?Amagedon Bambae i Stat Long Isrel?—?Baebol i Talem Wanem?

Baebol i tokbaot Amagedon se hem i wan faet we bambae i hapen bitwin ol gavman blong man mo God, be i no wan faet we bambae i hapen long wan smol eria long wol.

• “Trifala mesej ya, trifala i kamaot long ol dimon . . . mo oli go long evri ples long wol blong hivimap ol king, blong oli kam mekem faet long bigfala dei blong God Ya We i Gat Olgeta Paoa. Nao oli hivimap olgeta oli kam wanples long ples ya we long lanwis Hibru, oli singaot se Amagedon.”—Revelesen 16:14, 16.

Tok ya “Amagedon” i kamaot long Hibru tok ya Har Meghid·dohnʹ, we i minim “Bigfala Hil Blong Megido.” Megido i wan taon we i stap long teritori blong Isrel bifo. Hemia nao from wanem sam man oli ting se faet blong Amagedon bambae i stat long Isrel. Be i no gat wan eria long Megido o eni narafala eria long Medel Is, we “ol king” long evri ples long wol mo ol ami blong olgeta oli save kam hivap long hem.

Buk blong Revelesen oli raetem long wan fasin we oli yusum plante “saen” we oli pijarem sam samting we bambae i hapen. (Revelesen 1:1) Taswe, Amagedon i no minim wan prapa eria, be hem i minim taem ya we olgeta nesen long wol bambae oli joen wanples blong faet agensem God.—Revelesen 19:11-16, 19-21.