OL YANGFALA OLI ASKEM
Harem Nogud From Wan Famle o Fren i Ded ?Mi Save Mekem Wanem?
I no longtaem, ?wan famle o fren blong yu i ded? Sipos yes, atikol ya i save givhan long yu blong gotru long hadtaem ya.
Long atikol ya
?Mi mi stap harem nogud tumas from hemia we i ded?
Plante man oli harem nogud tumas, mo filing ya i gohed longtaem.
“Evri dei mi tingbaot abu man. Tu yia finis we hem i ded, be taem mi tokbaot hem, mi krae yet.”—Olivia.
“Oltaem abu woman i pulum mi blong traehad blong kasem ol mak, be hem i ded bifo we mi kasem wan long ol mak ya. Mi harem nogud evri taem mi kasem wan mak long laef blong mi be hem i no stap blong luk.”—Alison.
Taem yu harem nogud olsem, yu kasem ol defdefren kaen filing. Hemia sam long olgeta:
“Taem angkel blong mi i ded, mi mi sek nogud, mo filing ya i stap longtaem. Hemia fastaem wan famle i ded, mo mi harem olsem se wan kameong i kilim mi.”—Nadine.
“Mi mi kros long abu man blong mi taem i ded, from we hem i no lukaot gud long helt blong hem, nating se mifala i talem long hem oltaem.”—Carlos.
“Long olgeta memba blong famle blong mifala, mi mo sista blong mi nomo i no stap taem abu man i ded. Afta, mi harem se mi gilti from se mi no talem tata long hem.”—Adriana.
“Wan kapol we mifala i fren gud wetem, tufala i ded long wan aksiden blong trak. Afta long hemia, evri taem wan long famle i aot long haos, mi mi fraet se hem tu bambae i ded.”—Jared.
“Tri yia i pas, abu woman blong mi i ded, mo mi rigret se mi no spenem moa taem wetem hem, taem hem i laef yet.”—Julianna.
Taem wan famle o fren i ded, i nomol nomo we yumi sek, mo yumi gat ol filing blong kros, gilti, fraet, mo rigret. Yu mas tingbaot se sloslo ol filing ya bambae oli godaon. Be go kasem taem ya, ?yu save mekem wanem?
?Mi save mekem wanem taem mi harem nogud olsem?
Talemaot ol filing blong yu long wan fren. Baebol i talem se wan trufala fren i “kamtru long yu long taem blong trabol.” (Ol Proveb 17:17) Sipos yu talemaot ol filing blong yu, yu save kasem help we yu nidim.
“Taem wan famle o fren i ded, i nomol blong harem nogud. Yu save traem winim filing ya yu wan, be samtaem i olsem se bae yu neva kam gud. Taswe i gud blong talemaot ol filing blong yu long narafala.”—Yvette.
Tingbaot hemia we i ded. Baebol i talem se: “Wan gudfala man i gat ol gudfala samting i stap long hat blong hem.” (Luk 6:45, Easy-to-Read Version, 1992) Yu save raetemdaon ol gudfala memori we yu gat blong hemia we i ded, o mekem wan foto albam.
“Mi raetemdaon ol samting we mi lanem long fren blong mi bifo we hem i ded. Long fasin ya, eksampol blong hem i gohed blong halpem mi. Taem mi raetemdaon ol samting ya, hemia i givhan long mi blong harem gud bakegen.”—Jeffrey.
Lukaot gud long helt blong yu. Baebol i soemaot se eksasaes i gud long bodi. (1 Timoti 4:8) Meksua se yu stap kakae gud, eksasaes, mo slip gud.
“Taem yu harem nogud from wan famle o fren i ded, yu no save tingting klia. Taswe yu mas lukaot gud long helt blong yu. Yu no mas mestem kakae mo slip blong yu.”—Maria.
Givhan long ol narafala. Baebol i talem se: “Man i harem gud moa taem hem i givim samting, i bitim we hem i kasem samting.”—Ol Wok 20:35.
“Traem givhan long ol narafala, speseli olgeta we oli bin lusum wan famle o fren blong olgeta. Hemia i save mekem yu yu tingbaot se plante narafala tu oli stap safa.”—Carlos.
Prea blong talemaot filing blong yu. Baebol i talem se Jehova God hem i “Man blong harem ol prea.” (Ol Sam 65:2) Mo tu, Baebol i talem se Jehova i “hilim olgeta we hat blong olgeta i brok, hem i fasem ol soa blong olgeta.”—Ol Sam 147:3.
“Askem long Jehova blong i givhan mo leftemap tingting blong yu. Long sam dei, bambae yu harem nogud moa, be Jehova i stap oltaem blong halpem yu.”—Jeanette.
Yu no mas sapraes sipos i tekem taem. Tingbaot se filing blong yumi evriwan i defdefren taem wan famle o fren i ded. Baebol i talem se taem Jekob i ting se boe blong hem i ded, hem i no wantem lesin long olgeta we oli “traem blong mekem hem i harem gud bakegen.” (Jenesis 37:35) Taswe yu no mas sapraes sipos filing blong harem nogud i stap longtaem.
“Nating se sista blong abu woman i ded 15 yia finis, sam samtaem mi luk wan samting we i mekem mi mi tingbaot hem bakegen.”—Taylor.
Tingbaot sipos yu brekem wan bun long bodi blong yu. Bambae i soa, mo maet i tekem longtaem blong kam gud. Long taem ya, dokta bambae i givim sam advaes olsem wanem blong halpem bodi blong yu blong kam gud.
I sem mak taem yu “harem nogud” from wan famle o fren i ded. I tekem taem blong filing ya blong harem nogud tumas i godaon. Taswe yu mas gat longfala tingting. Tingbaot ol advaes long atikol ya, mo folem olgeta we yu ting se bambae oli givhan long yu.