OL YANGFALA OLI ASKEM

?Olsem Wanem Baebol i Save Givhan Long Mi?—Haf 3: Kasem Gudfala Samting Long Baebol Riding Blong Yu

Taem yu luk long Baebol, bambae yu makem se i gat plante toktok. !Be yu no mas letem samting ya i mekem tingting blong yu i foldaon, nao yu no moa ridim Baebol! Defren olgeta, i gud yu tingbaot Baebol olsem wan tebol we i fulap long plante defren kakae we oli naes. I tru se yu no save kakae evri samting we yu luk, be yu save jusum blong kakae sam long ol kakae ya nomo we yu laekem.

Blong kasem ol gudfala samting long Baebol riding blong yu, yu mas putum tingting blong yu i stap fulwan long samting we yu ridim. Atikol ya bambae i halpem yu blong mekem samting ya.

Long atikol ya

?From wanem yu mas putum tingting blong yu i stap long samting we yu ridim?

Taem yu traehad moa blong ridim Baebol, bambae yu kasem plante moa gudfala samting from. Traem tingbaot: Sipos yu draonem lepton long hot wota blong smoltaem nomo, bambae i nogat tumas tes blong hem. Be sipos yu lego i stap longtaem moa, bambae i gat gudfala tes.

Wan kap ti we oli droem wan laen blong seraotem long tu. Long wan saed, kala blong ti i laet from we oli draonem lepton smoltaem nomo. Mo long narasaed, ti i blak gud from we lepton i stap longtaem moa.

Hemia i sem mak taem yu ridim Baebol. Bitim we yu ridim Baebol kwiktaem nomo, i gud yu tekem sam taem blong tingting long samting we yu ridim. Hemia nao samting we man ya we i raetem Sam 119 i mekem. Hem i tokbaot loa blong God se: “Mi stap tingting long hem long fuldei.”—Ol Sam 119:97.

I tru, hemia i no min se bambae yu tekem wan fuldei blong ridim mo tingting dip long samting we Baebol i talem. Poen se: Man blong raetem sam ya i tekem taem blong tingting dip long Tok blong God. Mo hemia i halpem hem blong mekem ol gudfala desisen.—Ol Sam 119:98-100.

“Mama blong mi i talem long mi se: ‘Long wan wik i gat seven dei, mo long ol taem ya, yu mekem plante samting blong yu wan. ?Yu no ting se i gud yu yusum sam long ol taem ya blong tingbaot Jehova? !I stret nomo blong mekem olsem!’”—Melanie.

Taem yu tingbaot ol stamba trutok blong Baebol, bambae yu naf blong mekem ol gudfala desisen, olsem taem yu wantem jusum ol fren, o taem wan samting i traem pulum yu blong mekem i no stret.

?Olsem wanem blong kasem gudfala samting long Baebol riding blong yu?

Mekem wan plan. Wan yangfala we nem blong Julia, i talem se: “Taem yu mekem wan program blong ridim Baebol, hemia i mekem se yu save wanem blong ridim, wetaem blong rid, mo ples we bambae yu stap long hem blong yu rid.”

Wan yangfala gel i stap raetem plan blong hem blong ridim Baebol long wan kalenda.

Faenem wan stret ples. Wan yangfala woman nem blong hem Gianna, i talem se: “I gud blong faenem wan ples we i kwaet. Mo tu, i gud yu letem famle blong yu i save program blong yu blong ridim Baebol, olsem nao bambae oli no distebem yu.”

Sipos yu stap yusum wan elektronik divaes, i gud yu ofem evri notifikesen. Maet yu save yusum Baebol long had kopi. Sam man blong mekem risej oli talem se i isi moa blong man i kasemsave samting we hem i ridim, sipos hem i ridim ol buk long had kopi. Be i had moa blong fokas taem yu rid long wan divaes.

“Mi faenem i had blong fokas taem mi rid long wan divaes. Maet mi kasem ol notifikesen, o batri i flat, o intenet i no wok gud. Be sipos mi yusum wan had kopi blong rid, bambae mi wari nomo se i gat naf laet o no.”—Elena.

Prea fastaem. Askem Jehova blong i halpem yu blong kasemsave, rimemba, mo kasem ol gudfala samting taem yu plan blong ridim Baebol.—Jemes 1:5.

Blong wok folem wanem we yu prea from, i gud yu traem faenem ol gudgudfala samting long wanem we yu ridim. ?Olsem wanem yu save mekem samting ya? Sipos yu yusum JW Library app o yu ridim Baebol long intenet, yu save klik long wan vas blong luk ol defren risej o atikol long saed blong vas ya.

Askem ol kwestin. Eksampol: ‘?Stori ya i tijim mi long wanem long saed blong Jehova? ?Hem i soemaot wan fasin blong Jehova we mi save folem?’ (Efesas 5:1) ‘?Wanem lesen we mi lanem long stori ya, we mi save folem long laef blong mi?’ (Ol Sam 119:105) ‘?Olsem wanem mi save yusum samting we mi lanem blong halpem ol narafala?’—Rom 1:11.

Yu save askem tu se: ‘?Olsem wanem samting we mi ridim i joen wetem bigfala tingting long Baebol?’ Kwestin ya i impoten tumas. ?From wanem? From we evri samting long Baebol, stat long Jenesis kasem Revelesen, oli joen wetem bigfala tingting ya blong Baebol se: Jehova bambae i yusum Kingdom blong hem blong mekem nem blong hem i tabu, mo pruvum se hem i gat raet blong rul mo se rul blong hem i beswan.

?Sam yangfala oli talem wanem?

“Sipos yu laekem histri, i gud yu stadi long ol laen we i makem ol impoten yia o akeoloji blong ol nesen we Baebol i tokbaot. Sipos yu laekem blong stadi long ol defren kaen fasin, yu save stadi long ol stori blong ol man olsem Deved. I gat plante samting we yumi wanwan i save jusum blong stadi long hem. Yu jes nid blong tingbaot se yu laekem moa blong lanem wanem.”—Judah.

“Taem mi ridim wan stori long Baebol, mi traem blong makem ol gudfala fasin mo ol nogud fasin blong ol man long stori ya, mo mi askem se: ‘?Wanem i hapen long man ya? ?Hem i gat wanem fasin mo wanem i kamaot from?’ Biaen mi askem mi wan se: ‘?Olsem wanem stori ya i save halpem mi?’”—Mackenzie.

“Mi traem blong mekem risej long stori we mi ridim long Baebol. Eksampol, ?Wetaem oli raetem stori ya? ?Hu i raetem mo wanem bigfala tingting we i stap insaed long buk ya blong Baebol? Plante long ol stori ya oli stret long taem blong yumi. Be taem mi mekem risej, hemia i halpem mi blong kasemsave moa long ol samting we oli hapen long taem ya we Baebol i tokbaot.”—Elle.

“Taem mi ridim Baebol, mi stap pijarem olsem wanem bambae mi eksplenem stori ya long narafala. ?Olsem wanem mi save halpem man ya blong i kasemsave? ?Mi save yusum wanem pija tok blong mekem poen i klia? Taem mi tingbaot ansa blong ol kwestin ya, hemia i halpem mi blong kasemsave gud samting we mi ridim. I tru nomo se beswan rod blong lanem samting, hemia blong tijim save ya long ol narafala.”—Owen.