?Mi Save Mekem Wanem Sipos Mi No Moa Wantem Stap Laef?

“Sam yia i pas, mi wari bitim mak, i olsem se oltaem mi stap traehad blong kilim wan faea. Mi stap tingbaot blong kilim mi wan i ded. Mi no rili wantem ded, be mi wantem stopem ol tingting ya we oli mekem mi mi safa.”—Jonathan we i gat 17 yia.

Long wan sevei blong 14,000 studen long haeskul, 1 long evri 5 studen i talem se long 12 manisa we i pas, hem i tingbaot blong kilim hem wan i ded. Sipos yu yu harem olsem, ?yu save mekem wanem?

• Wet. Mekem desisen se bambae yu no tekem aksen kwiktaem. Nating we yu harem se ol problem blong yu oli hevi tumas, i gat sam samting we yu save mekem blong traem winim olgeta.

Maet yu harem se yu stap insaed long ol korido we oli fasfas, mo yu no save rod blong kamaot. Be plante taem ol filing oli no laenap wetem samting we i tru. Sipos yu kasem help we i stret long situesen blong yu, maet yu save winim trabol ya kwiktaem.

• Rul blong Baebol: “Mifala i stap long medel blong ol trabol, be oli no fasem mifala we mifala i no save muvmuv. Tingting blong mifala i paspas, be mifala i save faenem rod yet blong kamaot.”—2 Korin 4:8.

  Wan tingting: Sipos filing blong wantem kilim yu wan i ded i kam strong tumas, faenemaot wanem help we yu save kasem. Maet i gat wan emejensi namba we yu save ring long hem o wan dipatmen long hospital. Long ol ples olsem, i gat ol man we oli tren blong givhan long olgeta we oli gat tingting olsem yu, mo oli rili wantem halpem yu.

• Storian wetem narafala. I gat plante man we oli kea mo oli wantem givhan long yu. Maet hemia sam fren o famle blong yu. Sipos yu no talem long olgeta se yu stap safa bigwan, bambae oli no save.

Samfala oli mas werem glas blong oli save luk klia. Wan fren i save mekem wok olsem glas ya, mo givhan long yu blong luk klia ol problem blong yu, mo halpem yu blong yu wantem stap laef.

• Rul blong Baebol: “Wan tru fren . . . i kamtru long yu long taem blong trabol.”—Ol Proveb 17:17.

  Wan tingting: Blong statem wan storian, yu save talem samting olsem: “Mi stap gat ol nogud tingting. ?I oraet sipos mi storian wetem yu long saed ya?” O yu save talem se: “Mi gat sam problem we mi wan mi no naf blong winim olgeta. ?Yu yu glad blong halpem mi?”

• Go luk wan dokta. Ol problem blong helt olsem wari o tingting i foldaon, oli save mekem se man i no moa wantem stap laef. Be i gud se i gat tritmen blong ol sik olsem.

Sipos yu kasem flu, yu no moa wantem kakae. Long sem fasin, sipos tingting i foldaon, maet yu no moa wantem stap laef. Be i gat tritmen blong tugeta sik ya.

• Rul blong Baebol: “Ol man we oli no sik, oli no nidim dokta, be olgeta we oli sik, yes, oli nidim.”—Matiu 9:12.

  Wan tingting: I gud yu kasem naf slip mo eksasaes, mo kakae gud. Helt blong yu i gat paoa long tingting blong yu.

• Prea. Baebol i talem se Krieta blong yumi “i hae moa long hat blong yumi, mo hem i save evri samting.” (1 Jon 3:20) I gud yu prea long hem tede. Yusum nem blong hem Jehova, mo talemaot evri samting we i stap long hat blong yu.

Sam problem oli hevi tumas blong yu wan yu karem. Jehova we i Krieta blong yu, i wantem halpem yu.

• Rul blong Baebol: “Yufala i mas askem olgeta samting we yufala i wantem long God . . . [nao] pis ya blong God we i bigwan tumas i bitim olgeta save blong yumi, bambae i lukaot gud long hat mo tingting blong yufala.”—Filipae 4:6, 7.

  Wan tingting: Antap long ol problem blong yu, talem tangkiu long Jehova from wan gudfala samting we i hapen tede. (Kolosi 3:15) Fasin blong talem tangkiu i save halpem yu blong tingting moa long ol gudfala samting long laef.

Sipos yu ting se i moa gud yu ded, yu mas kasem help kwiktaem. Jonathan we yumi tokbaot finis i mekem olsem. Hem i se: “Mi storian plante wetem papa mo mama blong mi, mo mi lukaot help blong wan dokta. Naoia mi stap kamgud. Sam samtaem mi harem nogud yet, be mi no moa wantem kilim mi wan i ded.”