeta. Yumi save tekem saed blong Papa blong yumi long heven, mo yusum Baebol wetem ol save we yumi tokbaot long stadi ya, blong eksplenem from wanem yumi bilif se Jehova i wokem heven mo wol.—Sam 102:25; Aes. 40:25, 26.
?Yu Yu Soem “Gudfala Eksampol Long Ol Toktok Blong Yu”?
13 Singsing wetem fulhat. Impoten risen from wanem yumi singsing long ol miting, hemia blong presem Jehova. Wan sista nem blong hem Sara i ting se hem i no save singsing gud. Be yet, hem i wantem presem Jehova taem hem i singsing. Taswe hem i rerem ol singsing tu, taem hem i rerem ol miting blong hem. Hem i praktis long ol singsing mo hem i traem blong luk olsem wanem ol singsing ya oli joen wetem ol haf blong miting. Hem i talem se: “Hemia i halpem mi blong tingbaot moa ol toktok blong singsing ya i bitim we mi wari se mi singsing gud o nogat.”
Ol Gudgudfala Samting Long Baebol
it-1 832
Fingga
God i yusum tok ya olsem wan pijatok, blong talem se hem i mekem wan wok wetem “(ol) fingga” blong hem, olsem taem i raetem ol Ten Komanmen long tu flat ston (Eks 31:18; Du 9:10), i mekem ol merikel (Eks 8:18, 19), mo i krietem heven (Sam 8:3). Taem yumi ridim se God i yusum “ol fingga” blong hem blong krietem ol samting, hemia i stap tokbaot tabu spirit, o bigfala paoa blong God, olsem we yumi ridim long Jenesis taem i tokbaot ol samting we God i krietem. Long buk ya, yumi ridim se paoa blong God we i stap wok (ruʹach, “spirit”), i stap muv olbaot antap long ol wota. (Je 1:2) Be long Kristin Grik Haf Blong Baebol, yumi kasemsave klia minim blong tok ya. Buk blong Matiu i eksplenem se Jisas i yusum ‘tabu spirit blong God’ blong ronemaot ol dimon mo buk blong Luk i talem se Jisas i yusum “fingga blong God.”—Mt 12:28; Lu 11:20.
26 FEBRUARI–3 MAJ
OL SAS SAMTING LONG BAEBOL | OL SAM 11-15
Pijarem Yu Wan Long Niufala Wol Blong God We i Gat Pis
Ol Bigfala Poen Long Buk Wan Blong Ol Sam
11:3—?Wanem fandesen we bambae i foldaon? Hemia fandesen blong fasin blong laef blong ol man tede, olsem loa, oda, mo stret fasin blong jajem man. Taem ol samting ya oli olbaot, ol man tu oli olbaot mo i no gat stret fasin blong jajem man. Long taem olsem, “gudfala man” i mas trastem God fulwan.—Ol Sam 11:4-7.
?Raf Fasin Bambae I Finis Samtaem?
Baebol i promes se klosap nao God bambae i tekemaot raf fasin long wol ya. Bambae God i jajem wol ya blong tede we i raf tumas, long “bigfala Dei ya we God bambae i jajem ol man we oli no obei long hem, nao bambae oli lus.” (2 Pita 3:5-7) Bambae i no moa gat man we i gat raf fasin. ?Olsem wanem yumi save sua se God wantem givhan long yumi mo tekemaot raf fasin?
Baebol i talem se God “i no laekem nating olgeta we oli laekem tumas blong mekem faet.” (Ol Sam 11:5) God ya we i wokem olgeta samting, hem i laekem pis mo stret fasin. (Ol Sam 33:5; 37:28) Taswe bambae hem i no letem ol man we oli gat raf fasin oli stap olwe.
?Yu Yu Gat Longfala Tingting Blong Wet?
15 ?From wanem Deved i gat longfala tingting blong wet? Hem i givim ansa long semfala Sam ya we i askem fo taem se: “?Gogo kasem wetaem?” Hem i se: “Mi mi trastem yu from fasin ya blong yu we oltaem yu yu lavem man tumas. Mi bambae mi glad, from we yu bambae yu sevem mi. Hae God, mi bambae mi sing long yu, from we yu bin mekem i gud tumas long mi.” (Ol Sam 13:5, 6) Deved i save se Jehova i lavem hem mo bambae i no lego hem. Hem i tingbaot ol taem ya we Jehova i bin givhan long hem, mo hem i wet blong Jehova i finisim ol trabol blong hem. Deved i save se hem i no wet blong nating nomo, from we Jehova bambae i blesem hem.
Kingdom i Mekem Samting We God i Wantem Long Wol
16 Oli stap sef. Gudfala pijatok ya long Aesea 11:6-9 bambae i kamtru long fulwol. Nomata se ol man, mo woman, mo pikinini, oli wokbaot i go wea, be bambae oli stap sef. Bambae i no gat wan man no wan animol we i save spolem olgeta. Fulwol bambae i ples blong yu. Bambae yu save swim long olgeta reva, mo lek, mo solwota. Yu save krosem ol bigbigfala hil mo wokbaot long open ples we gras i grin gud, be bambae yu stap sef. Taem tudak i kam, bambae yu no fraet. Ol tok blong Esikel 34:25 bambae oli kamtru, se ol man blong God oli save ‘stap gud nomo long ol open ples, mo oli save slip gud olbaot long bus.’
Ol Gudgudfala Samting Long Baebol
?God i Jenisim Yu Finis?
12 Sore tumas, plante man raonabaot long yumi oli gat ol rabis tingting ya we Pol i tokbaot. Oli ting se i no stret blong man i folem ol rul mo se man i no mas fosem narafala blong hem i folem ol rul. Plante tija mo papa mama oli letem ol pikinini oli mekem samting we olgeta nomo oli wantem. Oli tijim olgeta tu se evri man i save jusum se wanem i stret mo wanem i no stret. Ol man olsem, oli bilif se i no gat rod blong save se wan samting i stret no i no stret. Mo plante we oli talem se oli bilif long God, oli no ting se oli mas mekem samting we God i talem se i stret. (Sam 14:1) Ol Kristin oli mas lukaotgud blong ol tingting olsem i no spolem olgeta. Sipos yumi no lukaotgud, maet bambae yumi no moa folem ol advaes we oli kamaot long ogenaesesen blong God, mo yumi stat blong komplen from ol samting we yumi no laekem. No maet yumi no agri fulwan long advaes we Baebol i givim long saed blong ol samting we yumi wajem taem yumi spel, long fasin blong yusum Intenet, mo long hae edukesen.