1921 Wan Handred Yia Bifo

Wajtaoa blong 1 Jenuware 1921, i askem wan kwestin long ol Baebol Studen se: “?Wanem wok yumi luk fowod blong mekem long yia ya?” Biaen, oli putum vas blong Aesea 61:1, 2, we i rimaenem olgeta long wok blong prij we oli stap mekem blong talemaot gud nius. Vas ya i se: “Jehova i makemaot mi blong mi talemaot gud nius long ol man we oli gat tingting daon . . . Mo blong talemaot yia we Jehova bambae i soemaot gladhat blong hem, mo dei blong God blong yumi blong givimbak.”

OL MAN BLONG TALEMAOT GUD NIUS WE OLI GAT STRONG TINGTING

Ol Baebol Studen oli nidim blong gat strong tingting blong mekem wok blong prij. Oli mas talemaot “gud nius” long ol man we oli gat tingting daon, be tu oli mas talemaot “dei blong God blong yumi blong givimbak” long ol man nogud.

Brata J. H. Hoskin, we i laef long Kanada, i prij wetem strong tingting nating se i gat fasin agens. Long 1921, hem i mitim wan minista blong Metodis. Brata Hoskin i stat blong toktok se: “I gud yumitu storian long saed blong Baebol, mo nating sipos yumitu no agri long sam samting, be yumitu save finisim storian ya long kwaet fasin mo yumitu gohed blong stap fren.” Be i no hapen olsem. Brata Hoskin i talem se: “Mitufala i toktok blong sam minit nomo nao minista ya i faetem doa strong, we klosap mi ting se glas long doa ya bambae i brok.”

Minista ya i singaot strong long hem mo i se: “I moa gud yu go long ol man we oli no Kristin mo yu storian wetem olgeta?” Brata Hoskin i no ansa bak, be taem hem i aot, hem i stap tingting se: ‘!Be wan long olgeta ya nao mi jes storian wetem hem!’

Long nekis dei taem minista ya i stap prij insaed long jos blong hem, hem i talem plante giaman samting long saed blong brata Hoskin. Brata Hoskin i talem se: “Hem i wonem ol man blong hem se mi kam long taon ya blong giaman long ol man, mo se oli mas kilim mi mi ded.” Be hemia i no stopem brata Hoskin mo hem i gohed blong prij long plante moa man. Hem i se: “Mi laekem tumas blong prij long ples ya. Iven i gat sam man oli talem se, ‘!Mi save se yu yu wan man blong God!’ mo oli askem sipos oli save halpem mi sipos mi nidim eni samting.”

PRAPA STADI MO FAMLE STADI

Blong halpem olgeta we oli intres blong gohed gud, ol Baebol Studen oli wokem ol program blong Baebol stadi long The Golden Age.a Program Blong Baebol Stadi Blong Ol Yangfala, i gat ol kwestin we ol perens oli save tokbaot wetem ol pikinini blong olgeta. Ol perens oli “askem ol kwestin ya long ol pikinini blong olgeta mo oli halpem olgeta blong faenem ansa long Baebol.” I gat sam kwestin olsem, “?I gat hamas buk long Baebol?,” hemia sam smol save long saed blong Baebol. O “?evri tru kristin bambae oli kasem fasin agens?,” hemia i halpem ol yangfala blong oli gat strong tingting blong prij.

I gat ol Baebol kwestin mo ansa tu blong olgeta we oli gat plante save finis long saed blong Baebol, mo oli save faenem ol ansa long volum wan blong buk ya Studies in the Scriptures. Plante man oli kasem gudfala samting from ol program ya, be long 21 Disemba 1921, The Golden Age i talemaot se bambae oli no moa wokem tufala program ya. ?From wanem?

!WAN NIUFALA BUK!

Buk ya *The Harp of God*

Kad we i talem ol pej blong ridim

Ol kad blong ol kwestin

Ol brata oli luksave se ol niufala Baebol studen oli nidim blong lanem ol stamba trutok long wan fasin we i oganaes gud. Taswe long Novemba 1921, oli rilisim buk ya The Harp of God. Olgeta we oli intres mo oli akseptem wan buk, oli joen tu long wan Baebol Stadi Kos we oli save mekem olgeta wan. Kos ya i halpem ol man blong oli save “plan ya blong God blong givim laef ya we i no save finis long ol man.” ?Oli mekem kos ya olsem wanem?

Taem wan man i akseptem wan kopi blong buk ya, hem i kasem wan smol kad tu we i talem ol pej we hem i mas ridim. Long nekis wik blong hem, hem i kasem wan narafala kad we i gat ol kwestin long saed blong ol samting we hem i bin ridim. Long en blong kad ya, oli talem long hem ol nekis wan pej we bambae hem i ridim long ol wik we bambae i kam.

Evri wik blong 12 wik, ol studen oli kasem wan niufala kad long kongregesen we i stap klosap long olgeta. Plante taem oli yusum ol olfala long kongregesen o olgeta we oli no save go long ol haos wanwan, blong dropem ol kad ya. Eksampol, Anna K. Gardner, we hem i blong Millvale, Pennsylvania, U.S.A., i talem se: “Taem oli rilisim buk ya The Harp of God, sista blong mi Thayle we i no save wokbaot gud, i save mekem plante moa wok evri wik blong sanemaot ol kad blong ol kwestin.” Taem wan man i finisim kos, i gat wan long kongregesen we bambae i visitim hem blong halpem hem blong lanem moa long saed blong Baebol.

WOK BLONG MEKEM

Long en blong yia ya, Brata J. F. Rutherford i sanem wan leta i go long olgeta kongregesen. Long leta ya hem i raetem se: “Wok blong talemaot Kingdom long yia ya i bigwan moa, mo i halpem plante moa man i bitim ol yia we i pas.” Mo hem i gohed se: “I gat plante wok yet blong mekem. I gud yumi enkarejem ol narafala blong joen long nambawan wok ya.” I klia se ol Baebol Studen oli folem advaes ya we hem i talem. Long 1922, oli gat strong tingting blong talemaot gud nius blong Kingdom moa bitim ol taem we i pas.

Ol Fren We Oli Gat Strong Tingting

Ol Baebol Studen oli soem lav taem oli givgivhan long olgeta. Oli ol fren we oli gat strong tingting mo oli “kamtru long yu long taem blong trabol,” olsem stori ya daon i soem.—Prov. 17:17.

Long Tusde 31 Maj 1921, oli putum wan blakman long we i kamaot long taon blong Tulsa (Oklahoma, U.S.A.) long kalabus, from oli talem se hem i stap atakem wan waet woman. Afta long taem ya, wan grup blong bitim 1,000 waetman oli faet wetem wan smol grup blong ol blakman. Wantaem nomo faet ya i kam bigwan long Greenwood, we hemia wan eria we i gat plante blakman oli laef long hem. Ol man oli stil mo oli bonem bitim 1,400 haos mo bisnes. Ol ripot oli talem se i gat 36 man we oli ded, be i luk olsem se i gat plante moa. Mo bigfala faet ya oli singaot se Tulsa Race Massacre.

Brata Richard J. Hill, we i wan black Baebol Studen mo i laef long Greenwood, i tokbaot samting we i hapen se: “Long naet ya mifala i gat nomol kongregesen miting blong mifala. Afta we miting i finis, mifala i harem we oli stap sut long masket long taon. Mifala i go slip we mifala i stap lesin long noes blong samting ya. Long nekis dei blong hem, Wenesde 1 Jun, situesen i kam moa nogud. “Sam man oli kam mo oli talem se sipos mifala i wantem stap sef, mifala i mas go long Convention Hall.” So Brata Hill mo waef blong hem wetem ol faef pikinini blong tufala, oli ronwe i go long Tulsa Convention Hall. Long ples ya, i gat ol ami we gavman i sanem olgeta blong stopem faet, oli stap blong protektem samwe long 3,000 blak man mo woman.

Long ol sem taem ya, Brata Arthur Claus, we i wan waetman, i mekem wan strong desisen. Hem i talem se: “Taem mi harem se oli man oli stap stil mo oli stap bonem ol haos long Greenwood, mi tekem desisen blong go jekem gudfala fren blong mi, Brata Hill.”

Arthur Claus i yusum buk ya The Harp of God, blong tijim wan stadi klas blong 14 pikinini

Taem hem i kasem haos blong Brata Hill, hem i luk wan waetman i stap holem masket. Man ya i neba mo i fren blong Brata Hill, mo hem i ting se Arthur i wan long ol man blong agens. Nao i singaot long hem i se: “?Yu kam long ples ya blong mekem wanem?”

Arthur i talem se: “Sipos mi givim wan rong ansa, bambae hem i sutum mi. Taswe mi talem long hem se mi mi wan fren blong Brata Hill, mo se mi stap kam long haos blong hem plante taem finis.” Ale, Arthur mo neba ya i protektem gud haos blong Brata Hill blong ol man oli no kam stil.

Biaen, Arthur i faenemaot se Brata Hill mo famle blong hem oli stap long Convention Hall. Oli talem long Arthur se ol blakman oli no save aot sipos Jenerol Barrett, we i bos, i no saenem wan pepa blong givim raet long olgeta. Arthur i talem se: “I had blong go toktok long jenerol. Taem mi talemaot ol plan blong mi long hem, hem i askem se: ‘?Bambae yu protektem famle ya mo yu lukaotgud long ol nid blong olgeta?’ Mi ansa wetem bigfala glad se yes.”

Arthur i tekem pepa we jenerol i sanem mo i resis i go long Convention Hall. Taem hem i soem long ofisa we i stap, ofisa ya i sapraes mo i talem se: “!Jenerol hem wan i saenem pepa ya! ?Yu save se tede yu yu faswan man we i kam blong tekemaot wan man long ples ya?” Smoltaem biaen, Brata Hill mo famle blong hem oli kamaot. Olgeta evriwan oli jam long trak blong Arthur mo oli go long haos.

Brata Arthur i meksua se Brata Hill mo famle blong hem oli stap sef. Eksampol blong hem blong gat strong tingting mo soemaot lav, i mekem ol narafala oli sapraes. Arthur i talem se: “Neba we i givhan blong protektem haos blong Brata Hill, i stat blong respektem ol Witnes moa i bitim bifo. Mo i gat plante moa man we oli stat blong intres long trutok from we oli luk se ol man blong God oli no seraot from kala blong skin, mo se i no gat wan man we i gud moa long narafala.”

a Oli jenisim nem ya The Golden Age i kam Consolation long yia 1937 mo Wekap! long 1946.