?Olsem Wanem Blong Kontrolem Wari?
Sipos yu wari tumas, hemia i save spolem bodi mo filing blong yu. Maet i mekem wan problem i kamaot we i bigwan moa i bitim problem we yu wari long hem fastaem.
Advaes long saed blong wari
I nogud yu wajem, ridim, o lesin long tumas rabis nius. I no nid blong yu save evri samting long saed blong wan trabol. Sipos yu wajem, ridim, o lesin long tumas rabis nius, bambae yu harem se yu fraet mo i no gat hop.
Rul blong Baebol: “Tingting we i foldaon, i mekem se man i no moa gat paoa.”—Ol Proveb 17:22.
“Yumi save kam olsem we oltaem yumi wantem tumas blong save samting we i niu o i mekem yumi sek, be hemia i nogud long yumi. Mi luk se wari blong mi i godaon taem mi no moa wajem nius tumas.”—Jon.
Blong tingbaot: ?Yu ting se yu nidim blong wajem nius hamas taem evri dei?
Folem wan program. Yu traem wekap, kakae, mekem ol wok blong yu, mo go slip long semtaem evri dei. Sipos yu folem wan program, bambae yu harem se laef blong yu i nomol, nao yu no moa wari tumas.
Rul blong Baebol: “Man we i stap wok had, i sua se ol plan blong hem bambae oli go gud.”—Ol Proveb 21:5.
“Taem COVID-19 pandemik i stat, mi no moa folem wan program, mo samting ya i mekem se mi westem tumas taem blong wajem TV. Mi luk se mi mas yusum gud taem blong mi, taswe mi mekem wan program blong ol wok blong mi evri dei.—Josef.
Blong tingbaot: ?Yu yu gat wan program we yu folem, nao long en blong dei yu harem se yu mekem sam gudfala wok?
Putum tingting i stap long ol gudfala samting long laef blong yu. Sipos yu stap tingting oltaem long ol mastik we yu mekem finis o ol nogud samting we maet i hapen long fiuja, bambae yu wari tumas. I moa gud yu tingbaot tu o tri samting we yu save talem tangkiu from.
Rul blong Baebol: “Yufala i mas gat fasin ya blong talem tangkiu.”—Kolosi 3:15.
“Taem mi ridim Baebol, mi no stap fulumap tingting blong mi wetem ol rabis nius, be mi putum tingting blong mi long ol gudfala samting. !Maet hemia i saon olsem se i isi tumas, be i wok gud!”—Lisa.
Blong tingbaot: ?Yu stap tingbaot ol nogud samting we oli stap hapen long laef blong yu, mo yu fogetem ol gudfala samting?
Tingbaot ol narafala. Taem yu wari tumas, maet yu wantem stap yu wan nomo, be i moagud yu tingbaot olsem wanem yu save givhan long olgeta we oli nidim help.
Rul blong Baebol: “Yufala i no mas tingbaot yufala nomo, be yufala i mas tingbaot ol narafala man tu.”—Filipae 2:4.
“Taem mi mekem samting blong narafala, mi mi glad moa. Mi stap mekem olgeta oli harem gud, mo long semtaem, mi daonem wari blong mi. Blong talem stret, mi no moa gat taem blong wari.—Maria.
Blong tingbaot: ?Yu yu save samfala we oli nidim help? ?Yu save mekem wanem blong givhan long olgeta?
Traem stap helti. Yu mas mekem eksasaes, mo kakae ol samting we i givhan long helt blong yu. Taem yu lukaot gud long bodi, hemia i givhan long yu blong yu gat wan gudfala tingting long laef, mo yu sakemaot ol wari.
Rul blong Baebol: “Fasin ya blong eksasaes, i save givhan long man.”—1 Timoti 4:8, futnot.
“Mi mo boe blong mi, mitufala i no save goaot blong eksasaes afsaed, taswe mitufala i mekem wan program blong eksasaes long haos. Hemia i givhan long mitufala blong harem gud, mo tu, mitufala i kaen moa long mitufala.”—Katrin.
Blong tingbaot: ?Yu yu nidim blong kakae gud moa, mo eksasaes moa, blong givhan long helt blong yu?
Antap long ol advaes ya long saed blong wari, plante man oli harem gud moa taem oli lanem ol gudfala promes blong Baebol long saed blong wan gudfala fiuja. Yu luk haf ya, “?Kingdom Blong God Bambae i Mekem Wanem?”