Leta Blong Hed Kampani
Yufala ol gudfala Witnes blong Jeova:
Bifo, aposol Pol i yusum olgeta janis we hem i gat blong talem long ol narafala brata we hem i laekem olgeta mo hem i tangkiu long olgeta. Hem i talem long ol kristin brata blong Rom se: “Mi talem tangkiu long God from yufala evriwan, from we olgeta man long wol oli stap harem nius blong bilif blong yufala.” (Rom. 1:8) Yes, long olgeta ples blong bigfala kingdom blong ol man Rom, ol man oli save se ol kristin ya oli gat strong bilif mo oli gohed strong blong prij. (1 Tes. 1:8) !Yumi no sapraes we Pol i laekem tumas olgeta!
Olsem Pol, mifala tu i tangkiu long Jeova evri taem we mifala i tingbaot yufala. !Mifala i laekem tumas yufala evriwan! Mo i klia we Jeova tu i laekem tumas yufala wanwan. Sam long yufala, yufala i stap fesem hadtaem, be yufala i gohed blong prij. !Fasin ya blong yufala, we yufala i gat strong tingting mo yufala i no fraet blong prij, hem i mekem Jeova i haremgud tumas long hat blong hem!—Prov. 27:11.
Yearbook i wan buk we i save bildim bilif blong yufala mo mekem yufala i glad tumas. Ating yufala i gat janis blong ridim buk ya, nao yufala i tingtingdip long “Ol Wok Blong Ol Witnes Blong Jeova Long Taem Blong Yumi” we oli stap insaed long hem. Ale, bambae yufala i luksave klia nomo we Masta blong yumi Jisas Kraes “i win finis long faet,” mo hem i stap gohed “blong faet bakegen, blong bambae i win bakegen.” Mo tu bambae i klia long yufala we olgeta tul blong faet we ol man oli mekem blong faetem yumi, be oli no save win nating.—Rev. 6:2; Aes. 54:17.
Aposol Pol i talem long ol kristin long Filipae se: “Mi stap talem tangkiu long God from yufala . . . from we mi stap tingbaot fasin blong yufala, we yufala i stap givhan long mi long ol wok blong gud nius blong Kraes.” (Fil. 1:3-5) Mifala ol memba blong Hed Kampani, mifala i harem sem mak nomo taem mifala i tingbaot yufala. Long sevis yia ya 2007, ol 6,691,790 pablisa oli pas 1,431,761,554 aoa blong talemaot gud nius long 236 kantri long fulwol. !Hadwok blong yufala blong mekem gud nius i go moa, hem i nambawan! !Traem tingbaot hamas handred taosen man we yumi evriwan tugeta, yumi naf blong halpem olgeta! !Wok ya i leftemap bigwan nem blong Jeova!
Wan narafala taem, Pol i soemaot we hem i tingbaot tumas ol brata. Hem i talem long olgeta long Tesalonaeka se: “Oltaem long fes blong God, we i Papa blong yumi, . . . mifala i stap tingbaot we yufala i stap stanap strong yet from we tingting blong yufala i stap strong long Jisas Kraes, Masta blong yumi.” (1 Tes. 1:2, 3) Yes, yumi gat traem long laef blong yumi. Yumi gat problem, be yumi mas stanap strong. ?Wanem traem we yu wan yu stap fesem naoia? ?Ating yu gat wan strong sik we i mekem tingting blong yu i konkon from we yu no save mekem plante long wok blong Jeova? ?Ating gudfala hasban no waef blong yu i foldaon finis long ded, mo i go long Seol, ples ya we i neva save talem “I naf ya”? (Prov. 30:15, 16) ?Ating yu stap lukaot wan man no wan woman blong Masta blong yumi, wan brata no wan sista we i laekem Jeova olsem yu, blong yu save mared wetem, be i luk olsem we i no gat? (1 Kor. 7:39) ?Ating yu traem blong tijimgud ol pikinini blong yu, nating we yu stap hadwok tumas from mane we yu sot tumas long hem? Nomata wanem fasin blong laef blong yufala wanwan, be sipos yufala i putum Kingdom long fasples long tingting blong yufala, yufala i save bilif strong we Jeova “i no save fogetem ol wok ya we yufala i mekem. Hem bambae i stap tingbaot we yufala i lavem hem.” !Plis ol brata mo sista, yufala i “no kam slak blong mekem ol gudfala fasin”!—Heb. 6:10; Gal. 6:9.
?Wanem bambae i mekem we yufala i save stanap strong? Sem mak long ol man Tesalonaeka, hemia “from we tingting blong yufala i stap strong long Jisas Kraes, Masta blong yumi.” Pol i talem se fasin ya blong yumi we yumi “putum tingting blong yumi long God blong hem i sevem yumi,” hem i olsem wan “hat blong faet” we i blokem ol nogud tingting we oli save slakem bilif blong yumi. Tok ya i tru nomo.—1 Tes. 5:8.
Yufala we yufala i stanap strong mo yufala i stap glad long ol traem, i klia we yufala i stap ansagud long Setan we i tok agensem raet blong Jeova blong rul long evri samting. Setan i stap talem se ol man blong Jeova oli tingbaot olgeta nomo, oli no tingbaot Jeova. Hem i talem se maet i tru we oli save mekem wok blong Jeova blong smoltaem, be sipos ol traem oli kam strong moa, no sipos wol ya i no finis kwik, ale bambae oli slodaon nomo. !Yufala i gat wan nambawan janis blong soemaot we Setan i rabis mo i giaman nomo! Long evri dei long laef blong yu we i stap pas, yu stap kam klosap moa long taem blong kasem ol blesing we yu stap wet tumas long olgeta.
Bifo, Pol i glad blong holem olgeta janis we hem i gat blong leftemap tingting blong ol brata we oli gat strong bilif, mo oli wok had blong talemaot gud nius long gladhat blong olgeta, mo oli stanap strong tu. Long sem fasin, mifala i glad blong holem janis ya we mifala i gat blong leftemap tingting blong yufala, mo blong talem long yufala we mifala i laekem tumas yufala. !I gud yufala i gohed long gudfala wok ya!
Mifala i wantem we long yia ya we i stat, God bambae i blesem yufala bigwan long saed blong spirit.
Ol brata blong yufala,
Hed Kampani Blong Ol Witnes Blong Jeova