Halpem Olgeta We Tingting i Trabol

Hemia i Minim Wanem

Samtaem maet yumi harem se yumi no naf blong givhan long wan fren blong yumi we tingting blong hem i trabol. Be yumi save soemaot se yumi kea long hem taem yumi traehad blong halpem hem. ?Olsem wanem blong mekem?

Hemia i Givhan Olsem Wanem

“Rere oltaem blong lesin.”—JEMES 1:19.

Beswan rod blong givhan long fren blong yu hemia blong lesin taem hem i nidim blong toktok. Tingbaot se yu no nid blong givim ansa long evri samting we hem i talem. Letem hem i save se yu rere blong lesin mo se yu kea long hem. Traehad blong kasem save filing blong hem, be yu no jajem hem. Mo tingbaot tu se hem i save talem sam samting we i no minim mo biaen i rigret from.—Job 6:2, 3.

“Toktok blong leftemap tingting.”—1 TESALONAEKA 5:14.

Tingbaot se maet fren blong yu i sem o i gat filing ya se hem i gud blong nating nomo. Taem yu givhan long hem blong kasemsave se yu kea long hem, hemia bambae i kamfotem mo enkarejem hem, nating sipos yu no save wanem blong talem.

“Wan tru fren i soemaot lav oltaem.”—OL PROVEB 17:17.

Soem se yu rere blong givhan. Yu no mas ting se yu save finis wanem we hem i nidim, be i gud yu askem stret long hem. Sipos i had blong hem i talemaot ol samting we hem i nidim, maet yu save mekem sam plan blong yutufala i joen tugeta, olsem go wokbaot. Mo yu save askem blong go soping blong hem, klinap o mekem sam nara samting.—Galesia 6:2.

“Gat longfala tingting.”—1 TESALONAEKA 5:14.

Maet i no oltaem we fren blong yu i wantem toktok. Letem hem i save se yu rere enitaem blong lesin, sipos hem i wantem toktok. Tingbaot se sik blong hem i save mekem hem i talem o mekem sam samting we yu harem nogud from. Maet hem i kanselem ol plan we hem i gat wetem yu o i kam kros. I gud yu gat longfala tingting mo kasemsave filing blong hem taem yu stap givhan long hem.—Ol Proveb 18:24.

Sapot We Yu Givim i Save Halpem Fren Blong Yu

“Mi meksua se hem i kasemsave se mi rere enitaem blong givhan long hem. Nating se mi no save rod blong stretem ol problem blong hem, be mi traehad oltaem blong lesin taem hem i toktok. Samtaem, hem i jes nidim blong wan i lesin long hem, blong hem i save haremgud bakegen.”—Farrah,a we fren blong hem i gat problem long saed blong kakae mo i sik long tingting (clinical depression).

“Wan long ol fren blong mi i rili kaen mo oltaem i gat positif tingting. Hem i invaetem mi blong go kakae long haos blong hem. Hem i toktok kaen mo i mekem se isi blong mi talemaot ol filing blong mi. !Hemia i rili leftemap tingting blong mi!”—Ha-eun, we i gat sik ya clinical depression.

“I rili impoten blong gat longfala tingting. Taem waef blong mi i mekem mi harem nogud, mi stap tingbaot se sik blong hem nao i mekem se hem i olsem, hemia i no fasin blong hem. Hemia i halpem mi blong no kam kros mo kasemsave filing blong hem.”—Jekob, we waef blong hem i gat sik ya clinical depression.

“Waef blong mi i rili sapotem mo enkarejem mi. Taem mi wari bitim mak, hem i no fosem mi blong mekem samting we mi no wantem mekem. Samtaem hem i lego samting we hem i laekem blong mekem, blong givhan long mi. Hem i rili spesel from hem i kaen mo i no tingbaot hem wan nomo.”—Enrico, we i gat sik ya blong wari bitim mak.